Content de lai

Malawm Ni Hpe Lai U

 Hkaja Na Sumhpa 27

Hkrum Wa Na Zingri Zingrat Lam A Matu Ya Kaw Nna Hkyen Lajang Da U

Hkrum Wa Na Zingri Zingrat Lam A Matu Ya Kaw Nna Hkyen Lajang Da U

“Hkristu Yesu hta tara hkungga ai lam hkan nang mayu ai ni nlang hte gaw, zingri zingrat ai hkrum lu na ma ra ai.”​—⁠2 TM 3:12.

Mahkawn 129 Shakut Sharang Nga Na

Sumhpa Hta Lawm Ai Lam *

1. Zingri zingrat lam a matu anhte hpa majaw hkyen lajang da ra ai kun?

MADU Yesu garai n si shi ai shana hta, shi a sape ni gaw nju ndawng hkrum na ngu shi tsun wa ai. (Yhn 17:14) Dai ni aten du hkra, sadi dung ai Hkristan ni gaw teng man ai nawku dawjau ai lam hpe ninghkap ai ni a majaw, zingri zingrat hkrum nga ai. (2 Tm 3:12) Ndai hpang jahtum nhtoi htum hkyen sai hte maren, anhte a hpyen ni gaw anhte hpe grau nna ninghkap wa na hpe myit mada da ga ai.​—⁠Mat 24:9.

2-3. (a) Hkrit tsang ai hte seng nna anhte hpa hpe chye da ra ai kun? (b) Ndai sumhpa hta hpa lam hkaja mat na kun?

2 Zingri zingrat hkrum wa ai shaloi hkamjan lu na matu, ya kaw nna gara hku hkyen lajang mai ai kun? Hkrum wa na lam yawng hpe tau hkrau n myit da ra ai. Myit da na nga yang, hkrit tsang ai myit ni anhte hpe shingkang ka-up wa chye ai. Jahkrit shama ai lam ni hpe tau hkrau nna myit ai gaw, chyam dinglik lam ni garai n hkrum shi yang pyi hkrat sum mat chye ai. (Gsh 12:25; 17:22) Hkrit tsang ai gaw, atsam rawng ai laknak re ai majaw, “hpyen wa ngu ai Satan” gaw, anhte hpe gasat na matu dai hpe akyu jashawn ai. (1 Pe 5:8, 9, JCLB) Anhte a makam masham ngang kang hkra ya kaw nna gara hku galaw mai na kun?

3 Ndai sumhpa hta, Yehowa hte anhte a hku hkau lam ngang kang hkra gara hku galaw mai ai lam hte ya kaw nna dai hku galaw na matu hpa majaw ahkyak ai lam hpe hkaja mat na re. Nden marai grau nga hkra gara hku galaw mai na lam ni hpe mung hkaja mat na re. Masha ni anhte hpe nju ndawng ai shaloi anhte galaw ra na lam ni hpe mung hkaja mat na re.

Yehowa Hte Hku Hkau Lam Ngang Kang Hkra Galaw Mai Ai Lam

4. Hebre 13:5, 6 hku nga yang anhte hpa hpe kam mai ai kun? Hpa majaw kun?

4 Yehowa gaw nang hpe tsawra nna, galoi n kau da ai hpe kam u. (Hebre 13:5, 6 hpe hti u.) Lai wa sai shaning law law hta  shapraw ai Sin Langchyi kaw ndai hku tsun da ai: “Karai Kasang hpe atsawm chye ai wa gaw, chyam dinglik lam ni hkrum magang, Karai hpe grau kamhpa magang re.” Dai gaw teng ai. Zingri zingrat lam ni hpe hkamjan lu na matu, Yehowa hpe tsawra nna, tsep kawp kamhpa ra ai. Yehowa anhte hpe tsawra ai lam hpe mung kam ra ai.​—⁠Mat 22:36-38; Yak 5:11.

