Content de lai

Malawm Ni Hpe Lai U

 Hkaja Na Sumhpa 40

“Hpang Jahtum Na Prat” A Jahtum Daw Hta Matut Amu Law Nga Ga

“Hpang Jahtum Na Prat” A Jahtum Daw Hta Matut Amu Law Nga Ga

“Ngang ngang kang kang, dakring dalang nga nga nna, dai Madu a bungli hta tut nawng e tsam mari shakut sharang nga nga mu law.”​—1 KO 15:58.

Mahkawn 58 Ngwi Pyaw Lam Ra Sharawng Ai Ni Hpe Tam Ga

Sumhpa Hta Lawm Ai Lam *

1. “Hpang jahtum na nhtoi ni” hta asak hkrung nga ai lam anhte gara hku chye lu ai kun?

1914 ning a hpang hta nang shangai wa ai kun? Rai yang, nang gaw “hpang jahtum na nhtoi ni” hta asak hkrung nga ai re. (2 Tm 3:1) Ndai aten hte seng nna Yesu tau hkrau tsun wa ai mabyin masa ni hpe anhte yawng na ga ai. Dai hta, majan, lusha hku hku ai, nnang nawn ai, ana zinli ni, tara tawt lai ai lam ni law htam wa ai hte hpawn, Yehowa a masha ni hpe zingri zingrat ai lam ni lawm ai. (Mat 24:3, 7-9, 12; Luk 21:10-12) Kasa Pawlu tau hkrau tsun wa ai masha ni a akyang lailen hte seng ai lam ni hpe mung anhte mu lu nga ai. (“ Dai Ni Aten Na Masha Ni A Akyang Lailen” ngu ai hpe yu u.) Yehowa hpe nawku dawjau ai ni hku nna, “hpang jahtum na prat” laman asak hkrung nga ai hpe anhte chye ga ai.​—Mik 4:1.

2. Gara ga san ni a mahtai hpe anhte chye ra ai kun?

2 1914 kaw nna aten ni grai lai mat wa sai majaw, anhte gaw “hpang jahtum na nhtoi” a jahtum daw hta asak hkrung nga ai. Jahtum grai ni wa sai majaw, ahkyak ai ndai ga san nkau a mahtai hpe anhte chye ra ai: “Hpang jahtum na nhtoi” a jahtum aten hta hpa mabyin ni byin wa na kun? Dai mabyin ni byin wa na aten hpe anhte la nga ai laman hpa galaw na matu Yehowa myit mada ai kun?

“Hpang Jahtum Na Nhtoi” A Jahtum Aten Hta Hpa Ni Byin Wa Na Kun?

3. 1 Htesaloni 5:1-3 na myihtoi ga hku nga yang mungdan ni gaw hpa hpe ndau shana wa na kun?

3 1 Htesaloni 5:1-3 hpe hti u. “Madu [Yehowa, NW] a shani” hpe Pawlu tsun wa ai. Ndai Chyum daw na Yehowa a shani ngu ai gaw, shut shai ai nawku htung re ai “galu kaba ai Babelon” hpe gasat ai shaloi hpang wa nna, Hara magedon hta htum mat na  hpe tsun mayu ai re. (Shr 16:14, 16; 17:5) Dai “shani” garai n hpang shi yang, mungdan ni gaw “ngwi pyaw ai hte asan apan rai nga ai” nga nna ndau shana wa na re. (Ga gale ai Chyum Laika nkau mi hta ndai hku tsun da ai: “Ngwi Pyaw Ai Hte Shim Lum Sai.”) Mungdan ni shada da kanawn mazum ai lam rawt jat wa ai lam hpe mungkan uphkang du ni tsun ai shaloi, dai zawn ga ni hpe kalang lang tsun wa na re. * Dai majaw, “ngwi pyaw ai hte asan apan rai nga ai” ngu ai ndau shana ai lam gaw Chyum Laika hta tsun da ai lam hte nhtan shai na re. Hpa majaw kun? Dai hku byin wa ai shaloi, mungkan uphkang du ni gaw mungkan hpe grau shim lum hkra galaw lu sai ngu masha ni shadu na re. Teng sha nga yang, “hten byak wa ai gaw akajawng sha” byin wa sana re.​—Mat 24:21.

