Content de lai

Malawm Ni Hpe Lai U

Anhte Hpe Yehowa Madu

Anhte Hpe Yehowa Madu

“Yehowa hpe Karai Kasang hku nna nawku ai amyu hte sali wunli a matu shi lata la ai ni gaw ngwi pyaw ma ai.”​—⁠SHAKAWN 33:12, NW.

Mahkawn: 40, 50

1. Yawng mayawng hpe Yehowa madu ai ngu hpa majaw lu tsun ai kun? (Sumhpa shawng na sumla hpe yu u.)

YAWNG mayawng hpe Yehowa madu ai. “Sumsing lamu hte de a lahta tang, ginding aga hte dai hta pra mapra” hpe shi madu ai. (Tara Jahprang 10:14; Shingran 4:11) Shinggyim masha ni hpe Yehowa hpan da ai majaw, anhte yawng gaw shi madu ai ni sha re. (Shakawn 100:3) Mungkan ntsa asak hkrung wa ai masha ni kaw nna nkau mi hpe, Karai Kasang gaw laksan hku nna lata la ai.

2. Laksan hku nna Yehowa madu ai ni gaw kadai ni rai kun?

2 Ga shadawn, Yehowa hpe sadi dung let nawku wa ai moi Israela ni hpe “shi a sali wunli” ngu nna Shakawn Kungdawn 135 hta tsun da ai. (Shakawn 135: 4) Israela n re ai nkau mi mung, Yehowa a masha byin wa na ngu Hosea myihtoi htoi wa ai. (Hosea 2:25) Hkristu hte arau sumsing lamu hta uphkang na matu Israela n re ai ni hpe lata la ai shaloi, dai myihtoi ga hpring tsup  wa ai. (Kasa 10:45; Roma 9:23-26) Chyoi pra ai wenyi hte namman chya hkrum ai shanhte hpe “chyoi pra ai amyu baw” ngu nna shaga ai. Shanhte gaw “Karai Kasang a amyu” rai nga ai. (1 Petru 2:9, 10) Mungkan hta htani htana asak hkrung na matu myit mada ai, sadi dung ai Hkristan ni hte seng nna gaw gara hku kun? Shanhte hpe “nye a amyu masha,” “ngai lata la ai amyu” ngu nna Yehowa shaga da ai.​—⁠Esaia 65:22.

3. (a) Kadai ni gaw Yehowa hte laksan hku hkau lam nga ai kun? (b) Ndai sumhpa hta hpa lam hkaja mat na kun?

3 Sumsing lamu hta htani htana asak hkrung na matu myit mada lam nga ai “sagu hpung kaji” hte ginding aga hta htani htana asak hkrung na matu myit mada lam nga ai “sagu kaga” ni gaw, “sagu hpung langai” hku nna Yehowa hpe nawku nga ai. (Luka 12:32; Yawhan 10:16) Yehowa hte grai kaja ai hku hkau lam lu da ai majaw, anhte grai chyeju dum ga ai. Ndai laksan ahkaw ahkang a matu, Yehowa hpe gara hku chyeju dum lu ai lam, ndai sumhpa hta hkaja mat na re.

Yehowa Kaw Anhte A Prat Hpe Apnawng Da

4. Yehowa hte hku hkau lam lu da ai majaw, chyeju dum ai lam gara hku madun na kun? Yesu gara hku madun wa ai kun?

4 Anhte apnawng nna hkalup hkam ai shaloi, Yehowa hpe chyeju dum ai lam madun ai. Dai gaw, Yehowa gaw anhte hpe madu nna, shi hpe anhte madat mara mayu ai lam masha hpawng hta madun ai re. (Hebre 12:9) Yesu mung hkalup hkam ai hku nna, dai lam hpe madun wa ai. Shi gaw Yehowa hpang apnawng da ai amyu kaw lawm ngut chyalu raitim, Yehowa hpang shi hkum shi apnawng wa ai. Ndai zawn shi tsun nga ai hte bung ai: “Nye a Karai Kasang e, na a myit hkan nang na ngai ra nga nngai.”​—⁠Shakawn 40:7, 8

5, 6. (a) Yesu hkalup hkam ai shaloi, Yehowa hpa tsun ai kun? (b) Gara ga shadawn gaw, anhte a apnawng ai lam hte seng nna Yehowa a hkamsha lam hpe chye na shangun ai kun?

