Content de lai

Malawm Ni Hpe Lai U

Karai Kasang Ra Sharawng Ai Lam Shi Lu La Mai

Karai Kasang Ra Sharawng Ai Lam Shi Lu La Mai

YEHOWA hpe anhte nawku dawjau nga nna, shi a shaman chyeju hte ra sharawng ai lam lu mayu ga ai. Karai Kasang ra sharawng ai lam anhte gara hku lu mai na kun? Chyum Laika prat hta, masha nkau gaw Karai Kasang n ra sharawng ai mara kaba ni galaw wa ai. Nkau mi gaw kaja ai atsam ningja ni nga tim, hpang hta gaw, Karai Kasang ra sharawng ai lam sum mat ai. Rai yang, anhte ndai hku myit chye na re: “Anhte langai hpra hta Yehowa hpa hpe tam ai kun?” Yuda hkawhkam Rehoboam a mabyin kaw nna mahtai lu na re.

N Kaja Ai Lahkam

Rehoboam a kawa, Shawlumon gaw Israela ni hpe shaning 40 uphkang wa ai. (1 Hkawhkam 11:42) Shi kawa si mat ai hpang, Rehoboam gaw hkawhkam aya hkam la na matu Yerusalem kaw nna Shehkem de sa ai. (2 Hkawhkam Labau 10:1) Hkawhkam byin na matu shi hkrit tsang ai kun? Shawlumon gaw nyan hpaji a majaw mying gumhkawng ai. Kade n na yang, Rehoboam gaw, yakhkak ai manghkang hpe hparan lu ai atsam nga ai kun? ngu ai hpe sakse madun ra na re.

Israela ni gaw adip arip hkrum ai ngu hkamsha nna, Rehoboam hte tsun shaga na matu dat kasa ni hpe shangun dat ai. Shanhte ndai hku tsun ai: “Na nwa gaw anhte a kan dang hpe li wa shangun ya mi ai: dai re ai majaw, na nwa a yak la ai amu makan hte, anhte e shagun ya ai li la ai kandang hpe nang shayawm shatsang kau ya mi; shaloi anhte nang hpe daw jau nga na ga ai.”​—⁠2 Hkawhkam Labau 10:3, 4.

Rehoboam gaw, grai myit yak mat na re. Lama na, masha ni ra sharawng ai hpe galaw na nga yang, shi, shi a dinghku hte hkawhkam htingnu hta nga ai ni gaw, moi na daram madang tsaw ai hku nga lu sana n re. Masha ni hpyi shawn ai hpe nyet kau na nga yang mung, shi hpe gumlau wa na re. Shi hpa galaw na kun? Shawng nnan hku nna, shi kawa hpe karum ya wa ai asak kaba ai ni hpe san ai. Shanhte gaw, masha ni tsun ai hpe madat na matu tsun ai. Raitim, Rehoboam gaw shi hte asak bung ai ni hte ga shaga nna, masha ni hpe adip arip di na matu dawdan wa ai. Shi ndai hku tsun ai: “Nye wa gaw nanhte a kandang hpe shali ti mung, ngai dai hta naw jat na we ai; nye wa gaw nanhte hpe ri lasik hte kayat ai, ngai mahtang hpri n-gawgawk hte kayat na ma de ai.”​—⁠2 Hkawhkam Labau 10:6-14.

Anhte hpa sharin la lu ai kun? Dai ni na aten hta, Yehowa hpe shaning law law nawku dawjau nga ai asak kaba ai ni anhte hta nga nna, shanhte gaw anhte hpe kaja ai dawdan lam ni jahkrat lu na matu karum ya lu ai. Shanhte a ga madat nna hpaji rawng ai ni byin hkra shakut ga.​—⁠Yoba 12:12.

