Content de lai

Malawm Ni Hpe Lai U

Na A Myit Nsam Hpe Karai Kasang A Tara Ni Gaw Shaman Shakyang Ya U Ga

Na A Myit Nsam Hpe Karai Kasang A Tara Ni Gaw Shaman Shakyang Ya U Ga

“Na a tara hpe ngai gade wa tsaw nga n hka! Ngai shani tup dai hpe myit aru nga nngai.”​—⁠SHAKAWN 119:97.

Mahkawn: 127, 88

1. Dusat ni hta anhte hpa majaw grau ai kun?

YEHOWA gaw, shinggyim masha ni hpe grai manu dan ai myit nsam jaw da ai. Dai myit nsam a majaw, dusat dumyeng ni hta grau ai re. Adam yan Ewa hta myit nsam nga ai hpe anhte gara hku chye lu ai kun? Karai Kasang a ga n madat nna mara galaw hkrup ai majaw, shan yan makoi nga ai. Shan a myit nsam gaw, shan hpe sharu shatsang ai majaw re.

2. Anhte a myit nsam gaw, lamu ga man madun jak hte gara hku bung ai kun? (Sumhpa shawng na sumla hpe yu u.)

2 Myit nsam ngu ai gaw, kaja ai hte n kaja ai hpe ginhka shangun lu ai myit hpe tsun ai re. Marai langai ngai gaw, myit nsam hpe atsawm n shaman da yang, hten taw nga ai lamu ga man madun jak hte bung mat na re. Nbung hte nammukdara hka gaw, sanghpaw li hpe lam shai mat hkra galaw lu ai. Raitim, lamu ga man madun jak gaw, sanghpaw li hpe lam n shai mat hkra lam madun ya lu ai. Dai hte maren, anhte a myit nsam hpe atsawm shaman da yang, myit nsam gaw anhte hpe atsawm lam madun ya lu na re.

3. Myit nsam hpe jaw ai hku n shaman da yang, hpa ni byin chye ai kun?

3 Anhte a myit nsam hpe jaw ai hku n shaman da yang, shut ai lam galaw ai shaloi, myit nsam gaw sadi jaw sana n re. (1 Timohti 4:1, 2) “N kaja ai hpe kaja ai” ngu nna pyi kam shangun chye ai. (Esaia 5:20) Yesu gaw shi hpang hkan ai ni hpe ndai hku tsun ai: “Nanhte hpe sat kau lu ai wa kadai mung, Karai Kasang a magam hpe gun hpai nngai, nga nna myit la ai aten du wa ra ai.” (Yawhan 16:2) Sape Stehpan hpe sat kau ai ni gaw, dai hku myit la wa ai. (Kasa 6:8, 12; 7:54-60) Shinggyim labau hta, nawku htung ni gaw masha sat ai lam zawn re ai dawsa ai lam ni galaw nna Karai Kasang a matu galaw ai ngu hkam la ma ai. Raitim, teng sha nga yang, shanhte galaw ai lam ni gaw Karai Kasang a tara ni hpe tawt lai nga ai re. (Pru Mat 20:13) Shanhte a myit nsam gaw, shanhte hpe jaw ai hku lam n madun ai hpe mu lu ai.

4. Myit nsam gaw anhte hpe jaw ai hku lam madun lu hkra hpa galaw mai ai kun?

4 Myit nsam gaw anhte hpe jaw ai hku lam madun na matu, anhte hpa galaw mai ai kun? Chyum Laika kaw nna tara ni gaw, “sharin shaga ya ai, daru sharin chye ai, mye shading lu ai hte, ding hpring ai lam hta sharin achyin ya na matu, akyu rawng nga ai.” (2 Timohti 3: 17) Chyum Laika hpe ayan hti nna, hti ai lam hpe atsawm myit sumru ra ai. Chye wa ai lam ni hpe tatut hkan sa ra ai. Dai hku galaw na nga yang, Yehowa gara hku myit ai hpe grau nna chye wa na re. Rai yang, anhte a myit nsam gaw anhte hpe atsawm lam madun lu sai. Yehowa a hkang da ai tara ni hte npawt tara ni gaw, anhte a myit nsam hpe gara hku shaman ya lu ai lam hkaja mat ga.

