Content de lai

Malawm Ni Hpe Lai U

 Hkaja Na Sumhpa 19

Nhkru Ai Lam Ni Nga Tim Lu La Na Tsawra Myit Hte Tara Rap Ra Ai Lam

Nhkru Ai Lam Ni Nga Tim Lu La Na Tsawra Myit Hte Tara Rap Ra Ai Lam

“N tara ai hta awng nga ai Karai Wa, nang rai nga ndai n rai, N hkru ai amu nang hte rau nga lu na, n rai.”​—⁠SHK 5:4.

Mahkawn 142 Myit Mada Lam Hta Manoi Nga Ga

Sumhpa Hta Lawm Ai Lam *

1-3. (a) Shakawn 5:4-6 hku nga yang nhkru ai amu hte seng nna Yehowa gara hku hkamsha ai kun? (b) Ma hpe hkum shan roi rip ai gaw “Hkristu a tara” hte nhtan shai ai ngu hpa majaw lu tsun ai kun?

YEHOWA KARAI KASANG gaw, nhkru nhkra ai lam yawng hpe nju ndawng ai. (Shakawn 5:4-6 hpe hti u.) Grau nna gaw, ma hpe hkum shan roi rip ai hpe grai hkyet rung nna, matsat shabat amu hku mu mada ai. Anhte gaw Yehowa Sakse ni re ai majaw, ma hpe roi rip ai lam hte seng nna Yehowa zawn sha nju ndawng ga ai. Nawku hpung hta mung dai zawn byin wa yang hkam sharang nga na n re.​—⁠Rom 12:9; Heb 12:15, 16.

2 Ma hpe hkum shan roi rip ai lam yawng gaw, “Hkristu a tara” hte tsep kawp nhtan shai nga ai. (Gal 6:2) Dai zawn anhte hpa majaw lu tsun ai kun? Shawng na sumhpa hta hkaja wa sai hte maren, Yesu gaw tsun ai ga, kasi ningli hte Hkristu a tara hpe sharin ya wa ai. Dai tara gaw tsawra myit hta gawde da nna, tara rap ra na matu shadut ya ai. Dai tara hpe Hkristan ni hkan sa ai majaw, ma ni shim lum ai ngu hkamsha hkra kanawn mazum nna, jet ai tsawra myit hte tsawra ga ai. Dai majaw, ma hpe hkum shan roi rip ai gaw tingkyeng myit jasat rai nna, shut ai lam re. Dai lam a majaw, ma ni gaw makawp maga n hkrum ai, tsawra n hkrum ai ngu hkamsha mat ai.

3 Ma hpe hkum shan roi rip ai gaw, mungkan ting hta chyam bra nga nna, jet ai Hkristan ni hta pyi nga wa ai gaw yawn hpa re. Hpa majaw kun? “N hkru n hkra ai hte sawt ai masha ni” law wa nna, nkau nga yang nawku hpung hta shang lu na matu shakut wa chye ai. (2 Tm 3:13) Kaga lam langai gaw, Yehowa hpe moi aten hta nawku ga ai wa gaw, hkum shan ra marin ai  myit hpe n hkang lu ai sha, ma hpe hkum shan roi rip ai lam ni galaw wa ai. Ma hpe hkum shan roi rip ai gaw sawng dik htum mara re ai lam hkaja yu ga. Ngut nna, ma hpe hkum shan roi rip ai mara hte hpawn, mara kaba ni hpe myitsu salang ni gara hku hparan ai kun? Kanu kawa ni mung, tinang a ma hpe gara hku makawp maga mai na kun? ngu ai lam ni hpe hkaja yu ga. *

Sawng Dik Htum Ai Mara

4-5. Ma hpe roi rip ai lam gaw gara lam hku nna ma ntsa tara tawt lai ai mara rai kun?

4 Ma hpe hkum shan roi rip ai gaw aten grai na hkra, hkra machyi shangun ai. Roi rip hkrum ai ma hte hpawn, ma hpe lanu lahku ai nta masha ni hte Hkristan hpunau nauna ni hpe mung hkra machyi shangun ai. Ma hpe hkum shan roi rip ai gaw sawng dik htum ai mara re.