5. Yehowa nang hpe tsawra ai lam chye hkra hpa gaw karum ya na kun?

5 Yehowa hte hku hkau lam kaja na matu bandung tawn let Chyum Laika hpe shani shagu hti u. (Yak 4:8) Hti ai shaloi, Yehowa a tsawra myit lawm ai atsam ningja ni hpe myit maju jung u. Yehowa tsun ai, galaw ai lam ni hta mu lu ai shi a tsawra myit hpe chye na hkra shakut u. (Pru 34:6) Nkau mi gaw tsawra myit galoi mung n hkamsha ga ai majaw, Karai Kasang shanhte hpe tsawra ai lam kam na matu yak chye ai. Nang dai zawn byin nga yang, Yehowa nang hpe madun ai tsawra matsan dum myit ni hpe shani shagu ka matsing da u. (Shk 78:38, 39; Rom 8:32) Na a mahkrum madup ni hte Chyum Laika labau ni hpe myit sawn sumru u. Rai yang, Yehowa galaw ya wa ai lam ni hpe nang matsing wa na re. Yehowa galaw ya ai lam ni hpe nang grau chyeju dum wa magang, Yehowa hte hku hkau lam grau ngang kang wa magang rai na re.​—⁠Shk 116:1, 2.

6. Shakawn 94:17-19 hku nga yang myit masin mahkra hte akyu hpyi ai gaw nang hpe gara hku karum ya lu ai kun?

6 Galoi mung akyu hpyi u. Ma langai hpe tsawra myit rawng ai kawa gaw ahpum da ai ngu shingran yu u. Dai ma gaw, shim lum ai ngu hkamsha ai majaw, shani tup hkrum wa ai kaja ai lam, n kaja ai lam yawng kawa hpe dan dan leng leng tsun dan na re. Nang mung Yehowa hte hku hkau lam kaja ai nga yang, Yehowa hpe akyu hpyi ai hku nna shani shagu sit sa na re. (Shakawn 94:17-19 hpe hti u.) Yehowa hpe akyu hpyi ai hku nna, “na a myit masin hpe ntsin zawn ru dat u.” Nang hkrit tsang ai lam yawng hpe tsun dan u. (Shy 2:19) Hpa akyu lu na kun? Chyum Laika hta tsun da ai “chye chyang ai nyan yawng hta grau lai ai Karai Kasang a ngwi pyaw” lam hpe tatut hkamsha lu na re. (Hpl 4:6, 7) Dai hku grau akyu hpyi magang, Yehowa hte grau ni htep wa ai ngu hkamsha na re.​—⁠Rom 8:38, 39.

Yehowa hte shi a Mungdan hpe kamhpa ai majaw nden marai lu

Satanli Jon gaw Karai A Mungdan hpe kam ai majaw shi a makam masham ngang kang wa (Laika pang 7 hpe yu u)

7. Karai Kasang a mungdan teng sha du wa na ngu Karai ga sadi jaw da ai hpe hpa majaw kam mai ai kun?

7 Karai Kasang mungdan a shaman chyeju ni teng sha hpring tsup wa na hpe kam u. (Bhk 23:19) Dai zawn ga sadi ni hpe kamsham ai myit yawm wa yang, Satan hte shi hpang hkan ai ni gaw nang hpe jahkrit shama lu na re. (Gsh 24:10; Heb 2:15) Karai Kasang a mungdan hpe kam ai myit ngang kang hkra, ya aten hta gara hku galaw lu na kun? Karai Kasang mungdan hte seng ai shi a ga sadi ni hte dai ga sadi ni teng sha byin wa na hpe hpa majaw kam mai ai lam hkaja u. Dai gaw gara hku karum ya lu ai kun? Makam masham a majaw, htawng 7 ning jahkrat hkrum wa ai hpunau Satanli Jon a mahkrum madup hpe myit yu ga. * Matut sadi dung let hkamjan lu na matu, shi hpe hpa gaw karum ya  wa ai kun? Shi ndai hku tsun ai: “Nye a makam masham gaw grai ngang kang ai. Hpa majaw nga yang, Karai Kasang a mungdan hte dai mungdan galaw ya na lam ni hpe ngai chye ai. N tsen ai myit galoi n nga ai. Dai majaw, Yehowa hpe ngai kau da hkra kadai mung n lu galaw ai.” Lama na, nang gaw Karai Kasang a ga sadi ni hpe tsep kawp kamsham yang, Yehowa hte nang grau ni htep wa nna, Yehowa hpe mung kau da sana n re.​—⁠Gsh 3:25, 26.