“Ngwi pyaw ai hte asan apan rai nga ai” ngu ai mungdan ga daga ni a shut ai hku ndau shana ai lam hte hkalem n hkam ga (Laika pang 3-6 hpe yu u) *

4. (a) “Ngwi pyaw ai hte asan apan rai nga ai” ngu ai ndau shana lam hte seng nna gara lam ni hpe anhte la yu ra na kun? (b) Dai hte seng nna anhte hpa hpe chye da ai kun?

4 “Ngwi pyaw ai hte asan apan rai nga ai” ngu ai ndau shana lam hte seng ai lam nkau hpe anhte chye ai. Raitim, anhte n chye ai lam ni mung nga ai. Shanhte ndau shana na matu hpa gaw lam woi mat wa na (sh) gara hku ndau shana wa na hpe gaw anhte n chye ga ai. Dai hpe chyahkring hkring ndau shana na kun? (sh) laklai ai hku kalang sha shana na kun? ngu ai hpe mung anhte n chye ga ai. Raitim, mungkan a uphkang du ni gaw mungkan simsa lam hpe teng sha lu galaw sai ngu ai lam hpe anhte n kam ai. Dai zawn ndau shana ai lam gaw matut byin wa na lam ni hte seng nna maja nga na matu re. Dai gaw Yehowa a shani hpang sana ngu ai kumla re. Dai hpe gaw anhte chye ai.

5. Yehowa a shani hta jin jin rai nga lu na matu 1 Htesaloni 5:4-6 gaw anhte hpe gara hku karum ya ai kun?

5 1 Htesaloni 5:4-6 hpe hti u. Yehowa a shani hta gara hku jin jin rai nga lu ai lam Pawlu a hpaji jaw ga kaw nna anhte chye lu ai. “Masha gale zawn anhte n yup nga” ai sha, “maja” nga ging ai. Ga shadawn, anhte gaw mung masa lam hta galoi mung n shang lawm na matu hte matut nna lapran nga na matu sadi ra ai. Lama na, anhte shang lawm ai nga yang, “mungkan ga hte seng ai ni” rai mat na re. (Yhn 15:19) Mungkan a simsa lam lu na matu myit mada mai ai gaw Karai A Mungdan sha re ai hpe anhte chye ai.

6. Kaga ni hpa galaw na matu anhte karum ya mayu ai kun? Hpa majaw kun?

6 Tinang hkum tinang maja nga ai sha n-ga, kaga ni mung mungkan hta byin wa na lam hte seng nna Chyum Laika hta tau hkrau tsun da ai lam ni hpe chye lu hkra anhte karum ya mayu ai. Ru tsang kaba hpang ai shaloi hta gaw, Yehowa hpang de masha ni kayin wa na matu, grai hpang hkrat mat sai. Dai majaw, ya hkaw tsun na matu grai ahkyak ai. *

 Hkaw Tsun Magam Hta Matut Amu Law Nga U

Karai A Mungdan sha jet ai simsa lam hte shim lum lam jaw lu ai hpe hkaw tsun ai hku nna anhte madun (Laika pang 7-9 hpe yu u)

7. Ya anhte hpa galaw na matu Yehowa myit mada ai kun?

7 Shi a shani du hkyen sai majaw, hkaw tsun magam hta anhte matut amu law nga na matu Yehowa myit mada ai. Dai majaw, anhte gaw “madu a bungli hta . . . tsam mari shakut sharang nga” ra ai. (1 Ko 15:58) Anhte hpa galaw ra na hpe Yesu tau hkrau tsun da ai. Hpang jahtum na nhtoi hta byin wa na lam ni hpe tsun ai shaloi, ndai lam hpe mung tsun shalawm wa ai: “Dai kabu gara shi ga hpe, masha amyu baw shagu hpe, shawng hkaw dan lu na, rai nga ai”. (Mrk 13:4, 8, 10; Mat 24:14) Hkaw tsun magam sa shagu nang gaw dai Chyum Laika myihtoi ga hpring tsup hkra galaw ai hta shang lawm nga ai re.