5 Roi rip hkrum ai wa hpe tawt lai ai mara. * Dai lam gaw kaga masha ni hpe hkra machyi shangun ai mara rai nna, manghkang ni mung byin shangun ai. Ma hpe hkum shan roi rip ai gaw, ma a prat hpe grai htenza mat hkra galaw kau ai lam re ai hpe hpang na sumhpa hta hkaja mat na re. Roi rip ai wa gaw, ma a kamhpa myit hpe jahten shaza kau ai rai nna, shim lum ai ngu ma n hkamsha mat hkra galaw kau ya ai re. Dai zawn nhkru ai lam ni n hkrum hkra, ma ni hpe makawp maga ya ra ai. Dai zawn hkrum wa ai ma ni gaw, shalan shabran lam hte karum shingtau lam ra ai.​—⁠1 Ht 5:14.

6-7. Ma hpe hkum shan roi rip ai gaw nawku hpung hte asuya ni hpe hpa majaw tara tawt lai ai mara rai kun?

6 Nawku hpung hpe tawt lai ai mara. Hpung masha langai ma hpe roi rip ai gaw nawku hpung a amying hpe sari jahpoi ai re. (Mat 5:16; 1 Pe 2:12) “Makam masham lam a matu mara gasat” nga ai wan hku law ai sadi dung ai Hkristan ni a matu mung dai lam gaw n tara ai lam re. (Yud 3) Nawku hpung a sari hpoi mat hkra, nhkru ai amu galaw nna myit malai n la ai ni hpe, nawku hpung hta nga na ahkang anhte n jaw ai.

7 Asuya hpe tawt lai ai mara. Hkristan ni gaw “daru magam ahkang aya lu ai ni a npu e a taw nga” ra ai. (Rom 13:1) Asuya ni a tara hpe hkan sa ai hku nna npu taw ai lam hpe anhte madun ga ai. Hpung masha langai gaw, ma hpe hkum shan roi rip ai zawn re ai hpung a tara hpe tawt lai ai gaw, asuya a tara hpe tawt lai ai re. (Kas 25:8 hte shingdaw yu u.) Myitsu salang ni gaw, tara tawt lai ai wa hpe dam jaw na ahkang n nga ai. Raitim, hkum shan roi rip ai wa hpe asuya ni dam jaw wa ai shaloi mung, makawp maga ya na n re. (Rom 13:4) Tara tawt lai ai wa gaw shi galaw ai hte maren jeyang hkrum na re.​—⁠Gal 6:7.

8. Kaga masha hpe shut hpyit ai mara hte seng nna Yehowa gara hku mu mada ai kun?

8 Grau nna gaw Karai Kasang hpe shut hpyit ai mara re. (Shk 51:4) Marai langai gaw kaga masha hpe shut hpyit ai nga yang, Yehowa hpe mung shut hpyit ai re. Israela ni hpe Karai Kasang jaw ai Tara kaw na ga shadawn langai hpe myit yu ga. Htingbu wa hpe hkalem hkalau ai wa gaw “Yehowa a man e mara rawng nga ai.” (Jaw 6:2-4) Dai hte maren, hpung masha langai ma hpe hkum shan roi rip ai gaw, ma a shim lum lam hpe jahten shaza kau ai rai nna, Karai Kasang a man hta mung mara rawng mat ai. Roi rip ai wa gaw, Yehowa a amying ningsang hpe grai nan sari jahpoi kau ya ai. Dai majaw, ma hpe hkum shan roi rip ai wa gaw, Karai  Kasang hpe shut hpyit ai rai nna, dai lam hpe anhte n hkap la ga ai.

9. Lai wa sai shaning ni laman Yehowa a uhpung gaw Chyum Laika hta madung tawn nna gara lam ni hpe lajang ya wa ai kun? Hpa majaw kun?