8. Zuphpawng lung mayu ai myit jasat gaw gara hpe madun dan nga ai kun? Sanglang dan u. 

8 Zuphpawng ni hpe ayan lung u. Zuphpawng ni gaw Yehowa hte ni htep hkra karum ya ai. Zuphpawng lung mayu ai anhte a myit jasat gaw, htawm hpang hta hkrum wa na zingri zingrat lam hpe kade daram hkamjan lu na, n lu na lam hpe madun nga ai. (Heb 10:24, 25) Hpa majaw dai hku lu tsun ai kun? Ya aten hta, zuphpawng lung ai hpe hkum pat chye ai kaji kajaw lam a majaw zuphpawng n lung ai nga yang, htawm hpang hta hpunau nauna ni hte hkrum na matu asak shoihpa nga yang, gara hku galaw na kun? Zuphpawng lung na matu tsep kawp dawdan da yang, ninghkap ai ni gaw anhte arau zuphpawng ai hpe pat shingdang wa ai shaloi, asum jaw kau na n re. Zuphpawng lung mayu ai myit nga hkra ya kaw nna hkyen lajang da u. Dai myit nga yang, masha ga madat na hta Karai Kasang a ga madat ai kaw nna hkring mat hkra, asuya ni pyi pat shingdang lu na n re.​—⁠Kas 5:29.

Chyum Daw ni hte Mungdan mahkawn ni hpe ya kaw nna matsing hkra shaman da yang zingri zingrat hkrum wa ai shaloi hkamjan lu na re (Laika pang 9 hpe yu u) *

9. Chyum Daw ni hpe matsing hkra galaw da ai gaw zingri zingrat lam a matu hpa majaw kaja ai hkyen lajang lam rai kun?

9 Nang ra sharawng ai Chyum Daw ni hpe matsing hkra galaw da u. (Mat 13:52) Anhte a matsing nyan gaw n hkum tsup ai. Raitim, Chyum Daw ni hpe bai myit dum wa hkra, Yehowa a chyoi pra ai wenyi gaw karum ya lu ai. (Yhn 14:26) Sinpraw Jamani kaw na htawng langai hta shi hkrai sha sharen da hkrum ai hpunau ndai hku tsun ai: “Tsa lam hku law ai Chyum Daw ni hpe bai myit dum wa ai majaw grai kabu ai. Chyum Laika hte seng ai lam amyu myu hpe myit sawn sumru nna dai nhtoi ni hpe shalai wa ai.” Dai Chyum Daw ni gaw, anhte a hpunau hpe Yehowa hte ni htep na matu, matut sadi dung lu na matu karum ya wa ai.

(Laika pang 10 hpe yu u) *

10. Mahkawn ni hpe hpa majaw matsing hkra galaw da ra ai kun?

10 Yehowa hpe shakawn ai mahkawn ni hpe matsing hkra galaw da u. Hpilip, Pawlu hte Sila ni bawng dung hkrum ai shaloi, shanhte matsing ai wenyi mahkawn ni hkawn wa ai. (Kas 16:25) Moi na Sobiyet munghpawm mungdan kaw nna Saiberiya de bawng masha hku nna sa kau hkrum ai hpunau nauna ni mung, shanhte a makam masham ngang kang hkra gara hku galaw wa ai kun? Nauna Mariya Hpedun ndai hku tsun ai: “Mahkawn buk kaw na anhte matsing  ai mahkawn yawng hpe hkawn ai.” Dai mahkawn ni gaw shanhte hpe n-gun lu shangun nna, Yehowa hte grau hku hkau wa shangun ai ngu shi tsun ai. Yehowa hpe shakawn ai mahkawn ni kaw nna nang ra ai mahkawn hpe hkawn ai shaloi n-gun lu la ai kun? Dai mahkawn ni hpe matsing hkra ya kaw nna shaman da u.​—⁠“ Nden Marai Jaw Rit” ngu ai lawk hpe yu u.