8. Mungdan hkaw tsun magam gaw matut nna gara hku rawt jat nga ai kun?

8 Mungdan hkaw tsun magam gaw matut nna gara hku rawt jat nga ai kun? Shaning shagu dai magam gaw rawt jat nga ai. Ga shadawn, hpang jahtum na nhtoi laman hta, Mungdan shiga hkaw tsun ai ni gaw grau nna rawt jat nga ai hpe myit yu u. 1914 hta, mungdan 43 kaw hkaw tsun masha 5,155 sha nga ai. Dai ni aten hta gaw, mungdan 240 hta hkaw tsun masha wan 8.5 daram rai sai. Raitim, anhte a magam gaw n ngut kre shi ai. Masha ni a manghkang yawng hpe hparan ya lu ai gaw Karai A Mungdan sha re ai lam anhte matut nna shana ra ai.​—Shk 145:11-13.

9. Mungdan shiga hpe hpa majaw matut nna hkaw tsun ra ai kun?

9 Hkaw tsun magam ngut sai nga nna Yehowa tsun ai aten du hkra galaw ra ai. Yehowa hte Yesu Hkristu hpe masha ni chye chyang wa na matu aten kade daram naw ngam ai kun? (Yhn 17:3) Anhte n chye ga ai. Ru tsang kaba garai n hpang shi yang, “myit madung hte shakut” ai ni gaw, kabu gara shiga hpe naw hkap la lu nna, Yehowa hpe nawku na matu lata lu ai lam hpe anhte chye ga ai. (Kas 13:48, NW) Aten garai n hpang hkrat shi yang, shanhte hpe gara hku karum ya lu na kun?

10. Masha ni hpe tengman ai lam sharin ya lu na matu Yehowa gaw anhte hpe hpa ni jaw da ai kun?

10 Masha ni hpe tengman ai lam anhte sharin ya lu na matu, Yehowa gaw shi a uhpung hku nna ra ai lam yawng hpe hkyen lajang da ya ai. Ga shadawn, shaman shakyang ya ai lam hpe bat lapran zuphpawng hku nna bat shagu lu la nga ai. Shawng nnan hkaw tsun ten hte bai kawan ai lam ni hta gara hku tsun ra na hpe chye hkra dai zuphpawng gaw karum ya ai. Chyum ga sharin gara hku galaw na lam hpe mung sharin ya ai. Sharin Achyin  Hkingrai Ni hpe mung Yehowa a uhpung gaw hkyen lajang da ya ai. Dai hkingrai ni gaw . . .

  • ga shaga hpang mai na matu

  • myit lawm hkra shadut ya lu na matu

  • Chyum Laika hpe grau hkaja mayu wa hkra karum ya na matu

  • Chyum Ga sharin ni hpe tengman ai lam sharin ya na matu hte

  • myit lawm ai ni hpe anhte a website de shang yu na matu, Nawku Htingnu de sa chyai na matu saw shaga chye hkra anhte hpe karum ya lu ai.

Ndai hkingrai ni anhte hta nga ai hte sha n ngut ai. Dai ni hpe anhte akyu jashawn ra ai. * Ga shadawn, myit lawm ai masha hte ga shaga ngut ai hpang, garan laika (sh) magazine hpe jaw na re. Shi hte hpang kalang nang n hkrum shi ai laman dai laika hpe hti da lu ai. Anhte langai hpra a lit gaw hkaw tsun magam hta shata shagu amu law nga na matu re.