Karai A Hkang Da Ai Tara Gaw Nang Hpe Shaman Ya U Ga

5, 6. Karai a tara ni gaw anhte hpe gara hku karum ya ai kun?

5 Karai a hkang da ai tara ni kaw nna akyu lu la hkra, dai tara ni hpe chye da ai hta n-ga, tatut hkan sa ra ai. Tara ni hpe anhte tsawra nna hkungga ra ai. Chyum Laika hta anhte hpe ndai hku tsun ai: “N kaja ai hpe n dawng nna, kaja ai hpe tsaw ra mu.” (Amo 5:15) Dai hpe anhte gara hku hkan sa mai na kun? Dai tara ni hpe Yehowa mu mada ai hku, mu mada chye wa hkra sharin la ra ai. Ndai lam hpe myit yu u. Nang atsawm yup n pyaw ai majaw, sarawun gaw hkamja ai malu masha sha na matu, shamu shamawt ai lam grau galaw na matu hte galai shai ai lam nkau galaw na matu nang hpe matsun ai. Shi a matsun hpe nang hkan galaw ai majaw, yup pyaw wa ai. Sarawun a matsun hpe nang gara hku myit la ai kun?

6 Dai hte maren, anhte a prat grau nna kaja wa na hte yubak a majaw n kaja ai akyu ni lu la ai kaw nna koi lu na matu, Hpan Madu gaw anhte hpe tara ni jaw da ai. Ga shadawn, masu ai, lagu ai, akyang hten za ai, dawsa ai lam (sh) nat hpaji hte seng ai lam yawng hpe koi na matu Chyum Laika hta tsun da ai. (Ga Shagawp 6:16-19 hpe hti u; Shingran 21:8) Yehowa a ga madat ai majaw, kaja ai akyu ni hkamsha wa ai shaloi, shi hpe grau tsawra wa nna shi a tara ni hpe hkan sa mayu wa na re.

7. Chyum Laika labau ni gaw anhte hpe gara hku karum ya lu ai kun?

7 Jaw ai, shut ai hpe chye na matu, tinang nan Karai a tara ni hpe tawt lai nna, n kaja ai akyu hpe n hkam la ra ai. Lai wa sai aten hta shut ai lam galaw wa ai ni kaw nna sharin la mai ai. Shanhte a mabyin ni hpe Chyum Laika hta ka da ai. Ga Shagawp 1:5 (NW) hta, “Hpaji rawng ai wa gaw madat mara nga nna, lam matsun ni hpe hkam la nga ai” ngu tsun da ai. Karai Kasang kaw nna sa ai ndai hpaji jaw ga gaw kaja htum re. Ga shadawn, Dawi gaw Yehowa a ga n madat nna Batsheba hte shut hpyit ngut ai hpang, kade daram jamjau hkrum wa ai hpe myit yu u. (2 Samuela 12:7-14) Dai labau hpe hti ai shaloi, tinang hkum tinang ndai hku san yu u: ‘Ndai manghkang ni hpe Dawi gara hku koi lu na kun? Dai zawn re ai masa lam hta ngai nga yang hpa galaw na kun? Hpye ai amu galaw na matu gunglau hkrum yang, Dawi zawn rai na kun? (sh) Yosep zawn rai na kun?’ (Ningpawt 39:11-15) Mara galaw nna lu wa na hkrit hpa akyu ni hpe atsawm sha myit yang, grau nna “n kaja ai hpe n dawng” wa na re.

8, 9. (a) Anhte a myit nsam gaw hpa galaw na matu shadut ya ai kun? (b) Anhte a myit nsam hte npawt tara gaw gara hku matut mahkai ai kun?