‘Shanhte Gaw Yehowa A Ga Madat Mara Ai’

Rehoboam gaw, gumlau ai ni hpe gasat na matu hpyen dap hpe hkyen lajang ai. Raitim, Yehowa gaw  myihtoi Shemia hpe ndai hku tsun shangun dat ai: “Nanhte gaw lsraela amyu nhpu nnau ni hpe sa gasat lu na myit dai n rai: langai hte langai tinang a nta de bai wa ma nu; ndai lam gaw ngai kaw na rai nga ai.”​—⁠1 Hkawhkam 12:21-24. *

Yehowa a ga hpe Rehoboam madat na matu loi ai kun? Hkawhkam nnan hte seng nna masha ni gara hku myit na kun? Shanhte hpe “hpri n-gawgawk hte” ari jaw na nga nna tsun da sai. Raitim, ya gaw ndai zawn gumlau ai lam hte seng nna hpa mung n lu galaw ai. (2 Hkawhkam Labau 13:7 hte shingdaw yu u.) Masha ni shi hpe gara hku mi shadu tim, hkawhkam hte shi a hpyen dap gaw, “Yehowa a ga madat mara nna, langai hte langai Yehowa tsun dan ai hte maren, bai nhtang wa ma ai.”

Anhte hpa sharin la lu ai kun? Masha ni anhte hpe jahpoi asawng tim, Karai Kasang a ga madat ai gaw hpaji rawng ai hpe chye lu ai. Anhte madat mara yang, Karai Kasang galoi mung shaman chyeju jaw na re.​—⁠Tara Jahprang 28:2.

Rehoboam madat mara ai majaw, shaman chyeju lu wa ai kun? Rehoboam gaw Yuda hte Ben-yamin amyu a hkawhkam naw rai nga nna, dai shara hta mare nnan ni gawgap na matu dawdan wa ai. Shi gaw mare nkau hpe ‘grai shangang da wu ai.’ (2 Hkawhkam Labau 11:5-12) Yehowa a tara ni hpe shi madat mara ai aten ni nga wa ai. Amyu lakung 10 mungdan gaw, gawng ngu sumla ni hpe nawku wa ai majaw, dai kaw na masha law law gaw, Rehoboam hte teng man ai nawku dawjau lam hpe madi shadaw na matu Yerusalem de sa wa ai. (2 Hkawhkam Labau 11:16, 17) Rehoboam gaw Yehowa hpe madat mara wa ai majaw, shi a mungdan gaw n-gun ja wa ai.

Rehoboam Mara Galaw Nna Myit Malai La

Rehoboam gaw shi a mungdan n-gun ja wa ai shaloi, lam langai hpe galaw wa ai. Yehowa a tara hpe n hkan sa mat nna, shut shai ai hpara ni hpe nawku wa ai. Hpa majaw kun? Amon masha re ai kanu gaw shi a dawdan lam hta shingkang ka-up wa ai majaw kun? (1 Hkawhkam 14:21) Anhte n chye ga ai. Mung masha ni mung shi a n kaja ai kasi hpe hkan sa ai. Dai majaw, Yehowa gaw, Egutu mung kaw nna Hkawhkam Shishak hpe Yuda mung na mare law law hpe zing la na matu ahkang jaw dat ai. Rehoboam gaw dai mare ni hpe grai ngang kang hkra galaw da tim, hkrat sum mat ai.​—⁠1 Hkawhkam 14:22-24; 2 Hkawhkam Labau 12:1-4.

Rehoboam uphkang nga ai Yerusalem hpe gasat na matu, Shishak hte shi a hpyen dap ni sa wa ai shaloi, masa ni grau sawng wa ai. Dai aten hta, Rehoboam hte shi a masha ni hpe, myihtoi Shemia kaw nna Karai Kasang ndai hku tsun ai: “Nanhte ngai hpe kau da ai majaw, ngai nanhte hpe Shishak a lata de ap kau ma sa de ai.” Dai hku sharin shaga ai hpe Rehoboam gara hku bai htang ai kun? “Israela du salang ni hte hkawhkam wa gaw tinang myit nem let, Yehowa ding man nga ai” nga nna tsun ai. Dai majaw, Yehowa gaw, Rehoboam hpe hkye la nna, Yerusalem hpe n jahten kau ai.​—⁠2 Hkawhkam Labau 12:5-7, 12.