Nden Marai Grau Nga Hkra Galaw Ai Lam

11-12. (a) 1 Samuela 17:37, 45-47 hku nga yang Dawi gaw hpa majaw nden marai nga ai kun? (b) Dawi a mahkrum madup kaw nna gara ahkyak ai lam hpe sharin la lu ai kun?

11 Zingri zingrat hkrum wa ai shaloi, nden marai nga ra ai. Nang hta dai atsam n nga ai ngu hkamsha yang gara hku galaw na kun? Jet ai nden marai gaw, na a hkrang nsam, n-gun atsam hta madung ai n re. Goliat hte hkrum wa ai shaloi na ramma Dawi a mabyin hpe myit yu ga. Dai n-gun ja ai wa hte shingdaw dat yang, Dawi gaw grau kaji nna, n-gun kya ai, gasat na matu hpa laknak mung n nga ai. Nhtu pyi n nga ai. Raitim, shi hta nden marai nga ai. Dai majaw gumrawng nna n-gun ja ai Goliat hpe marai rawng let Dawi gasat wa ai re.

12 Dawi hta hpa majaw dai daram nden marai nga ai kun? Yehowa shi hte arau rai na hpe tsep kawp kam ai majaw re. (1 Samuela 17:37, 45-47 hpe hti u.) Goliat gaw shi hta kade daram kaba ai hpe myit maju n jung wa ai. De a malai, Yehowa hte shingdaw dat yang Goliat gaw kade daram kaji mat ai hpe sha, myit maju jung wa ai. Ndai mabyin kaw na hpa sharin la lu ai kun? Yehowa anhte hte arau re ai hpe kam nna, Chyahtum Chyalai Karai hte shingdaw dat ai shaloi ninghkap ai ni gaw hpa n rai mat ai hpe chye yang, nden marai nga wa na re. (2 Hl 20:15; Shk 16:8) Zingri zingrat garai n hkrum shi ai ya aten kaw nna, nden marai nga hkra gara hku galaw lu na kun?

13. Nden marai nga wa hkra gara hku galaw mai ai kun? Sanglang dan u. 

13 Kaga masha ni hpe Karai mungdan hte seng ai kabu gara shiga hkaw tsun ai hku nna, ya aten hta nden marai hpe shalat la mai ai. Hpa majaw kun? Hkaw tsun ai gaw, Yehowa hpe kamhpa na matu hte masha hpe hkrit ai myit hpe tawt lai lu na matu karum ya lu ai majaw re. (Gsh 29:25) Shamu shamawt ai lam gaw n-gun shan hpe n-gun grau nga wa shangun ai. Dai zawn sha, nta langai hpang langai hkaw tsun ai, shawa hpawng man sakse hkam ai, masat kaman sakse hkam ai hte bungli galaw ai shara hta hkaw tsun ai gaw, nden marai grau nga wa shangun ai. Ya aten hta hkaw tsun ai hku nna nden marai nga hkra galaw yang, anhte a magam bungli hpe hkum pat wa ai shaloi mung, matut hkaw tsun lu na re.​—⁠1 Ht 2:1, 2.

Nansi Yun gaw kabu gara shiga n hkaw tsun na matu tsun ai shaloi nyet kau (Laika pang 14 hpe yu u)

14-15. Nauna Nasi Yun hte Balentina Ganosakaya kaw nna anhte hpa sharin la lu ai kun?