8 Karai Kasang nju ai lam ni hte anhte tsan tsan nga ai. Raitim, Chyum Laika hta tup hkrak matsun da ai tara ni n nga ai masa hte anhte hkrum nga ai nga yang hpa galaw na kun? Karai Kasang galaw shangun mayu ai hpe ngai gara hku chye lu na kun? Anhte a myit nsam hpe shaman shakyang ya na matu, Chyum Laika hpe ahkang jaw na nga yang, hpaji rawng ai dawdan lam ni hpe jahkrat lu na re.

9 Yehowa gaw anhte hpe tsawra ai majaw, anhte a myit nsam hpe shaman ya na matu npawt tara ni hpe lajang da ya ai. Yehowa ndai hku tsun ai: “Ngai gaw, na a akyu matu nang hpe sharin achyin ya nna, nang mai hkan ai lam hta nang hpe lakawn wa ai, na a Karai Kasang Yehowa rai nga nngai.” (Esaia 48:17, 18) Chyum Laika npawt tara ni hpe sung sung myit nna, dai tara ni hte maren hkan sa na nga yang, anhte a myit nsam hpe jaw ai hku shaman da lu na re. Dai hku nna hpaji rawng ai dawdan lam ni jahkrat lu na re.

Karai A Npawt Tara Gaw Nang Hpe Shaman Ya U Ga

10. Npawt tara ngu ai gaw hpa rai kun? Yesu gaw sharin achyin ya ai shaloi npawt tara hpe gara hku lang wa ai kun?

10 Npawt tara gaw anhte a myit mang ai lam hpe hkang ya lu ai teng man lam rai nna, kaja ai dawdan lam ni jahkrat lu hkra karum ya ai. Yehowa jaw da ai npawt tara ni hpe chye na da yang, shi gara hku myit ai hte hpa majaw tara ni jaw ai hpe chye wa na re. Galaw ai lam ni hte myit jasat ni hta shi akyu hte shi nga ai lam sape ni chye na hkra, npawt tara ni hte Yesu sharin ya ai. Ga shadawn, pawt sindawng ai gaw dawsa ai lam byin shangun chye nna, nse nsa ai lam hpe myit ai gaw num shaw la shaw ai lam byin shangun chye ai ngu shi sharin ya ai. (Mahte 5:21, 22, 27, 28) Yehowa a npawt tara ni hte maren anhte hkan sa yang, anhte a myit nsam gaw atsawm shaman da hkrum na re. Anhte a dawdan lam ni mung Karai Kasang hpe shagrau lu na re.​—⁠1 Korinhtu 10:31.

Kung hpan ai Hkristan ni gaw kaga ni a myit nsam hpe tau ya (Laika pang 11, 12 hpe yu u)

11. Marai langai hte langai a myit nsam gaw gara hku shai chye ai kun?

11 Hkristan ni gaw, Chyum Laika hte myit nsam hpe shaman da ai raitim, masa lam ni hte seng nna dawdan lam jahkrat ai shaloi, langai hte langai bung na n re. Tsa lu ai hte seng nna myit yu ga. Tsa lu ai gaw shut ai ngu Chyum Laika hta n tsun da ai. Raitim, lu lai ai (sh) nang hkra lu ai gaw n mai ai ngu sadi jaw da ai. (Ga Shagawp 20:1; 1 Timohti 3:8) Lu lai hkra n rai tim pyi, kaga lam ni hpe naw myit ra ai. Tsa lu ai hte seng nna tinang a myit nsam gaw hpa n ra tim, kaga masha ni a myit nsam hpe gaw myit ya ra na re.

