Content de lai

Malawm Ni Hpe Lai U

 Hkaja Na Sumhpa 10

Ngai Baptisma Hkam Na Hpa Hkum Shara Nga A Ta?

Ngai Baptisma Hkam Na Hpa Hkum Shara Nga A Ta?

“Shan lahkawng hka de yu wa nna, Hpilip gaw Unuk wa hpe baptisma jaw wu ai.”​—⁠KAS 8:38.

Mahkawn 52 Hkristan Apnawng Ai Lam

Sumhpa Hta Lawm Ai Lam *

1. Adam yan Ewa hpa hpe sum kau ra ai kun? Hpa ni byin wa ai kun?

KAJA ai n kaja ai hte seng nna tsang madang ni hpe kadai gaw jahkrat ging ai ngu nang shadu ai kun? Kaja ai hte n kaja ai hpe chye ginghka lu ai hpun kaw nna namsi hpe Adam yan Ewa di sha ai shaloi, Yehowa a tsang madang ni hpe shan gara hku hkam la ai hpe chye lu ai. Kaja ai hte n kaja ai hpe tinang nan dawdan na matu lata wa ai. (Nin 3:22) Shan hpa hpe sum kau ra ai hpe myit yu ga. Yehowa hte hku hkau lam sum mat ai. Htani htana asak hkrung lu na ahkaw ahkang n nga mat sai. Shan a kashu kasha ni hpe yubak hte si hkrung si htan jaw wa ai. (Rom 5:12) Adam yan Ewa a dawdan lam gaw yawn hkyen lam ni sha hkrum shangun ai.

Ehtiopi unuk gaw Yesu hpe hkap la nna kalang ta hkalup hkam la (Laika pang 2-3 hpe yu u)

2-3. (a) Hpilip hkaw tsun ai hpe Ehtiopi unuk gara hku bai htang wa ai kun? (b) Hkalup hkam la na nga yang gara shaman chyeju ni lu la na kun? Gara ga san ni hpe bawngban mat na kun?

2 Adam yan Ewa a lam hte Hpilip hkaw tsun ai shaloi kalang ta hkap la wa ai Ehtiopi unuk a lam hpe shing daw yu u. Unuk gaw, Yehowa hte Yesu shi a matu galaw ya ai lam ni hpe grai chyeju dum ai majaw, kalang ta hkalup hkam la ai. (Kas 8:34-38) Anhte mung Karai Kasang hpang tinang hkum tinang ap nawng nna hkalup hkam ai shaloi, unuk zawn sha, Yehowa hte seng nna gara hku hkamsha ai hpe madun nga ai re. Yehowa hte Yesu galaw ya ai lam yawng a matu chyeju dum ai lam madun nga ai re. Yehowa hpe kamhpa nna, kaja ai n kaja ai hte seng ai tsang madang ni hpe jahkrat ging ai wa gaw shi chyu sha re ai hpe anhte hkap la ai lam madun ai mung re.

3 Yehowa a magam gun ai kaw nna lu la ai shaman chyeju ni hpe myit yu u. Shaman chyeju gaw, htani htana asak hkrung lu na ahkaw ahkang hte hpawn, Adam yan Ewa sum mat ai lam yawng hpe lu la na re. Yesu Hkristu hpe kam sham ai majaw, Yehowa gaw anhte a mara ni hpe raw kau ya nna san seng ai myit nsam jaw ai. (Mat 20:28; Kas 10:43) Yehowa a myi man lu ai ni  gaw shi a nta masha ni byin wa nna, htawm hpang hta mauhpa shaman chyeju ni mung lu la na re. (Yhn 10:14-16; Rom 8:20, 21) Grai kaja ai shaman chyeju ni lu la na hpe chye tim, Yehowa hpe chye wa ai masha nkau gaw, Ehtiopi unuk a kasi hpe hkan sa na matu htingnut nga chye ai. Hkalup n hkam hkra shanhte hpe hpa gaw hkum pat da ai kun? Gara hku nna shanhte tawt lai lu wa ai kun?