9 Lai wa sai shaning ni laman, Yehowa a uhpung gaw Chyum Laika hta madung tawn nna, ma hpe hkum shan roi rip ai lam ni hpe chye na wa hkra lajang ya wa ai. Ga shadawn, Sin Langchyi hte Dum Hprang! sumhpa ni hta, roi rip hkrum ai wa gaw grai na hkra hkrit mat ai majaw, kaga ni gaw gara hku karum ya na, gara hku n-gun jaw na hte kanu kawa ni mung ma ni hpe gara hku makawp maga mai na lam ni hpe bawngban wa ai. Marai langai gaw ma hpe hkum shan roi rip ai nga yang, hpa galaw na hte seng nna uhpung gaw myitsu salang ni hpe Chyum Laika hte lam matsun ahkri ahkrai jaw wa ai. Ma hpe hkum shan roi rip ai lam hte seng nna nawku hpung ni hparan ai lam hpe uhpung gaw bai sawn maram yu ai. Hpa majaw kun? Dai manghkang hpe hparan ai shaloi, Hkristu a tara hte maren byin shangun mayu ai majaw re.

Mara Kaba Tawt Lai Ai Wa Hpe Myitsu Salang Ni Hparan Ai Lam

10-12. (a) Mara kaba ni hpe myitsu salang ni hparan ai shaloi gara lam hpe myit dum ra nna bandung gaw hpa rai ging ai kun? (b) Yaku 5:14, 15 hku nga yang, myitsu salang ni gaw hpa galaw na matu shakut ma ai kun?

10 Mara kaba hte hpawn manghkang ni hpe myitsu salang ni hparan ai shaloi, sagu hpung hpe tsawra myit hte kanawn mazum na matu Hkristu a tara hta hpyi shawn da ai hpe myit dum ra ai. Karai a man hta tara rap ra nna jaw ai hpe galaw ra ai. Dai majaw, marai langai mara kaba tawt lai ai hpe chye yang, myitsu salang ni gaw masa lam amyu myu hpe atsawm sha myit ra ai. Myitsu salang ni a bandung gaw Yehowa hpe shagrau sha-a na matu hte shi a mying ningsang hpe makawp maga na matu re. (Jaw 22:31, 32; Mat 6:9) Dai sha n-ga, shut ai lam galaw hkrup nna jamjau nga ai wa hte hpawn, nawku hpung hta nga ai hpunau nauna ni hpe wenyi lam hta kaja nga hkra karum ya ra ai.

11 Mara galaw ai wa gaw myit malai lu nna, Yehowa hte shi a hku hkau lam bai kaja wa hkra karum hpyi ai kun ngu ai hpe myitsu salang ni chye ra ai. (Yaku 5:14, 15 hpe hti u.) N htap htuk ai ra marin ai myit a majaw mara kaba galaw hkrup mat ai Hkristan langai gaw, wenyi lam hta machyi nga ai wa re. Tsun mayu ai gaw, Yehowa hte shi a lapran hta kaja ai hku hkau lam n nga sai. * Myitsu salang ni gaw wenyi lam hta tsi sara ni rai nga ai. Shanhte gaw “machyi ai wa [ndai ga shadawn hta, mara galaw ai wa] hpe shamai shatsai” ya na matu shakut ma ai. Raitim, mara galaw ai wa gaw teng sha myit malai lu yang she, Karai Kasang hte shi a hku hkau lam bai kaja wa hkra Chyum Laika hte hpaji jaw na re.​—⁠Kas 3:19, 20; 2 Ko 2:5-10.

12 Myitsu salang ni hta ahkyak ai lit nga ai. Karai Kasang kamhpa nna ap da ai sagu hpung hpe grai lanu lahku ra ai. (1 Pe 5:1-3) Nawku hpung gaw shim lum ai shara re ngu hpunau nauna ni hkamsha hkra shanhte galaw mayu ai. Dai majaw, ma hpe roi rip ai mara hte hpawn, shut hpyit ai mara ni nga wa ai shaloi, kalang ta hparan ai. Gara hku hparan ai kun?  Laika pang 13,  15 hte  17 nnan hpang ai hta mu lu ai ga san ni hpe yu yu ga.

13-14. Ma hpe hkum shan roi rip ai lam chye wa yang myitsu salang ni gaw asuya a tara hpe hkan sa ai kun? Sanglang dan u. 