12. Roma 14:21 hta tsun da ai ga ni gaw, kaga ni a myit nsam hpe tau ya na matu gara hku shadut ya ai kun?

12 Kaga ni a myit nsam hpe tau ya na matu Pawlu ndai hku tsun ai: “Shan sha na hte tsabyi lu na rai ti mung, na nhpu nnau hpe myit kataw shangun na lam hpa rai ti mung koi gam kau na gaw, mai kaja nga ai.” (Roma 14:21) Dai majaw, tsa lu na ahkang nga tim, kaga Hkristan ni a myit nsam hpe shanut shanat byin shangun ai nga yang, n lu ai sha koi kau ra na re. Hpunau langai gaw moi aten hta tsa ya byin ga nna, teng man lam hpe chye wa ai shaloi, n lu na matu dawdan ai ngu saga. Dai hpunau bai lu mayu wa hkra shadut ya ai lam hpa hpe mung anhte galaw na n re. (1 Korinhtu 6:9, 10) Anhte a nta de dai hpunau hpe saw shaga ai shaloi, tsa chyaru daw na kun? Daw na n re.

Kaga ni a matu, sak jaw ai lam ni nang galaw na kun?

13. Kabu gara shiga hpe masha ni myit lawm wa hkra, gara kasi kaja hpe Timohti madun wa ai kun?

13 Ramma Timohti gaw, matu gadoi hkam yang machyi na hpe chye tim pyi, hkam la ai. Shi hkaw tsun na Yuda masha ni a matu, dai lam gaw ahkyak ai lam re ai hpe chye ai majaw re. Pawlu zawn sha, kaga ni hpe ahtu kataw ai baw, Timohti n galaw wa ai. (Kasa 16:3; 1 Korinhtu 9:19-23) Kaga ni a matu, nang mung sak jaw ai lam ni galaw na kun?

“Kung Hpan Ai De Du Hkra”

14, 15. (a) Gara hku nna kung hpan ai ni byin wa mai na kun? (b) Kung hpan ai Hkristan ni gaw kaga masha ni hpe gara hku kanawn mazum ai kun?

14 Hkristan yawng gaw, “Hkristu a shawng npawt na ga kanu ni hpe tawn da nna, kung hpan ai de du hkra” shakut ra ai. (Hebre 6:1, NW) Teng man ai tara hta shaning grai na wa sai majaw sha, hkung hpan ai ni byin wa na n re. Kung hpan ai kaw du lu hkra shakut shaja ra ai. Anhte a machye machyang hte chye na ai lam hpe rawt jat hkra matut galaw ra ai. Dai majaw, Chyum Laika hpe shani shagu hti ra ai. (Shakawn 1:1-3) Chyum Laika hpe shani shagu hti yang, Yehowa a tara ni hpe grau nna chye na wa na re.

15 Hkristan ni a matu ahkyak htum tara gaw hpa rai kun? Shada da tsawra ra ai ngu ai tara re. Sape ni hpe Yesu ndai hku tsun ai: “Nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai.” (Yawhan 13:35) Tsawra myit hpe, “hkawhkam tara” hte “jep ai tara a shatup shadik ai lam” ngu nna tsun ai. (Yaku 2:8; Roma 13:10) “Karai Kasang gaw tsaw ra ai myit rai nga ai” ngu nna Chyum Laika hta tsun da ai majaw, tsawra myit gaw grai ahkyak ai hpe chye lu ai. (1 Yawhan 4:8) Karai Kasang a tsawra myit gaw hkamsha lam sha n re. Tatut galaw ya ai hku nna shi a tsawra myit hpe madun wa ai. Yawhan ndai hku tsun ai: “Karai Kasang gaw shi a Kasha shingtai hpe mungkan ga de shangun dat wu ai rai nna, anhte gaw shi a marang e a hkrung nga ma li ga, nga ai rai nna, dai gaw anhte hta e, Karai Kasang a tsaw ra ai myit dan pru ai lam rai nga ai” (1 Yawhan 4:9) Yehowa, Yesu, hpunau nauna ni hte kaga masha ni hpe anhte tsawra yang, kung hpan ai Hkristan ni re ai lam madun ai re.​—⁠Mahte 22:37-39.

