Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 41: Magri Lapu Sumla

Maumwi 41: Magri Lapu Sumla
Mawshe hte magri lapu sumla

Shadaw hta e dum bat lawai da ai lapu gaw, lapu majing hte nbung a ni? Lapu majing gaw n re ai. Magri hte galaw tawn ai lapu re. Yehowa gaw Mawshe hpe tsun ai; dai lapu hpe shadaw hta sharawt da u; masha ni gaw dai hpe yu nna, asak lawt na re, nga ai. Aga e nga ai kaga lapu ni gaw, lapu majing re ai. Masha ni hpe lapu achye nna, shanhte machyi nga ma ai. Hpa majaw re ai hpe chye ani?

Israela masha ni gaw Karai Kasang hte Mawshe hpe nhtan shai ai ga tsun ma ai majaw re. shanhte gaw: ‘Anhte hpe ndai nam mali e si na matu, Egutu mung kaw na hpa rai woi wa myit ta?; ndai yang e, ntsin mung nnga ai; lu sha mung nnga ai; ndai manna muk hpe anhte sha jin saga ai,’ nga nna aput angun ma ai.

Manna muk gaw grai kaja ai lu sha re. Yehowa gaw mauhpa lam hku nna shanhte hpe jaw ya ai. Mauhpa lam hku nna, shanhte hpe ntsin mung jaw ya ai. Raitimung Karai Kasang dai zawn jaw lu jaw sha bau sin makawp maga wa ai hpe shanhte chyeju ndum ma ai. Dai majaw agung rawng ai lapu ni hpe, Yehowa shangun dat nna, Israela masha ni hpe ari jaw ai. Lapu achye nna shanhte law law si ma ai.

Israela masha ni hpe lapu ni kawa ai

Hpang jahtum e, masha ni gaw Mawshe hpang de sa wa nna: anhte gaw Yehowa hte nang hpe nhtan shai ai ga tsun kau ai majaw, anhte hta mara lu ga ai. Ndai lapu ni hpe yeng kau na matu, Yehowa kaw akyu phyi ya mi,’ nga nna sa tawng ban ma ai.

Shing rai Mawshe gaw masha ni a matu akyu hpyi ya ai. Yehowa mung magri sumla galaw na matu Mawshe hpe tsun ai. Dai hpe shadaw hta e sharawt da u, nga ai da. Lapu achye hkrum ai masha shagu dai hpe yu ra ai da. Karai Kasang htet dat ai hte maren Mawshe galaw ai. Lapu achye hkrum ai masha ni mung magri lapu sumla hpe yu jang bai mai mat ma ai.

Ndai lam hta na kasi yu la na lam langai mi nga ai. Anhte yawng mung lapu achye hkrum ai Israela masha ni hte maga mi hku nna wa bung nga ga ai. Anhte yawng si lam hta nga nga ga ai. Anhte a makau grup yin hta e yu dat u; masha ni gaw gumgai ding la ai, machyi ai, si ai hkrum nga ma ai hpe mu lu ai. Hpa majaw nga yang shawng nnan lasha hte numsha Adam hte Ewa gaw Yehowa a lam hta na kayin mat ma ai majaw re. Anhte yawng mung shan kaw na yu hkrat wa ai kashu kasha ni rai nga ga ai. Raitimung anhte ni htani htana asak hkrung nga lu hkra, Yehowa gaw lam langai mi lajang ya ai.

Yehowa gaw shi kasha Yesu Hkristu hpe mungkan ga de shangun dat ya ai. Yesu mung hpun shadaw hta e, jen da hkrum ai. Shi hpe nhkru ai masha wa nga nna masha law law myit la ma ai majaw re. Raitimung Yehowa gaw anhte hpe hkye la na matu, Yesu hpe jaw kau ai. Yesu hpe anhte yu nna shi a hpang hkan ga yang gaw, anhte htani htana asak lu la na re. Hpang e ndai lam hpe matut nna chye na lu na re.

Bu hkawm laika 21:4-9; Yawhan laika 3:14, 15.