Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 52: Gidon Hte Shi A Masha 300

Maumwi 52: Gidon Hte Shi A Masha 300

Ndai sumla hta e hpa byin nga ai hpe chye a ni? Ndai ni gaw Israela hpyen la ni rai nga ma ai. Gum dagup nga ai masha ni gaw ntsin lu nga ma ai. Tara agyi Gidon gaw shanhte a makau e tsap nga ai wa re. Shanhte gara hku nna, ntsin lu nga ma ai kun nga nna, shi sin yu taw nga ai.

Masha ni lak lai nna ntsin lu nga ai hpe atswm sha mada yu u. Nkau mi gaw myi man hka hte kahtep hkra di nna ntsin lu nga ma ai. Raitimung langai mi gaw lata laku hte ntsin hpe shagawt la nna lu nga ai. Shing rai yang shi a makau grup yin hta hpa byin nga ai hpe mu lu na re. Ndai gaw ahkyak ai. Ntsin lu ai shaloi makau grup yin de mada yu nna ntsin lu ai masha ni hpe san da u, nga nna Gidon hpe Yehowa htet da ai. Kaga ni hpe nta de wa shangun kau u, nga ai. Hpa majaw re ai kun? Anhte yu yu ga.

Israela masha ni jam jau law law bai hkrum ma ai. Yehowa a aga hpe n madat ma ai majaw re. Midian masha ni shanhte hpe dang la nna, zing ri ma ai.Dai majaw Israela masha ni gaw Yehowa hpe karum na matu hpyi ma ai. Shanhte jahtau hpyi ai hpe Yehowa madat ya ai.

Yehowa gaw Gidon hpe hpyen lahkawn u nga ai hte, Gidon gaw hpyen la 32,000 hpe lahkawn dat ai. Raitimung Israela masha ni hpe gasat na hpyen ni gaw 135,000 rai ma ai. Shing rai yang pyi Yehowa gaw ‘nang kaw masha grai naw law ai,’ nga nna Gidon hpe tsun ai. Yehowa gaw ndai zawn hpa rai tsun ai kun?

Israela masha ni shanhte gasat nna majan awng dang ga ai, nga nna myit la na ma ai majaw re. Majan awng dang na matu Yehowa a karum ai n ra ai nga nna, myit la na ma ai. Dai majaw Gidon hpe Yehowa gaw: ‘Hkrit ai masha ni hpe nta de nhtang wa kau shangun u, ‘ nga nna tsun ai. Gidon gaw nta de nhtang wa shangun yang hpyen la 22,000 nhtang wa mat ma ai. Shi hte hpyen la 10,000 sha hti ngam nga sai. Shanhte sa gasat na hpyen ni gaw 135,000 rai ma ai.

Gidon shi a masha ni hpe dinglik yu ai

Raitimung madat la u!: ‘Nang hta masha naw law ai’ nga nnaYehowa tsun ai. Dai majaw masha ni hpe hka da nam de woi sa nna hka hta myi man kahtep dagup nna, lu ai masha ni hpe nta de wa shangun u, ‘ nga nna Gidon hpe tsun ai. ‘ Makau grup yin de maja nna ntsin lu ai masha 300 hte majan awng dang hkra, ngai galaw na,’ nga nna Yehowa ga sadi jaw dat ai.

Majan gasat na aten du wa sai. Gidon gaw masha 300 hpe hpung masum di nna karan dat ai. Masha hkum shagu hpe pahtau langai hpra, wan shanan lawm ai di bu langai hpra, lang shangun ai. Yup tung daram hta hpyen dap hpe wang shing grup dat ma ai. Bai nna aten langai hta pahtau dum ai hte, di bu kayet ga nna: ‘Yehowa hte Gidon a nhtu law’ nga nna marawn dat ma ai. Hpyen ni yup hprang wa ma ai shaloi, shanut mat nna hkrit kajawng ma ai. Shanhte yawng hprawng htaw mat nna, Israela masha ni majan awng dang la lu ma ai.

Tara agyi daw kaba 6 kaw na 8.