Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 62: Dawi A Dinghku Yak Hkak Hkrum Ai

Maumwi 62: Dawi A Dinghku Yak Hkak Hkrum Ai

Yerusalem mare e dawi up hkang ai hpang hpyen ni law law a ntsa e majan awng dang na matu, Yehowa galaw ya ai. Israela masha ni hpe Hkanan mung hpe jaw na nga nna, Yehowa ga sadi jaw tawn ai. Ya gaw Yehowa a karum ya ai hte, Israela masha ni hpe ga sadi jaw tawn ai, mungdan hpe madu la lu sai.

Dawi gaw kaja ai hkawhkam langai mi re. Yehowa hpe shi tsaw ra ai. Dai majaw Yerusalem hpe gasat la nna shawng nnan e Yehowa a gashaga sumpu hpe, Yerusalem mare de la sa wa ai. Bai nna gashaga sumpu tawn na matu nawku htingnu hpe mung gaw gap mayu ai.

Dawi asak kaba wa ai shaloi nshawp nkap ai mara langai mi galaw ai. Masha ni hte seng ai arai hpe la yang shut ai nga nna Dawi chye ai. Raitimung lana de mi hta, shi a hkaw numgaw ntsa e nga nga ai shaloi, lawu de mada yu dat yang grai tsawm la ai num langai mi hpe mu ai. Dai anum a mying gaw Bat-sheba re da. Shi a madu wa gaw Dawi a hpyen la langai mi rai nna Uria ngu ai wa re.

Dawi gaw Bat-sheba hpe grai yu tsaw ra nna, shi hpe hkawhkam htingnu du hkra shaga sa wa shangun ai. Shi a madu wa gaw majan pa de du nga ai. Dawi gaw Bat-sheba hte yup kau ai. Hpang e Bat-sheba gaw na-um na-sin byin wa ai. Shing rai wa jang Dawi myit tsang wa ai majaw Uria hpe majan pa de sa shangun nna majan hta hkrat sum mat na matu, shi a hpyen du Yoab hpe shangun ai. Uria si mat ai shaloi, Dawi gaw Bat-sheba hpe shi a madu jan shatai la ai.

Yehowa gaw Dawi hpe grai masin pawt ai. Dai majaw shi a mayam Nahtan hpe shangun dat nna, Dawi a mara hpe madun shangun ai. Nahtan gaw Dawi hpe sharin shaga nga ai lam ndai sumla hta mu lu ai. Dawi gaw shi galaw shut ai mara a majaw, grai myit yawn nga ai. Dai majaw Yehowa gaw shi hpe nsat kau ai. Raitimung Yehowa gaw Dawi hpe ning nga ai: ‘Nang ndai nshawp ai amu galaw ai majaw, na a dinghku hta yak hkak lam amyu myu byin pru wa na ra ai,’ nga ai. Tsun ai hte maren Dawi gaw jam jau hkrum sai.

Nahtan gaw dawi hpe sharin shaga nga ai

Shawng nnan e, Bat-sheba a kasha si mat ai. Bai nna Dawi a kasha alat Amnon gaw kajan Tama hpe langai hkrai shaga la nna, aroi arip di kau ai. Dawi a kasha Absalom gaw dai hpe grai masin pawt nna, Amnon hpe sat kau ai. Dai hpang e, Absalom hpe masha ni shagrau wa nna shi a hkum hpe shi nan hkawhkam dang la ai. Dai hpang e Absalom hpe Dawi majan gasat dang kau ai. Absalon mung si mat ai. Dawi gaw kaja wa jam jau law law hkrum sai.

Ndai lam ni byin nga ai laman e, Bat-sheba gaw Shawlumon ngu ai shadang sha langai mi shangai wa ai. Dawi gaw asak kaba wa nna, machyi makaw hkrum nga ai shaloi, Dawi a kasha Adoniya gaw shi hkum shi nan hkawhkam dang la ai. Dai shaloi e Dawi gaw Shawlumon a baw hta asau jaw bun na matu, hkinjawng agyi Zaduk hpe shangun dat ai. Kade nna yang Dawi gaw asak 70 ning hta si mat wa sai. Shaning 40 ning up hkang ai. Ya Shawlumon gaw Israela mashani a hkawhkam tai wa sai.

2 Samuela 11:1-27; 12:1-18; 1 Hkawhkam 1:1-48.