Content de lai

Malawm Ni Hpe Lai U

Yehowa Hpe Shagrau Sha-a Lu Ai “Nhtoi Hpe Htoi Tu Shangun Da Mu”

Yehowa Hpe Shagrau Sha-a Lu Ai “Nhtoi Hpe Htoi Tu Shangun Da Mu”

“Kawa hpe shagrau sha-a lu mu ga, shanhte a man e nanhte a nhtoi hpe htoi tu shangun da mu.”​—⁠MAHTE 5:16.

Mahkawn: 77, 59

1. Hpa lam a majaw anhte kabu gara lu ai kun?

KARAI a mayam ni nhtoi htoi tu nga ai hpe na lu ai majaw, anhte grai kabu nga ga ai. Lai wa sai shaning hta, Yehowa a amyu masha ni gaw Chyum ga sharin ai lam, wan 10 jan galaw wa ai. Wan hku law ai myit lawm ai ni mung, Myit Dum Poi de sa du shang lawm nna, Yehowa a tsawra myit hte lajang ya ai gawng malai jahpu a lam hpe hkaja wa ai.​—⁠1 Yawhan 4:9.

2, 3. (a) “Nhtoi zawn” htoi tu ai lam hta, anhte hpe hpa gaw n hkum pat lu ai kun? (b) Ndai sumhpa hta hpa lam hkaja na kun?

2 Mungkan ting na Yehowa Sakse ni gaw, amyu ga amyu myu hpe shaga ai. Dai zawn amyu ga ni n bung tim, Yehowa hpe kahkyin gumdin let shakawn shagrau lu ai. (Shingran 7:9) Gara amyu ga hpe shaga ai raitim, gara shara hta nga ai raitim, anhte yawng gaw, “mungkan ga a nhtoi zawn” htoi tu nga ai.​—⁠Hpilipi 2:16.

3 Hkaw tsun bungli, Hkristan kahkyin gumdin lam hte hkyak hkyak galaw ra na hpe ginhka chye ai myit ni gaw, Yehowa hpe  shakawn shagrau nga ai. Ndai masa lam masum hta anhte a nhtoi hpe gara hku htoi tu lu na lam hpe hkaja mat ga.​—⁠Mahte 5:14-16 hpe hti u.

Yehowa Hpe Nawku Wa Hkra Kaga Ni Hpe Karum Ya U

4, 5. (a) Hkaw tsun magam sha n-ga, gara lam hku nna mung nhtoi htoi lu ai kun? (b) Tsawra matsan dum ai myit a majaw, gara akyu ni lu la ai kun? (Sumhpa shawng na sumla hpe yu u.)

4 Hkaw tsun ai hte sape shatai ai magam gaw, anhte a nhtoi hpe htoi tu lu ai ahkyak ai lam re. (Mahte 28:19, 20) 1925 kaw shapraw ai “Nsin Mungkan Na Nhtoi” ngu ai sumhpa hta, ndai hpang jahtum na nhtoi ni hta “nhtoi htoi tu na ahkaw ahkang” hpe n la ai nga yang, kadai mung Madu hpe matut nna sadi dung lu na n re ngu tsun da ai. “Masha ni hpe kabu gara shiga hkaw tsun ai hku nna, nhtoi htoi tu ra na” ngu nna matut tsun da ai. (Sin Langchyi, June 1, 1925) Anhte a hkaw tsun magam sha n-ga, anhte a galaw hkawm sa ai lam hku nna mung, Karai Kasang a hpung shingkang danhkung lu ai. Anhte hkaw tsun ai shaloi, masha law law sadi hkrup ai. Shanhte hpe mani sumsai hte shakram ai shaloi, anhte hte anhte nawku ai Karai Kasang a lam chye shangun ai.

Hkaw tsun magam hte galaw hkawm sa ai lam hku nna, Karai Kasang a hpung shingkang danhkung lu

5 Yesu gaw sape ni hpe, “nta hta shang myit yang gaw, dai ni hpe shachyen ya mu” ngu tsun ai. (Mahte 10:12) Yesu aten hta, tsasam masha ni hpe nta de saw shaga ai htung nga ai. Dai ni na aten hta gaw, shara law law hta dai zawn htung n nga sai. Tsasam masha ni hpe tinang a nta chyinghka hta mu ai nga yang, myit tsang chye ai. Raitim, anhte gaw hku hkau chye nna tsawra myit nga ai rai yang, nta madu ni myit tsang lam yawm na re. Shawa hpawng man sakse hkam ai aten hta, mani sumsai hte hku hkau ai lam madun ai shaloi, shanhte ni anhte hpang sit sa wa nna laika ni sa la mayu wa na re. Anhte hte pyi ga shaga mayu wa na re.

