Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi17: Myit Jasat Nbung Ai Ma Marun Yan

Maumwi17: Myit Jasat Nbung Ai Ma Marun Yan
Esaw

Ndai sumla na la sha lahkawng gaw, myit jasat grai shai ma ai, nrai ni? Shan nau a amying hpe chye ma ai kun? Jau gawng wa gaw Esaw rai nna, sagu rem nga ai lasha wa gaw, Yaku re.

Esaw hte Yaku gaw, Isak hte Rebeka a ma marun la sha yan rai ma ai. Kawa Isak gaw Esaw hpe, grai tsaw ra ai. Esaw gaw jau gawng wa rai nna, nta kaw sha na matu, ashan la wa ai majaw re. Rebeka gaw, Yaku hpe grau tsaw ra ai. Yaku gaw azim sha sim sa nna, nga ai la sha re ai majaw re.

Kaji dwi Abraham mung, asak naw hkrung nga ai majaw, Yehowa a lam tsun dan ai hpe, Yaku gaw kade daram sharawng nna, madat na hpe, anhte myit sawn la lu ai. Ma marun yan asak 15 ning du ai shaloi; Abraham gaw hpang jahtum e,asak 175 ning hta, si mat wa ai.

Esaw asak 40 ning du ai shaloi, Hkanan mung na num lahkawng hpe, hkungran la ai. Ndai lam a majaw, Isak hte Rebeka gaw, myit grai npyaw kau ma ai. Dai num yan gaw, Yehowa hpe, n naw ku ma ai, majaw re.

Lani mi hta e, Esaw gaw, shi a kanau Yaku hpe, grai masin pawt na lam byin wa ai. Isak gaw shi shadang sha kaba ai wa hpe, shaman chyeju jaw na aten du wa ai. Esaw gaw Yaku hta grau kaba ai majaw, dai shaman chyeju hpe, shi lu la na re, nga nna, myit mada ai. Raitimung Esaw gaw, shaman chyeju lam hpe, shawng shawng kaw nna, yaku hpe dut ya kau ngut sai. Bai nna ndai shadang sha lahkawng hpe shangai wa ai aten hta mung, shaman chyeju gaw, Yaku lu la na re nga nna, Karai Kasang tsun da ngut sai. Tsun da ai hte maren byin tai wa ai. Isak gaw, kasha Yaku hpe, shaman chyeju jaw ai.

Yaku

Hpang e, Esaw ndai lam chye wa ai shaloi, Yaku hpe masin pawt ai. Yaku hpe sat kau na nga tsun ai du hkra, grai pawt ai. Ndai lam hpe, Rebeka na ai shaloi, grai myit ru myit tsang nu ai. Dai majaw shi a madu wa Isak hpe tsun ai: ‘Yaku mung Hkanan mung kaw na anum la jang, grai yak na re,’ nga ai.

Dai rai nna, Isak gaw shi a shadang sha Yaku hpe shaga la na nna, tsun ai: ‘Hkanan mung na shayi sha hpe hkum la u; Haran mare kaw na na a kaji dwi Behtuela nta kaw sa nna, shi a shadang sha Laban a shayi sha langai ngai hpe, la u’ nga nna tsun ai.

Yaku mung shi a kawa na ga madat nna, shi a amyu ni nga ai, Haran mare de sa wa sai.

Ningpawt Ninghpang 25:5-11, 20-34; 26:34, 35; 27:1-46; 28:1-5; Hebre 12:16, 17.