5 Yesu hkalup hkam ai shaloi, Yehowa gara hku hkamsha ai kun? Chyum Laika hta ndai hku tsun ai: “Ya Yesu gaw baptisma hkam la ngut jang, dai hka hta na byawn hprang rai lung wa nna, yu u, lamu gaw hpaw malang wa nhtawm, Karai Kasang a Wenyi gaw, hkrudu zawn yu hkrat wa nna, shi a ntsa e dung nga ai hpe shi mu lu ai: dai hta n-ga, Ndai wa gaw ngai sharawng awng nga ai, ngai tsawra ai Kasha rai nga li ai, nga nna lamu de na nsen ngoi pru wa ai.” (Mahte 3:16, 17) Yehowa gaw Yesu hpe madu ngut chyalu re. Raitim, Yesu gaw shi hpe sharawng awng let magam gun mayu ai lam madun ai shaloi, Yehowa grai kabu ai. Anhte mung, anhte a prat hpe Yehowa hpang apnawng ai shaloi, shi ra sharawng nna anhte hpe shaman chyeju jaw na re.​—⁠Shakawn 149:4.

6 Yehowa gaw yawng hpe madu ngut chyalu re. Shi hpe anhte hpa lu jaw na kun? Grai tsawm ai nampan ni law law nga ai nampan sun madu a lam hpe myit yu ga. Lani mi hta, shi a ma gaw, nampan di la nna shi hpe jaw ai. Dai nampan hpe shi madu ngut chyalu raitim, kasha jaw ai dai kumhpa a matu, kawa gaw grai kabu ai. Shi kasha gaw shi hpe tsawra ai ngu ai hpe, dai lam gaw madun nga ai majaw re. Kasha jaw ai dai nampan gaw, shi a sun hta nga ai kaga nampan ni yawng hta manu dan ai ngu shi hkamsha na re. Dai zawn sha, anhte a prat hpe sharawng awng let Yehowa hpang apnawng ai shaloi, shi grai kabu ai.​—⁠Pru Mat 34:14.

7. Yehowa gaw shi hpe nawku ai ni hte seng nna gara hku hkamsha ai hpe, anhte chye lu hkra Malahki gara hku tsun da ai kun?

 7 Malahki 3:16 hpe hti u. Yehowa hpang apnawng nna hkalup hkam na matu, hpa majaw ahkyak ai kun? Nang shangai ai aten kaw nna, nang hpe Hpan Madu Yehowa madu ngut chyalu re. Raitim, nang gaw Yehowa hpe na a uphkang madu hku nna hkap la let, shi hpang apnawng ai shaloi, shi kade daram kabu na hpe shingran yu u. (Ga Shagawp 23:15) Yehowa gaw shi hpe sharawng awng let nawku ai ni hpe chye nna, shanhte a amying hpe “jahpan laika” hta ka matsing da ai.

8, 9. Yehowa gaw, shi a “jahpan laika” hta lawm ai ni hpe gara lam hpyi shawn da ai kun?

8 Anhte a amying hpe Yehowa a “jahpan laika” hta lawm shangun mayu ai nga yang, anhte galaw ra na lam nga ai. Yehowa hpe hkrit hkungga nna, shi a amying hpe sumru ra ai ngu Malahki tsun ai. Kaga hpara shaje (sh) kaga lam langai ngai hpe anhte nawku na nga yang, anhte a amying gaw, jahpan laika kaw nna shaw kau hkrum na re.​—⁠Pru Mat 32:33; Shakawn 69:28.

Asak hkrung nga dingsa, Yehowa hpe madat mara ai lam magam bungli hku nna madun ra

9 Dai majaw, hkalup hkam la nna Yehowa a magam gun na matu ga sadi jaw ai hta n-ga galaw ra ai. Anhte a prat hta, kalang daram sha galaw ra ai lam ni nga ai. Raitim, Yehowa hpe nawku dawjau ai lam gaw, prat tup galaw mat wa ra na lam re. Anhte asak hkrung nga dingsa, Yehowa hpe madat mara ai lam hpe anhte a galaw hkawm sa ai lam hku nna madun dan mat wa ra na re.​—⁠1 Petru 4:1, 2

Mungkan Myit Jasat Hpe Anhte Nyet Kau

10. Yehowa hpe nawku ai wa hte n nawku ai wa a lapran gara shai ai lam nga ai kun?

10 Ka-in, Shawlumon hte Israela ni gaw, Yehowa hpe shanhte nawku nga ai ngu tsun tim sadi n dung ai lam, lai wa sai sumhpa hta hkaja wa sai. Yehowa hpe nawku nga ai ngu tsun ai daram hte sha n mai ai lam, dai mabyin ni gaw madun nga ai. N kaja ai hpe nju nna, Kaja ai hpe tsawra ra ai. (Roma 12:9) ‘Ding hpring ai wa hte, tara n lang ai wa, Karai Kasang hpe daw jau ai wa hte, n daw n jau ai wa’ a lapran shai ai lam nga na ngu Yehowa tsun ai.​—⁠Malahki 3:18.