Dai hpang, Rehoboam gaw, Yuda mung hpe matut nna uphkang ai. Shi n si shi yang, shi a kasha ni hpe law law wa madi shadaw ya wa ai. Hpang hta hkawhkam byin wa na Abiya hpe kahpu kanau ni n gumlau na matu lajang ya wa ai. (2 Hkawhkam Labau 11:21-23) Rehoboam gaw, asak kaji ai aten hta grau nna hpaji rawng ai hku galaw wa ai.

Rehoboam Kaja Ai Kun? N Kaja Ai Kun?

Rehoboam gaw kaja ai lam nkau hpe galaw wa tim, shi uphkang ai lam hte seng nna “n hkru ai amu galaw nga ai” ngu nna Chyum Laika hta tsun da ai. Hpa majaw kun? “Shi gaw Yehowa hpe shi a myit masin mahkra hte n hkan tam ai” majaw re. Dai majaw, Yehowa gaw shi hpe n ra sharawng ai.​—⁠2 Hkawhkam Labau 12:14.

Dawi gaw Yehowa hte hku hkau lam nga wa tim Rehoboam gaw n nga

Rehoboam a mabyin kaw nna anhte hpa sharin la lu ai kun? Karai Kasang a ga hpe kalang lang shi madat ai. Yehowa a masha ni a matu kaja ai lam nkau mi galaw ya ai. Raitim, Yehowa hte hku hkau lam n nga wa ai. Yehowa myit ra ai lam galaw na matu shi n sharawng wa ai. Teng man ai lam hpe n galaw ai sha, shut shai ai hpara ni hpe pyi nawku wa ai. Nang ndai hku myit na re: ‘Rehoboam gaw, shi galaw shut ai lam hpe grai myit malai lu nna Yehowa ra sharawng ai hpe galaw mayu ai majaw, Yehowa shading sharai ya ai hpe hkap la wa ai kun? Shing nrai kaga ni tsun ai majaw rai kun?’ (2 Hkawhkam Labau 11:3, 4; 12:6) Hpang hta gaw, n kaja ai lam hpe bai galaw wa ai. Shi a kaji dwi Hkawhkam Dawi hte grai shai ai. Dawi gaw, mara galaw wa tim, shi galaw wa ai mara hte seng nna teng sha myit malai lu wa ai.  Yehowa hpe tsawra nna, shi a prat ting hta teng man ai hku nawku dawjau wa ai.​—⁠1 Hkawhkam 14:8; Shakawn 51:1, 17; 63:1.

Ndai Chyum Laika labau kaw nna anhte sharin la lu ai. Dinghku hpe madi shadaw ya nna, kaga ni a matu kaja ai bungli ni galaw ya ai nga yang, shakawn ging ai. Raitim, Yehowa ra sharawng ai lam lu na matu, shi ra sharawng ai hku nawku dawjau ra nna, shi hte ngang kang ai hku hkau lam nga ra ai.

Dai bandung de du na matu, Yehowa hpe teng sha tsawra ra ai. Wan matut chyi nga na matu hpun bang ra ai zawn, Karai Kasang hpe matut tsawra na matu, Chyum Laika ayan hti ra nna, myit sawn sumru ra ai, nsim nsa akyu hpyi ra ai. (Shakawn 1:2; Roma 12:12) Dai zawn tsawra myit gaw, Yehowa ra sharawng ai lam galaw na matu anhte hpe shadut ya ai. Shut ai lam galaw ai shaloi teng sha myit malai lu nna, mara raw dat hkrum hkra Yehowa kaw hpyi nem na matu mung shadut ya ai. Rai yang, anhte gaw Rehoboam zawn n re ai sha, teng man ai hku matut nna nawku dawjau lu na re.​—⁠Yuda 20, 21.

^ စာပိုဒ်၊ 9 Shawlumon sadi n dung ai majaw, Mungdan gaw lahkawng garan mat na ngu Karai Kasang tsun ngut chyalu re.​—⁠1 Hkawhkam 11:31.