Content de lai

Malawm Ni Hpe Lai U

 Hkaja Na Sumhpa 30

Nawku Htung N Nga Ai Ni A Myit Masin De Du Hkra Hkaw Tsun Lu Ai Lam

Nawku Htung N Nga Ai Ni A Myit Masin De Du Hkra Hkaw Tsun Lu Ai Lam

“Nkau mi hpe lam langai ngai hte hkye hkrang la lu hkra, masha yawng mayawng hta lam yawng mayawng, ngai hkan shatsup nngai.”​—⁠1 KO 9:22.

Mahkawn 82 ‘Nhtoi Htoi Tu Nga Mu’

Sumhpa Hta Lawm Ai Lam *

1. Lai wa sai 10 ning ladaw ni hta shara nkau mi kaw hpa ni galai shai wa ai kun?

LAI WA sai shaning hkying hku hta, mungkan kaw nga ai masha law malawng gaw, nawku htung langai ngai hta shang lawm ma ai. Raitim, lai wa sai 10 ning ladaw ni hta gaw grai shai mat sai. Nawku htung hpe n kamsham ai masha ni grau grau law wa ai. Mungdan nkau mi kaw nna masha law malawng gaw, shanhte hta nawku htung n nga ai ngu tsun ma ai. *​—⁠Mat 24:12.

2. Nawku htung n nga ai masha ni hpa majaw law wa ai kun?

2 Nawku htung n nga ai ni * hpa majaw law wa ai kun? Masha nkau gaw pyaw hpa lam (sh) myit ru myit tsang lam ni hpe sha myit maju jung nga ai majaw rai na re. (Luk 8:14) Nkau mi gaw Karai Kasang n nga ai ngu hkap la wa ma ai. Masha nkau mi gaw, Karai Kasang hpe kamsham tim, nawku htung gaw prat n dep mat sai, n seng ang sai, hpung tang hpaji hte sawn dinglik lu ai hpaji hku nga yang mung shai taw nga ai ngu myit ma ai. Ngut nna, asak gaw yat yat kung hpan wa ai ngu nna manang ni, sara ni hte shiga shapoi ai ni kaw nna shanhte na la ai majaw mung rai na re. Raitim, Karai Kasang hpe kam na matu, grai kaja ai madi madun lam ni nga ai hpe gaw shanhte nau n na ga ai. Gumhpraw hte ahkang aya hpe ra marin ai nawku htung ningbaw ni hpe, masha nkau mi gaw grai hkyet rung ai majaw mung re. Shara nkau mi hta nga yang, asuya gaw nawku htung hte seng ai lam ni galaw na matu ahkang n jaw ai majaw re.

3. Ndai sumhpa a yaw shada lam gaw hpa rai kun?

 3 “Masha amyu baw shagu hpe sape shatai” na matu, Yesu anhte hpe lam matsun da ai. (Mat 28:19) Nawku htung n nga ai masha ni Karai Kasang hpe tsawra wa na matu hte Hkristu a sape byin wa na matu, anhte gara hku karum ya mai na kun? Masha ni gaw shanhte nga kaba wa ai shingdu labau hta hkan nna, anhte a shiga hpe amyu myu bai htang chye ai. Ga shadawn, Urawpa kaw na masha ni gaw, Asha kaw na masha ni hte bai htang ai lam n bung ma ai. Hpa majaw kun? Urawpa kaw na masha law law gaw, Chyum Laika hte seng ai lam nkau hpe chye nna, Karai Kasang gaw yawng mayawng hpe hpan da ai lam hpe mung na ga ai. Raitim, Asha kaw na masha law malawng gaw, Chyum Laika hte seng ai lam hpe loi mi sha chye ai (sh) tsep kawp n chye ma ai. Hpan Madu hpe mung n kam ma ai. Ndai sumhpa a yaw shada lam gaw, gara shingdu labau kaw na raitim, hkaw tsun magam hta hkrum ai ni yawng a salum de du hkra karum ya na matu re.

