Content de lai

Malawm Ni Hpe Lai U

 Hkaja Na Sumhpa 25

Myit Ru Myit Tsang Ai Shaloi Yehowa Hpe Kamhpa U

Myit Ru Myit Tsang Ai Shaloi Yehowa Hpe Kamhpa U

“Ngai grai myit ru myit tsang nga nngai.”​—⁠1 SA 1:15, NW.

Mahkawn 30 Nye A Kawa, Karai Hte Jinghku

Sumhpa Hta Lawm Ai Lam *

1. Yesu a sadi jaw ga hpe anhte hpa majaw madat ra ai kun?

HPANG jahtum nhtoi hte seng nna Yesu ndai hku myihtoi htoi da ai: “Dinghta asak hkrung lam a matu myit ru myit tsang ai lam ni hte nanhte hpe n ka-up dang kau u ga, sadi hte nga nga mu.” (Luk 21:34, JCLB) Dai sadi jaw ga hpe anhte madat ra ai. Hpa majaw kun? Ya aten hta anhte yawng gaw, myit ru myit tsang ai lam ni hkrum nga ai majaw re.

2. Hpunau nauna ni hta hpa myit ru myit tsang lam ni hkrum nga ai kun?

2 Kalang lang, anhte gaw myit ru myit tsang lam law law hte kalang ta hkrum wa chye ai. Lawu na ga shadawn ni hpe myit yu ga. Hpunau Jon * gaw, dinghku de nna 19 ning na ai hpang madu jan a kau da ai hkrum wa ai. Shi hta lasaw lasa ging ai baw ana byin nga ai. Shi a shayi sha yan mung, Yehowa hpe n nawku mat sai. Bob yan Linda ngu ai kaga yan la mung manghkang ni hkrum nga ai. Shan yan bungli n nga mat ai. Nta mung sum mat sai. Madu jan hta mung si na daram sawng ai salum ana byin nga ai. Bai nna, hkum hkrang n-gun yawm shangun ai ana mung byin nga ai.

3. Yehowa hte seng nna Hpilipi 4:6, 7 hta gara hku tsun da ai kun?

3 Tsawra myit rawng ai Hpan Madu Yehowa gaw anhte a myit ru myit tsang lam ni hpe chye na ya ai. Anhte hkrum nga ai manghkang ni hpe hparan na matu shi karum ya mayu ai. (Hpilipi 4:6, 7 hpe hti u.) Chyam dinglik lam ni hpe hkamjan wa ai Yehowa a mayam ni a lam Chyum Laika hta grai law hkra lawm ai. Myit ru myit tsang hkrum nga ai shaloi, hparan na matu Yehowa karum ya wa ai lam ni mung lawm ai. Ga shadawn nkau mi hpe hkaja yu ga.

 Anhte Zawn Hkamsha Lam Nga Ai Elia

4. Elia gaw hpa manghkang ni hkrum wa ai kun? Yehowa a ntsa shi a hkamsha lam gaw gara hku kun?

4 Elia gaw grai yakhkak nna manghkang kaba ni hkrum ai aten hta, Yehowa hpe nawku wa ai. Israela labau kaw na sadi n dung ai Hkawhkam Ahab gaw, Bala hpe nawku ai Yezebela hte hkungran la ai. Shan yan gaw, mung ting Bala hpe nawku wa hkra shadut ya ai. Yehowa a myihtoi law law hpe mung sat kau ai. Elia gaw lawt lu wa ai. Shi gaw Yehowa hpe kamhpa ai majaw, hku hku ai aten hta mung asak hkrung wa ai. (1 Hk 17:2-4, 14-16) Bala hpe nawku dawjau ai ni hte myihtoi ni shi hpe ninghkap ai shaloi hta mung, Yehowa hpe sha kamhpa ai. Yehowa hpe nawku na matu Israela ni hpe shi n-gun jaw ai. (1 Hk 18:21-24, 36-38) Dai zawn yakhkak ai aten ni hta, Yehowa gaw Elia hpe karum ya ai lam law law nga ai.

