Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 6: Myit Su Ai Ma Hte Nhkru Ai Ma

Maumwi 6: Myit Su Ai Ma Hte Nhkru Ai Ma

Ka-in hte Abela hpe yu yu mu. Shan nau kaba wa masai. Ka-in gaw yi sun hkauna galaw sha ai wa tai wa ai. Shi gaw nsi naisi, namsi, namsaw, namlap namlaw, ni hpe hkai shatut ai.

Ka-in hte Abela Karai Kasang hpe wan nat hkungga nawng jaw ai

Abela gaw, sagu rem ai wa tai wa ai. Sagu kasha ni hpe rem na matu ra sharawng ai. Sagu kasha ni kaba wa nna, kade nna yang Abela gaw, sagu hpung kaba lu nna, sagu hpung ni hpe rem nna nga ai.

Lani mi na hta Ka-in hte Abela Karai Kasang hpang de kumhpa la sa ma ai. Ka-in gaw shi hkai nna lu ai, nsi naisi nkau mi la sa wa ai. Abela gaw shi lu ai hta na, kaja htum ai sagu hpe la sa wa ai. Yehowa gaw Abela hte Abela jaw ai kumhpa hpe ra sharawng ai. Ka-in hte shi a kumhpa hpe nra sharawng ai. Hpa majaw re ai hpe chye a ni?

Abela jaw ai kumhpa gaw, Ka-in jaw ai kumhpa hta grau kaja ai sha mung nrai. Abela gaw kaja ai masha langai mi nan rai nga ai majaw re. Abela gaw Yehowa hte shi a kahpu hpe tsaw ra ai. Ka-in gaw nhkru n kaja ai masha wa re. Shi a kanau hpe n tsaw ra ai.

Dai majaw Karai Kasang gaw Ka-in hpe shi a lai masa galai kau na matu tsun ai. Raitimung Ka-in gaw n madat ai. Karai Kasang Abela hpe shi hta grau nna tsaw ra ai majaw masin grai pawt bu ai. Dai rai nna Ka-in gaw Abela hpe tsun ai; ‘Hkauna pa de sa ga’ nga ai. Hkauna pa de du ai hte shan nau hkrai sha rai jang, Ka-in gaw shi a kanau Abela hpe si hkra a dup ai. Ndai zawn Ka-in galaw ai gaw hkrit hpa nre ani?

Ka-in gaw Abela hpe sat kau ai hpang hprawng mat ai

Abela si mat timung Karai Kasang shi hpe naw myit dum ai. Abela gaw myit kaja ai rai nna, ndai zawn myit su ai masha hpe Yehowa galoi mung n malap kau ai. Dai majaw lani mi hta Abela asak hkrung wa hkra Yehowa Karai Kasang galaw ya na re ai. Dai aten hta Abela galoi mung bai n si sai. Ndai ginding aga ntsa e, shi htani htana asak hkrung nga lu sai. Abela zawn re ai ni hte, hku hkau lu yang nmai ani?

Ka-in hte bung ai masha ni hpe Karai Kasang nra ai. Dai majaw Ka-in gaw shi a kanau hpe sat kau ai hpang, Karai Kasang gaw shi hpe ari jaw ai hku nna, shi a nta masha ni hte grai tsan ai shara de, shangun kau ai. Ka-in gaw ginding aga kaga daw shara mi de sa wa ai shaloi, shi a kajan langai mi hpe woi sa ai. Dai hpe shi a madu jan shatai la kau ai.

Dai hpang e, Ka-in hte shi a madu jan hta kashu kasha shaprat ma ai. Adam yan Ewa a kaga shayi shadang sha ni mung dinghku de nna, kashu kasha shaprat ma ai. Kade nna yang ginding aga ntsa e, shinggyim masha ni law htam wa ai. Shanhte kaw na masha n kau mi a lam hpe hti yu ga.

Ningpawt Ninghpang 4:2-26; 1 Yawhan 3:11,12; Yawhan 11:25.