Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 65: Mungdan Garan Mat Ai

Maumwi 65: Mungdan Garan Mat Ai

Ndai masha wa hpa majaw shi a palawng hpe adaw achyen di nna je nga ai lam chye nga ni? Yehowa shi hpe ndai zawn galaw shangun ai. Shi gaw Karai Kasang a myihtoi Ahiya re. Myihtoi wa ngu ai hpe chye a ni? Htawm hpang e kaning re byin wa na lam hpe jau jau kaw nna Karai Kasang e chye shangun ai masha hpe ngu ai.

Ahiya hte Yeroboam

Ndai sumla hta e Ahiya gaw Yeroboam hte shaga nga ai. Yeroboam ngu ai wa gaw dum nta shachyaw yang amu madu hku nna Shawlumon san tawn da ai wa re. Ahiya gaw lam ntsa e Yeroboam hte hkrum ai shaloi, lak lai ai hku galaw dan ai. Shi hpun da ai palawng nnan hpe raw nna daw 12 gang je kau ai. Bai nna Yeroboam hpe ‘daw 10 la u,’ nga ai. Ahiya gaw hpa majaw Yeroboam hpe daw 10 jaw a ni?

Yehowa gaw mungdan hpe, Shawlumon a lata na dawm la kau sana re, nga nna Ahiya gaw shaleng dan ai. Yeroboam hpe amyu lakung 10 jaw na nga ai. Shawlumon a kasha Rehoboam uphkang na matu, lakung lahkawng sha ngam sai.

Yeroboam hpe Ahiya gaw ning nga nna tsun dan ai lam hpe Shawlumon na jang grai masin pawt bu ai. Yeroboam hpe sat kau na matu shakut ai. Raitimung Yeroboam gaw Egutu mung de rawt hprawng mat ai. Kade nna yang Shawlumon si mat wa ai. Shawlumon hkawhkam galaw ai shaning 40 ning na ai. Raitimung ya shi a kasha Rehoboam hkawhkam tai wa sai. Shawlumon si mat sai shi ga hpe Egutu mung kaw na Yeroboam na jang Israela mungdan de bai nhtang wa ai.

Rehoboam gaw myit su ai hkawhkam langai mi nre. Shawlumon hta grau nna masha ni hpe zing ri ai. Yeroboam hte kaga ahkyak ai masha kaba ni Rehoboam kaw sa du nna mung masha ni a ntsa e matsan dum ai lam sa tsun ma ai. Raitimung Rehoboam gaw n madat ai. Shawng na hta grau nna nshawp nkap rai wa ai. Dai majaw masha ni gaw Yeroboam hpe amyu lakung 10 a hkawhkam shatai ma ai. Ben-yamin hte Yuda ngu ai lakung lahkawng mungdan yan gaw Rehoboam hpe hkawhkam hku nna tawn ma ai.

Yeroboam gaw shi a masha ni Yerusalem mare de sa nna Yehowa a nawku htingnu hta nawku ma ai hpe nra ai. Dai majaw aja dumsu sumla lahkawng galaw nna amyu lakung 10 ni hpe nawku shangun ai. Kade nna yang mungdan gaw tara nlang ai hte masha sat ai amu ni hte hpring wa sai.

Lakung lahkawng a mungdan hta mung ruyak jam jau hkrum ma ai. Rehoboam hkawhkam galaw ai manga ning pyi rai ndu yang Egutu hkawhkam sa wa nna Yerusalem mare hpe sa gasat sai. Yehowa a nawku htingnu na sutgan law law la mat wa ai. Dai majaw nawku htingnu gaw nnan galaw yang na zawn hkik hkam ai hte na na n-grin nga lu ai.

1 Hkawhkam 11:26-43; 12:1-33; 14:21-31.