Kaja Ai Ningmu Matut Nga Hkra Galaw U

4. Kaja ai ningmu hpa majaw matut nga ra ai kun?

4 Kaja ai ningmu nga u. Nawku htung n nga ai masha ni mung, shaning shagu Yehowa Sakse ni byin wa ai. Masha law law gaw, kaja ai tsang madang ni nga tim, hpyi hpun ai nawku htung ni hpe gaw hkyet rung ai ngu hkamsha ma ai. Masha nkau gaw, n kaja ai tsang madang ni nga nna, dawm kau ra na n kaja ai akyang lailen ni mung nga ai. Yehowa a karum shingtau lam hte “n htum n wai asak lu la na san da ai ni” hpe anhte tam mu na gaw teng sha re.​—⁠Kas 13:48; 1 Tm 2:3, 4.

Chyum Laika hpe n kamsham ai masha hpe sakse hkam yang hkaw tsun ladat hpe galai shai u (Laika pang 5-6 hpe yu u) *

5. Anhte a shiga hpe masha ni atsawm bai htang ai gaw hpa majaw kun?

5 Tsawra myit nga nna hpaji rawng u. Masha law law gaw, anhte tsun ai lam a majaw n re ai sha, anhte tsun ai ladat a majaw, shiga hpe hkap la ai re. Anhte a tsawra myit, hpaji rawng ai lam hte shanhte hpe teng sha myit lawm ai lam hpe, shanhte ra sharawng ai majaw re. Anhte tsun ai hpe madat na matu atik anang n mai shadut ai. Nawku htung hte seng nna shanhte a ningmu hpe chye na hkra anhte shakut ai. Ga shadawn, nkau mi gaw masha tsasam ni hte nawku htung a lam n tsun mayu ai. Nkau mi gaw, Karai Kasang hte seng nna shanhte a ningmu hpe san ai gaw, n kaja ai lailen ngu nna sawn la ai. Masha nkau mi chyawm gaw, Chyum Laika hkaja ai hpe kaga ni mu na hpe kaya ma ai. Laksan hku nna, Yehowa Sakse langai hte sharin ai shaloi hta re. Gara hku mi raitim, shanhte a hkamsha lam hpe anhte chye na ya ra ai.​—⁠2 Tm 2:24.

6. Pawlu gaw galai shai ai lam gara hku galaw wa ai kun? Anhte shi hpe gara hku kasi la mai ai kun?

6 “Chyum Laika,” “hpan da ai lam,” “Karai Kasang,” “nawku htung” zawn re ai ga si ni hpe anhte tsun ai shaloi, n ra na masa nga yang, gara hku galaw na kun? Kasa Pawlu hpe kasi la ai hku nna, anhte a tsun shaga ai ladat hpe galai shai mai ai. Yuda ni hte ga shaga ai shaloi hta Pawlu gaw, Chyum Laika hpe lakap nna tsun ai. Raitim, Aripagu kaw Greek myit mang ninghkrin ni hte ga shaga ai shaloi hta gaw, Chyum Laika hpe dingtawk lakap nna n tsun ai. (Kas 17:2, 3, 22-31) Pawlu a kasi ningli hpe gara hku hkan sa mai na kun? Chyum Laika hpe n hkap la ai masha hte hkrum yang, ga shaga ai shaloi Chyum Laika hpe dingtawk lakap nna n tsun ai gaw kaja htum rai na re. Marai langai gaw nang hte Chyum Laika arau hti nga ai hpe kaga ni mu na hpe tsang yang, electronic hking rai ni zawn re ai hpe lang nna kaga ni n sadi hkrup ai hku nna madun mai ai.

7. 1 Korinhtu 9:20-23 hku nga yang Pawlu zawn hpa galaw ra ai kun?

