Content de lai

Malawm Ni Hpe Lai U

 Hkaja Na Sumhpa 1

Pru Sa Nna Sape Shatai Mu

Pru Sa Nna Sape Shatai Mu

2020 A Matu Shaning Ginchyum Chyum Daw: ‘Pru sa nna . . . sape shatai let, shanhte hpe baptisma jaw mu.’​—MAT 28:19.

Mahkawn 79 Ngang Ngang Tsap Lu Hkra Shanhte Hpe Sharin Ya

Sumhpa Hta Lawm Ai Lam *

1-2. Lamu kasa gaw Yesu a lup hta num ni hpe hpa tsun ai kun? Shanhte hpe Yesu hpa lam matsun jaw wa ai kun?

NDAI mabyin gaw, A.D.33 Nisan 16 jahpawt jau jau hta re. Karai Kasang hpe tsawra ai num nkau mi gaw grai yawn hkyen let lup de sa mat ai. Lai wa sai hkying hkum 36 jan hta dai shara kaw Madu Yesu Hkristu hpe makoi mayang da ai. Hkum tsawp hpe manam pyaw ai baw hte mura sau chya ya na matu yaw shada let, dai shara de shanhte sa ai re. Raitim, dai shara de du ai shaloi, lup hta hpa n nga ai majaw shanhte grai mau mat ai. Yesu gaw si ai kaw nna hkrung rawt mat sai lam hpe lamu kasa langai gaw dai num ni hpe ndai hku tsun ai: “Nanhte a shawng e, Galile mung de shi sa wa na ra ai; dai yang e nanhte shi hte hkrum na ma rin dai.”​—Mat 28:1-7; Luk 23:56; 24:10.

2 Lup kaw nna num ni bai wa ai shaloi, Yesu gaw shanhte hpang de shani sa nna ndai hku lam matsun jaw ai: “Galile mung de wa jahkrum mu ga, nye a hpu nau ni hpe sa tsun dan mu; dai yang e, ngai hte hkrum na ma ra ai.” (Mat 28:10) Yesu hkrung rawt nna shawng nnan galaw ai lam gaw, shi a sape ni hte zuphpawng na matu lajang ai lam re. Grai ahkyak ai lam matsun nkau mi hpe shi jaw na matu re.

Kadai Hpe Lam Matsun Jaw Wa Ai Kun?

Yesu hkrung rawt ai hpang kasa ni hte kaga masha ni hpe Galile hta hkrum ai shaloi, shanhte hpe ‘pru sa nna . . . sape shatai mu’ ngu matsun jaw nga (Laika pang 3-4 hpe yu u)

3-4. Mahte 28:19, 20 hta tsun da ai lam matsun gaw kasa ni hpe sha tsun ai n re ai hpe hpa majaw lu tsun ai kun? (Makawp sumla hpe yu u.)

3 Mahte 28:16-20 hpe hti u. Yesu gaw shi woi awn ai zuphpawng hta, tsa ban langai na sape ni galaw ra na ahkyak ai lit hpe tsun dan wa ai. Dai magam lit hpe sha dai ni aten anhte galaw nga ai. Yesu ndai hku tsun ai: “Nanhte pru sa nna, masha amyu baw shagu hpe sape shatai let, . . . ngai nanhte hpe hkang da mada yawng hte hpe hkan shadik lu mu ga, shanhte hpe sharin shaga ya mu.”

4 Yesu gaw shi a sape ni yawng hpe hkaw tsun shangun mayu  ai. Sadi dung ai kasa 11 hpe sha lam matsun jaw ai n re. Dai hpe gara hku chye lu ai kun? Sape shatai na matu lam matsun hpe Galile mung na bum ntsa hta jaw ai shaloi dai kaw kasa ni sha nga ai kun? Num ni hpe lamu kasa tsun ai ga hpe bai myit yu u: “[Galile mung e] nanhte shi hte hkrum na ma rin dai.” Dai majaw, dai zuphpawng hta sadi dung ai num ni mung lawm ai. Raitim, dai daram sha n re. Yesu gaw “lang lata sha shi a hpang hkan nang ai hpu nau manga tsa jan kaw dan pru wu ai” nga nna kasa Pawlu tsun ai. (1 Ko 15:6, JCLB) Gara shara kaw kun?

