Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 89: Yesu NawKu Thingnu Hpe Seng Kau Ai

Maumwi 89: Yesu NawKu Thingnu Hpe Seng Kau Ai

Ndai kaw e Yesu teng teng masin pawt nga ai zawn san ai, nre a ni? Shi hpa majaw dai daram masin pawt ai lam hpe chye a ni? Yerusalem mare na Karai Kasang a nawku htingnu kaw e, nga ai masha ni grai law hpa ma ai majaw re. Karai Kasang hpe nawku na matu ndai shara de sa ai masha ni kaw na gumhpraw law law maw sha ma ai.

Yesu gaw gumhpraw mara tawn ai ku ni hpe htu kanawng kau ai

Dumsu kasha ni, sagu ni, hkru du ni hpe mu a ni? Ndai masha ni gaw nawku htingnu kata de du hkra sa nna dai dusat ni hpe sa dut ma ai. Hpa majaw sa dut ma ai lam hpe chye a ni? Israela masha ni Karai Kasang hpe shagu hkungga nawng ya na matu, dusat ni, u ni ra ai majaw re.

Israela masha langai mi mara galaw hkrup yang Karai Kasang hpe shagu hkungga nawng ya ra ai nga nna, Karai Kasang a tara nga ai. Kaga aten hta mung Israela masha ni shagu hkungga nawng ya ai mung nga ai. Raitimung Karai Kasang hpe shagu hkungga nawng ya na matu, Israela masha langai mi dusat ni, u ni, kanang na lu la na kun?

Israela masha nkau mi gaw u ni, dusat ni lu ma ai. Dai majaw dusat ni hpe ap nawng ya lu ai. Raitimung u ni, dusat ni nlu ai Israela masha law law nga ai. Bai nna nkau mi gaw Yerusalem mare hte grai tsan ai shara kaw nga ai majaw shanhte ra ai u ni, dusat ni hpe ndai shara kaw e sa mari la ma ai. Raitimung dut ya ai ni gaw masha ni hpe manu law law hpyi la ma ai. Masha ni hpe masu sha ma ai. Kaja nga yang Karai Kasang a nawku htingnu kata du hkra sa nna nmai sa dut ai.

Yesu masin pawt ai lam gaw ndai lam a majaw re. Dai majaw gumhpraw mara tawn ai ku ni hpe htu kanawng kau nna, shanhte a gumhpraw hpe agat kau ya ai. Bai nna lasik hte, dusat ni hpe nawku htingnu kata kaw na gawt shapraw kau ai. Hkru du dut ai ni hpe mung: ‘Ndai ni hpe shinggan de shapraw kau mu. Nye wa a nta hpe gumhpraw amyat sha ai shara tai hkra hkum galaw mu,’ nga nna tsun ai.

Yesu a hpang hkan ai nkau mi Yesu hte rau Yerusalem nawku htingnu kaw e, nga nga ma ai. Yesu shing rai galaw ai hpe mu jang mau ma ai. Dai hpang e Karai Kasang a kasha hte seng nna: ‘Karai Kasang a nta hpe tsaw ra ai myit gaw shi hpe wan zawn hkru ai, nga nna Chyum Laika shara mi hta ka da ai hpe myit dum ma ai.

Yesu gaw Yerusalem mare hta shalai wa ai poi de sa nna lamik kumla amyu amyu madun dan ai. Dai hpang e Yuda ginwang na pru nhtawm Galile de bai wa ai. Raitimung Samari mung hku nna ga sa wa ra ai. Dai shara kaw e, hpa byin ai hpe yu yu ga.

Yawhan 2:13-25; 4:3, 4.