11. Yehowa hpe sha anhte nawku nga ai lam, masha yawng a man hta hpa majaw dan dawng hkra madun ra ai kun?

11 Anhte hpe shi a amyu masha hku nna lata la ai majaw, Yehowa hpe chyeju dum ga ai. Anhte gaw Yehowa maga tsap nga ai hpe, masha yawng a man hta dan dawng nga ra ai. (Mahte 5:16; 1 Timohti 4:15) Tinang hkum tinang ndai hku san u: ‘Yehowa hpe ngai tsep kawp sadi dung ai lam, kaga masha ni mu ai kun? Ngai gaw Yehowa Sakse langai re ai hpe tsun dan ai kun?’ Anhte hpe Yehowa madu ai lam kaga ni hpe tsun dan na matu kaya taw ai nga yang, Yehowa kade daram yawn na hpe myit yu u.​—⁠Shakawn 119:46; Marku 8:38 hpe hti u.

Nang gaw Yehowa Sakse langai re ai hpe na a prat hkrun lam gaw madun nga ai kun? (Laika pang 12, 13 hpe yu u)

12, 13. Gara lam ni gaw, Yehowa Sakse langai re ai, n re ai hpe ginhka na matu yak shangun ai kun?

12 Yawn hpa gaw, hpunau nauna nkau pyi, “mungkan ga a wenyi” hpe hkap la wa ai. Shanhte gaw, Yehowa hpe n nawku ai ni hte nau n shai wa ai. (1 Korinhtu 2:12) “Mungkan  ga a wenyi” gaw, tingkyeng akyu hpe sha myit maju jung na matu shadut ya ai. (Ehpesu 2:3) Ga shadawn, shadum shahprang ai lam law law lu nga tim, nkau mi gaw, sari n rawng ai hku bu hpun nga ai. Nawku zuphpawng sa ai shaloi pyi, hkum hkrang hpe grai hpaw madun ai bu hpun palawng ni bu hpun ai. Grai laklai ai hku nna kara hpe mawn sumli ai. (1 Timohti 2:9, 10) Dai majaw, shanhte hpe Yehowa Sakse ni re ai, n re ai, ginhka na matu yak mat ai.​—⁠Yaku 4:4.

13 Sakse hkam nkau gaw, mungkan a arawn alai ni hpe, tsep kawp n nyet kau ai lam ni nga chye ai. Ga shadawn, Hkristan ni n hkap la lu ai lam hku ka manawt ai pati poi ni de sa ma ai. Nkau gaw, mungkan myit jasat nga ai hpe madun ai shanhte a sumla ni, comment ni hpe, social media hta mara ai, ka ai. Mara kaba galaw ai n re ai majaw, sharin shaga hkrum na n raitim, shanhte gaw mungkan hte n bung hkra shakut nga ai hpunau nauna ni a ntsa, n kaja ai shingkang ka-up lu na re.​—⁠1 Petru 2:11, 12 hpe hti u.

Yehowa maga de tsep kawp n tsap ai ni a shingkang ka-up ai lam hpe hkum hkam

14. Yehowa hte anhte a hku hkau lam hpe makawp maga na matu, hpa galaw ra na kun?

14 Mungkan hta nga ai lam ni yawng gaw, anhte hpe, “hkumshan kayut ai lam, myit marin ai lam hte ndai prat na grang ai lam nlang hte” hpe myit maju jung na matu shadut ai. (1 Yawhan 2:16) Anhte hpe Yehowa madu ai majaw, anhte gaw kaga ni hte n bung ai. “Tara n hkungga ai myit hte mungkan ga hpe marin marit ai lam” hpe koi kau nna, “ndai prat e si si re ai hte ding hpring nna tara hkungga ai lam hkan nang lu hkra” shakut ga ai. (Titu 2:12) Tsun shaga ai, lu ai, sha ai, bu hpun mawn sumli ai hte galaw hkawm sa ai lam yawng hta, anhte hpe Yehowa madu ai lam dan dawng nga ra ai.​—⁠1 Korinhtu 10:31, 33 hpe hti u.

 “Shada Da Tsawra Ai Myit Makyit Rawng Nga Mu”

15. Hpunau nauna ni hpe hpa majaw, tsawra nna matsan dum myit madun ra ai kun?

15 Yehowa hte hku hkau ai lam hpe anhte kade daram manu shadan ai lam, hpunau nauna ni hte tsun shaga ai lailen hta mu lu ai. Anhte zawn sha, shanhte hpe mung Yehowa madu ai. Dai lam hpe dum na nga yang, shanhte hpe galoi mung tsawra myit hte kanawn mazum na re. (1 Htesaloni 5:15) Dai gaw kade daram ahkyak ai kun? Sape ni hpe Yesu ndai hku tsun ai: “Nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai.”​—⁠Yawhan 13:35.