Hkalup N Hkam Lu Hkra Masha Nkau Hpe Htingnut Shangun Ai Lam Ni

Hkalup hkam la na matu garai n dawdan shi yang masha nkau gaw mayak mahkak ni hkrum

Tinang hkum tinang kam ai myit n nga ai (Laika pang 4-5 hpe yu u) *

4. Ramma Ebari gaw gara mayak mahkak ni hte hkrum wa ai kun?

4 Tinang hkum tinang kam ai myit n nga ai. La kasha Ebari a kanu yan kawa gaw Yehowa Sakse ni re. Shi kawa gaw, lanu lahku chye nna grai ram ai myitsu salang hku nna mying lu da ai. Ebari gaw hkalup hkam na matu htingnut nga ai. Hpa majaw kun? “Awa zawn mying kaja lu hkra n lu galaw na hpe tsang ai” ngu nna shi tsun ai. Htawm hpang hta lu wa na lit ni hpe n lu galaw na hpe tsang nga ai. “Shawa hpawng hta akyu hpyi shangun na, mungga htawn shangun na, hkaw tsun magam hta woi awn shangun na hpe ngai myit tsang nga ai.”

5. Ramma Hena gaw gara mayak mahkak ni hte hkrum wa ai kun?

5 Asak 18 rai sai numsha Hena gaw, tinang hkum tinang kam ai myit grai n nga taw ai. Yehowa Sakse re ai kanu yan kawa gaw shi hpe bau maka wa ai. Raitim, Yehowa a tsang madang ni hte maren nga lu na n re ngu myit tsang nga ai. Hpa majaw kun? Hena gaw shi hkum shi grai yu kaji nga ai. Kalang lang rai yang, shi hkum shi hkra machyi hkra dingsang galaw ai majaw, masa lam ni gaw grau grau sawng wa ai. Shi ndai hku tsun ai: “Ngai kadai hpe mung n tsun dan ai. Nu yan wa hpe mung n tsun dan ai. Ngai dai hku galaw ai majaw, Yehowa gaw shi a mayam langai hku nna galoi mung hkap la mayu na n re ngu myit wa ai.”

Manang ni a shingkang ka-up ai lam (Laika pang 6 hpe yu u) *

6. Hkalup n hkam lu hkra Banesa hpe hpa gaw htingnut shangun ai kun?

6 Manang ni a shingkang ka-up ai lam. Asak 22 rai sai numsha Banesa ndai hku tsun ai: “Ngai hta 10 ning daram hkau wa ai manang nga ai.” Raitim, Banesa a manang gaw shi hkalup hkam lu hkra n karum ya lu ai. Dai gaw shi hpe hkra machyi shangun ai. Shi ndai hku tsun ai: “Manang nnan tam na matu yak ai. Lama na shi hte manang n galaw sai nga yang, grai hkau ai manang lu sana n re ngu ngai myit tsang wa ai.”

Hkrat sum na hpe tsang (Laika pang 7 hpe yu u) *

7. Mahkela gaw hpa hpe hkrit wa ai kun? Hpa majaw kun?

7 Hkrat sum na hpe tsang ai. Numsha Mahkela asak 5 daram hta shi kahpu gaw hpung kaw nna shapraw kau hkrum ai. Kahpu galaw wa ai lam a majaw kanu yan kawa kade daram hkra machyi ai hpe shi mu wa ai. Shi ndai hku tsun ai: “Dai majaw ngai hkalup hkam na matu hkrit nga ai. Shut ai lam ngai galaw hkrup nna hpung kaw nna shapraw hkrum  yang, nu yan wa hpe grau nna yawn shangun na re.”

Ninghkap na hpe hkrit tsang (Laika pang 8 hpe yu u) *

8. Mai gaw hpa hte seng nna hkrit tsang wa ai kun?

8 Ninghkap na hpe hkrit tsang ai. La kasha Mai a kawa hte hpang kanu gaw Yehowa Sakse ni re. Raitim, kanu majing gaw Sakse hkam n re. Mai ndai hku tsun ai: “Anu hte arau nga ai 18 ning rai sai.” “Hkalup hkam mayu ai ngu shi hpe tsun dan na matu ngai hkrit nga ai. Awa Sakse hkam byin mat ai shaloi, anu galaw wa ai lam hpe ngai mu wa ai. Ngai hpe mung manghkang tam na hpe tsang wa ai.”