7 Chye na ya nna madat ya u. Anhte hte hkrum ai masha ni hta shanhte hpe shingkang ka-up da ai lam ni nga ai hpe chye da ra ai. (Gsh 20:5) Pawlu a kasi ningli hpe bai myit yu ga. Shi gaw Yuda masha ni a lapran hta nga kaba wa ai. Raitim, Yehowa hte Chyum Laika a lam hpe loi mi sha chye ai (sh) tsep kawp n chye ai maigan masha ni hpe hkaw tsun ai shaloi, galai shai nna hkaw tsun wa ai. Anhte a hkaw tsun lawk hta nga ai masha ni hpe matsan dum myit hte chye na ya na matu, nawku hpung kaw na mahkrum madup nga ai ni  hpe san mai ai. Shing nrai, tam sawk sagawn ai lam ni galaw ra ai.​—⁠1 Korinhtu 9:20-23 hpe hti u.

8. Chyum Laika hte seng nna ga shaga hpang mai ai lam langai gaw hpa rai kun?

8 Anhte a bandung gaw ‘ging dan ai’ ni hpe tam na matu re. (Mat 10:11) Dai hku tam lu na matu, shanhte a ningmu hpe tsun dan wa hkra saw shaga ra nna, atsawm madat ya ra ai. Ingalan kaw na hpunau gaw, ngwi pyaw ai dinghku hte seng ai lam, ma ni hpe bau maka ai lam, n tara ai lam ni hpe gara hku hkamjan lu na ngu ai lam hte seng nna shanhte a ningmu hpe san ai. Shanhte tsun wa ai hpe madat ya nna, ndai hku tsun ai: “Lai wa sai shaning 2,000 daram hta ka da ai ndai hpaji jaw ga hpe nang gara hku shadu ai kun?” Dai hpang, “Chyum Laika” ngu ai ga si hpe n tsun ai sha, phone kaw nna atsawm lata da ai Chyum daw hpe madun ai.

Masha Ni A Myit Masin De Du Hkra Galaw U

9. Karai Kasang hte seng ai lam tsun ai hpe n ra ai masha ni hpe gara hku karum ya mai na kun?

9 Karai Kasang a lam tsun jahta ai hpe n ra ai masha ni hpe, shanhte chye da ai lam lama ma hpe tsun ai hku nna, myit masin de du hkra galaw mai ai. Ga shadawn, masha ni gaw shingra tara hpe grai mau ma ai. Dai majaw, lawu na lam zawn re ai lam ni hpe tsun mai ai: “Shingra tara hta nga chyalu arai ni hpe hpung tang hpaji du ni gaw yu la nna, arung arai ni gin shalat ma ai hpe nang chye na re. Ga shadawn, ga tsun kawk (microphone) hpe galaw ai ni gaw, dusat ni a na hpe atsawm hkaja nna galaw ma ai. Sumla dem ai kemra galaw ai wa gaw, dusat ni a myi hpe yu nna galaw ai. Shingra tara hpe myit dat yang, nang hpa hpe myit hkrup ai kun? Shi hkrai shi byin wa ai kun? Marai langai ngai hpan da ai majaw kun? Lama ma a majaw kun?” Atsawm madat ya ngut ai hpang, ndai hku tsun mai ai: “Na hte myi a hkrang kaw nna hpaji du ni sharin la ai nga yang, shanhte gaw kadai kaw na sharin la nga ai kun? nga nna anhte myit na re. Moi na laika ka sara langai tsun da ai lam gaw grai myit lawm hpa re: ‘Na shatut ai wa gaw, n na lu na rai ni? Myi hpan da ai wa gaw, n mu lu na a hka kun? . . . Masha wa hpe chye chyang ai lam sharin ya ai.’ Hpung tang hpaji du nkau mi gaw, dai ga hpe hkap la nna, hpan da ai lam hpe kam wa ma ai.” (Shk 94:9, 10) Dai hpang, jw.org® kaw nna “Ramma Ni” ngu ai ga baw npu hta lawm ai “Ramma Ni Tsun Ai Ga​—⁠Karai Kasang Hpe Kam Sham Ai Lam” ngu ai video hpe madun u. (LAILI LAIKA NI > VIDEO NI ngu ai npu hta yu u.) Shing nrai, Myen amyu ga hte lu mai ai Hkrung Mahkrung Gaw Hpan Da Hkrum Ai Kun? ngu ai laika buk hpe jaw mai ai.

