Content de lai

Malawm Ni Hpe Lai U

 Hkaja Na Sumhpa 45

Chyoi Pra Ai Wenyi Anhte Hpe Karum Ya Lu Ai Lam

Chyoi Pra Ai Wenyi Anhte Hpe Karum Ya Lu Ai Lam

“Ngai hpe n-gun lagaw shaja ya ai wa a majaw lam shagu hpe ngai hkam lu nngai.”​—HPL 4:13.

Mahkawn 104 Karai Jaw Ai Chyoi Pra Wenyi

Sumhpa Hta Lawm Ai Lam *

1-2. (a) Yakhkak ai nhtoi ni hpe tawt lai lu hkra anhte hpe hpa gaw karum ya ai kun? Sanglang dan u. (b) Ndai sumhpa hta hpa lam hkaja mat na kun?

“NGAI mayak mahkak ni hkrum wa ai aten hpe bai myit yu yang, nye a atsam marai hte tawt lai lu wa ai n re ai hpe ngai chye ai.” Nang mung dai zawn tsun ga ai kun? Anhte ni hta dai zawn mahkrum madup ni nga ai. Nang gaw machyi sawng nga ai (sh) tsawra ai marai langai ngai si mat ai hpe hkrum nga ra ai rai na re. Dai masa ni hpe bai myit dat yang, Yehowa a chyoi pra ai wenyi gaw “chyahtum chyalai re ai n-gun atsam” hku nna madi shadaw ya ai majaw sha, shani shagu tawt lai lu ai hpe nang chye wa na re.​—2 Ko 4:7-9.

2 Ndai nhkru ai mungkan a shingkang ka-up ai hpe ninghkap na matu mung, chyoi pra ai wenyi a karum shingtau lam ra ai. (1 Yh 5:19) Dai sha n-ga, anhte ni gaw “n hkru n hkra ai nat a luksuk ni” hpe mung gasat nga ra ai. (Ehp 6:12) Dai zawn lam ni hkrum nga tim, chyoi pra ai wenyi anhte hpe karum ya ai lam lahkawng hpe hkaja lu na re. Chyoi pra ai wenyi kaw na akyu hpring tup lu la na matu anhte galaw ra ai lam ni hpe mung hkaja lu na re.

Chyoi Pra Ai Wenyi Anhte Hpe Jaw Ai Atsam

3. Mayak mahkak ni hpe hkam jan lu na matu Yehowa anhte hpe karum ya ai lam langai gaw hpa rai kun?

3 Yakhkak ai lam ni hkrum nga tim, anhte a lit ni hpe atsawm gun hpai lu hkra Yehowa a chyoi pra ai wenyi gaw n-gun atsam jaw ya ai. Kasa Pawlu mung, “Hkristu a n-gun atsam” hpe shamyet shanat ai majaw, mayak mahkak ni hkrum tim Yehowa a magam hpe matut gun hpai lu wa ai ngu hkamsha ai. (2 Ko 12:9) Shi a lahkawng ngu na sasana hkrun lam hkawm ai shaloi, hkaw tsun bungli hta shakut shaja ai sha n-ga, shi hkum shi madi shadaw na matu mung, bungli hpe shakut nna galaw wa ai. Shi gaw Korinhtu mare hta Akula yan Priskila a nta kaw nga wa ai. Shan la gaw janghpang chywi ma ai. Pawlu mung dai bungli hpe sha, aten kadun mi shan hte arau galaw wa ai. (Kas 18:1-4) Kan bau bungli galaw nna hkaw tsun magam ngut kre lu na matu Pawlu hpe chyoi pra ai wenyi gaw n-gun atsam jaw wa ai.

4. 2 Korinhtu 12:7-9 hku nga yang Pawlu hta hpa mayak mahkak ni nga ai kun?