Yehowa gaw lamu kasa hpe shangun dat nna Elia n-gun bai lu hkra karum ya wa (Laika pang 5-6 hpe yu u) *

5-6. 1 Hkawhkam 19:1-4 hku nga yang Elia gara hku hkamsha ai kun? Yehowa gaw Elia hpe tsawra ai lam gara hku madun wa ai kun?

5 1 Hkawhkam 19:1-4 hpe hti u. Hkawhkam Jan Yezebela a sat na ngu jahkrit shama ai lam hpe Elia hkrit wa ai. Dai majaw, Bera-Sheba de hprawng mat wa ai. Shi grai myit daw myit hten wa ai majaw, “si mayu” ai ngu nna pyi hpyi shawn wa ai. Dai zawn hpa majaw hkamsha ai kun? Elia gaw n hkum tsup nna, anhte zawn hkamsha chye ai shinggyim masha sha re. (Yak 5:17) Shi grai myit ru myit tsang ai majaw, grai pu ba nga na re. San seng ai nawku dawjau lam rawt jat na matu shi shakut ai gaw kaman lila sha re, Israela ni mung rawt jat lam n nga ai ngu shi myit nga ai rai na re. Dai majaw, Yehowa hpe nawku ai  gaw shi hkrai sha re ngu nna pyi hkamsha wa ai. (1 Hk 18:3, 4, 13; 19:10, 14) Sadi dung ai myihtoi wa dai hku myit ai hpe anhte mau na re. Raitim, Yehowa gaw Elia a hkamsha lam hpe chye na ya ai.

6 Elia gaw shi a hkamsha lam hpe tsun dan ai shaloi, Yehowa mara n shagun wa ai. De a malai, shi n-gun bai lu la hkra karum ya wa ai. (1 Hk 19:5-7) Yehowa gaw Shi a atsam ningja hpe madun nna, Elia a myit mang ai lam hpe tsawra myit hte shading sharai ya ai. Bala hpe n nawku ai Israela marai 7,000 naw nga ai hpe mung tsun dan wa ai. (1 Hk 19:11-18) Dai lam ni hku nna Yehowa gaw Elia hpe tsawra ai lam madun wa ai.

Yehowa Anhte Hpe Karum Ya Ai Lam

7. Elia hpe Yehowa karum ya ai lam kaw na anhte gara hku n-gun lu ai kun?

7 Nang myit ru myit tsang hkrum nga ai kun? Elia a hkamsha lam hpe Yehowa chye na ya ai lam chye lu ai majaw, shalan shabran lam lu la na re. Anhte a yakhkak lam ni hpe mung shi chye na ya ai lam kam shangun ai. Anhte n hkum tsup ai hpe shi chye na ya nna, anhte a myit mang ai lam, hkamsha ai lam hpe pyi shi chye ai. (Shk 103:14; 139:3, 4) Elia hpe kasi la nna Yehowa hpe kamhpa yang, manghkang ni a majaw anhte myit ru myit tsang hkrum ai shaloi, shi karum ya na re.​—⁠Shk 55:22.

8. Myit ru myit tsang lam ni hpe tawt lai lu na matu Yehowa gara hku karum ya na kun?

8 Myit ru myit tsang lam gaw, n kaja ai ningmu nga shangun nna, myit daw myit hten lam hkamsha shangun ai. Nang dai hku hkamsha yang, myit ru myit tsang lam ni hpe tawt lai lu na matu Yehowa karum ya lu ai lam hpe dum u. Shi gara hku karum ya na kun? Na a myit tsang lam ni hpe tsun dan na matu shi saw shaga da ai. Nang karum hpyi ai hpe mung shi mahtai jaw na re. (Shk 5:3; 1 Pe 5:7) Dai majaw, na a manghkang ni hte seng nna Yehowa kaw chyahkring hkring akyu hpyi u. Elia hpe dingtawk ga shaga ai zawn nang hpe gaw shaga na n re. Raitim, Chyum Laika hte uhpung hku nna nang hpe ga shaga na re. Chyum Laika labau ni hpe nang hti ai shaloi, shalan shabran lam hte myit mada lam lu la na re. Hpunau nauna ni mung nang hpe n-gun jaw na re.​—⁠Rom 15:4; Heb 10:24, 25.