10. Karai Kasang a lam tsun ai hpe n ra ai marai langai ngai hte gara hku ga shaga hpang mai na kun?

10 Masha law malawng gaw kaja ai prat hpe myit mada ma ai. Raitim, masha law law gaw, mungkan ga jahten hkrum na (sh) grai shoihpa nga wa na hpe hkrit tsang ma ai. Karai Kasang a lam tsun ai hpe n ra ai masha ni gaw, mungkan  a masa lam hte seng ai lam ni hpe grai jahta mayu ma ai nga nna Naw We mungdan kaw na hpung kawan hpunau tsun ai. Masha ni hpe shachyen ngut ai hpang shi ndai hku tsun ai: “Kaja ai htawm hpang prat hte seng nna hpa myit mada lam nga ai kun? Anhte a myit mada lam gaw, mung masa galaw ai ni, hpung tang hpaji du ni (sh) marai langai ngai a ntsa madung nga ai kun?” Atsawm madat ya ngut ai hpang, htawm hpang hte seng nna kaja ai lam hpe madun da ai Chyum daw langai hpe shi hti dan ai. Mungkan ga gaw galoi mung agrin nga nna kaja ai masha ni gaw dai hta htani htana nga lu na ngu ai Chyum Laika ga sadi hpe masha nkau mi grai myit lawm ma ai.​—⁠Shk 37:29; Hpj 1:4.

11. Masha ni hpe ga shaga hpang mai na matu ladat amyu myu hpe hpa majaw lang ging ai kun? Roma 1:14-16 hku nga yang Pawlu a kasi ningli hpe anhte gara hku hkan sa mai na kun?

11 Masha ni hte ga shaga hpang mai ai ladat amyu myu hpe lang ging ai. Hpa majaw kun? Marai langai hte langai n bung ai majaw re. Marai langai ra sharawng ai lam hpe kaga langai gaw ra sharawng na n re. Nkau mi gaw Karai Kasang a lam (sh) Chyum Laika a lam tsun ai hpe ra sharawng tim, kaga lam hku nna tsun hpang ai hpe ra sharawng ma ai. Gara masa hta raitim, masha amyu myu hpe tsun shaga lu na matu ahkaw ahkang tam ging ai. (Roma 1:14-16 hpe hti u.) Myit dingman ai ni a myit masin hta tengman ai lam rawt jat wa hkra galaw lu ai gaw, Yehowa langai sha re ai hpe anhte myit dum ra ai.​—⁠1 Ko 3:6, 7.

Asha Dan Masha Ni Hpe Tengman Ai Lam Tsun Dan

Hkaw tsun masha law law gaw, Hkristan Mungdan n re ai kaw nna sa wa ai masha ni hpe myit lawm ai lam madun nna, tatut re ai Chyum Laika hpaji byeng-ya ni hpe tsun dan nga (Laika pang 12-13 hpe yu u)

12. Hpan Madu hte seng nna n myit ga ai Asha dan ni kaw nna masha ni a salum de du hkra gara hku galaw mai na kun?

12 Mungkan ting hta, hkaw tsun masha law law gaw, nawku htung hte seng nna pat shingdang da ai mungdan ni kaw nna masha ni hte hpawn, Asha dan kaw nna sa wa ai masha ni hte hkrum chye ai. Asha dan kaw nna mungdan law law hta nga kaba wa ai masha ni gaw, Hpan Madu nga ai, n nga ai hte seng nna kalang mi mung n myit ga ma ai. Nkau mi gaw chye mayu ai myit nga nna Chyum Laika hkaja na matu saw shaga yang hkap la ma ai. Raitim, nkau mi gaw shanhte n chye ai lam ni hpe sharin la na matu myit n lawm ma ai. Shanhte a myit masin de du hkra hpa galaw mai na kun? Hku hkau ai hku ga shaga hpang ai, myit lawm ai lam madun ai, Chyum Laika tara ni hpe hkan sa ai majaw tinang a prat rawt jat wa ai lam hpe tsun dan ai hku nna, mahkrum madup nga ai hkaw tsun masha nkau mi awng dang lam lu la ma ai.

