Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 22: Yosep Htawng Hkrat Ai

Maumwi 22: Yosep Htawng Hkrat Ai

Yosep gaw Egutu mung de du ai shaloi, asak 17 ning sha naw re ai. Egutu mung hta, Hputihpa ngu ai wa hpe dut ya ma ai. Hputihpa gaw, hpara-u ngu mying ai, Egutu hkawhkam a matu amu galaw ya ai.

Yosep htawng rawng nga ai

Yosep gaw shi a madu Hputihpa a matu, amu shakut galaw ya ai. Dai rai nna, Yosep asak kaba wa ai shaloi Hputihpa gaw shi a nta ting hpe, up hkang shangun ai. Dai rai yang Yosep hpa majaw htawng hkrat ai kun? Hputihpa a madu jan a majaw re ai da.

Yosep kaba wa ai shaloi grai tsawm ai rai nna, Hputihpa a madu jan gaw shi hte yup shangun mayu ai. Raitimung ndai hku galaw yang, shut ai lam re ai hpe, Yosep chye ai majaw shi hte n yup ai. Hputihpa a madu jan grai pawt ai. Dai majaw shi a madu wa nta kaw du wa ai shaloi: ‘Ndai nhkru ai Yosep ngai hte rau yup na matu, shakut ai,’ nga nna, masu dan ai. Hputihpa mung shi a madu jan tsun ai ga hpe kam nna, Yosep hpe grai pawt ai. Dai majaw Yosep hpe htawng jahkrak dat ai.

Yosep gaw myit su ai masha langai mi re ai lam hpe, htawng ningbaw wa kade nna yang chye kau ai. Dai majaw kaga htawng masha ni hpe up hkang na matu, Yosep hpe hkang da ai. Hpang e Hpara-u gaw shi a tsabyi jaw ai wa hte, muk kabaw ai yan hpe masin pawt nna, htawng jahkrat kau ai. Lana mi na hta e shan lahkawng yup mang langai hpra mu ma ai. Raitimung shan lahkawng a yup mang a lachyum hpe, nchye ma ai. Hpang shani e Yosep gaw: ‘Nan a yup mang ngai hpe hkai dan mi’ nga nna, tsun ai. Dai shaloi Karai Kasang a karum ra ai hte, Yosep gaw shan a yup mang a lachyum hpe, tsun shaleng dan ai.

Tsabyi jau ai wa hpe Yosep gaw ning nga nna, tsun ai: ‘Masum ya du jang nang hpe, htawng na shapraw nna, Hpara-u a tsabyi jau ai wa bai wa galaw lu na re; Nang htawng shingan de du jang, Hpara-u hpe nye a lam wa tsun dan u; ngai hpe mung htawng kaw na pru lu hkra karum ya rit,’ nga nna, htet dat ai. Raitimung muk kabaw ai wa hpe Yosep gaw ning nga ai: ‘Masum ya rai jang Hpara-u gaw na a baw hpe daw la na re ai da.’

Masum ya du jang Yosep tsun ai hte maren byin wa ma ai. Hpara-u gaw muk gabaw ai wa a baw hpe daw kau ai. Tsabyi jau ai wa hpe chyawm gaw htawng kaw na pru lu nhtawm, shawng na hte maren, hkawhkam wa hpe bai wa daw jau ai. Raitimung tsabyi jau ai wa gaw, Yosep hpe malap kau sai. Shi a lam hpara-u hpe n wa tsun dan ai. Yosep gaw htawng kata kaw naw rawng nga ai.

Ningpawt Ninghpang 39:1-23; 40:1-23.