Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 67: Yehosahpat Yehowa Hpe Kam Hpa Ai

Maumwi 67: Yehosahpat Yehowa Hpe Kam Hpa Ai

Ndai masha ni gaw kadai ni rai nga ma ni? Hpa galaw nga ma ai hpe chye ma ni? Majan gasat na matu rawt sa wa nga ma ai. Shawng na masha ni gaw mahkawn hkawn nga ma ai. Mahkawn hkawn ai ni gaw: ‘hpa rai nna hpyen gasat na matu nri, nhtu ni nlang ma ni?’ nga nna nanhte san na ma ai.

Majan gasat na matu rawt sa wa nga ai Israela masha ni

Yehosahpat gaw Israela amyu lakung lahkawng mungdan a hkawhkam re. Ding dung amyu lakung 10 mungdan a hkawhkam Ahab yan Yezebela hte rau aten e asak hkrung ai. Raitimung Yehosahpat gaw kaja ai hkawhkam langai mi re. Shi a kawa Asa mung kaja ai hkawhkam re. Dai majaw dingda lakung lahkawng mungdan na masha ni gaw, shaning tsawm ra na hkra ngwi pyaw ai hte nga lu ma ai.

Raitimung masha ni hkrit kajawng na lam byin pru wa ai. Shi ga htawn ai ni Yehosahpat hpe: ‘Moba, Ammon, Siera bum mungdan ni gaw hpyen wunawng kaba hte madu hpe gasat na matu sa wa nga ma ai,’ nga nna shi ga jaw ma ai. Israela masha ni law law Yerusalem mare kaw hpawng de nna Yehowa kaw karum hpyi ma ai. Shanhte nawku htingnu de sa nna Yehosahpat mung dai shara kaw na; ‘O anhte a Karai Kasang Yehowa e, anhte kaning di na n chye saga ai. Ndai hpyen hpung kaba hpe anhte nlu gasat ga ai. Madu hpe anhte kamhpa ga ai,’ nga nna hpyi ai.

Yehowa mung madat ya ai. Shi a mayam langai mi hpe shangun dat nna, masha ni hpe ning ngu tsun shangun ai: ‘Majan gaw nanhte a matu nrai; Karai Kasang a matu re; nanhte n gasat ra ai; mada yu nna sha nga mu; Yehowa nanhte hpe kaning di hkye la ai hpe yu yu mu,’ nga ai.

Dai majaw hpang jahpawt e, Yehosahpat gaw masha ni hpe tsun ai: ‘Yehowa hpe kamhpa mu,’ nga ai. Dai hpang shi a hpyen la ni a shawng e, mahkawn hkawn ai ni hpe tawn da ai. Shanhte majan rawt sa wa yang, Yehowa hpe shakawn ai mahkawn hkawn nna, sa wa ai. Hpyen majan ginra de du na ni jang hpa byin mat ai hpe chye a ni? Yehowa gaw hpyen ni shada da sat hkat na matu, galaw dat ai. Israela masha ni du sa wa ma yang hpyen ni langai mi mung n-ngam hkra si taw nga ma ai.

Yehosahpat Yehowa hpe kamhpa ai gaw, hpaji rawng ai lam nrai a ni? Anhte mung Yehowa hpe kamhpa yang hpaji rawng ai lam rai na re.

1 Hkawhkam 22:41-53; 2 Hkawhkam labau 20:1-30.