 4 2 Korinhtu 12:7-9 hpe hti u. Dai Chyum daw hta Pawlu hkamsha ai “hkum shan hta ju ai aju” ngu ai gaw hpa hpe tsun mayu ai kun? Na hkum hta ju ju yang grai machyi na re. Pawlu mung shi hta mayak mahkak lama mi hkrum nga ai majaw dai hku tsun ai re. Dai manghkang gaw shi hpe matut “abyen” nga ai Satan a kasa hte bung ai ngu shi tsun wa ai. Satan hte shi hpang hkan ai ni gaw Pawlu a hkum hta ju ju ai zawn hkamsha hkra manghkang ni hpe galaw na gaw n re. Raitim, Pawlu hkrum ai mayak mahkak ni hpe shanhte mu ai shaloi, dai hpe grau sawng wa hkra galaw ya ai. Kaga ni a tsun ai lam hku nna Pawlu hpe grau hkra machyi hkra galaw ya chye ai. Pawlu hpa galaw wa ai kun?

5. Pawlu a akyu hpyi ga hpe Yehowa gara hku mahtai jaw ai kun?

5 Shawng nnan hta Pawlu gaw dai “aju” hpe la kau shangun mayu ai. Shi ndai hku tsun ai: “Ngai gaw dai hta na lawt lu u ga, dai Madu [Yehowa] hpe masum lang akyu hpyi nga nngai.” Pawlu dai zawn akyu hpyi tim, shi hkum hta ju gaw naw nga nga ai. Dai gaw Pawlu a akyu hpyi ga hpe Yehowa n madat ya ai lachyum kun? N re ai. Shi madat ya ai. Yehowa gaw manghkang ni hpe n yeng seng kau ya tim, dai hpe hkam jan lu na matu n-gun atsam jaw ya ai. Yehowa ndai hku tsun ai: “Masha a gawngkya ai hta nye a n-gun atsam hkum tsup nga ai.” (2 Ko 12:8, 9) Karai Kasang karum ya ai majaw, Pawlu gaw matut simsa nna ngwi pyaw lu ai.​—Hpl 4:4-7.

6. (a) Anhte a akyu hpyi ga hpe Yehowa gara hku mahtai jaw ai kun? (b) Ndai laika pang hta madun da ai Chyum daw ni gaw nang hpe gara hku n-gun jaw ai kun?

6 Pawlu zawn nang mung manghkang ni hpe yeng seng kau ya na matu Yehowa hpang hpyi shawn ga ai kun? Akroi anoi akyu hpyi nga ai raitim, manghkang ni gaw n mat ai (sh) grau sawng wa chye ai. Dai shaloi, nang gaw Yehowa a myiman n lu sai ngu nna myit tsang wa chye ai. Rai yang, Pawlu a mahkrum madup hpe bai dum u. Pawlu a akyu hpyi ga hpe Yehowa mahtai jaw ai zawn, na a akyu hpyi ga hpe mung mahtai jaw na re. Yehowa gaw manghkang ni hpe n yeng seng kau ya ai. Raitim, chyoi pra ai wenyi hku nna manghkang ni hpe hkam jan lu na matu ra nga ai n-gun atsam hpe shi jaw na re. (Shk 61:3, 4) Nang gaw “ari gumpye kau” hkrum nga ai zawn raitim, Yehowa gaw nang hpe kabai da na n re.​—2 Ko 4:8, 9; Hpl 4:13.

Chyoi Pra Ai Wenyi Gaw Matut Hkawm Sa Lu Hkra Karum Ya

7-8. (a) Chyoi pra ai wenyi gaw gara lam hku nna nbung hte bung ai kun? (b) Chyoi pra ai wenyi gara hku amu galaw ai ngu Petru sanglang dan wa ai kun?

7 Chyoi pra ai wenyi karum ya ai kaga lam langai gaw hpa rai kun? Nbung laru ru nga ai panglai kaw nna tawt lai lu hkra kaja ai nbung gaw karum ya ai zawn, chyoi pra ai wenyi mung nbung laru hte bung ai manghkang ni hpe tawt lai lu hkra karum ya lu ai. Bai nna, Karai Kasang ga sadi jaw da ai mungkan nnan de du hkra mung karum ya lu ai.

