Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 88: Yesu Hpe Yawhan Hka Lup Jaw Ai

Maumwi 88: Yesu Hpe Yawhan Hka Lup Jaw Ai

Ndai masha wa a baw ntsa e, hkru du langai mi yu hkrat wa nga ai hpe yu yu mu. Dai masha wa gaw Yesu rai nga ai. Ya shi a asak 30 ning rai sai. Shi a makau na masha wa gaw Yawhan rai nga ai. Shi a lam nkau mi hpe nanhte chye saga ai. Mari shi a amyu Elisabat kaw sa hkawm ai shaloi, Elisabat a hkritung na ma gaw kabu gumlawt ai hpe naw myit dum a ni? Dai hkritung na ma gaw Yawhan rai nga ai. Raitimung ya Yawhan hte Yesu gaw hpa galaw nga ma ni?

Yesu hka lup hkam ai

Yawhan gaw Yesu hpe ya sha Yawdan hka hta dip lup dat ai. Hka lup hkam ai ngu ai gaw dai hte maren sha re. Shawng nnan e, hka kata de dip lup ra ai. Dai hpang hka kata na bai sharawt la ra ai. Yawhan gaw masha ni hpe dai zawn galaw ya ai majaw shi hpe hka lup sara Yawhan nga ma ai. Raitimung Yawhan gaw Yesu hpe hpa majaw hka lup jaw a ni?

Yesu gaw Yawhan hpang de sa wa nna ngai hpe hka lup jaw rit, nga nna sa hpyi ai majaw, hka lup jaw ai re. Nshawp ai amu hpe galaw kau ai majaw yawn ai lam madun ai masha ni hpe Yawhan gaw hka lup hkam ya ai. Raitimung Yesu gaw nkaja ai amu hpe galaw ai majaw yawn na shara nga a ni? N nga ai. Yesu gaw galoi mung nkaja ai amu hpe n-galaw ai . Hpa majaw nga yang shi gaw sumsing lamu na yu hkrat wa ai Karai Kasang a kasha majing re. Dai rai nna kaga lam a majaw shi hpe hka lup jaw na matu, Yawhan kaw hka lup hpyi ai. Hpa lam a majaw hpyi ai hpe chye a ni? yu yu ga.

Yawhan hpang de garai n sa wa yang Yesu gaw lak sama amu galaw ai masha langai mi re. Lak sama ngu ai gaw, hpunpyen hte shaku ni, lahkum ni, lahkum galu ni galaw ai wa hpe ngu ai. Mari a madu wa Yosep gaw lak sama galaw ai masha rai nna, Yesu hpe mung lak sama hpaji sharin ya ai. Raitimung Yehowa gaw shi a kasha hpe lak sama galaw na matu, shangun dat ai n rai. Grai ahkyak ai amu hpe galaw ra ai. Dai amu galaw na aten mu du sai. Dai majaw shi a kawa ra sharawng ai amu hpe gun hpai na matu du sa ai lam re ai hpe madun ai hku nna shi hpe hka lup jaw na matu, Yesu gaw Yawhan kaw hpyi ai. Dai hpe Karai Kasang ra sharawng a ni?

Ra sharawng ai. Hpa majaw nga yang Yesu gaw hka kaw na pru wa ai hte, sumsing lamu na nsen gaw: ‘Ndai wa gaw ngai sharawng awng ai; ngai tsaw ra ai; nye a kasha rai nga ai,’ nga nna tsun ai. Bai sumsing lamu hpaw wa ai zawn san nna, hkru du langai mi Yesu a ntsa e yu hkrat wa ai. Hkru du majing gaw nre. Hkru du zawn san ai. Dai gaw teng teng Karai Kasang a chyoi pra ai wenyi re.

Ya Yesu myit yu na lam law law nga sai. Dai majaw simsa ai shara langai mi de, shi hkrai sha nhtoi 40 ya sa nga ai. Dai shara hta Satan shi hpang de sa wa ai. Karai Kasang a tara hpe tawt lai ai amu hpe galaw na matu Satan Yesu hpe masum lang shakut ai. Raitimung Yesu gaw n-galaw ai.

Dai hpang Yesu bai nhtang wa ai. Masha nkau mi hte hkrum ai. Dai ni gaw Yesu a shawng ningnan na hpang hkan ai ni, shing nrai sape ni rai ma ai. Shanhte a amying ni gaw, Andri, Petru (Simun mung nga ai), Hpilip hte Nahtnela ( Barhtolume mung nga ai) ni rai ma ai. Yesu hte shi a sape nnan ni, Galile ginwang de pru sa ma ai. Galile ginwang de du jang Nahtanela a mare Hkanan kahtawng hta hkring ma ai. Dai kaw e hkungran poi kaba langai mi hta Yesu sa lawm ai. Dai kaw e Yesu a shawng ningnan na lamik kumla hpe madun dan ai. Hpa lamik kumla re ai hpe chye a ni? Ntsin hpe tsabyi jahku byin hkra galaw dat ai.

Mahte 3:13-17; 4:1-11; 13:55; Marku 6:3; Yawhan 1:29-51; 2:1-12.