9. Kamhpa mai ai manang gaw anhte hpe gara hku karum ya lu ai kun?

9 Elisha hpe lit nkau garan jaw na matu Elia hpe Yehowa tsun ai. Elia myit daw nga ai shaloi, hkamjan lu na matu karum ya lu ai manang kaja jaw ai hku nna Yehowa karum ya wa ai. Dai hte maren, kamhpa mai ai manang ni hpe anhte a hkamsha lam ni tsun dan ai shaloi, anhte a hkamsha lam ni yawm mat na ai. (2 Hk 2:2; Gsh 17:17) Anhte a manghkang ni, hkamsha lam ni hpe tsun dan na matu manang n nga yang, anhte hpe n-gun jaw lu ai kung hpan ai Hkristan langai hpe mu na matu Yehowa kaw akyu hpyi u.

10. Elia a mahkrum madup gaw anhte hpe gara hku myit mada lam jaw lu ai kun? Esaia 40:28, 29 hta mu lu ai ga sadi gaw anhte hpe gara hku karum ya lu ai kun?

10 Yehowa gaw Elia hpe myit ru myit tsang lam ni tawt lai lu na matu hte shaning law law sadi dung let nawku dawjau lu na matu karum ya wa ai. Elia a mahkrum madup gaw anhte hpe myit mada lam jaw lu ai. Kalang lang, anhte grai myit ru myit tsang ai majaw, hkum hkrang hte myit masin grai pu ba ai ngu hkamsha ai. Dai shaloi, Yehowa hpe kamhpa na nga yang, shi hpe matut nawku dawjau lu na matu ra ai n-gun atsam hpe shi jaw na re.​—⁠Esaia 40:28, 29 hpe hti u. 

Yehowa Hpe Kamhpa Wa Ai Ni Kaw Na Marai Masum

11-13. Karai Kasang a moi na mayam 3 gaw gara myit ru myit tsang lam ni hkrum wa ai kun?

11 Chyum Laika kaw na kaga masha ni mung, grai sawng ai myit ru myit tsang lam ni hkrum  wa ai. Ga shadawn, Hana gaw grai myit daw myit hten nga ai. Shi gaw ma n lu nna, madu wa a kaga num mung shi hpe jahpoi asawng nga ai. (1 Sa 1:2, 6) Hana gaw myit ru myit tsang nga ai majaw, hkrap chyu hkrap nna hpa mung n kam sha ai.​—⁠1 Sa 1:7, 10.

12 Kalang mi hta, Hkawhkam Dawi mung, grai myit ru myit tsang hkrum nga ai. Shi hkrum ai manghkang ni hpe myit yu ga. Shi galaw wa ai mara ni a majaw, mara kaba nga ai ngu nna hkamsha wa ai. (Shk 40:12) Shi grai tsawra ai kasha Absalom gaw shi hpe gumlau wa ai. Hpang hta Absalom sat hkrum wa ai. (2 Sa 15:13, 14; 18:33) Dawi a grai hkau ai manang langai mung shi hpe sadi n dung wa ai. (2 Sa 16:23–17:2; Shk 55:12-14) Dawi gaw myit daw myit hten wa tim, Yehowa hpe tsep kawp kamhpa ai lam Shakawn Kungdawn Laika hta ka wa ai.​—⁠Shk 38:5-10; 94:17-19.