13. Chyum Laika hpe masha ni myit lawm wa hkra hpa gaw karum ya lu ai kun? (Makawp sumla hpe yu u.)

13 Masha law law gaw, Chyum Laika kaw na tatut re ai hpaji byeng-ya ni hpe grai ra sharawng ma ai. (Hpj 7:12) Nyu Yawk mare hta, Miwa amyu ga shaga ai masha ni hpang de sa chyai ai nauna langai ndai hku tsun ai: “Masha ni hpe myit lawm ai lam madun nna shanhte tsun ai hpe madat ya ai. Shanhte ni gaw kaga mungdan kaw nna htawt wa ai nau n na shi ai hpe chye ai majaw, ndai hku san ai: ‘Ndai de htawt wa ai gara hku kun? Bungli tam mu sai kun? Buga masha ni atsawm kanawn mazum ma ai kun?’” Kalang lang dai hku tsun ai gaw Chyum Laika sharin hpang na matu lam hpaw wa ai. Shanhte hkap la na masa nga yang, ndai hku bai tsun ai: “Masha ni hte atsawm kanawn mazum chye na matu ahkyak htum gaw hpa rai kun? Chyum Laika kaw nna ga shagawp langai hpe madun mayu ai. Dai hta ndai hku tsun da ai: ‘Ga law ai npawt gaw, hka shalen dat ai hte bung ai majaw, Garai n ga law yang, htailai ai lam koi kau u.’ Kaga masha ni hte atsawm kanawn mazum chye hkra, ndai hpaji jaw ga gaw karum ya lu ai ngu nang shadu ai kun?” (Gsh 17:14) Dai zawn tsun shaga ai gaw, shanhte hpang de bai sa chyai mai na, n mai na hpe chye hkra karum ya ai.

14. Mungkan A Sinpraw maga kaw nga ai hpunau langai gaw Karai Kasang hpe n kam ai masha ni hpe gara hku karum ya wa ai kun?

14 Karai Kasang hpe n kamsham ai ni hte anhte gara hku tsun shaga na kun? Mungkan A Sinpraw maga na makam masham n nga ai ni hpe hkaw tsun ai hta mahkrum madup grai nga ai  hpunau langai ndai hku tsun ai: “Shawoi tsun chye ai zawn sha, marai langai ndai hku tsun ai, ‘Karai Kasang hpe ngai n kamsham ai,’ dai gaw shi a buga na masha law malawng nawku ai hpara ni hpe tsun ai re. Hpara law malawng gaw masha lata hte galaw ai rai nna, Karai Kasang n re ai hpe ngai mung hkap la ai. Dai majaw, Yeremia 16:20 hpe ngai hti dan ai: ‘Masha gaw, Karai Wa n re ai hpara ni hpe, tinang a matu galaw mai a ni?’ Dai hpang ndai hku san ai: ‘Masha lata hte galaw ai kaw nna hpara ajet byin wa mai na kun?’ Ngai atsawm madat ya nna Esaia 41:23 hpe bai hti dan ai: ‘Nanhte Hpara rai nga ai hpe, anhte chye na lu hkra, byin magang ra ai lam ni, tsun dan mi.’ Dai hpang, Yehowa gaw htawm hpang hte seng nna tau hkrau tsun da ai ga shadawn langai hpe madun dan ai.”

15. Asha dan a Sinpraw maga kaw nga ai hpunau langai a kasi ningli kaw nna hpa sharin la lu ai kun?

15 Asha dan a Sinpraw maga kaw nna hpunau langai gaw, bai kawan ai lam gara hku galaw ai hpe ndai hku tsun dan ai: “Hpring tsup ngut sai Chyum Laika myihtoi ga ni, Chyum Laika hpaji byeng-ya, ninggawn tawa hpe hkang nga ai tara ni hte seng ai ga shadawn ni hpe ngai madun ya ai. Dai lam ni gaw, asak hkrung nna hpaji rawng ai Hpan Madu nga ai hpe madun nga ai lam shanhte hpe tsun dan ai. Karai Kasang nga ai gaw mai byin ai ngu nna marai langai myit wa yang, Yehowa hte seng nna Chyum Laika hta tsun da ai lam ni hpe ngai madun dan ai.”

