Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 61: Dawi Hpe Hkawhkam Aya Dang Ai

Maumwi 61: Dawi Hpe Hkawhkam Aya Dang Ai

Shawlu gaw Dawi hpe rim la na matu bai shakut nga ai. Reng grau htum ai shi a hpyen ma 3,000 hpe shaga nna Dawi hpe hkan tam ma ai. Shing re ai lam hpe Dawi chye ai majaw shana e Shawlu hte shi a masha ni gara shara hta dap jung nga ma ai lam chye lu na matu, kin yu dat ai. Dawi gaw shi a masha lahkawng hpe san ai: Nan kaw na kadai mahtang ngai hte rau Shawlu dap jung ai shara de hkan nang na ma ni? nga ai.

Dawi gaw hkawhkawm Shawlu hpe jahtau nga ai

Abishai gaw, ‘ngai hkan nang na nngai,’ nga nna tsun ai. Abishai gaw Dawi a kana Zeruia a shadang sha re. Shawlu hte shi a masha ni yup pyaw nga ma yang, Dawi hte Abishai gaw dap kata de, lagyim shang sa wa ma ai. Shawlu a baw n hpang na nri hte ntsin tau hpe sa la wa ma ai. Shanhte yawng yup pyaw nga ma ai majaw kadai mung nna nmu dat ma ai.

Dawi hte Abishai hpe yu dat mu. Shan pru mat wa masai. Bum pungding de angwi apyaw sha du wa masai. Dawi gaw Israela hpyen du kaba hpe jahtau tsun ai: ‘Abana e, na madu hkawhkam a asak hpe hpa majaw n makawp n maga a ni? Yu u hkawhkam wa a nri hte ntsin tau kanang du nga sata?’ nga ai.

Shawlu yup hprang wa ai. Dawi a nsen re ai hpe shi matsing ai: ‘Nang Dawi rai nga a ni?’ nga nna bai san ai. Lawu e Shawlu hte Abana hpe mu a ni?

‘Re ai law, nye a madu hkawhkam wa e,’ nga nna Dawi gaw Shawlu hpe bai htan ai. Bai nna Dawi gaw: ‘Ngai hpe rim la na matu hpa rai shakut nga a ni? ngai nkaja ai lam hpa galaw a ni? Hkawhkam wa a nri nang e rai nga ai. Na a shangun ma langai mi hpe sa la shangun u,’ nga nna bai tsun ai.

Hkawhkam Shawlu hte Abana

Shawlu gaw, ‘ ngai shut ni ai,’ nga nna yin la ai. ‘Ngai gaw angawk angak re ai amu hpe galaw kau ni ai,’ nga ai. Dawi gaw shi a lam de shi bai hkawm mat wa ai. Shawlu mung hkawhkam htingnu de bai nhtang wa ai. Raitimung Dawi myit la ai gaw: ‘Shawlu lani mi na nhtoi e ngai hpe sat nan sat kau na re. Hpilisti mung de hprawng sa wa yang she mai na re,’ nga ai. Dai hpang e Hpilisti mung de hprawng sa wa ai. Dai mung hta du jang Hpilisti masha ni gaw, shi hpe shanhte a masha rai sam ai, nga nna myit la hkra Dawi gaw shanhte hpe mana galaw dat ai.

Dai hpang lani mi hta e, Hpilisti masha ni gaw Israela masha ni hpe gasat na matu sa wa nga ma ai. Majan pa hta Shawlu hte Yonahtan sat kau hkrum ma ai. Dai lam a majaw Dawi grai yawn kau ai. Dai majaw Dawi gaw sharung sharawt ai hte seng nna mahkawn langai mi mahkawn ai. Shi a mahkawn mangwi hta e: ‘Ngai hpu Yonahtan e, na a majaw ngai yawn dik nngai law. Hpu hpe tsaw ra ai myit ngai kaw kade daram kaba nga ai law,’ nga nna mahkawn ai.

Dai hpang e Dawi gaw Israela masha ni nga ai, Hebron mare de bai nhtang wa ai. Dai kaw e Shawlu a shadang sha Ish-boshet hpe hkawhkam shatai mayu ai masha ni hte, Dawi hpe hkawhkam shatai mayu ai masha ni nga nna masha hpung lahkawng majan gasat nga ma ai. Hpang jahtum e Dawi a masha ni dang ma ai. Dawi hkawhkam aya dang ai aten hta asak 30 ning rai sai. Hebron mare hta shi gaw sanit ning chyen up hkang ai. Hebron mare hta shaprat ai Dawi a shadang sha nkau mi a amying ni gaw, Amnon, Absalon, Adoniya ni rai ma ai.

Tsawm la ai Yerusalem mare hpe Dawi hte shi a masha ni gasat la na aten du sai. Dawi a kana Zeruia a shadang Yoab gaw woi awn nna majan gasat ai. Dai rai nna Dawi gaw Yoab hpe hpyen du kaba aya dang dat ai. Ya Dawi Yerusalem mare hpe up hkang hpang sai.

1 Samuela 26:1-25; 27:1-7; 31:1-6; 2 Samuela 1:26; 3:1-21; 5:1-10; 1 Hkawhkam labau 11:1-9.