Yehowa a magam gun ai hta bai pyaw wa hkra shakawn kungdawn sara hpe hpa gaw karum ya wa ai kun? (Laika pang 13-15 hpe yu u) *

13 Shakawn Kungdawn sara langai mung, nhkru ai masha ni a prat hpe manawn ai myit nga wa ai. Shi gaw “Karai Wa a nta hta” magam gun nna, Lewi masha Asap kaw nna yu hkrat wa ai rai na re. Ndai shakawn kungdawn sara gaw, myit ru myit tsang ai majaw, myit n pyaw nna myit n dik wa ai. Yehowa hpe nawku dawjau ai majaw lu la ai shaman chyeju ni hpe ntsen ai myit nga wa ai.​—⁠Shk 73:2-5, 7, 12-14, 16, 17, 21.

14-15. Yehowa a karum shingtau lam hpe lu na matu karum hpyi wa ai Chyum Laika ga shadawn masum kaw na hpa sharin la lu ai kun?

14 Yehowa hpe nawku dawjau wa ai shanhte 3 gaw, karum shingtau lam lu na matu Yehowa hpe shamyet shanat wa ai. Shanhte a myit ru myit tsang lam ni hpe akyu hpyi nna Yehowa hpe tsun dan ai. Hpa majaw dai hku hkamsha ai hpe mung dan dan leng leng tsun dan ai. Yehowa a nawku dawjau ai shara de mung matut nna sa ai.​—⁠1 Sa 1:9, 10; Shk 55:22; 73:17; 122:1.

15 Yehowa gaw shanhte langai hpra hpe tsawra myit madun wa ai. Dai majaw, Hana  gaw myit simsa mat ai. (1 Sa 1:18) Dawi mung ndai hku ka wa ai: “Ding man ai wa gaw ru tsang law law hkrum nga ti mung, Yehowa shi hpe nlang hta na mawai la nu ai.” (Shk 34:19) Yehowa gaw tsawra myit hte lam matsun ya ai majaw, ‘[shi] a hkra lata hpe jum’ da ai ngu shakawn kungdawn sara hkamsha wa ai. Shi ndai hku tsun ai: “Karai Kasang kaw sit wa na, nye a ngamai shara rai nga ai: . . . Yehowa hta nye a kam sham shara ngai tawn da se ai.” (Shk 73:23, 24, 28) Ndai ga shadawn ni kaw nna anhte hpa sharin la lu ai kun? Kalang lang anhte gaw, manghkang kaba ni hkrum ai majaw, myit ru myit tsang wa ai. Raitim, Yehowa gaw kaga ni hpe gara hku karum ya ai lam anhte myit sawn sumru na, shi hpe kamhpa nna akyu hpyi na, anhte hpe shi hpyi shawn da ai lam ni hpe galaw na nga yang, anhte tawt lai lu na re.​—⁠Shk 143:1, 4-8.

Yehowa Hpe Kamhpa Nna Awng Dang Lu

Shawng nnan hta nauna gaw shi hkrai nga mayu wa ai. Raitim, kaga ni hpe karum ya na matu shakut ai shaloi shi a masa galai shai mat ai (Laika pang 16-17 hpe yu u)

16-17. (a) Anhte hkrai kaga san san hpa majaw n mai nga ai kun? (b) N-gun atsam hpe gara hku bai lu la na kun?

16 Ndai ga shadawn masum kaw nna grai ahkyak ai lam hpe sharin la lu ai. Dai gaw Yehowa hte shi a amyu masha ni hte kaga san san galoi n mai nga ai lam re. (Gsh 18:1) Madu wa a kau da hkrum nna, grai myit ru myit tsang hkrum ai Nauna Nansi ndai hku tsun ai: “Ngai kadai hte mung n hkrum mayu ai, kadai hte mung n shaga mayu ai aten law law nga wa  ai. Raitim, ngai hkrai nga magang, grau nna yawn magang re.” Mahkrum madup nga ai kaga ni a karum shingtau lam hpe tam ai shaloi, masa lam gaw galai shai mat ai. Shi ndai hku tsun ai: “Kaga ni shanhte a mayak mahkak ni hpe tsun dan ai shaloi ngai madat ai. Shanhte hpe myit tau ya magang, nye a hkamsha lam ni yawm mat wa magang re.”