Mayak Mahkak Ni Hpe Gara Hku Tawt Lai Lu Na Kun?

9. Yehowa gaw kade daram myit galu nna tsawra myit nga ai hpe hkaja na nga yang hpa galaw mayu wa na kun?

9 Adam yan Ewa gaw, Yehowa hpe tsawra ai myit ngang kang hkra n galaw wa ai majaw, Yehowa hpe n nawku mat ai re. Raitim, Yehowa gaw, shan yan hpe kashu kasha shaprat shangun nna, shan a tsang madang ni hte maren ma ni hpe bau maka na matu ahkang jaw wa ai. Yehowa a ga n madat nna, wanglu wanglang nga na matu Adam yan Ewa dawdan ai gaw hpaji n rawng ai lam kade n na yang dan dawng wa ai. Shan a kasha ma gam gaw, mara n nga ai ma naw hpe sat kau ai. Shinggyim masha dinghku hta dawsa ai lam hte tingkyeng myit jasat ni hpring chyat wa ai. (Nin 4:8; 6:11-13) Raitim, Yehowa gaw, Adam yan Ewa a kashu kasha ni kaw na shi hpe nawku mayu ai ni yawng hpe hkye la na matu lajang wa ai. (Yhn 6:38-40, 57, 58) Yehowa gaw kade daram myit galu nna tsawra myit nga ai hpe, grau nna hkaja na nga yang shi hpe grau nna tsawra wa na re. Adam yan Ewa lata ai prat hkrun lam hpe nang nyet kau nna Yehowa hpang de apnawng mayu wa na re.

Mayak mahkak ni hpe nang tawt lai lu

(Laika pang 9-10 hpe yu u) *

10. Shakawn Kungdawn 19:7 hpe myit sumru ai gaw Yehowa a magam gun lu hkra gara hku karum ya ai kun?

10 Yehowa a lam matut nna hkaja u. Yehowa a lam grau nna hkaja na nga yang, shi a magam hpe awng dang hkra gun hpai lu na re. La kasha Ebari ndai hku bai tsun ai: Shakawn Kungdawn 19:7 (Hti u) hta lawm ai ga sadi ni hpe hti nna myit sawn sumru ai majaw, tinang hkum tinang kam ai myit nga wa ai.” Yehowa gaw, laksan hku nna “myit n su ai ni [mahkrum madup n nga ai ni] hpe hpaji jaw” ai lam Ebari chye wa ai. Dai gaw Karai Kasang hpe tsawra ai myit law htam wa shangun ai. Tsawra myit gaw  tinang hkum tinang kam ai myit nga shangun ai sha n-ga, Yehowa hte shi ra sharawng ai hpe myit maju jung lu hkra mung anhte hpe karum ya ai. Numsha Hena mung ndai hku bai tsun ai: “Tinang hkrai Chyum Laika hti nna hkaja ai majaw, nye hkum ngai hkra machyi hkra galaw ai gaw, Yehowa hpe mung hkra machyi shangun ai hpe chye na wa ai.” (1 Pe 5:7) Hena gaw mungga hpe tatut hkan sa wa ai. (Yak 1:22) Hpa akyu lu wa ai kun? Shi ndai hku tsun ai: “Yehowa a ga madat mara ai gaw ngai hpe kade daram akyu jaw ai lam chye wa ai. Shi hpe tsawra ai myit mung ngang kang wa ai. Yehowa a karum madi shadaw lam ra shagu, shi ngai hpe lam matsun jaw na hpe ngai chye sai.” Hena gaw shi hkum shi hkra machyi hkra galaw ai akyang hpe awng dang lu wa sai. Yehowa hpe ap nawng nna hkalup hkam la ngut sai.