8 Kasa Petru gaw nga hkan ai wa re ai majaw, sumpan li yawng hte seng nna mahkrum madup ni grai nga ai. Dai majaw, chyoi pra ai wenyi gara hku amu galaw ai hte seng nna sanglang dan ai shaloi, sumpan li yawng hte seng ai lam ni hpe akyu jashawn nna tsun dan wa ai re. Shi ndai hku ka wa ai: “Masha a myit shasat ai hku majaw, hpa myihtoi ga galoi mung byin pru yu ai n rai; Chyoi pra ai Wenyi e myit shadut ya hkrum ai masha ni gaw, Karai Kasang kaw na ga htawn tsun ma ai.” “Shadut ya” ngu ga gale da ai Greek ga a madung lachyum gaw “ding yang woi mat wa ai” ngu ai re.​—2 Pe 1:21.

9. Chyoi pra ai wenyi “shadut ya” ai ngu Petru tsun ai shaloi gara lam hpe myit shangun mayu ai majaw kun?

9 “Ding yang woi mat wa ai” ngu Petru tsun ai ga si gaw hpa hpe tsun mayu ai kun? Nbung woi ai de “yawng nang” mat wa ai hka li a lam hpe tsun dan na matu, Kasa Laika ka ai Luka gaw dai hte bung ai Greek ga si hpe lang wa ai. (Kas 27:15) Chyum Laika ka ai ni hpe chyoi pra ai wenyi “shadut ya” ai ngu Petru tsun wa ai. Dai ga si hpe na yang, hka li yawng ai mabyin hpe masha ni mu mada na re ngu nna Chyum Laika hpaji du langai tsun ai. Tinang sa mayu ai shara de du hkra hka li hpe nbung gaw karum ya ai  zawn, Chyum Laika ka ai ni hpe mung shanhte a magam ngut kre lu hkra chyoi pra ai wenyi gaw karum ya ai ngu Petru tsun mayu ai re. Yehowa gaw shi galaw ra na daw hpe shi galaw ai. “Nbung” hte bung ai chyoi pra ai wenyi hte madi shadaw ya ai. Chyum Laika ka ai ni mung shanhte galaw ra na daw hpe shanhte galaw ma ai. Shanhte gaw chyoi pra ai wenyi lam matsun ya ai hku hkan ma ai.

LAM 1: Yehowa jaw da ai lit ni hpe ayan galaw u

LAM 2: Na a atsam marai mahkra hte Yehowa a magam hpe gun hpai u (Laika pang 11 hpe yu u) *

10-11. Chyoi pra ai wenyi lam matsun ya ai hpe hkam la lu na matu gara lam lahkawng hpe galaw ra ai kun? Ga shadawn jaw u.

10 Dai ni aten hta, Chyum Laika ka na matu chyoi pra ai wenyi shung ya ai ladat hpe gaw n lang sai. Raitim, Yehowa gaw shi a mayam ni hpe lam matsun ya na matu, chyoi pra ai wenyi hpe matut nna akyu jashawn nga ai. Yehowa gaw shi a daw hpe matut galaw nga ding yang re. Karai Kasang a chyoi pra ai wenyi kaw nna gara hku akyu lu mai na kun? Anhte a daw hpe anhte matut galaw ra ai. Dai hpe gara hku galaw na kun?