6. Asak kaba sai yan la langai gaw hkaw tsun bungli hta matut nna gara hku shang lawm ai kun?

6 Inglan mung kaw nna asak kaba sai yan la gaw, hkam n kaja ai majaw, nta langai hpang langai hkaw tsun sa na matu yak nga ai. Dai majaw, nta shawng kaw sha, saboi langai tawn nna laili laika ni hpe mara da ai. Nta makau kaw, jawng nga ai majaw, jawng ma ni hpe sa tau ai kanu kawa ni myit lawm na laika ni hpe madun da ai. Kanu kawa nkau gaw, Ramma Ni A Ga San​—⁠Mahtai Ga ngu ai laika buk hte hpawn, laili laika ni sa la ai. Ningshawng nauna langai gaw shan yan hpe sa karum ya ai. Kanu kawa ni gaw, hku hkau chye ai nauna hte asak kaba sai yan la a shakut shaja ai lam hpe sadi hkrup ai. La langai hte pyi, Chyum Laika sharin hpang nga sai.

7. Na a buga hta sa shingbyi ai ni hpe nang gara hku karum ya mai na kun?

7 Ndai laman hta, tinang a dum nta hpe kau da nna, kaga mungdan ni de sa shingbyi ra ai ni grai law ai. Na a buga ginra hta hprawng shingbyi nga ai ni hpe nang gara  hku karum ya mai na kun? Shawng nnan, shanhte a amyu ga hte shachyen shaga ai hpe sharin la ra ai. Shanhte hte ga shaga lu na ga yan ni hpe JW Language app kaw nna sharin la mai ai. jw.org hta na, shanhte amyu ga hte lu mai na laili laika ni hte video ni hpe madun ya mai ai.​—⁠Tara Jahprang 10:19.

8, 9. (a) Bat lapran na zuphpawng gaw, anhte hpe gara hku karum ya lu ai kun? (b) Zuphpawng hta ma ni mahtai atsawm jaw lu hkra, kanu kawa ni gara hku karum ya mai ai kun?

8 Hkaw tsun bungli hta akyu law law lu na matu, anhte ra nga ai lam ni hpe Yehowa lajang da ya ai. Ga shadawn, Hkristan Prat Hte Magam Zuphpawng gaw, bai kawan ai lam hte Chyum ga sharin ni galaw lu hkra, anhte hpe karum ya nga ai.

9 Nawku zuphpawng hta ma ni mahtai jaw ai hpe, manam ni mu ai shaloi mau ma ai. Tinang a ma ni hpe, mahtai atsawm jaw chye hkra, kanu kawa ni sharin ya ra ai. Tinang a makam masham hte seng nna ma ni mahtai jaw ai hpe, manam ni na ai shaloi, teng man ai lam hpe hkaja mayu wa na re.​—⁠1 Korinhtu 14:25.

Kahkyin Gumdin Ai Lam Rawt Jat Shangun U

10. Dinghku grau nna zinlum wa hkra, dinghku nawku gaw gara hku karum ya lu ai kun?

10 Anhte a kun dinghku gaw zinlum nna simsa ai rai yang, Yehowa hpe shagrau lu na re. Ga shadawn, nang gaw kanu kawa rai yang, bat shagu Dinghku Nawku galaw lu hkra lajang da u. Dinghku nkau mi gaw, JW TV lamang hpe arau yu nna, bawngban ai.  Raitim, ma ni hte ramma ni hpe jaw ra ai lam matsun gaw n bung ai hpe dum ra ai. Dinghku nawku kaw nna, nta masha yawng akyu lu la hkra, nang dang lu ai daram shakut u.​—⁠Shakawn 148:11-13.

Asak kaba ai ni hte hku hkau ai gaw kaja (Laika pang 11 hpe yu u)

11-13. Nawku hpung grau nna kahkyin gumdin hkra nang hpa galaw mai ai kun?