11. Online Chyum Laika Hkaja Ai Lamang hpe hpa majaw lajang da ai kun?

11 Bai nna, tengman ai lam hpe kaga ni sharin la lu hkra karum ya ai kaga lam gaw jw.org® hta na Online Chyum Laika Hkaja Ai Lamang re. Dai lamang hpe hpa majaw lajang da ai kun? Shata shagu, mungkan ting kaw nna mun hku law ai masha ni gaw Chyum Laika hkaja lamang hpe Internet kaw tam nga ai. Dai website kaw nna lamang gaw Chyum Laika kaw nna tengman ai lam hpe masha ni chye hkra shachyen ya lu ai. Nang hte hkrum ai masha nkau gaw, Chyum Laika hkaja ai hpe hkap la na matu htingnut chye ai. Rai yang, anhte a website kaw nna dai daw hpe madun mai ai (sh) hkaja na matu link hpe sa ya mai ai. *

12. Masha langai gaw Online Chyum Laika Hkaja Ai Lamang kaw nna hpa ni sharin la mai ai kun?

12 Online Chyum Laika Hkaja Ai Lamang kaw “Chyum Laika Hte Chyum Laika A Madu,” “Chyum Laika Kaw Nna Ahkyak Ai Masha Ni” hte “Chyum Laika Hta Lawm Ai Myit Mada Shiga” ngu ai lam ni hpe mara da ai. Dai lamang hpe hkaja ai laman, ndai lam ni hpe chye wa na re:

  • Chyum Laika gaw masha langai hpe karum ya lu ai lam

  • Yehowa, Yesu hte lamu kasa ni gaw kadai ni re ai lam

  • Shinggyim masha hpe Karai Kasang hpa majaw hpan ai lam

  • Yakhkak ai lam hte nhkru ai lam ni hpa majaw byin nga ai lam

Dai lam ni hpe Yehowa gara hku galaw ya na lam hpe mung chye lu na re:

  • Yakhkak jamjau ai lam hte si hkrung si htan hpe jahtum kau ya na lam

  • Asak bai hkrung hkra galaw ya na lam

  • Masha ni n galaw ya lu ai lam ni hpe Karai A Mungdan hku nna bai galaw ya na lam ni re.

13. Online hku nna hkaja ai lamang gaw Chyum ga sharin lamang a malai rai kun? Sanglang dan u.

13 Online hku nna hkaja ai lamang gaw, Chyum ga sharin lamang a malai n re. Sape shatai ai magam hpe galaw na matu Yesu anhte hpe laksan ahkaw ahkang jaw da ai. Online hku nna hkaja ai wa gaw chye wa ai lam hpe manu shadan nna grau hkaja mayu wa na hpe anhte myit mada ga ai. Rai yang, shanhte gaw Chyum ga sharin na matu hkap la wa chye ai. Hkaja ai lamang langai hpra a jahtum hta, shang yu ai wa gaw shi hte Chyum Laika hkaja na matu marai langai ngai hpe hpyi shawn na matu saw shaga hkrum ai. Anhte a website kaw nna, mungkan ting hta Chyum Laika hkaja na matu shani shagu hpyi shawn ai marai 230 jan hpe hkap la lu ai. Dai zawn marai langai ngai hte arau hkaja na matu grai ahkyak ai.

 Sape Shatai Ai Magam Hta Matut Galaw Nga U

14. Mahte 28:19, 20 hta Yesu lam matsun da ai hte maren hpa hpe kaja htum galaw ra ai kun? Hpa majaw kun?

14 Mahte 28:19, 20 hpe hti u. Chyum ga sharin galaw ai hku nna, Yesu a hkang da ai lam yawng hpe shanhte hkan sa lu hkra sharin ya ai hku nna “sape shatai” ai magam hpe anhte kaja htum galaw nga ga ai. Yehowa hte shi a Mungdan maga de tsap na matu kade daram ahkyak ai hpe chye na na matu shanhte hpe karum ya ra ai. Shanhte sharin ai lam ni hpe hkan sa nna, Yehowa kaw ap nawng let, hkalup hkam ai kaw du hkra karum ya ra ai ngu ai lachyum re. Rai yang she, Yehowa a shani hta shanhte asak lawt lu na re.​—1 Pe 3:21.