(Laika pang 11 hpe yu u) *

11. Manang kaja lu na matu Banesa hpa galaw wa ai kun? Anhte mung hpa sharin la lu ai kun?

11 Kanawn manang hpe hpaji rawng let lata u. Yehowa a magam n gun lu hkra kanawn manang gaw htingnut shangun nga ai hpe, hpang e Banesa chye mat ai. Dai majaw shi hte n kanawn sai. Raitim, Banesa gaw dai hta n-ga galaw wa ai. Nawku hpung kata kaw na manang nnan ni lu hkra shi shakut wa ai. Noa hte shi a nta masha ni madun wa ai kasi ningli gaw shi hpe karum ya wa ai ngu nauna ndai hku tsun dan ai: “Noa a makau grup-yin na ni gaw Yehowa hpe n tsawra ai ni hkrai rai nga ai. Raitim, shanhte shada da kaja ai hku hkau lam nga ma ai.” Banesa gaw hkalup hkam ngut ai hpang, ningshawng langai byin wa ai. Ya, shi ndai hku tsun ai: “Ningshawng galaw ai majaw, tinang a nawku hpung hta na hpunau nauna ni hte sha n-ga, kaga nawku hpung kaw na hpunau nauna ni hte mung manang galaw lu wa ai.” Nang mung, Yehowa jaw da ai magam lit ni hpe gun hpai let, manang kaja ni lu la na re.​—⁠Mat 24:14.

(Laika pang 12 hpe yu u) *

12. Adam yan Ewa hta gara hkrit ai myit n nga wa ai kun? Dai majaw shan hpa byin wa ai kun?

12 Htap htuk ai hkrit tsang myit nga u. Hkrit tsang ai myit nkau nga ai gaw anhte a matu kaja ai. Ga shadawn, Yehowa myit n pyaw mat na hpe anhte hkrit tsang ra ai. (Shk 111:10) Adam yan Ewa hta dai zawn hkrit ai myit nga yang, Yehowa hpe gumlau wa na n re. Raitim, shan gumlau wa ai. Shan gumlau wa ai hpang, shan a myi hpaw wa nna yubak masha ni rai mat sai hpe chye mat ai. Shan a kashu kasha ni  hpe yubak hte si hkrung si htan sha jaw lu mat ai. Karai a tara hpe n hkan sa ai majaw, shan singgu krin rai nga ai hpe kaya wa nna, tinang hkum tinang magap la ma ai.​—⁠Nin 3:7, 21.

13-14. (a) 1 Petru 3:21 hta tsun da ai hte maren, si na hpe ladu lai hkra hpa majaw n hkrit ra ai kun? (b)Yehowa hpe tsawra ging ai gara lam anhte hta nga ai kun?

13 Yehowa myit n pyaw na hpe hkrit ai myit anhte hta nga yang, si na hpe ladu lai hkra hkrit na n rai sai. Anhte htani htana asak hkrung lu na matu Yehowa lajang da ya ai. Anhte mara galaw hkrup tim, myit madung hte myit malai la na nga yang, Yehowa gaw mara raw ya na re. Shi kasha a gawng malai hkungga hpe anhte kam ai majaw, anhte a mara hpe raw ya ai re. Ahkyak htum gaw, Karai Kasang hpang ap nawng nna hkalup hkam la ai hku nna, anhte a makam masham hpe madun ra ai.​—⁠1 Petru 3:21 hpe hti u.

14 Yehowa hpe tsawra ging ai lam law law nga ai. Shani shagu ngwi pyaw lu hkra kaja ai lam law law hpe shi madi shadaw da ya ai. Shi hte seng ai teng man lam hte shi a yaw shada lam ni hpe mung sharin ya ai. (Yhn 8:31, 32) Anhte hpe lam matsun ya nna madi shadaw ya na matu, Hkristan nawku hpung hpe mung jaw da ai. Ya aten hta hkrum ai manghkang ni hpe hkamjan lu hkra karum ya ai. Htawm hpang hta mung hkum tsup let htani htana asak hkrung lu na myit mada lam hpe jaw da ai. (Shk 68:19; Shr 21:3, 4) Yehowa madun wa ai tsawra myit hpe sumru na nga yang, anhte shi hpe tsawra wa na re. Yehowa hpe anhte tsawra ai nga yang, hkrit ai myit hte seng nna rap ra ai ningmu nga wa na re. Anhte tsawra ai Yehowa hpe hkra machyi hkra galaw hkrup na hpe hkrit tsang nga na re.