11 Nang asak naw kaji tim pyi, nawku hpung kaw nga ai ni yawng gaw, nawku hpung a matu manu dan ai ni re ai ngu hkamsha hkra, nang karum ya lu ai. Lam langai gaw, asak kaba ai hpunau nauna ni hte manang galaw ai hku nna re. Yehowa a magam hpe gun hpai lu hkra, hpa gaw karum ya wa ai lam shanhte hpe san mai ai. Grai manu dan ai hpaji jaw ga ni hpe nang lu la na re. Dai lam gaw, lahkawng maga n-gun lu shangun ai. Asak kaji kaba, anhte yawng gaw, Nawku Htingnu de sa chyai ai manam yawng hpe, hkap tau la mai ai. Shanhte hpe mani dan nna shachyen shaga mai ai. Dung na shara madun ya mai ai. Kaga ni hte shachyen ya mai ai. Tinang a nta ngu hkamsha hkra karum ya mai ai.

12 Magam hkrum zup hpawng hpe woi awn na matu lit lu yang, asak kaba ai ni mung matut nna nhtoi htoi lu hkra karum ya mai ai. Asak kaba ai ni a matu, htap htuk ai magam lawk lajang ya mai ai. Shanhte hte arau magam gun na matu, ramma ni hpe karum hpyi mai ai. Asak kaba nna, hkam n kaja ai hpunau nauna ni gaw, dang lu ai daram sha shang lawm lu sai hpe chye na ya ra ai. Shanhte hpe nang chye na ya nna lanu lahku yang, shanhte myit pyaw na re. Nang madun ai tsawra matsan dum myit gaw, asak kaba ai ni (sh) teng man lam hta shaning law law na sai ni hpe, shakut shaja let matut nna hkaw tsun lu hkra karum ya lu ai.​—⁠Jaw Jau 19:32.

Nawku hpung hta nga ai hpunau nauna ni hte grau nna hku hkau hkra nang galaw mai na kun?

13 Yehowa hpe arau nawku lu ai majaw, Israela ni grai kabu ai. Shakawn Kungdawn sara ndai hku tsun ai: “Hpu nau ni myit hkrum nga nna, Rau hpawng nga lu ai gaw, Gade ngwi pyaw nga a hka!” (Shakawn 133:1-3 hpe hti u.) Kahkyin gumdin ai lam hpe, manam pyaw nna shalan ya lu ai namman hte shingdaw da ai. Dai hte maren, anhte mung tsawra matsan dum myit hte hpunau nauna ni hpe shalan shabran ya mai ai. Dai zawn galaw ai gaw, nawku hpung hpe grau nna kahkyin gumdin shangun na re. Nawku hpung hta nga ai hpunau nauna ni hte grau nna hku hkau hkra nang galaw mai na kun?​—⁠2 Korinhtu 6:11-13.

14. Nang gara kaw mi nga ai raitim, gara hku nhtoi htoi lu na kun?

14 Nang gara kaw mi nga ai raitim, nang nga ai shara hta nhtoi htoi tu lu ai. Nang madun ai tsawra myit gaw, htingbu ni hpe Yehowa a lam chye mayu wa hkra shadut ya lu ai. Tinang hkum tinang ndai hku san yu u: ‘Htingbu ni gaw ngai hpe gara hku mu mada ai kun? Nye a nta hte wang gaw san seng ai kun? Htingbu ni hpe ngai karum ya ai kun?’ Jinghku ni, htingbu ni, bungli manang ni hte jawng manang ni hpe, tsawra matsan dum myit madun ai majaw, gara hku akyu lu  wa ai lam hpunau nauna ni hpe san yu u.​—⁠Ehpesu 5:10.

Matut Nna Maja Nga U

15. Hpa majaw matut nna maja nga ra ai kun?

15 Matut nna nhtoi htoi tu mayu ai nga yang, anhte asak hkrung nga ai ya aten hta maja nga ra ai. Sape ni hpe Yesu chyahkring hkring ndai hku tsun wa ai: “A maja nga mu.” (Mahte 24:42; 25:13; 26:41) Lama na, “ru tsang kaba” gaw grai naw tsan ai ngu myit la na nga yang, Yehowa a lam kaga ni chye wa hkra karum ya ai hta myit maju jung lu sana n re. (Mahte 24:21) Nhtoi htoi tu na malai, nhtoi n htoi mat ai sha, nhtoi pyi mat mat chye ai.

16, 17. Matut nna maja nga lu hkra hpa galaw mai ai kun?