11 Ndai ga shadawn hpe myit yu u. Nbung kaw nna akyu lu la na matu, sumpan li gau ai wa gaw lam lahkawng hpe galaw nan galaw ra ai. Langai, shi a li gaw nbung bung ai shara de du nga ra ai. Raitim, hka li gau ai wa gaw shi a hka li hpe hka li daru hte grai tsan ai nbung bung ai shara kaw sa tawn da ai hte sha hka li gaw shawng de sa na n re. Lahkawng, shi gaw sumpan hpe shalun ra nna dang lu ai daram hpyan da ra ai. Nbung bung nga tim pyi, shi a sumpan gaw nbung hta atsawm poi nga yang she, shawng de sa lu ai. Dai zawn sha, chyoi pra ai wenyi a karum shingtau ya ai lam hku nna sha, Yehowa a magam hpe matut gun hpai lu ai. Dai wenyi a karum shingtau lam kaw nna akyu lu na matu anhte lam lahkawng hpe galaw nan galaw ra ai. Langai, chyoi pra ai wenyi galaw shangun mayu ai lam ni hpe Karai a mayam ni galaw ra ai. Lahkawng, dai zawn lam ni hta anhte dang lu ai daram shakut shaja let shang lawm gun hpai ra ai. (Shk 119:32) Dai lam lahkawng hpe galaw na nga yang, hka leng ni zawn ninghkap ai lam ni hte manghkang ni nga tim shawng de matut sa lu nna Karai a mungkan nnan de du hkra chyoi pra ai wenyi gaw karum ya na re.

12. Gara lam hpe ya hkaja lu na kun?

12 Chyoi pra ai wenyi karum ya ai lam lahkawng  hpe anhte hkaja wa sai. Manghkang ni hkrum nga ai aten hta, chyoi pra ai wenyi gaw anhte hpe atsam jaw nna matut sadi dung lu na matu karum ya ai. Chyoi pra ai wenyi gaw anhte hpe shawng de sa na matu shadut ya lu nna htani htana asak lam hta matut hkawm sa lu hkra mung karum ya ai. Chyoi pra ai wenyi kaw nna akyu hpring tup lu la na matu anhte galaw ra ai lam 4 hpe ya hkaja yu ga.

Chyoi Pra Ai Wenyi Kaw Nna Akyu Hpring Tup Lu La Na Lam

13. 2 Timohti 3:16, 17 hku nga yang Chyum Laika gaw anhte hpe gara hku akyu shabyin ya lu ai kun? Raitim, anhte maga hku nna hpa galaw ra ai kun?

13 Langai, Karai A Mungga hpe hkaja u. (2 Timohti 3:16, 17 hpe hti u.) Karai Kasang gaw chyoi pra ai wenyi hpe akyu jashawn nna shi a myit mang ai lam ni hpe Chyum Laika ka ai ni a myit hta bang ya ai. Chyum Laika hpe anhte hti ai, hti ai lam hpe myit sawn sumru ai shaloi, Karai a lam matsun ni gaw anhte a myit masin de shang wa ai. Karai a myit ra ai lam hte maren asak hkrung hkawm sa lu hkra, dai lam gaw anhte hpe shadut ya ai. (Heb 4:12) Raitim, chyoi pra ai wenyi kaw nna akyu hpring tup lu la na matu, Chyum Laika hpe ayan hkaja nna hti da ai lam ni hpe sung sung myit na matu aten la ra ai. Dai hku galaw yang, anhte tsun ai, galaw ai lam ni hta Karai A Mungga gaw shingkang ka-up wa na re.

14. (a) Yehowa a wenyi gaw zuphpawng ni hta nga ai ngu hpa majaw tsun lu ai kun? (b) Chyoi pra ai wenyi kaw nna akyu hpring tup lu la na matu zuphpawng ni gaw gara hku karum ya ai kun?