 14 Nden marai nga wa nna sadi dung ai nauna 2 a kasi ningli kaw nna mung anhte sharin la lu ai. Nansi Yun gaw pe 5 daram sha galu ai. Raitim, nden marai nga ai. * Karai Kasang a mungdan kabu gara shiga n hkaw tsun na matu shi hpe tsun ai shaloi nyet kau ai. Dai majaw, Kumyunit Miwa asuya gaw shi hpe htawng 20 ning jan jahkrat kau ai. Shanhte a mungdan hta shi gaw “baw ja dik htum ai wa” re ngu nna san jep ai masha kaba gaw tsun wa ai.

Balentina Ganosakaya gaw Yehowa shi hte arau rai nga ai hpe tsep kawp kam (Laika pang 15 hpe yu u)

15 Dai zawn sha, Balentina Ganosakaya gaw, moi na Sobiyet munghpawm mungdan hta masum lang htawng hkrat wa ai. Yawng hpawn 21 ning daram re. * Hpa majaw kun? “Laksan hku nna shoihpa nga ai wa” ngu nna asuya ni shi hpe amying jaw da tim, shi matut hkaw tsun ai majaw re. Dai sadi dung ai nauna yan gaw hpa majaw nden marai nga wa ai kun? Yehowa gaw shanhte hte arau rai nga ai hpe kam ai majaw re.

16. Jet ai nden marai a madung gaw hpa rai kun?

16 Anhte hkaja wa sai hte maren, nden marai nga hkra galaw ai hta anhte a n-gun atsam hpe n mai myit maju jung ai. De a malai, Yehowa gaw anhte hte arau rai nga ai hpe kam ra ai. Shi gaw anhte maga kaw na gasat ya na hpe mung kam ra ai. (Trj 1:30–32; Zeh 4:6) Jet ai nden marai a madung gaw dai rai nga ai.

Nju Ndawng Hkrum Wa Yang Hkamjan Lu Na Lam

17-18. Yawhan 15:18-21 hta Yesu anhte hpe hpa sadi jaw da ai kun? Sanglang dan u.

17 Masha ni anhte hpe hkungga ai hpe anhte ra sharawng ga ai. Raitim, masha ni anhte hpe ra sharawng ai majaw, anhte manu dan nga ai n re. Yesu ndai hku tsun ai: “Masha ni gaw nanhte hpe n dawng n yawt ai hte, dai Masha Kasha a majaw shadaw jahka di kau nna, asawng asang di ai hte nanhte a mying hpe n hpru n mai ai arai hpe zawn shaden kau ai hkrum myit yang, nanhte a lu myit dai.” (Luk 6:22) Yesu hpa hpe tsun mayu ai kun?

18 Hkristan ni gaw masha ni a nju ndawng hkrum ai majaw, kabu ai ngu tsun mayu ai n re. De a malai, anhte hkrum wa na lam hpe sadi jaw nga ai re. Anhte gaw mungkan hte n  seng ai. Yesu a sharin achyin ai lam hte maren asak hkrung ai. Shi hkaw tsun ai shiga hpe anhte hkaw tsun ga ai. Dai majaw, mungkan gaw anhte hpe nju ndawng ai re. (Yawhan 15:18-21 hpe hti u.) Anhte gaw Yehowa hpe myit shapyaw ya mayu ai. Yehowa hpe anhte tsawra ai majaw, masha ni anhte hpe nju ndawng tim anhte hpa n byin ai.

19. Kasa ni a kasi ningli hpe gara hku hkan sa mai na kun?

19 Masha ni a tsun ai ga, galaw ai lam a majaw, Yehowa Sakse re ai hpe kaya ai ngu n hkamsha ging ai. (Mik 4:5) Yesu sat hkrum ai hpang, Yerusalem hta nga ai kasa ni a mabyin hpe myit sawn sumru ai hku nna, masha hpe hkrit ai myit hpe awng dang lu ai. Yuda nawku htung ningbaw ni gaw, shanhte hpe grai nju ndawng ai hpe shanhte chye ma ai. (Kas 5:17, 18, 27, 28) Raitim, Yesu a sape re ai lam nawku htingnu hte shawa hpawng kaw shani shagu hkaw tsun ai hku nna madun ma ai. (Kas 5:42) Hkrit ai majaw n hkaw tsun ai sha n nga ai. Anhte mung jawng hta, bungli hta, makau grup-yin hta Yehowa Sakse re ai hpe tsun dan na nga yang, hkrit ai myit hpe awng dang lu na re.​—⁠Kas 4:29, 30; Rom 1:16.