5. 1 Korinhtu 15:6 kaw nna hpa sharin la lu ai kun?

5 Mahte 28 hta lawm ai Galile mung na zuphpawng hpe Pawlu myit nna tsun wa na re ngu anhte sawn la mai ai lam law law nga ai. Hpa lam ni kun? Langai, Yesu a sape law malawng gaw Galile masha ni re. Dai majaw, Yerusalem na nta kaw hkrum zup na hta, Galile mung na bum hta hkrum zup ai gaw masha wunawng wuwa a matu grau nna htap htuk ai. Lahkawng, hkrung rawt ai hpang Yesu gaw, Yerusalem hta nga ai nta hta kasa 11 hte hkrum ngut chyalu re. Lama na, Yesu gaw hkaw tsun na matu hte sape shatai na matu shi a kasa ni hpe sha galaw shangun mayu ai nga yang, Yerusalem kaw sha matsun dat tim mai ai. Raitim, Galile mung hta shi hte hkrum na matu num ni, kaga ni hte sape ni hpe shi matsun wa ai.​—Luk 24:33, 36.

6. Mahte 28:20 hta mu lu ai sape shatai mu ngu ai lam matsun gaw dai ni na aten hte gara hku seng ai kun? Dai lam matsun hpe masha ni ya gara hku hkan sa nga ai kun?

6 Masum ngu na ahkyak ai lam hpe myit yu ga. Sape shatai ai magam hpe tsa ban langai na Hkristan ni hpe sha Yesu lam matsun jaw ai n re. Anhte gara hku chye lu ai kun? Yesu gaw shi hpang hkan ai ni hpe lam matsun jaw ai shaloi, ndai ga ni hte hpung dim dat da ai: “Lamu ga aprat htum hkra, ngai nanhte hte rau dinggrin a nga nga na nngai law.” (Mat 28:20) Yesu tsun da ai hte maren, sape shatai ai magam hpe masha law law galaw nga ai. Ndai lam hpe myit yu u. Shaning shagu marai 300,000 daram gaw, Yehowa Sakse hku nna hkalup hkam la nna, Yesu Hkristu a sape ni byin wa ai.

7. Ya anhte hpa lam hkaja na kun? Hpa majaw kun?

7 Chyum Laika hkaja ai masha law law gaw, hkalup hkam ai kaw du hkra rawt jat wa ai. Raitim, anhte hte arau Chyum Laika ayan hkaja ai nkau gaw, sape byin na matu htingnut nga chye ai. Chyum Laika hkaja ai hpe gaw ra sharawng tim, hkalup hkam la ai du hkra gaw n rawt jat wa ai. Nang gaw masha ni hpe chyum ga sharin ya nga ai nga yang, sharin hkam la ai wa hpe shi chye wa ai lam ni hpe hkan sa na matu hte Hkristu a sape byin wa na matu karum ya mayu na re. Chyum ga sharin ni Yehowa hpe tsawra wa nna rawt jat wa na matu gara hku karum ya lu na hpe ndai sumhpa hta hkaja mat na re. Ndai lam hpe anhte hpa majaw hkaja ra ai kun? Kalang lang Chyum Laika matut sharin ya ra na kun? hkring kau ra na kun? ngu nna anhte dawdan ra chye ai majaw re.