 13 Ma hpe hkum shan roi rip ai lam chye wa yang myitsu salang ni gaw asuya a tara hpe hkan sa ai kun? Hkan sa ai. Mungdan nkau hta, ma langai hkum shan roi rip hkrum yang, asuya ni hpe tsun dan ra ai ngu hpyi shawn da ai tara nga ai. Myitsu salang ni gaw dai tara hpe hkan sa ai. (Rom 13:1) Dai tara ni gaw Karai a  tara hte nhtan shai ai lam n nga ai. (Kas 5:28, 29) Dai majaw, ma langai roi rip hkrum ai ngu nna myitsu salang ni hpe marai langai tsun dan ai shaloi, myitsu salang ni gaw, dai hte seng nna tara ni hpe gara hku hkan sa mai na lam chye lu hkra ginjaw garan rung de kalang ta matut mahkai ai.

14 Myitsu salang ni gaw roi rip hkrum ai wa, shi a kanu kawa hte dai lam hpe chye ai kaga masha ni hte ga shaga ngut ai hpang, asuya ni hpe shana mai ai lam tsun dan na re. Tsun dan ra na lam gaw hpung masha langai hte seng ai lam rai yang gara hku kun? Masha hpawng yawng chye mat yang gaw gara hku kun? Dai lam hpe sa tsun dan ai Hkristan langai gaw Karai a amying jahpoi hkrum mat na ngu hkamsha ging ai kun? N hkamsha ging ai. Karai a amying hpe jahpoi ai wa gaw mara galaw ai wa sha re.

15-16. (a) 1 Timohti 5:19 hku nga yang, myitsu salang ni gaw tara komiti n hpaw shi yang sakse lahkawng hpa majaw ra ai kun? (b) Nawku hpung kaw na marai langai gaw ma hpe hkum shan roi rip ai ngu nna tsun hkrum ai hpe myitsu salang ni chye ai shaloi hpa galaw na kun?

 15 Nawku hpung hta myitsu salang ni tara komiti garai n hpaw shi yang, yawm htum sakse lahkawng hpa majaw ra ai kun? Chyum Laika hta hpyi shawn da ai majaw re. Mara kaba tawt lai ai ngu tsun hkrum ai wa gaw, mara hpe n yin la yang, tara komiti n hpaw shi yang, sakse lahkawng nga ra ai. (Trj 19:15; Mat 18:16; 1 Timohti 5:19 hpe hti u.) Marai langai gaw ma hpe hkum shan roi rip ai nga yang, asuya ni hpe tsun na matu sakse lahkawng nga ra ai ngu nna tsun mayu ai kun? N re. Tara tawt lai wa ai lam hpe, myitsu salang ni (sh) kaga masha ni gaw, asuya hpang shana ai hta dai hpe n hkan sa ra ai.

16 Hpung masha langai gaw ma hpe hkum shan roi rip ai ngu nna tsun hkrum ai hpe myitsu salang ni chye yang, dai lam hte seng ai asuya a tara yawng hpe hkan sa na re. Dai hpang, byin ai lam hpe atsawm sagawn nna, Chyum Laika hta madung tawn let tara komiti hpaw ging yang hpaw na re. Myitsu salang ni gaw tara tawt lai ai wa hpe shawng san na re. Shi gaw ningdang ai nga yang, dai lam hpe chye ai kaga sakse langai hpe bai san na re. Ma hpe roi rip ai lam sa tsun dan ai wa hte yawm htum kaga langai gaw, dai wa gaw ndai ma (sh) kaga ma hpe roi rip ai ngu tsun yang, myitsu salang ni gaw tara komiti mai hpaw sai. * Kaga sakse langai n nga ai rai yang pyi, ma hpe roi rip ai ngu nna sa tsun dan ai wa a ga gaw n jaw ai ngu n mai sawn la ai. Ma hpe hkum shan roi rip ai ngu sakse hkam na matu marai lahkawng n nga yang pyi, tsun hkrum ai wa gaw kaga masha ni hpe grai nan hkra machyi hkra lama ma galaw da sai hpe myitsu salang ni chye ma ai. Myitsu salang ni gaw, hkra machyi ai wa hpe shalan shabran nna madi shadaw ya na re. Ma hpe hkum shan roi rip ai ni a shoihpa kaw nna nawku hpung hpe makawp maga na matu, myitsu salang ni gaw matut nna sadi maja nga na re.​—⁠Kas 20:28.