20. Masha ni a nju ndawng hkrum tim kasa ni hpa majaw kabu ma ai kun?

20 Kasa ni hpa majaw kabu ai kun? Shanhte hpa majaw nju ndawng hkrum ai hpe chye ai majaw re. Dai hku chye da ai majaw, Yehowa myit ra ai hpe galaw nna n tara ai hku kanawn mazum hkrum ai shaloi, shanhte arawng la lu ai re. (Luk 6:23; Kas 5:41) Kasa Petru ndai hku ka wa ai: “Dinghpring ai lam a majaw, nanhte nni nkri hkrum myit yang gaw, nanhte a lu nga myit dai.” (1 Pe 2:19-21; 3:14) Jaw ai hpe galaw ai majaw nju ndawng hkrum na hpe anhte chye da yang, gaja wa hkrum wa ai shaloi, Yehowa hpe n nawku mat ai baw byin sana n re.

Hkyen Lajang Yang Lu La Na Akyu Ni

21-22. (a) Zingri zingrat lam a matu hkyen lajang lu hkra hpa galaw mai ai kun? (b) Hpang na sumhpa hta hpa lam hkaja mat na kun?

21 Yehowa hpe nawku dawjau ai lam hpe galoi aten hta pat shingdang hkrum wa na, zingri zingrat galoi hpang wa na hpe anhte n chye ga ai. Raitim, ya kaw nna hkyen lajang da ra ai hpe gaw anhte chye ga ai. Dai hku hkyen lajang ai hta, Yehowa hte hku hkau lam kaja hkra galaw ai, nden marai nga hkra galaw ai, masha ni nju ndawng yang hpa galaw na hpe sharin la ai lam ni lawm ai. Htawm hpang hta Yehowa hpe matut nawku lu na matu, ya kaw nna hkyen lajang da ai gaw anhte hpe karum ya na re.

22 Nawku dawjau ai lam hpe pat shingdang wa yang, hpa galaw na kun? Hpang na sumhpa hta, pat shingdang hkrum ai lapran Yehowa hpe matut nawku lu na matu karum ya lu ai Chyum Laika npawt tara ni hpe hkaja mat na re.

Mahkawn 118 ‘Kamsham Myit Shalaw Ya Rit’

^ စာပိုဒ်၊ 5 Anhte gaw nju ndawng n hkrum mayu ga ai. Raitim, kade n na yang zingri zingrat ai lam ni anhte hkrum wa na re. Ndai sumhpa gaw, hkrum wa na zingri zingrat lam hpe nden marai hte tawt lai lu hkra karum ya na re.

^ စာပိုဒ်၊ 7 1965, December 15, Sin Langchyi-E laika man 756-767 hpe yu u.

^ စာပိုဒ်၊ 14 1979 July 15, Sin Langchyi-E laika man 4-7 hpe yu u. Jehovah’s Name Will Be Made Known ngu ai video hpe JW Broadcasting® hta yu u. (လူတွေ့မေးမြန်းမှုများ၊ တွေ့ကြုံမှုများ ngu ai hta yu u.)

^ စာပိုဒ်၊ 15 2008 Yehowa Sakse Ni A Shaning Ginchyum Laika Buk-E a laika man 191-192 hpe yu u.

^ စာပိုဒ်၊ 67 SUMLA HPE HTAI DAN AI LAM: Dinghku nawku hta, kanu kawa ni gaw maisau pa hpe akyu jashawn nna, ma ni Chyum Daw ni hpe matsing lu hkra karum ya nga.

^ စာပိုဒ်၊ 70 SUMLA HPE HTAI DAN AI LAM: Zuphpawng sa nga ai laman mawdaw ntsa hta dinghku langai gaw Mungdan mahkawn ni hpe shaman nga.