16. Yehowa gaw shi a mayam ni hpe kade daram tsawra ai lam, Mawshe a tara kaw nna hpa chye lu a ta?

16 Hpunau nauna ni hpe gara hku tsun shaga ging ai hte seng nna, Mawshe a tara kaw na sharin la lu ai. Yehowa a nawku htingnu hta, nawku dawjau ai lam a matu sha lang ai hkingrai ni nga ai. Dai hkingrai ni hpe gara hku lang ra na hte seng nna, Lewi masha ni hpe lam matsun hkrak jaw da ai. Dai lam matsun ni hpe atsawm n hkan sa ai ni gaw, sat hkrum na re. (Bu Hkawm 1:50, 51) Yehowa gaw, nawku dawjau ai lam hta lang ai hkingrai ni hpe pyi, dai daram ahkyak la ai nga yang, shi kaw apnawng da ai sadi dung ai mayam ni hpe kade daram lanu lahku na hpe chye lu ai. Shi a matu anhte kade daram manu dan ai lam, shi ndai hku tsun ai: ‘Nanhte hpe hkra ai gaw, nye a myi sha hpe hkra ai re.’​—⁠Zehkaria 2:8.

Manam daw ai, gam jaw gam ya ai, mara raw ya nna matsan dum lam madun ai hpe Yehowa sadi hkrup

17. Yehowa gaw, hpa hpe “madat nna, na Ia nga ai” kun?

17 Yehowa gaw, shi a masha ni shada da gara hku kanawn mazum nga ai hpe “madat  nna, na la nga ai” ngu nna Malahki tsun ai. (Malahki 3:16) Yehowa gaw, “shi hte seng ai ni hpe chye ginhka ai.” (2 Timohti 2:19) Anhte tsun shaga ai, galaw ai lam yawng hpe shi chye nga ai. (Hebre 4:13) Hpunau nauna ni hpe matsan n chye dum ai nga yang, dai hpe Yehowa mu ai. Raitim, anhte ni manam daw ai, gam jaw gam ya ai, mara raw ya nna matsan dum myit madun ai nga yang, dai hpe Yehowa sadi hkrup na gaw teng sha re.​—⁠ Hebre 13:16; 1 Petru 4:8, 9.

“Yehowa Gaw Shi A Amyu Hpe Kau Da Na N Rai”

18. Anhte hpe shi a mayu masha byin hkra lata la ai majaw, Yehowa hpe chyeju dum ai lam gara hku madun na kun?

18 Anhte hpe shi a masha hku nna Yehowa madu ai majaw, chyeju dum ai lam madun mayu ga ai. Anhte a prat hpe shi hpang apnawng ai gaw, kaja htum dawdan lam re ai hpe anhte chye ga ai. Anhte gaw, “myit magaw ai prat a kaang” hta asak hkrung nga ai raitim, “mara n rawng nna yubak n kap ai sha,” “mungkan ga a nhtoi zawn” htoi tu lu ai. (Hpilipi 2:15, 16) Dai majaw, Yehowa nju ai lam yawng hpe koi na matu, anhte dawdan da ga ai. (Yaku 4:7) Hpunau nauna ni hpe mung Yehowa madu ai re ai majaw, shanhte hpe tsawra myit hte hkungga ai lam madun mayu ga ai.​—⁠Roma 12:10.

19. Yehowa gaw, shi madu ai ni hpe gara hku shaman chyeju jaw ai kun?

19 “Yehowa gaw shi a amyu hpe kau da na n rai” ngu nna Chyum Laika hta ga sadi jaw da ai. (Shakawn 94:14) Ndai gaw, pahkam hkam ai lam re. Hpa lam byin wa tim, Yehowa anhte hte arau nga na re. Anhte si mat tim pyi, shi anhte hpe malap kau na n re. (Roma 8:38, 39) “Hkrung nga yang gaw, dai Madu a lam anhte hkrung nga ga ai; si wa yang mung, dai Madu a lam anhte si wa ga ai. Dai re ai majaw, hkrung timung si timung, dai Madu hte anhte seng nga ga ai.” (Roma 14:8) Si mat sai sadi dung ai mayam ni yawng hpe, Yehowa asak bai jahkrung ya na aten hpe, anhte myit mada nga ga ai. (Mahte 22:31, 32) Ya aten hta mung, Yehowa kaw nna grai kaja ai shaman chyeju ni lu la nga ga ai. Chyum Laika kaw ndai hku tsun da ai hte maren re: “Yehowa hpe Karai Kasang hku nna nawku ai amyu hte sali wunli a matu shi lata la ai ni gaw ngwi pyaw ma ai.”​—⁠Shakawn 33:12, NW.