17-18. Tara komiti a lit hpe sanglang dan u. 

 17 Tara komiti a lit gaw hpa rai kun? Tara tawt lai ai wa gaw, nawku hpung hta matut nga mai, n nga mai ai lam hpe dawdan ai. Dai wa gaw asuya a tara hpe tawt lai ai majaw, ari jaw ra na ngu nna n dawdan ai. Tara tawt lai ai wa hpe ari jaw na matu asuya ni a lata hta sha ap da ai.​—⁠Rom 13:2-4; Tit 3:1.

18 Tara komiti hta lawm ai myitsu salang ni a lit gaw, wenyi lam (sh) nawku htung hte seng ai lam sha re. Roi rip ai wa gaw myit malai lu ai, n lu ai hpe dawdan lu na matu Chyum Laika hpe akyu jashawn ai. Myit malai n lu ai nga yang, shapraw kau sai lam shi hpe tsun nna, nawku hpung hpe mung shana ya na re. (1 Ko 5:11-13) Myit malai lu ai nga yang gaw, nawku hpung hta matut nga mai na re. Raitim, nawku  hpung hta lu la na magam lit ni (sh) laksan ahkaw ahkang ni hpe gaw lu yang she lu sana ngu nna tsun dan na re. Ma ni a shim lum lam hte seng nna myitsu salang ni grai myit tsang ai majaw, tara tawt lai ai wa a makau hta ma ni nga nga ai nga yang, sadi maja na matu nawku hpung hta nga ai kanu kawa ni hpe tsun dan na re. Kanu kawa ni hpe sadi jaw ai shaloi, dai wa gaw kadai hpe roi rip wa ai hpe n tsun na matu sadi ra ai.

Na A Ma Ni Hpe Makawp Maga Lu Ai Lam

Kanu kawa ni gaw ngang hte seng ai lam ma ni hpe htap htuk ai hku tsun dan hku nna hkum shan roi rip n hkrum hkra makawp maga ya ma ai. Dai hku galaw na matu Karai a uhpung kaw na lajang da ya ai lam ni hpe akyu jashawn u. (Laika pang 19-22 hpe yu u)

19-22. Ma ni hpe makawp maga na matu kanu kawa ni hpa galaw mai na kun? (Makawp sumla hpe yu u.)

19 Ma ni shoihpa n hkrum na matu makawp maga ya na lit kadai hta nga ai kun? Kanu kawa ni hta re. * Ma ni gaw “Yehowa jaw ai sali wunli” re. (Shk 127:3) Ma ni hpe makawp maga na matu nang hpe Yehowa lit jaw da ai. Ma ni hkum shan roi rip n hkrum hkra nang gara hku makawp maga mai na kun?

20 Langai, hkum shan roi rip ai ngu ai gaw hpa re ai lam chye hkra galaw u. Ma ni hpe hkum shan roi rip ai ni a lam hte shanhte gara hku hkalem ai hpe hkaja da u. Byin chye ai masa lam (sh) shoihpa jaw chye ai masha ni hpe sadi maja u. (Gsh 22:3; 24:3) Byin mat ai masa law malawng hta, hkum shan roi rip ai wa gaw ma hte hkau nna, ma mung kam ai wa re ai hpe dum u. 

21 Lahkawng, ma hte hku hkau lam kaja hkra galaw u. (Trj 6:6, 7) Dai lam hta, atsawm madat ya ai lam lawm ai. (Yak 1:19) Hkum shan roi rip hkrum ai ma ni gaw, kaga ni hpe bai tsun dan na matu hkrit chye ai hpe dum ra ai. Shi tsun ai hpe kadai mung n kam na hpe mung tsang chye ai. Shing nrai, kaga marai langai ngai hpe tsun dan na nga yang, lama ma bai galaw na ngu roi rip ai wa gaw jahkrit shama da ai majaw hkrit ai mung rai na re. Ma hta lama ma byin nga ai hpe nang sadi hkrup yang, tsawra matsan dum myit hte ga san san nna, myit galu let madat ya u. 