14 Lahkawng, Karai Kasang hpe arau nawku daw jau u. (Shk 22:22) Yehowa a chyoi pra ai wenyi gaw zuphpawng ni hta nga nga ai. (Shr 2:29) Hpa majaw lu tsun ai kun? Hpunau nauna ni hte arau nawku daw jau na matu arau hkrum zup ai shaloi, chyoi pra ai wenyi lu na matu akyu hpyi ai, Chyum Laika hpe madung da ai Mungdan mahkawn ni hkawn ai, chyoi pra ai wenyi hku nna aya tang da hkrum ai hpunau ni a Chyum Laika hpe madung da ai lam matsun ni hpe anhte madat nga ai majaw re. Dai chyoi pra ai wenyi sha, nauna ni hpe mung shanhte a daw hpe hkyen lajang na matu, shang lawm na matu karum ya ai. Chyoi pra ai wenyi kaw nna akyu hpring tup lu la na matu, zuphpawng sa ai shaloi mahtai ni hpe atsawm hkyen lajang nna shang lawm mahtai jaw ging ai. Dai lam hku nna anhte zuphpawng lung ai gaw chyoi pra ai wenyi kaw nna akyu hpring tup lu na matu, jin jin rai nga ai rai nna li sumpan hpe hpyan da ai hte bung ai.

15. Hkaw tsun bungli hta chyoi pra ai wenyi gaw gara hku karum ya ai kun?

15 Masum, hkaw tsun bungli hta shang lawm u. Hkaw tsun ai, sharin achyin ya ai shaloi, Chyum Laika hpe anhte akyu jashawn ai gaw hkaw tsun bungli hta chyoi pra ai wenyi anhte hpe karum ya na matu ahkang jaw nga ai re. (Rom 15:18, 19) Karai a wenyi kaw nna akyu hpring tup lu la na matu, hkaw tsun bungli hta ayan shang lawm ra ai. Mai byin ai daram Chyum Laika hpe akyu jashawn ra ai. Hkaw tsun bungli hta grau akyu lu hkra galaw mai ai lam langai gaw Prat Hte Magam Zuphpawng Shaman Laika Buk kaw nna ga shaga ai ladat ni hpe akyu jashawn ai hku nna re.

16. Chyoi pra ai wenyi lu na matu ding tawk re ai lam gaw hpa rai kun?

16 Mali, Yehowa kaw akyu hpyi u. (Mat 7:7-11; Luk 11:13) Chyoi pra ai wenyi lu na matu ding tawk galaw lu ai lam gaw, dai hpe akyu hpyi ai shaloi Yehowa kaw hpyi shalawm ai hku nna re. Anhte a akyu hpyi ga ni Yehowa kaw n du hkra kadai mung n lu galaw ai. Karai jaw ai chyoi pra ai wenyi anhte kaw n du lu hkra mung htawng shakum ni (sh) Satan pyi pat shingdang n lu ai. (Yak 1:17) Chyoi pra ai wenyi kaw nna akyu hpring tup lu la na matu, gara hku akyu hpyi ging ai kun? Mahtai lu na matu, Luka laika kaw sha mu lu ai akyu hpyi ga hte seng nna ahkri ahkrai tsun da ai ga shadawn hpe hkaja yu ga. *

 Akroi Anoi Akyu Hpyi U

17. Akyu hpyi ai hte seng nna Luka 11:5-9, 13 hta mu lu ai Yesu a ga shadawn kaw nna hpa sharin la lu ai kun?

17 Luka 11:5-9, 13 hpe hti u. Yesu a ga shadawn hta Chyoi pra ai wenyi lu na matu gara hku akyu hpyi ging ai hte seng nna tsun da ai. Dai ga shadawn hta, la langai gaw “akroi anoi hpyi nga ai majaw” shi ra ai hpe lu la wa ai. Shana nsin grai sin nga tim pyi, shi a manang wa kaw karum hpyi na matu n hting nut wa ai. * (Luk 11:8) Yesu tsun ai ndai ga shadawn gaw akyu hpyi ga hte seng nna hpa sharin ya ai kun? Shi ndai hku tsun ai: “Hpyi mu, shaloi nanhte lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai.” Dai kaw nna hpa sharin la lu ai kun? Chyoi pra ai wenyi lu na matu akroi anoi akyu hpyi ra ai.