Myit Masin De Du Hkra Sharin Ya U

8. Chyum ga sharin ni Yehowa hpe tsawra wa hkra karum ya na matu kalang lang hpa majaw yak ai kun?

8 Yehowa gaw shi hpe tsawra nna, nawku daw jau ai hpe sha ra sharawng ai. Dai majaw, chyum ga sharin langai hpra hpe Yehowa lanu lahku nna grai tsawra ai lam hpe chye hkra karum ya na matu bandung tawn u. Yehowa gaw “jahkrai nmai ni hpe lanu lahku nga nna gaida jan ni hpe makawp maga ya nga ai” hpe shanhte mu hkra anhte karum ya ai. (Shk 68:5, JCLB) Chyum ga sharin ni gaw shanhte hpe Karai Kasang grai tsawra ai lam chye wa ai shaloi, Karai Kasang hpe shanhte bai tsawra wa na re. Chyum ga sharin nkau gaw Yehowa hpe tsawra ai Kawa langai hku nna mu mada na matu yak chye ai. Shanhte a kawa gaw tsawra matsan dum myit n madun wa ai majaw re. (2 Tm 3:1, 3) Nang chyum ga sharin ai shaloi, Yehowa a atsam ningja ni hpe ahkyak shatai  nna tsun u. Karai Kasang gaw shanhte hpe htani htana asak lu shangun mayu ai. Dai hku lu la hkra mung shi karum ya mayu ai hpe chye hkra tsun dan u. Anhte hpa naw galaw ya ra ai kun?

9-10. Chyum ga sharin ai shaloi gara laika buk ni hpe akyu jashawn ra ai kun? Hpa majaw kun?

9 Chyum Laika Anhte Hpe Hpa Sharin Ya Ai Kun?hte Karai Kasang A N-gaw Nwai Ai Myit Hta A Nga Nga Mungu ai laika buk ni hpe akyu jashawn u. Dai laika buk ni gaw chyum ga sharin ni a myit masin de du hkra sharin ya lu ai laksan laika buk re. Ga shadawn, Sharin Ya laika buk a daw 1 hta ndai ga san ni a mahtai hpe chye lu na re: Karai Kasang gaw anhte hpe yu lanu lahku ai kun? (sh) Matsan dum n chye ai kun? Masha ni jamjau hkrum ai shaloi Karai Kasang gara hku hkamsha ai kun? hte Nang Yehowa hte jinghku mai byin ai kun? Bai nna, N-gaw Nwai Ai Myit ngu ai laika buk gaw gara hku kun? Chyum Laika npawt tara ni hpe shanhte hkan sa na nga yang, shanhte a prat rawt jat wa nna, Yehowa hte grau hku hkau wa na hpe chye na hkra dai laika buk gaw karum ya na re. Nang gaw dai laika buk ni hpe kaga ni hte hkaja ngut sai nga yang pyi, bai hkaja na lamang langai hpra hte chyum ga sharin langai  hpra a ra rawng ai lam hpe atsawm myit nna hkyen lajang u.

10 Lama na, Sharin Achyin Hkingrai Ni hta n lawm nna laili laika langai hta lawm ai kaga lam ni hpe chyum ga sharin gaw chye mayu ai nga yang gara hku kun? Dai laili laika ni hpe shi hkrai hti na matu n-gun jaw mai ai. Rai yang she, chyum ga sharin na matu matsun da ai laika hte matut nna sharin ya lu na re.

Hkaja ai lamang hpe akyu hpyi nna hpang u (Laika pang 11 hpe yu u)

11. Hkaja ai lamang hpang ai hte ngut ai shaloi akyu hpyi ai hpe gara aten kaw nna hpang ging ai kun? Dai lam hpe gara hku tsun dan mai ai kun?

11 Hkaja ai lamang hpe akyu hpyi nna hpang u. Hkaja ai lamang hpang ai hte ngut ai shaloi akyu hpyi ai gaw kaja ai hpe chyum ga sharin ni chye hkra, Chyum Laika hkaja hpang nna kade n na yang tsun dan u. Chyum Laika hpe chye na na matu, Karai a chyoi pra ai wenyi sha karum ya lu ai hpe chyum ga sharin ni chye hkra anhte karum ya ra ai. Chyum Laika sharin ya ai nkau gaw, Yaku 1:5 hta tsun da ai, “nanhte hta na marai langai ngai hpaji byeng-ya kadawn nga yang gaw, . . . Karai Kasang kaw, hpyi nga u ga” ngu ai hpe hti dan nna, hpa majaw akyu hpyi ra ai hpe sanglang dan ai. Dai hpang, sharin hkam la ai wa hpe “Karai Kasang kaw nna hpaji byeng-ya hpe gara hku hpyi mai na kun?” ngu nna san ai. Karai Kasang kaw akyu hpyi ging ai hpe chyum ga sharin mung myit hkrum wa na re.

12. Chyum ga sharin hpe akyu hpyi ai atsam rawt jat wa na matu Shakawn 139:2-4 hpe akyu jashawn nna gara hku karum ya mai na kun?