22 Masum, ma hpe tau hkrau sharin da ya u. Ngang (sex) hte seng ai lam hpe ma a asak hta hkan nna tsun dan u. Marai langai ngai gaw n htap htuk ai lam hku shanhte hpe galaw wa ai nga yang, gara hku bai tsun na, galaw na hpe sharin da ya u. Na a ma ni hpe gara hku makawp maga ya lu na hte seng nna uhpung lajang da ya ai lam ni hpe akyu jashawn u. “ Nang Hte Na A Ma Hkaja Lu Na Lam” ngu ai lawk hpe yu u.

23. Ma hpe hkum shan roi rip ai lam hpe anhte gara hku mu mada ai kun? Hpang na sumhpa hta gara ga san hpe hkaja lu na kun?

23 Ma hpe hkum shan roi rip ai lam gaw hkap la n mai ai mara rai nna, grai sawng ai amu re ngu Yehowa Sakse ni mu mada ga ai. Hkristu a tara hpe anhte hkan sa ai majaw, hkum shan roi rip ai wa a maga de hkan nna karum ya na n re. Raitim, hkum shan roi rip hkrum ai wa hpe anhte gara hku karum ya mai na kun? Hpang na sumhpa hta dai lam hpe hkaja mat na re.

Mahkawn 103 Sagu Rem​—⁠Karai A Kumhpa

^ စာပိုဒ်၊ 5 Ma ni hkum shan roi rip n hkrum na matu gara hku makawp maga lu na lam hpe ndai sumhpa hta hkaja mat na re. Myitsu salang ni gaw nawku hpung hpe gara hku makawp maga na hte kanu kawa ni gaw tinang a ma ni hpe gara hku makawp maga na lam hpe mung hkaja mat na re.

^ စာပိုဒ်၊ 3 Ga Si Ni A Lachyum: Asak ram sai marai langai gaw, hkum shan ra marin ai myit hpe shadik na matu, ma hpe akyu jashawn ai gaw ma hpe hkum shan roi rip ai lam re. Dai lam hta, hkum shan kanawn ai, n-gup (sh) maidang hku hte hpye ai amu galaw ai, gindai, sinda, dangbau hpe masawp ai hte hpawn, akyang htenza ai kaga lam ni mung lawm ai. Roi rip hkrum ai ni law malawng gaw numsha ni rai nna, lasha ni mung lawm ai. Roi rip ai wa gaw law malawng la ni rai nna, num nkau mung lawm ai.

^ စာပိုဒ်၊ 5 Ga Si A Lachyum: Ndai sumhpa hte hpang na sumhpa hta, “roi rip hkrum ai wa” ngu ai ga si hpe lang ai shaloi, ma prat hta hkum shan roi rip hkrum wa ai hpe tsun ai re. Shi gaw mara n nga ai wa rai nna, ahkaw ahkang la kau hkrum ai, hkra machyi hkrum ai wa re ai hpe chye na hkra, dai ga si hpe lang ai re.

^ စာပိုဒ်၊ 11 Wenyi lam gawng kya mat ai majaw mara galaw hkrup ai ngu nna lawt ga n mai tsun ai. Mara galaw ai wa gaw, galaw shut ai lam a matu lit la ra nna, Yehowa mung dai lam hpe tara jeyang na re.​—⁠Rom 14:12.

^ စာပိုဒ်၊ 16 Hkum shan roi rip ai wa a man de sa wa na matu ma hpe tsun na n re. Kanu kawa (sh) ma kamhpa ai wa gaw ma tsun dan ai lam hte seng nna myitsu salang ni hpe sa tsun dan na re. Dai hku nna, ma gaw kahtap nna hkra machyi sana n re.

^ စာပိုဒ်၊ 19 Kanu kawa ngu tsun ai shaloi, ma hpe tara shang bau la ai ni hpe mung tsun ai re.