16 Ya aten hta anhte ni grau maja ra ai. Mungkan a masa lam ni gaw grau nna sawng wa nga ai. Yehowa masat da ai aten hta jahtum du wa na hpe anhte chye ai. (Mahte 24:42-44) Ndai laman hta gaw, matut myit galu ra nna, htawm hpang a matu myit maju jung ra na re. Dai majaw, Chyum Laika hpe shani shagu hti nna, Yehowa kaw ayan akyu hpyi u. (1 Petru 4:7) Shaning law law Yehowa  hpe nawku wa ai hpunau nauna ni a kasi kaw nna sharin la u. Ga shadawn, 2012, April 15 Sin Langchyi, laika man 18-21 hta lawm ai “Yuda Masha Langai A Hpun Palawng Hpe Shaning 70 Jum Wa” ngu ai prat labau ni hpe hti mai ai.

17 Yehowa a magam hta matut nna bungli law nga u. Kaga masha ni a matu sak jaw ai lam ni galaw u. Hpunau nauna ni hte kanawn mazum u. Rai yang, nang grau pyaw wa nna, aten htum lawan ai ngu hkamsha na re. (Ehpesu 5:16) Lai wa sai shaning latsa laman, Yehowa a mayam ni ngut kre awng dang wa ai bungli ni grai law ai. Dai ni na aten hta nga yang, moi na hta grau nna bungli law nga ai. Anhte kalang pyi n myit ga ai hku, Yehowa a magam bungli gaw rawt jat nga ai. Nhtoi grau nna htoi tu nga sai.

Sagu kawan ai lamang kaw nna, Karai Kasang a nyan hpaji lu mai (Laika pang 18, 19 hpe yu u)

18, 19. Yehowa a magam hpe matut nna shakut shaja let gun hpai lu hkra, myitsu salang ni gara hku karum ya ai kun? Ga shadawn hte tsun dan u.

18 Anhte n hkum tsup tim, Yehowa gaw shi a magam gun na matu anhte hpe ahkaw ahkang jaw da ai. Anhte hpe karum ya na matu, myitsu salang ni hpe mung, “kumhpa” hku nna jaw da ai. (Ehpesu 4:8, 11, 12 hpe hti u.) Dai majaw, myitsu salang ni nang kaw sa kawan yang, shanhte a hpaji jaw ga hte machye machyang ni kaw nna akyu hkamsha lu hkra galaw u.

19 Ga shadawn, Inglan mung kaw nna yan la langai gaw, dinghku hta manghkang loi nga ai majaw, myitsu salang ni hpe karum hpyi ai. Wenyi lam hta madu wa gaw atsawm n woi awn ya ai ngu madu jan hkamsha nga ai. Madu wa chyawm gaw, sharin achyin ai lam hta gawng kya ai majaw, dinghku nawku hpe atsawm n woi awn ya lu ai ngu tsun ai. Yesu a kasi ningli hpe myit yu na matu, myitsu salang ni hpaji jaw ai. Sape ni hpe lanu lahku wa ai Yesu a kasi hpe hkan sa na matu, madu wa hpe shadut ya nna, myit galu ya na matu madu jan hpe n-gun jaw ai. Kasha lahkawng hte arau, dinghku nawku gara hku galaw mai na hpe mung tsun dan ai. (Ehpesu 5:21-29) Madu wa gaw, dinghku hpe atsawm woi awn na matu shakut ai. Asum n jaw na matu hte chyoi pra ai wenyi hpe kamhpa na matu, myitsu salang ni n-gun jaw ai. Myitsu salang ni madun ai tsawra matsan dum myit gaw, dai dinghku hpe teng sha karum ya lu wa ai.

20. Matut nna nhtoi htoi tu na nga yang, hpa akyu lu la na kun?

20 “Yehowa hpe hkrit hkungga nna, shi a lam hta hkan nang ai ni yawng hte gaw, a nga ma ai.” (Shakawn 128:1) Matut nna nhtoi htoi tu na nga yang, nang ngwi pyaw lu na re. Dai majaw, Karai Kasang a lam kaga ni hpe matut nna sharin ya u. Dinghku hte, nawku hpung hta matut nna zinlum nga hkra, nang galaw lu ai lam yawng hpe galaw nna, matut maja nga u. Na a kaja ai kasi ningli hpe kaga masha ni mu nna, anhte a Kawa Yehowa hpe shakawn shagrau mayu wa na re.​—⁠Mahte 5:16.