16. Hebre 11:6 hku nga yang Chyum ga sharin ni gaw Karai Kasang hte Chyum Laika hpe hpa majaw kam ra ai kun? Anhte gara hku karum ya mai na kun?

16 Nawku htung n nga ai masha ni hte Chyum Laika sharin ai shaloi, Karai Kasang nga ai ngu ai hpe shanhte grau nna kam wa hkra anhte matut nna karum ya ra ai. (Hebre 11:6 hpe hti u.) Ngut nna, Chyum Laika hpe shanhte kam wa na matu mung karum ya ra ai. Tengman lam ni hpe chyahkring hkring tsun dan ra chye ai. Chyum Laika hkaja ai aten shagu hta, Chyum Laika gaw Karai A Mungga re ai hpe madi madun dan ra ai. Dai lam hta, hpungtang hpaji, labau ni hte mung tup hkrak jaw ai lam, hpring tsup ngut sai myihtoi ga ni a lam hte tatut re ai hpaji byeng-ya ni a lam hpe kadun dawk bawngban ai lam ni lawm ai.

17. Masha ni hpe tsawra myit madun yang hpa akyu lu la na kun?

17 Nawku htung nga ai ni raitim, n nga ai ni raitim shanhte hpe tsawra myit madun nna Hkristu a sape byin wa hkra anhte karum ya nga ai. (1 Ko 13:1) Karai Kasang gaw shanhte hpe tsawra nna, shi hpe bai tsawra shangun mayu ai lam, shanhte chye na hkra anhte sharin ya ai. Lai wa sai aten hta, nawku htung hpe loi mi sha myit lawm ai (sh) myit n lawm wa ai hkying hku law ai masha ni gaw, Karai Kasang hpe tsawra wa ai majaw, shaning shagu hkalup hkam la wa ma ai. Dai majaw, kaja ai hku mu mada let masha shagu hpe tsawra nna myit lawm ai lam madun mat wa ga. Shanhte tsun ai hpe atsawm madat ya nna, chye na hkra shakut ya ga. Hkristu a sape byin wa hkra, anhte a kasi ningli hte sharin ya ga.

Mahkawn 76 Gara Hku Hkam Sha Ai?

^ စာပိုဒ်၊ 5 Nawku htung n nga ai ni hte moi na hta grau nna hkrum chye ai. Shanhte hpe Chyum Laika tengman lam gara hku tsun dan na hpe ndai sumhpa hta hkaja ga. Yehowa hpe kamsham wa na matu hte Chyum Laika hpe kam wa na matu, gara hku karum ya lu ai lam ni hpe mung hkaja mat ga.

^ စာပိုဒ်၊ 1 Sawk sagawn ai lam galaw wa ai mungdan nkau mi gaw, Albania, Australia, Austria, Azerbaijan, Canada, China, Czech Republic, Denmark, France, Germany, Hong Kong, Ireland, Israel, Japan, Nehterlands, Norway, Dingda Korea, Spain, Sweden, Switzerland, United Kingdom hte Vietnam mungdan ni re.

^ စာပိုဒ်၊ 2 Ga Si A Lachyum: Ndai sumhpa hta, nawku htung n nga ai ni ngu tsun ai shaloi, nawku htung langai a hpung shang masha (sh) Karai Kasang hpe n kamsham ai masha hpe tsun mayu ai re.

^ စာပိုဒ်၊ 54 SUMLA HPE HTAI DAN AI LAM: Hpunau gaw tsi rung hta bungli arau galaw ai manang hpe sakse hkam nga. Hpang hta shi gaw Internet hku nna Chyum Laika hkaja na matu tam nga.