Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 45: Yawdan Hka Rap Sa Ai

Maumwi 45: Yawdan Hka Rap Sa Ai

Mada yu mu. Israela masha ni Yawdan hka hpe rap nga ma ai. Ahka ni gaw gara kaw rai ta? Dai aten e marang kaba htu nna lai wa sai manit lapran e sha hka tung nga ai. Raitimung ya gaw hka yawm mat sai. Israela masha ni nawng hkyeng hka rap sa wa ai shaloi na hte maren sha hkun hkraw ai ga ntsa hku nna, hkawm lai wa ma ai. Hka ni gara de rai mat ma ai kun? Yu yu ga.

Israela masha ni Yawdan hka hpe rap nga ma ai

Israela masha ni Yawdan hka hpe rap na aten ni wa ai shaloi, Yehowa gaw masha ni hpe ning ngu nna, Yawshu hpe tsun shangun ai: ‘Hkinjawng ni gashaka sumpu hpai nna, anhte a shawng e sa wa na re. Shanhte a lagaw Yawdan hka hta kabye dat ai hte, hka ni lwi nga ai kaw na hkring mat na re’ nga ai.

Dai majaw hkinjawng ni gaw gashaka sumpu hpai nna masha ni a shawng e hkawm sa wa ma ai. Yawdan hka kaw du jang hka hta kabye dat ma ai. Hka hpung la mung ja dik ai hte grai mung sung nga ai. Raitimung shanhte a lagaw hka hta hkra ai hte, lwi nga ai hka gaw hkring mat ai. Ndai gaw mauhpa lam kumla re. Hka hku de na ahka hpe Yehowa madim dim shatang dat ai. Kade nna yang hka hkyet mat ai.

Gashaka sumpu hpai ai hkinjawng ni hkun hkraw ai hka kaang hku nna hkawm sa wa ma ai. Ndai sumla hta shanhte hpe mu a ni? Shanhte dai shara hta tsap nga ma ai shaloi, Israela masha ni yawng Yawdan hka hkun hkraw ai ga hku nna rap sa wa ma ai.

Langai mi mung nngam lai mat wa ai hpang n-gun ja ai la 12 hpe ning ngu nna tsun na matu Yehowa gaw Yawshu hpe htet dat ai: ‘Ga shaka sumpu hpai ai hkinjawng ni tsap nga ai hka kaw sa mu. Nlung tawng 12 hpe sa hpai wa mu. Dai na nanhte wa hpawng de na shara hta sumpum tawn da mu. Htawm hpang e nanhte a kashu kasha ni ndai nlung tawng a lachyum gaw hpa rai ta? nga nna san ma yang Yehowa a ga shaka sumpu Yawdan hka rap sa ai shaloi, lwi nga ai ahka gaw hkring mat ai ngu nna bai tsun dan mu. Nlung ni gaw ndai mauhpa lam byin ai hpe, myit dum shangun ai.’ Yawshu gaw hkinjawng ni tsap nga ai hka kaang e mung nlung tawng 12 hpe jung tawn ai.

Yawshu

Hpang jahtum e Yawshu gaw gashaka sumpu hpai ai hkinjawng ni hpe tsun ai. ‘Yawdan hka kaw na pru wa mu,’ nga ai. Shanhte pru wa ai hte hka gaw shawng na zawn bai lwi mat wa ai.

Yawshu 3:1-17; 4:1-18.