Chyum Laika npawt tara ni hpe grau nna myit sumru na nga yang, anhte a myit nsam hpe grau nna kam mai (Laika pang 16 hpe yu u)

16. Kung hpan ai Hkristan ni gaw, npawt tara ni hpe hpa majaw grau nna manu shadan ai kun?

16 Anhte gaw kung hpan ai Hkristan ni byin wa yang, npawt tara ni hpe grau nna manu shadan wa na re. Hkang da ai tara gaw, lak san matsun da ai masa lam langai a matu rai nna, npawt tara gaw masa lam amyu myu hte seng ai. Ga shadawn, ma langai gaw n kaja ai manang hte kanawn ai majaw, byin wa na manghkang ni hpe tau chye na n re. Dai majaw, kanu kawa ni gaw ma hpe makawp maga ya na matu tara ni jahkrat da ya ai. (1 Korinhtu 15:33) Raitim, dai ma gaw kaba wa ai shaloi, Chyum Laika npawt tara ni hpe gara hku hkan sa mai ai lam sharin la ai. Npawt tara ni gaw, manang kaja lata lu hkra shi hpe karum ya na re. (1 Korinhtu 13:11; 14:20 hpe hti u.) Chyum Laika npawt tara ni hpe anhte grau nna myit sawn sumru na nga yang, anhte a myit nsam hpe grau nna kamhpa mai na re. Gara masa hta mi raitim, Karai Kasang myit ai hku, myit chye na re.

17. Hpaji rawng ai dawdan lam ni jahkrat lu hkra, anhte hta hkingrai yawng nga ai ngu hpa majaw lu tsun ai kun?

17 Yehowa hpe myit shapyaw ya lu ai dawdan lam ni hpe jahkrat lu hkra, yawng mayawng anhte hta nga ai. “Karai Kasang a masha wa gaw hkum tsup rai wa nna, mai kaja ai magam bungli” galaw lu hkra, Chyum Laika hta lawm ai, hkang da ai tara ni hte npawt tara ni gaw karum ya na re. (2 Timohti 3:16, 17) Yehowa myit ai hte maren myit chye hkra, Chyum Laika npawt tara ni gaw karum ya na re. Raitim, dai npawt tara ni hpe chye hkra shakut shaja ra ai. (Ehpesu 5:17) Anhte hpe karum ya na matu, Yehowa Sakse Ni A Matu Chyum Laika Hkaja Lam Matsun, Sin Langchyi Laika Dum, Sin Langchyi Online Laika Dum hte JW Library app ni nga ai. Dai hkingrai ni hpe anhte akyu jashawn na nga yang, tinang hkrai hkaja lamang hte dinghku nawku a matu akyu grai lu la na re.

Chyum Laika Hte Shaman Da Ai Myit Nsam Gaw Shaman Chyeju Ni Lu Shangun

18. Yehowa a tara ni hpe anhte hkan sa na nga yang, prat hta hpa byin wa na kun?

18 Yehowa a hkang da ai tara ni hte npawt tara ni hpe hkan sa yang, anhte a prat gaw grau nna kaja wa na re. Shakawn Kungdawn 119: 97-100 hta ndai hku tsun ai: “Na a tara hpe ngai gade wa tsaw nga n hka! Ngai shani tup dai hpe myit aru nga nngai. Nang htet da ai ga majaw, ngai gaw gumlau ni hta grau nna hpaji lu nga nngai; Kaning rai nme law, dai gaw prat dingsa e ngai hta a rawng nga ai. Na a sakse ga hpe ngai myit aru nga nngai majaw, Ngai sharin la ai sara ni yawng hta, ngai grau nna chye lu nngai. Na a ga matsun ga hpe ngai hkan nga nngai majaw, Salang ni hta grau nna ngai myit su nga nngai.” Karai a tara ni hpe aten la nna atsawm myit na nga yang, hpaji byeng-ya hte machye machyang grau nna rawt jat wa na re. Karai a tara ni hte anhte a myit nsam hpe shaman da na nga yang, “Hkristu zawn kung hpan ai de du lu na re.”​—⁠Ehpesu 4:13, NW.