15. Hpa galaw na matu n shakut ging ai kun? Hpa majaw kun?

15 Lahta kaw tsun wa sai hte maren, ya aten hte mungkan a masa lam ni htum mat na aten a lapran aten loi sha ngam sai. Dai majaw, Hkristu a sape byin wa na matu yaw shada lam n nga ai ni hte Chyum Laika matut n hkaja ging ai. (1 Ko 9:26) Anhte a bungli gaw hkyak hkyak rai nga ai. Garai n hpang hkrat shi yang, Mungdan shiga hpe na mayu ai masha ni grai law hkra naw nga ai.

Shut Shai Ai Nawku Htung Ni Hte San San Nga U

16. Shingran 18:2, 4, 5, 8 hku nga yang anhte yawng hpa galaw ra ai kun? (Lawu matsing hpe yu u.)

16 Shingran 18:2, 4, 5, 8 hpe hti u. Dai Chyum Daw ni gaw shi a masha ni hpe Yehowa myit mada ai lam lama ma nga ai hpe madun dan ai. Jet ai Hkristan yawng gaw Galu Kaba Ai Babelon hte matut nna kaga san san nga ra ai. Tengman ai lam garai n sharin shi yang, Chyum Ga sharin ni gaw shut shai ai nawku htung a hpung shang masha langai byin wa chye ai. Shut ai nawku dawjau ai lam hta shang lawm wa nna, shamu shamawt ai lam ni hta mung shang lawm wa chye ai. Dai uhpung a matu alu gumhpraw mung shang lawm wa chye ai. Chyum Ga sharin gaw hkalup n hkam shi ai hkaw tsun masha langai garai n byin shi yang, shut shai ai nawku htung hpe kau da ra ai. Shi gaw mi na shut shai ai nawku htung hte matut mahkai nga ai nawku jawng (sh) uhpung de hpung shang masha n rai sai lam laika ka nna shana ra ai. *

17. Hkristan langai gaw gara kan bau bungli ni hpe koi ra ai kun? Hpa majaw kun?

17 Jet ai Hkristan ni gaw, Galu Kaba Ai Babelon hte matut mahkai nga ai kan bau bungli ni hpe n galaw na matu dawdan da ra ai. (2 Ko 6:14-17) Ga shadawn, shi gaw nawku jawng langai a bungli masha mung n byin ging ai. Dai sha n-ga, bungli galaw nga ai Hkristan langai gaw, shut shai ai nawku htung a htingnu ni hta bungli sa galaw na n re. Lama na, shi gaw bungli  madu rai yang mung, Galu Kaba Ai Babelon hte matut mahkai nga ai bungli ni hpe tender shawn ai lam (sh) myit hkrum ga shaka laika ka ai lam ni galaw na n re. Hpa majaw kun? Karai Kasang a ningmu hta n san seng ai ngu mu mada ai shut shai ai sharin achyin ai lam ni hte galaw hkawm sa ai lam ni hta n shang lawm mayu ai majaw re.​—Esa 52:11. *

18. Hpunau langai gaw kan bau bungli galaw ai hta Chyum Laika tsang madang ni hpe gara hku hkan sa wa ai kun?

18 Kan bau bungli galaw ai myitsu salang langai hpe lauban langai (contractor) gaw, lai wa sai shaning ni hta mare na nawku jawng langai hta lasama bungli galaw ya na matu karum hpyi wa ai. Hpunau gaw nawku jawng ni hta bungli n galaw ai ngu ayan na tsun ai hpe dai lauban wa chye ai. Ndai kalang hta, shi gaw kadai hpe mung n lu tam ai majaw, grai myit htum nga ai. Raitim, hpunau gaw dai bungli hpe n hkap la nna Chyum Laika tara ni hpe matut hkan sa ai. Hpang na bat buga shi laika hta, nawku jawng hte kaga lasama wa a sumla lawm wa ai. Hpunau gaw shi a tsang madang hpe asum jaw kau na nga yang, dai shi laika kaw shi a sumla lawm wa na re. Hpunau nauna ni a lapran shi a amying kade daram htenza mat na hpe myit yu u. Yehowa mung kade daram yawn mat na hpe myit yu u. 

Anhte Hpa Sharin La Lu Ai Kun?

19-20. (a) Anhte hpa ni hkaja wa sai kun? (b) Matut nna hpa ni naw hkaja na kun?

