Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 34: Lusha Ningnan Amyu Mi

Maumwi 34: Lusha Ningnan Amyu Mi

Masha ni gaw aga kaw na hpa hpe hta la nga ma ai hpe chye a ni? Hkyen zawn san ai. Hpraw ai, asep alap rai nna, hpraw ai. Raitimung hkyen nre;Lusha amyu mi rai nga ai.

Manna muk lahkawn la nga ai Israela masha ni

Israela masha ni Egutu mung kaw na pru wa ai shata mi daram sha naw re ai. Shanhte gaw nam mali kaw e du nga ma ai. Dai shara hta e, lusha nnga ai. Dai majaw masha ni gaw: ‘Yehowa anhte hpe Egutu mung hta e sat kau yang pyi kaja sai. Egutu mung hta gaw anhte ra ai lusha naw nga ai,’ nga nna aput angun ma ai.

Dai majaw Yehowa gaw: ‘ Ngai lamu de na lusha htu jahkrat jaw na nngai,’ nga nna tsun ai. Tsun ai hte maren Yehowa galaw ai. Hpang jahpawt aga kaw e, ahpraw san ai arai taw nga ai hpe Israela masha ni mu ma yang, ndai gaw hpa re a ni? nga nna langai hte langai san hkat ma ai.

Mawshe tsun ai: ‘ndai gaw nanhte a matu Yehowa jaw ya ai, lusha re’ nga nna htan ai. Masha ni gaw ndai hpe, MANNA MUK nga nna shamying ma ai. De a namta gaw lagat jahku hte galaw ai muk hkyep hte bung ai.

‘Masha langai hte langai sha law ai daram magawn la mu,’ nga nna Mawshe gaw masha ni hpe htet da ai. Dai rai nna jahpawt shagu magawn la ma ai. Jan ja wa ai hte manna muk gaw byawng mat ai.

Mawshe bai kahtap nna tsun ai gaw: ‘Kadai raitimung manna muk hpe hpang shani du hkra, hkum ngam da mu,’ nga ai. Raitimung masha nkau mi aga n madat ma ai. Hpa byin mat ai hpe chye a ni? Shanhte ngam da ai manna muk ni gaw, hpang jahpawt e byet shang nna, manam mat ai.

Raitimung bat mi hta nhtoi lani mi nga ai. Dai shani e manna muk htam lahkawng magawn la na matu, Yehowa gaw masha ni hpe htet da ai. Dai shani gaw kru ya shani re. Yehowa gaw hpang shani du hkra nkau mi hpe ngam da shangun ai. Hpa majaw nga yang sanit ya shani e, manna muk hpe n jahkrat jaw ra ai. Masha ni mung manna muk hpe, sanit ya ngu na shani du hkra tawn da ma ai raitimung byet nshang ai, n manam mat ai. Ndai mung mauhpa lam rai nga ai.

Israela masha ni nam mali e nga ai shaning mahkra hta Yehowa gaw shanhte hpe manna muk hte jaw sha wa ai.

Pru mat wa ai laika 16:1-36; Bu hkawm laika 11:7-9; Yawshu 5:10-12.