Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 85: Yesu Dumsu Ulawng Hta Shangai Wa Ai

Maumwi 85: Yesu Dumsu Ulawng Hta Shangai Wa Ai

Ndai ma changai gaw kadai re ai hpe chye ma ni? Teng ai Yesu rai nga ai. Ya sha dumsu ulawng hta shangai wa ai. Dumsu ulawng ngu ai gaw dusat ni hpe rawng da ai shara re. Mari gaw Yesu hpe ushat wakang hta galeng tawn ai. Ushat wakang ngu ai gaw, gumra ni; kaga dusat ni ushat sha ai wakang hpe ngu ai. Yosep hte mari gaw hpa rai dusat ni a lapran e, du nga ma ai kun? Ndai shara hta ma shangai na shara re a ni?

Rai gaw nre. Raitimung shan ndai shara hta du ai lam ning rai nga ai: ‘Roma hkawhkam Kehta Agustu gaw masha shagu tinang a dai daw buga de nhtang wa nna yuptung jahpang wa bang ra ai, nga nna tara shapraw da ai. Yosep a dai daw shara gaw Betlehem mare kaw re. Raitimung Yosep hte Mari ndai mare de du wa ma ai shaloi, shan manam na shara nnga sai. Dai majaw dusat ni a lapran e, du nga ma ai. Dai shani e nan Mari gaw Yesu hpe shangai ai. Ndai sumla kaw e, mu ai hte maren Yesu gaw hkam kaja nga ai.

Yosep, Mari, hte ma chyangai Yesu

Sagu rem ai masha ni Yesu hpe sa yu nga ma ai hpe mu a ni? Pa layang kaw shana e, shanhte sagu ni hpe sin nga ma ai, Shaloi shanhte a grup yin e htoi kabrim wa ai. Lamu kasa langai mi du sa wa ai majaw re. Sagu rem ai ni grai hkrit kajawng ma ai. Raitimung lamu kasa gaw: ‘Hkum hkrit mu, nanhte a matu kabu gara shi ga gun sa wa nngai; dai ni Betlehem mare kaw e, madu hkristu shangai wa sai; shi gaw masha ni hpe hkye la na ra ai; nbat hte kayawp nna ushat wakang hta galeng taw nga ai hpe nanhte mu lu na ma ai,’ nga nna tsun ai. Akajawng sha lamu kasa law law du sa nna Karai Kasang hpe shakawn kungdawn ma ai. Shing rai sagu rem ai ni mung alawansha sa nna Yesu hpe sa tam ma ai. Yu mu, shanhte Yesu hpe mu masai.

Yesu gaw hpa majaw dai daram lak san ahkyak kaba ai hpe chye ma ni? Shi gaw teng teng kadai wa re ai hpe chye ma ni? Matsing a ni? Ndai laika buk a shawng nnan na maumwi kaw e, Karai Kasang a kasha alat a lam hpe hti lai wa saga ai. Sumsing lamu hte ginding aga hta nga ai arai guji guyang hpe galaw yang ndai kasha gaw Yehowa hte rau amu galaw ai. Teng ai, Yesu gaw dai wa nan rai sai.

Teng ai, Yehowa gaw shi a kasha a asak hpe sumsing lamu kaw na la nna, Mari kan kata hta bang dat ya ai. Alawansha Mari a kan kaw ma chyangai langai mi tai wa nna kaba wa ai. Kaga ma chyangai ni shanhte a kanu a kan kaw e, kaba wa ai hte maren sha re. Raitimung ndai ma gaw Karai Kasang a kasha re. Hpang jahtum e, Yesu gaw Betlehem mare na dumsu ulawng kaw ya na zawn shangai wa ai. Masha ni hpe Yesu shangai wa sai ngu ai shi ga tsun dan lu ai majaw lamu kasa ni hpa rai nna dai daram kabu ma ai lam hpe chye na sai kun?

Luka 1:2-20.