17 Nawku zuphpawng lung ai hku nna n-gun bai lu mai ai. Dai hku lung yang, Yehowa gaw anhte hpe karum shingtau ya ai wa, shangwi shapyaw ya ai wa re ai hpe grau nna sakse madun lu shangun ai. (Shk 86:17) Shi a chyoi pra ai wenyi, Chyum Laika hte shi a masha ni hku nna anhte hpe n-gun jaw ai. Zuphpawng ni gaw, “shada da n-gun jaw” nna shangwi shapyaw ya na matu mung ahkaw ahkang lu shangun ai. (Rom 1:11, 12, JCLB) Nauna Sohpiya ndai hku tsun ai: “Yehowa hte hpunau nauna ni gaw hkamjan lu na matu, ngai hpe karum ya ai. Nawku zuphpawng gaw, nye a matu grai ahkyak ai. Nawku hpung hte hkaw tsun magam hta grau shang lawm ai gaw, myit ru myit tsang lam ni hpe grau nna tawt lai lu wa ai hpe ngai mu wa ai.”

18. Myit daw myit hten wa yang Yehowa gaw anhte hpe hpa jaw lu ai kun?

18 Myit daw myit hten wa yang, Yehowa gaw htawm hpang hta myit tsang lam ni hpe tsep kawp mat mat hkra galaw ya na ngu ga sadi jaw da ai sha n-ga, ya mung karum ya na ngu tsun da ai hpe dum ga. Myit daw nna, myit mada lam n nga ai ngu ai hkamsha lam hpe tawt lai lu na matu, ra nga ai ‘n-gun atsam’ hpe Yehowa jaw na re.​—⁠Hpl 2:13 JCLB.

19. Roma 8:37-39 hta anhte hpe hpa ga sadi jaw da ai kun?

19 Roma 8:37-39 hpe hti u. Karai Kasang a tsawra myit hte tsan gang mat hkra anhte hpe hpa mung n lu galaw ai lam kasa Pawlu tsun wa ai. Myit ru myit tsang lam ni hpe hparan nga ai hpunau nauna ni hpe gara hku karum ya mai na kun? Dai zawn hkamsha nga ai hpunau nauna ni hpe madi shadaw ai hku nna, matsan dum myit madun ai hku nna, Yehowa hpe gara hku kasi la mai na lam hpe hpang na sumhpa hta hkaja mat na re.

Mahkawn 44 Shagrit Shanem Ai Wa A Akyu Hpyi Ga

^ စာပိုဒ်၊ 5 Laja lana myit ru myit tsang ai (sh) myit tsang ai gaw aten na wa yang, hkum hkrang hte myit masin hpe hkra machyi shangun ai. Yehowa anhte hpe gara hku karum ya na kun? Elia myit ru myit tsang nga ai shaloi Yehowa karum ya wa ai lam hpe hkaja yu ga. Anhte myit ru myit tsang hkrum ai shaloi, Yehowa a karum shingtau lam lu na matu hpa galaw ra ai hpe, kaga Chyum Laika ga shadawn ni kaw nna mung hkaja lu na re.

^ စာပိုဒ်၊ 2 Ndai sumhpa hta mying ni hpe galai shai da ai.

^ စာပိုဒ်၊ 53 SUMLA HPE HTAI DAN AI LAM NI: Yehowa a lamu kasa gaw yup nga ai Elia hpe angwi sha jasu nna muk hte hka jaw nga.

^ စာပိုဒ်၊ 55 SUMLA HPE HTAI DAN AI LAM NI: Asap a kashu kasha kaw na yu hkrat wa ai mai byin ai shakawn kungdawn sara gaw, Lewi masha ni hte arau shakawn kungdawn mahkawn ni hkawn nna mahkawn ni ka na matu ra sharawng.