15. Numsha Mahkela gaw hkrit ai myit hpe gara hku tawt lai lu wa ai kun?

15 Numsha Mahkela gaw, Yehowa kade daram mara raw ya ai ngu ai hpe chye na wa ai shaloi, hkrat sum na hkrit ai myit hpe tawt lai lu wa ai. “Anhte yawng gaw n hkum tsup nna mara galaw chye ai hpe ngai chye wa ai. Yehowa anhte hpe tsawra nna gawng malai hkungga hta madung tawn let mara ni hpe raw kau ya ai lam hpe mung ngai chye na wa ai.” Yehowa hpe tsawra ai myit gaw apnawng nna hkalup hkam lu hkra shi hpe karum ya wa ai.

(Laika pang 16 hpe yu u) *

16. Ninghkap na hpe hkrit ai myit hpe tawt lai lu hkra Mai hpe hpa gaw karum ya wa ai kun?

16 La kasha Mai gaw, hkalup hkam la na ngu ai dawdan lam hpe kanu ninghkap na hpe hkrit ai majaw, hpung kawan hpunau hpe karum hpyi wa ai. Mai ndai hku tsun ai: “Hpunau wa mung makam masham n bung ai dinghku hta nga kaba wa ai. Hkalup hkam na ngu ai nye a dawdan lam gaw awa shadut ai majaw n re ai hpe, anu chye na wa hkra tsun dan lu na matu hpunau wa karum ya wa ai.” Mai a dawdan lam hpe kanu gaw n ra sharawng ai. Dai majaw, Mai gaw nta kaw nna pru mat wa ra ai. Raitim, shi a dawdan lam hte maren galaw wa ai. Mai ndai hku tsun ai: “Nye a matu Yehowa galaw ya wa ai kaja ai lam ni hpe hkaja lu ai gaw nye a myit hpe shadut ya ai. Yesu jaw wa ai gawng malai hkungga hte seng nna atsawm myit ai  shaloi, Yehowa ngai hpe kade daram tsawra ai lam chye wa ai. Dai zawn myit ai gaw Yehowa hpang nye hkum ngai ap nawng mayu wa nna hkalup hkam la lu hkra shadut ya wa ai.”

Dawdan Lam Hpe Ngang Kang Shangun U

Karai Kasang galaw ya ai lam ni a matu chyeju dum ai lam anhte madun mai (Laika pang 17 hpe yu u)

17. Anhte yawng hta gara ahkaw ahkang nga ai kun?

17 Edin sun hta nga ai namsi hpe Ewa sha ai gaw, shi Kawa hpe nyet kau ai lam re. Adam mung Ewa hte maren sha ai gaw, shi a matu Yehowa galaw ya wa ai lam yawng hpe chyeju n dum ai lam madun ai re. Anhte yawng gaw Adam yan Ewa zawn n re ai sha, Yehowa galaw ya wa ai lam yawng hpe chyeju dum ai lam madun na matu ahkaw ahkang lu ga ai. Kaja ai n kaja ai hte seng nna tsang madang ni hpe jahkrat lu ai ahkaw ahkang nga ai gaw, Yehowa sha re ai hpe anhte kam ai lam hkalup hkam la ai hku nna madun ga ai. Anhte a Kawa hpe tsawra nna kamhpa ai lam sakse madun ga ai.