12 Chyum ga sharin hpe gara hku akyu hpyi na hpe sharin ya u. Yehowa gaw myit madung hte akyu hpyi ai ga hpe madat mayu ai lam sanglang dan u. Tinang hkrai akyu hpyi ai shaloi, kaga ni hpe n tsun dan mayu ai lam ni hpe, shi kaw myit masin mahkra hte hpaw tsun dan lu ai lam tsun dan u. Yehowa gaw anhte a kraw lawang na hkamsha lam hpe chye chyalu re. (Shakawn 139:2-4 hpe hti u.) Shut shai ai myit mang ai lam hte n kaja ai akyang lailen ni hpe galai shai lu hkra, Karai Kasang kaw karum hpyi mai ai ngu nna n-gun jaw mai ai. Ga shadawn, hkaja ai aten na sai chyum ga sharin gaw, Hkristan ni n shang lawm ging ai poi langai ngai hpe ra sharawng nga ai ngu saga. Shut ai hpe shi chye tim, dai hku shang lawm ai hpe shi naw ra sharawng nga ai. Karai Kasang tsawra ai hpe sha, tsawra chye hkra karum hpyi na matu hte shi a hkamsha lam hpe Yehowa kaw dan dan leng leng tsun dan na matu n-gun jaw mai ai.​—Shk 97:10.

Chyum ga sharin hpe zuphpawng ni lung na matu saw shaga u (Laika pang 13 hpe yu u)

13. (a) Chyum ga sharin ni hpe zuphpawng lung na matu mai byin yang kalang ta hpa majaw saw shaga ging ai kun? (b) Chyum ga sharin hpe Nawku Htingnu hta pyaw hkra anhte gara hku karum ya mai ai kun?

13 Chyum ga sharin hpe zuphpawng lung na matu mai byin yang kalang ta saw shaga u. Hkristan zuphpawng ni hta, chye lu, na lu ai lam ni gaw chyum ga sharin a myit masin hpe shadut ya lu nna, rawt jat na matu shi hpe karum ya lu ai. Nawku Htingnu Hta Hpa Ni Galaw A Ta? ngu ai video hpe madun nna, nang hte arau sa na matu alum ala saw shaga u. Byin mai yang, shi zuphpawng sa lu lung na matu karum ya u. Chyum ga sharin ni hpang de hkaw tsun masha langai hpang langai hpe nang hte arau hkan nang na matu saw shaga ai gaw kaja ai. Dai hku galaw yang, shanhte gaw nawku hpung kaw na ni hte hkau wa nna, zuphpawng sa lung ai shaloi hta mung pyaw wa na re.

Chyum ga sharin Hpe Rawt Jat Hkra Karum Ya U

14. Wenyi lam hta rawt jat na matu chyum ga sharin hpe hpa gaw shadut ya lu ai kun?

14 Anhte a bandung gaw chyum ga sharin ni wenyi lam hta rawt jat hkra karum ya na matu re. (Ehp 4:13) Anhte hte arau chyum Laika hkaja ai ni nkau gaw, hkaja ai lamang kaw nna akyu lu la na hpe myit mada ai majaw rai na re. Yehowa hpe shi tsawra wa yang, nawku hpung kaw nna masha ni hte hpawn, kaga ni hpe karum ya na matu myit wa na re. (Mat 22:37-39) Htap htuk yang, Mungdan magam a matu alu shang  lawm mai ai lam hpe tsun dan na matu hkum htingnut.

Manghkang hkrum ai shaloi hpa galaw ra na lam chyum ga sharin hpe sharin ya u (Laika pang 15 hpe yu u)

