Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 58: Dawi Hte Goliat

Maumwi 58: Dawi Hte Goliat

Hpilisti masha ni Israela masha ni hpe bai sa gasat ma ai. Dawi a kahpu masum gaw Shawlu a hpyen dap kaw amu gun nga ma ai. Dai rai nna lani mi hta e Yese gaw Dawi hpe shaga la nna: ‘Mam nhpaw nkau mi hte muk tawng nkau mi hpe la nna, na a kahpu ni hpang de sa wa u; shanhte kaning re nga ma ai kun sa yu su,’ nga nna shangun dat ai.

Dawi nlung langai kabai nga ai

Hpyen dap kaw Dawi du sa wa ai shaloi, majan pa de kagat sa nna shi a kahpu ni hpe hkan tam ai. Hpilisti masha shalawa Goliat gaw Israela masha ni hpe jahpoi asawng na matu, pru sa wa ai hte sa katut ai. Ndai zawn jahpawt shagu shana de shagu jahpoi asawng ai, nhtoi 40 ya rai sai . ‘Nanhte kaw na marai langai mi lata nna ngai hte sat hkat shangun mi; shi dang nna ngai hpe sat kau lu yang gaw, anhte nanhte a mayam tai na ga ai; Raitimung ngai mahtang shi hpe dang kau nna sat kau lu yang gaw, nanhte anhte a mayam tai mu; Gwi yang nanhte kaw na marai langai pru sa wa nna langai hkrai, ngai hte chyaw rai gasat ga le,’ nga nna grang dakat bu nga ai.

‘Ndai Hpilisti masha wa hpe sat kau nna, Israela amyu ni hkrum ai, ndai kaya shara hpe yeng kau lu yang hpa lu la na da aw?’ nga nna hpyen la nkau mi hpe Dawi san ai.

‘Dai wa hpe Shawlu gaw sut gan law law jaw na da. Bai nna shi a shayi sha hpe mung ya sha na re da,’ nga nna hpyen la ni ga mahtai jaw ma ai.

Raitimung Israela masha ni yawng Goliat hpe hkrit ma ai. Shi a hkum hkrang mung galu kaba nga ai. Goliat gaw, pe 9 (3 meter) jan tsaw ai. Bai nna hpyen la langai mi gaw shi a n-gang hpe hpai ya ra ai.

Dawi gaw Goliat hpe gasat mayu ai lam, hpyen la nkau mi gaw Shawlu hpe tsun dan ma ai. Raitimung Shawlu gaw: ‘Hpilisti masha wa hpe nang dang na nrai. Nang gaw naw kaji ai. Shi gaw hpyen la galaw ai prat ting rai sai,’ nga nna Dawi hpe tsun ai. Dawi bai tsun ai gaw: ‘Nye wa a sagu kasha hpe dun sha mat wa ai, atsap langai mi hte, hkanghkyi langai mi hpe sat kau lu ai. Ndai Hpilisti masha wa hpe mung dai dusat hpe zawn sat kau lu na re. Yehowa ngai hpe karum na ra ai,’ nga nna tsun ai. Dai rai nna Shawlu mung: ‘Dai rai jang gaw sa wa u. Yehowa gaw nang hte rau rai u ga,’ nga nna tsun dat ai.

Dawi gaw hka de sa nna manen tsawm ai lungdin manga hta la nna tingsan hta bang gun ai. Bai nna shi a lakli hpe lang nna masha shalawa hte hkrum na matu sa wa sai. Goliat gaw Dawi hpe mu jang n-yu krem dum ai. Dawi hpe aloi sha sat kau lu na re, nga nna myit la ai.

‘Ngai kaw sa wa rit, na a shan hpe u ni, dusat ni hpe jaw sha kau de ga,’ nga nna Goliat tsun dat ai. Raitimung Dawi tsun ai gaw: ‘Nang gaw ngai hpang de nri, nhtu ni hte rai nna sa wa ndai. Ngai gaw nang kaw Yehowa a mying hte sa wa ai. Dai ni nang hpe Yehowa gaw nye a lata hta ap ya na ra ai. Nang hpe sat kau de ga,’ nga nna tsun ai.

Ndai zawn tsun ngut ai hte Goliat hpang de Dawi kagat sa wa ai. Shi a tingsan kaw na lungdin langai mi shaw la nna, shi a lakli hta bang nna aja awa ningwat kabai dat ai. Lungdin gaw Goliat a baw ang ang hta hpawk wa hkra jang Goliat kadawng si mat ai. Hpilisti masha ni mung shanhte a hpyen bu share wa si mat ai hpe mu jang, nhtang nna hprawng mat ma ai. Israela masha ni mung shanhte hpang de hkan shachyut gasat nna majan awng dang ma ai.

1 Samuela 17:1-54.