19 Chyum Laika myihtoi ga hku nga yang, mungkan hta kade n na yang byin wa na madung mabyin gaw, “ngwi pyaw ai hte asan apan rai nga ai” ngu nna mungdan ga daga ni a ndau shana ai lam re. Dai mungdan ga daga ni gaw, jet ai simsa lam hpe n lu galaw ya ai lam Yehowa gaw anhte hpe sharin ya ai majaw chyeju dum ai. Dai aten hte akajawng sha hten run mat na lam n byin shi yang, anhte hpa galaw ging ai kun? Mungdan shiga hkaw tsun ai lam hte sape shatai ai magam hta matut amu law nga na matu Yehowa myit mada ai. Shut shai ai nawku htung ni hte mung matut nna san san nga ra ai. Galu Kaba Ai Babelon hte matut mahkai ai bungli ni hte hpung shang masha byin ai lam ni hpe anhte koi ra ai.

20 “Hpang jahtum na nhtoi” a jahtum aten laman matut byin wa na kaga mabyin ni naw nga ai. Yehowa anhte hpe galaw shangun mayu ai lam ni mung nga ai. Hpa ni rai na kun? Kade n na yang byin wa na lam ni a matu gara hku hkyen lajang mai na kun? Hpang na sumhpa hta chye lu na re.

Mahkawn 71 Anhte Gaw Yehowa A Hpyen Dap!

^ စာပိုဒ်၊ 5 “Ngwi pyaw ai hte asan apan rai nga ai” ngu ai mungdan ni ndau shana ai lam hpe kade n na yang anhte na lu sana hpe myit mada mai ai. Dai gaw ru tsang kaba byin hpang wa na lam a kumla rai na re. Ya aten hte htawm hpang hta anhte hpa galaw na matu Yehowa myit mada ai kun? Ndai sumhpa gaw mahtai lu hkra karum ya mat na re.

^ စာပိုဒ်၊ 3 Ga shadawn, Mungkan Wunpawng Hpung (UN) gaw “mungdan shagu na simsa lam hte shim lum lam hpe lu galaw sai” nga nna shanhte a website hta mara da ai.

^ စာပိုဒ်၊ 23 2018, October hta shapraw ai Sin Langchyi hta “Teng Man Ai Lam Hpe Sharin Ya U” ngu ai sumhpa hta dai Sharin Achyin Hkingrai Ni hpe gara hku akyu jashawn na lam ahkri ahkrai tsun da ai.

^ စာပိုဒ်၊ 11 Dai lamang hpe ya aten hta English hte Portuguese amyu ga hku sha lu mai tim hpang de gaw law law lu wa na re.

^ စာပိုဒ်၊ 16 YMCA (Young Men’s Christian Association) hte YWCA (Young Women’s Christian Association) zawn re ai shut shai ai nawku htung hte matut mahkai nga ai ramma kem ni (sh) ban sa ai lam ni hpe anhte koi ra ai. YMCA/YWCA hpung ni gaw shanhte a galaw ai lam ni hpe nawku htung hte matut mahkai ai lam ni n nga ai ngu nna tsun nga tim, gaja nga yang, dai hpung gaw nawku htung hte seng ai myit mang ai lam ni hte nawku htung hte seng ai bandung de du na matu n-gun jaw nga ai.

^ စာပိုဒ်၊ 17 Nawku htung hte seng ai bungli ni hta shang lawm ai hte seng nna Chyum Laika ningmu hpe grau chye mayu ai nga yang, 1999, April 15 na Sin Langchyi (BU) hta lawm ai “Laika Hti Ai Ni Hpang De Na Ga San” ngu ai hta yu u.

^ စာပိုဒ်၊ 83 SUMLA HPE HTAI DAN AI LAM: “Ngwi Pyaw Ai Hte Asan Apan Rai Nga Ai” ngu ai ndau shana ai “Shiga Nnan” hpe kohpi lu nga ai ni madat nga. Hkaw tsun magam ngut nna hkring sa nga ai yan la gaw, dai shiga hpe n kam ai.