15. Manghkang ni hkrum wa yang hparan chye hkra chyum ga sharin hpe gara hku karum ya mai na kun?

15 Manghkang ni hkrum wa yang gara hku hparan ra na lam chyum ga sharin hpe sharin ya u. Ga shadawn, hkalup n hkam shi ai hkaw tsun masha re ai na a chyum ga sharin gaw, nawku hpung kaw nna marai langai a majaw, shi hkra machyi ai lam nang hpe tsun dan ai ngu saga. Maga mi sha lawm na malai, Chyum Laika hta tsun da ai lam ni hpe sanglang dan mai ai. Shi gaw hpunau hpe mara raw ya nna byin ai lam hpe malap kau mai ai. Dai hku n lu galaw ai nga yang, hpunau wa hpe “mawai la lu” na matu yaw shada let, tsawra myit hte hpunau hpang de sa tsun mai ai. (Mahte 18:15 hte shingdaw yu u.) Shi gara hku tsun ra na hpe hkyen lajang ya ai hku nna karum ya mai ai. JW Library®, Yehowa Sakse Ni A Matu Hkaja Lam Matsun hte jw.org® ni hpe akyu jashawn nna manghkang hpe gara hku hparan na lam hpe madun ya mai ai. Shi hkalup garai n hkam shi yang shaman shakyang ai lam ni law law lu da magang, hkalup hkam ngut ai hpang nawku hpung kaw nna kaga ni hte hku hkau lam kaja hkra galaw lu magang re.

16. Chyum ga sharin ai hta shang lawm na matu kaga ni hpe saw shaga ai majaw hpa akyu ni lu ai hpe nang mu ai kun?

16 Hkaja lamang galaw ai hta nawku hpung kaw na ni hpe sha n-ga, hpung kawan hpe mung shaga sa u. Hpa majaw kun? Nawku hpung kaw nna kaga hkaw tsun masha ni gaw nang n karum ya lu ai lam ni hpe karum ya lu ai mung rai na re. Ga shadawn, chyum ga sharin gaw hkayawm dawm kau na matu shakut nga tim, chyahkring hkring hkrat sum ai ngu saga. Dai zawn hkrat sum ai lam ni hpe awng dang wa ai Sakse Hkam langai hpe chyum ga sharin hpang de arau sa na matu saw shaga u. Na a chyum ga sharin ra nga ai tatut re ai hpaji jaw ga hpe shi tsun dan lu ai. Lama na, nang gaw mahkrum madup nga ai hpunau a shawng hta hkaja lamang galaw na matu n gwi yang, shi hpe woi awn ya na matu karum hpyi mai ai. Gara masa hta raitim, kaga ni a mahkrum madup ni kaw nna akyu lu na matu galaw mai ai. Anhte a bandung gaw, chyum ga sharin ni wenyi lam hta rawt jat hkra karum ya na matu re.

Hkaja Ai Lamang Hpe Hkring Kau Ra Na Kun?

17-18. Hkaja ai lamang hpe hkring kau na kun? matut sharin na kun? ngu ai hpe dawdan ai shaloi hpa hpe myit ging ai kun?

17 Na a chyum ga sharin gaw shi a prat hpe galai shai ai lam ni n galaw ai nga yang, aten langai ngai hta ‘hkaja ai lamang hpe hkring kau ra na kun?’ ngu nna tinang hkum tinang san mai ai. Masa hpe maram yu nna, shi a atsam ningja hpe mung shalawm nna myit ya ging ai. Masha nkau mi gaw rawt jat na matu aten law law la ra ai. Tinang hkum tinang ndai hku san yu u: ‘Nye a chyum ga sharin gaw shi a masa hku hkan nna rawt jat nga ai kun?’ ‘Shi sharin da ai lam ni hpe tatut “hkan shadik” nga ai kun?’ (Mat 28:20) Chyum ga sharin gaw angwi ngwi sha rawt jat wa chye ai. Raitim, shi masa hte shi gaw rawt jat ging ai.

18 Marai langai gaw aten na wa tim, hkaja ai  lamang hpe manu n shadan ai nga yang hpa galaw ra ai kun? Ndai mabyin hpe myit yu u: Chyum ga sharin gaw Sharin Ya laika buk hpe hkaja ngut nna, N-gaw Nwai Ai Myit laika buk hpe pyi hkaja hpang nga ai rai na re. Raitim, zuphpawng ni, Myit Dum Poi hpe pyi kalang mung n lung ga ai. Kaji kajaw lam ni a majaw n hkaja lu ai aten chyahkring hkring nga ai. Dai hku byin nga yang, shi hte dan dan leng leng tsun shaga ra ai. *

19. Chyum ga sharin gaw hkaja ai lamang hpe manu n shadan ai zawn rai yang shi hpe gara hku tsun mai ai kun? Hpa hpe myit ra ai kun?

