Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 37: NawKu Sum

Maumwi 37: NawKu Sum

Ndai ginsum gaw hpa re ai hpe chye a ni? Yehowa hpe nawku na matu, lak san gap da ai ginsum re. Nawku sum mung nga ma ai. Egutu mung kaw na pru wa ai hpang laning mi na jang dai hpe ngut hkra shachyaw ma ai. Kadai wa galaw shangun ai hpe chye ma ni?

Ginsum

Yehowa galaw shangun ai. Mawshe gaw Sina bum kaw e nga nga yang gara hku shachyaw na matu, Yehowa shi hpe tsun dan ai. Daw chyen run la loi hkra galaw shangun ai. Shing rai galaw yang she adaw achyen rai nna kaga shara de hpai htawt yang loi na re. Ra wa ai aten hta aloi sha bai shachyaw la lu ai. Dai majaw Israela masha ni nam mali e, shara mi kaw na shara mi de sa wa ai shaloi, ginsum hpe hpai hkawm ma ai.

Ginsum a jahtum maga na gawk kaji hpe yu dat mu. Sumpu shing nrai, sutdek, langai mi hpe mu lu ai. Dai hpe ga shaka sumpu nga nna shamying ai. Sumpu a lahkawng maga matu hta lamu kasa shing nrai Hkerubim lahkawng nga ai. Shawng nnan na lungpa hpe Mawshe kabai agrawp kau ai majaw, Karai Kasang gaw tara kanu shi lungpa lahkawng hpe bai ka ai. Dai lungpa lahkawng hpe gashaka sumpu hta bang tawn ai. Bai nna, Manna muk rawng ai ja di bu hpe mung bang tawn ai. Manna muk gaw kaning re ai kun? Naw matsing ma ni?

Mawshe a kahpu Arun hpe Yehowa lata la nna hkinjawng agyi galaw shangun ai. Arun gaw Yehowa hpe nawku ai lam hta masha ni hpe woi awn ai. Shi a kasha ni mung hkinjawng galaw ma ai.

Nawku sum kaw na gawk kaba hpe yu dat mu. Gawk kaji hta htam lahkawng grau nna kaba ai. Wan hkrut pru nga ai sumpu shing nrai sutdek kaji mu a ni? Ndai gaw tawn hkungri re. Ndai shara hta hkinjawng ni gaw, manam pyaw ai law ban hte wan nat ma ai. Bai nna wan pu sanit kap ai pyen din mung nga ai. Dai kaw nga ai masum ngu na arai gaw sha ku re. dai kaw e muk tawng 12 mara tawn ai.

Nawku sum nga ai wang kata hta e, hka ja jahpring tawn ai jarung shing nrai, ang dung langai mi nga ai. Hkinjawng ni hka shin yang lang na matu re. Tawn hkungri kaba langai mi mung nga ai. Dai ntsa e sat da ai dusat ni hpe Yehowa a matu nawng ya ma ai. Nawku sum hpe shawa dap kaang e gap da ma ai. Israela masha ni mung nawku sum hpe shinggrup tawn nna nga nga ma ai.

Pru mat wa ai laika 25:8-40; 26:1-37; 27:1-8; 28:1; 30:1-10, 17-21; 34:1, 2; Hebre 9:1-5.