18. Yehowa a magam gun ai hta gara hku awng dang lu na kun?

18 Hkalup hkam la ngut ai hpang, anhte ra sharawng ai hku n re ai sha Yehowa ra sharawng ai hte maren matut nna asak hkrung ra ai. Wan hku law ai Karai a mayam ni gaw, dai hku asak hkrung nga ma ai. Nang mung, Chyum Laika hpe grau nna chye na hkra hkaja na, hpunau nauna ni hte ayan kanawn mazum na, Yehowa a lam hpe myit rawt let tsun dan na nga yang, shanhte hte bung wa na re. (Heb 10:24, 25) Chyum Laika hte uhpung hku nna Yehowa jaw nga ai lam matsun ni hpe hkan sa nna dawdan lam ni jahkrat u. (Esa 30:21) Rai yang, nang awng dang lu na re.​—⁠Gsh 16:3, 20.

19. Hpa hpe galoi mung myit dum ging ai kun? Hpa majaw kun?

19 Yehowa jaw ai lam matsun ni a majaw lu la ai akyu hpe nang chye wa yang, shi hte shi a tsang madang ni hpe tsawra ai myit rawt jat wa na re. Yehowa hpe nawku ai kaw nna hkring mat hkra, Satan hkalem ai lam yawng hpe nang koi lu na re. Ya kaw nna shaning hkying mi lai mat sai ngu shingran yu u. Lai mat sai aten ni hpe bai myit yu ai shaloi, hkalup hkam na matu nang dawdan wa ai gaw kaja htum dawdan lam rai nga na hpe nang mu na re.

Mahkawn 28 Karai Kasang Hte Jinghku Hku Ai Lam

^ စာပိုဒ်၊ 5 Hkalup hkam na kun? N hkam na kun? ngu ai dawdan lam gaw nang jahkrat ra na ahkyak htum dawdan lam re. Dai dawdan lam gaw hpa majaw grai ahkyak ai kun? Ndai sumhpa hta dai ga san a mahtai hpe chye lu na re. Hkalup hkam na matu myit nga ai ni hpe htingnut shangun chye ai mayak mahkak ni hpe tawt lai lu hkra mung karum ya na re.

^ စာပိုဒ်၊ 57 SUMLA HPE HTAI DAN AI LAM NI: Tinang hkum tinang kam ai myit: Ramma la sha gaw mahtai jaw na matu hkrit tsang nga.

^ စာပိုဒ်၊ 59 SUMLA HPE HTAI DAN AI LAM NI: Kanawn manang ni: N kaja ai manang hte kanawn ai ramma Sakse Hkam gaw hpunau nauna ni hpe mu ai shaloi kaya nga.

^ စာပိုဒ်၊ 61 SUMLA HPE HTAI DAN AI LAM NI: Hkrat sum: Kahpu gaw hpung kaw na shapraw hkrum ai majaw nta kaw nna pru mat ai shaloi, ramma numsha gaw dai zawn hkrat sum na hpe tsang nga.

^ စာပိုဒ်၊ 63 SUMLA HPE HTAI DAN AI LAM NI: Ninghkap: Makam masham n bung ai kanu yu nga ai majaw, akyu hpyi na matu ramma la sha hkrit nga.

^ စာပိုဒ်၊ 66 SUMLA HPE HTAI DAN AI LAM NI: Tinang hkum tinang kam ai myit: Ramma la sha gaw grau nna tinang hkrai hkaja ai lam galaw nga.

^ စာပိုဒ်၊ 68 SUMLA HPE HTAI DAN AI LAM NI: Kanawn manang ni: Ramma Sakse Hkam gaw Sakse Hkam langai hku nna arawng la lu hkra sharin la wa.

^ စာပိုဒ်၊ 70 SUMLA HPE HTAI DAN AI LAM NI: Hkrat sum: Ramma numsha gaw teng man lam hpe shi nan hkap la hkra galaw nna hkalup hkam la.

^ စာပိုဒ်၊ 72 SUMLA HPE HTAI DAN AI LAM NI: Ninghkap: Ramma la sha gaw makam masham n bung ai kanu hpe shi a kam sham ai lam hpe nden marai rawng let tsun dan nga.