Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 60: Abigela Hte Dawi

Maumwi 60: Abigela Hte Dawi

Dawi hpe hkrum na matu sa wa ai tsawm la ai num sha hpe chye a ni? Shi a amying Abigela re. Shi gaw myit sam nna, nhkru nkaja ai hpe n-galaw hkrup na matu, Dawi hpe hkum shingdang ai. Raitimung ndai lam ni rai ntsun yang Dawi gaw kaning re byin ai hpe shawng yu yu ga.

Dawi gaw Shawlu kaw na hprawng pru nna, lungpu hku langai mi kaw e, makoi rawng nga ai. Shi a kahpu ni hte ngam nga ai kun dinghku masha ni gaw, shi hte rau sa nga nga ma ai. Shi kaw hkan nang ai masha 400 daram rai ma ai. Dawi mung dai masha ni a ningbaw tai wa ai. Dai hpang e Dawi gaw Moba hkawhkam kaw sa nna: ‘Ngai kaw gara hku byin wa na lam hpe garai nchye lu ai laman e, nye a kanu yan kawa hpe nang kaw shingbyi nga na ahkang jaw rit,’ nga nna tsun ai. Dai hpang e Dawi hte shi a masha ni gaw bum ga e makoi nga ma ai.

Dai lam ni byin ngut ai hpang e, dawi gaw Abigela hte hkrum ai. Abigela a madu wa Nabala gaw lu su ai yi sun hkauna madu re. Shi kaw sagu 3,000 hte bainam 1,000 lu ai. Nabala gaw myit nshawp ai masha langai mi re. Raitimung shi a madu jan gaw grai tsawm ai. Teng man ai amu hpe kaning rai galaw na lam mung chye ai. Kalang mi hta shi a dum nta masha ni a asak hpye pyi hkye la lu ai. Kaning rai nna hkye la ai lam hpe yu yu ga.

Dawi hte shi a masha ni gaw Nabala a ntsa hta myit kaja tawn ma ai. Shi a sagu ni hpe makawp maga ya ma ai. Lani mi hta e Dawi gaw shi a masha ni hpe shangun dat nna Nabala kaw karum shingtau hpyi shangun dat ai Nabala hte shi a shangun ma ni sagu mun rep nga ma ai aten hta Dawi a ali ama ni du sa wa ma ai. Poi shani re ai majaw Nabala kaw lusha law law nga ai. Dai majaw Dawi a ali ama ni gaw: ‘Madu hpe anhte akyu galaw saga ai. Madu a sagu langai mi hpe mung n lagu la ga ai; Sagu ni hpe mung rem ya ga ai; Dai majaw anhte hpe lusha nkau mi jaw dat rit,’ nga nna hpyi ma ai.

Nabala gaw, ‘nanhte zawn san ai masha ni hpe nye a lusha hpa njaw lu ai,’ nga nna nshawp akap ai hku tsun dat ai. Dawi nkaja ai lam hpe mung tsun ai. Dawi a masha ni gaw bai nhtang wa nna Dawi hpe byin ai lam wa tsun dan ma ai. Dawi grai masin pawt ai. ‘Nhtu hpe shaw hpye mu!’ nga nna shi a ali ama ni hpe tsun ai. Shing rai Nabala hte shi a masha ni hpe sat kau na matu rawt sa wa ma ai.

Nabala a nshawp nkap ai ga hpe na la dat ai Nabala a mayam wa gaw byin ai lam hpe Abigela hpe wa tsun dan ai hte Abigela gaw alawan sha lusha jahting nna lawze hta htaw sa wa ai. Dawi hpe hkrum jang lawze kaw na yu nna dingnyawm nna Dawi hpe tsun ai: ‘Madu e nye a madu wa Nabala a ga hpe hkum madat ya et, shi gaw angawk ai wa re, angawk angak re ai amu hpe mung galaw chye ai. Nang e ngai madu a matu kumhpa ni mung lawm sa wa nngai, chyeju hte hkap la ya rit, byin lai mat wa sai lam ni a matu anhte hpe mara raw ya rit,’ nga nna tsun ai.

Abigela gaw lusha jarik hpe Dawi hpang de htaw sa wa ai

Dawi gaw, ‘nang hpaji rawng ai num rai nga ndai,’ Nabala a nshawp ai myit hpe matai dawp na matu, shi a asak hpe nsat hkra ngai hpe hkum shingdang nit dai, nta de angwi apyaw sha bai nhtang wa nu,’ nga nna tsun ai. Nabala si mat ai hpang, Abigela gaw Dawi a madu jan tai wa ai.

1 Samuela 22:1-4; 25:1-43.