19 ‘Yehowa Sakse langai byin na matu nang hta hpa mayak mahkak nga ai kun?’ ngu nna shi hpe san u. Shi ndai hku tsun wa chye ai: ‘Ngai Chyum Laika hkaja ai hpe gaw ra ai. Raitim, Sakse Hkam gaw galoi mung galaw na n re.’ Hkaja ai mung aten na wa nna shi dai hku tsun ai nga yang, matut sharin ging ai kun? Chyum ga sharin nkau mi gaw, shanhte hpe htingnut shangun ai lam ni hpe hpaw tsun wa chye ai. Ga shadawn, nta langai hpang langai hkaw tsun na matu n mai byin ai ngu shi hkamsha chye ai. Ya, shi a hkamsha lam hpe nang chye sai majaw, shi hpe grau nna karum ya lu sai.

Rawt jat lam n nga ai chyum ga sharin ai lamang hta aten hkum shama (Laika pang 20 hpe yu u)

20. Chyum ga sharin lamang hpe hkring kau na (sh) matut sharin na ngu ai hpe chye hkra Kasa 13:48 gaw gara hku karum ya ai kun?

20 Chyum ga sharin nkau mi gaw Ezekela prat na Israela ni hte bung ai gaw yawn hpa re. Ezekela hpe Yehowa ndai hku tsun ai: “Yu u, na a ga gaw mahku grai pyaw nna, atsawm sha chye dum ai laka ka ai wa a ga hte maren, shanhte a man e rai nga ai: shanhte gaw na a ga na la ti mung, n galaw hkraw ma ai.” (Eze 33:32) Shi hte matut n hkaja sai lam hpe tsun na matu yak na re. Raitim, “ahkying ladaw law law n nga sai.” (1 Ko 7:29, JCLB) Rawt jat lam n nga ai ni hte hkaja nna aten shama na malai, “htani htana asak lu la na matu myit madung hte shakut” nga ai ni hpe tam ra ai.​—Kasa 13:48 hpe hti u. *

Na a magam lawk hta karum shingtau lam lu na matu akyu hpyi nga ai ni nga chye ai (Laika pang 20 hpe yu u)

21. 2020 shaning a matu shaning ginchyum Chyum daw gaw hpa rai kun?

21 2020 laman, sape shatai ai magam hta grau rawt jat wa na matu, shaning ginchyum Chyum daw gaw anhte hpe karum ya na re. Dai Chyum daw hta, Galile mung na bum kaw hkrum zup ai shaloi Yesu tsun wa ai ga ni kaw nna ndai ga nkau lawm ai: ‘Pru sa nna . . . sape shatai let, shanhte hpe baptisma jaw mu.’​Mat 28:19.

Sape shatai ai magam hta rawt jat na matu hte chyum ga sharin ni hkalup hkam la lu hkra karum ya na matu dawdan da ga (Laika pang 21 hpe yu u)

Mahkawn 70 Gingdan Ai Wa Hpe Tam

^ စာပိုဒ်၊ 5 2020 a shaning ginchyum chyum daw gaw “sape shatai” na matu anhte hpe n-gun jaw da ai. Yehowa a mayam ni yawng gaw dai lam matsun hpe hkan sa ai. Chyum ga sharin ni Hkristu a sape byin wa na matu shanhte a myit masin de du hkra gara hku sharin ya mai na kun? Chyum ga sharin ni Yehowa hte hku hkau wa na matu anhte gara hku karum ya lu na lam hpe ndai sumhpa hta chye lu na re. Chyum Laika hpe matut sharin ya na kun? n sharin ya na kun? ngu ai hpe gara hku dawdan na lam mung hkaja lu na re.

^ စာပိုဒ်၊ 20 Kasa 13:48 (NW): “Dai hpe maigan amyu ni na jang, shanhte kabu gara nga ma ai hte, Yehowa a mungga hpe shagrau shaa ma ai. Htani htana asak lu la na matu myit madung hte shakut ai ni nlang mung kamsham wa ma ai.”