18. Yesu a ga shadawn hku nga yang Yehowa gaw chyoi pra ai wenyi jaw na lam hpa majaw kam mai ai kun?

18 Yehowa anhte hpe chyoi pra ai wenyi hpa majaw jaw na hte seng nna chye na matu Yesu a ga shadawn gaw karum ya ai. Dai ga shadawn kaw nna masha wa gaw kaja ai nta madu byin mayu ai. Shana aten sa wa ai manam hpe daw na matu, shi hta hpa mung n nga tim, grai daw mayu nga ai. Muk hpe jaw na matu akroi anoi hpyi nga ai majaw, jinghku wa gaw dai wa hpe jaw dat ai nga nna Yesu tsun ai. Yesu hpa hpe sharin ya mayu ai kun? N hkum tsup ai shinggyim masha gaw akroi anoi hpyi ai htingbu wa hpe sharawng awng let jaw ai nga yang, chyoi pra ai wenyi lu na matu akroi anoi hpyi ai ni hpe tsawra myit rawng ai sumsing lamu Kawa gaw teng sha jaw na re. Hkyak hkyak ra kadawn nga ai chyoi pra ai wenyi hpe lu na matu anhte hpyi shawn yang, Yehowa teng sha jaw na re.​—Shk 10:17; 66:19.

19. Anhte awng dang lu na hpe hpa majaw kam mai ai kun?

19 Satan gaw anhte hpe galoi mung gasat nga tim anhte hkam jan let awng dang lu na gaw teng sha re. Hpa majaw kun? Chyoi pra ai wenyi gaw anhte hpe lam lahkawng hku nna karum ya ai majaw re. Langai, manghkang ni hpe hkam jan lu na matu chyoi pra ai wenyi gaw anhte ra ai atsam hpe jaw ai. Lahkawng, mungkan nnan de du hkra Yehowa a magam hpe matut gun hpai lu hkra chyoi pra ai wenyi a atsam gaw anhte hpe karum ya ai. Chyoi pra ai wenyi karum ya ai kaw nna akyu hpring tup lu la na matu, ra ai lam ni hpe galaw mat na ngu dawdan da ga!

Mahkawn 41 Nye Akyu Hpyi Ga Madat Ya Rit

^ စာပိုဒ်၊ 5 Ndai sumhpa hta, Karai a chyoi pra ai wenyi gaw manghkang ni hpe hkam sharang lu na matu anhte hpe karum ya lu ai lam sanglang da ai. Chyoi pra ai wenyi kaw nna akyu law law lu la na matu galaw ra ai lam hpe mung hkaja lu na re.

^ စာပိုဒ်၊ 16 Akyu hpyi ai gaw Yesu a prat hta grai ahkyak ai lam re ai hpe Luka gaw kaga Kabu Gara Shiga laika ka ai ni hta grau nna danleng hkra ka wa ai.​—Luk 3:21; 5:16; 6:12; 9:18, 28, 29; 18:1; 22:41-42, 44.

^ စာပိုဒ်၊ 17 2018, July hta shapraw ai Prat Hte Magam Zuphpawng Shaman Laika Buk A Matu Lakap Da Ai Lam Ni ngu ai laika buk a laika man 4 hta lawm ai hkaja matsing kaw nna “Akroi anoi hpyi nga ai” ngu ai hpe yu u.

^ စာပိုဒ်၊ 60 SUMLA HPE HTAI DAN AI LAM NI: LAM 1: Hpunau nauna ni gaw Nawku Htingnu de du sa wa ai. Dai hta hpunau nauna ni arau hkrum zup nga nna shada da shakram hkat nga ai. Dai shara kaw Yehowa a chyoi pra ai wenyi nga ai. LAM 2: Shanhte gaw hkyen lajang nna zuphpawng ni hta shang lawm nga. Ndai lam lahkawng hpe galaw ai gaw anhte hkaja wa sai lam ni re ai Chyum Laika hkaja ai, hkaw tsun magam hta shang lawm ai, Yehowa kaw akyu hpyi ai lam ni hpe galaw ai hte maren sha re.