Content de lai

Malawm Ni Hpe Lai U

 Hkaja Na Sumhpa 5

Zuphpawng Ni Hpe Lung Mayu Wa Hkra Karum Ya Lu Ai Atsam Ningja Ni

Zuphpawng Ni Hpe Lung Mayu Wa Hkra Karum Ya Lu Ai Atsam Ningja Ni

“Madu a si hkam ai lam, shi bai du ai du hkra, nanhte tsun shana ya myit dai.”​—⁠1 KO 11:26.

Mahkawn 18 Gawng Malai Hkungga A Matu Chyeju Dum

Sumhpa Hta Lawm Ai Lam *

1-2. (a) Madu A Shana Shat Sha Poi hpe wan hku law ai masha ni arau lung ai shaloi Yehowa hpa hpe mu ai kun? (Makawp sumla hpe yu u.) (b) Ndai sumhpa hta anhte hpa lam hkaja mat na kun?

MUNGKAN ting na wan hku law ai masha ni gaw Madu A Shana Shat Sha Poi hta arau shang lawm nga ai hpe Yehowa yu taw nga ai ngu shingran yu u. Shi gaw, sa lung ai ni hpe uhpung nawng hku nna sha mu ai n re. Marai langai hpra hpe myit lawm let yu taw nga ai. Ga shadawn, sadi dung let shaning shagu sa lung ai ni hpe shi chye ai. Sa lung ai ni kaw nna nkau gaw, laja lana zingri hkrum taw nga tim sa lung ma ai hpe mung shi mu ai. Nkau mi nga yang, kaga zuphpawng ni hpe ayan n sa tim, Myit Dum Poi hpe gaw grai ahkyak ai ngu mu mada nna, sa lung ma ai hpe mung mu ai. Ndai zuphpawng a lam hpe chye mayu ai majaw, shawng nnan hku nna sa lung ai ni hpe mung shi sadi hkrup ai.

2 Myit Dum Poi hpe masha grai law hkra sa lung ai majaw, Yehowa grai kabu ai. (Luk 22:19) Yehowa gaw, sa lung ai masha hti hkum hpe n re ai sha, shanhte hpa majaw sa lung ai lam hpe grau nna myit lawm ai. Ndai sumhpa hta, ahkyak ai ndai ga san hpe hkaja mat na re: Anhte gaw laning mi hta kalang galaw ai Myit Dum Poi hpe sha n-ga, shi hpe tsawra ai ni a matu Yehowa lajang ya ai bat shagu zuphpawng ni hpe mung hpa majaw lung ai kun?

Mungkan ting na wan hku law ai masha ni gaw Madu A Shana Shat Sha Poi lung na matu saw shaga hkrum (Laika pang 1-2 hpe yu u)

Shagrit Shanem Ai Myit Gaw Lung Na Matu Shadut Ya

3-4. (a) Zuphpawng ni hpe anhte hpa majaw lung ai kun? (b) Zuphpawng lung ai gaw anhte hte seng nna hpa hpe madun nga ai kun? (c) 1 Korinhtu 11:23-26 hta tsun da ai hku nga yang, Myit Dum Poi hpe anhte hpa majaw n mai koi yen ging ai kun?

3 Bat shagu zuphpawng gaw, nawku daw jau ai lam a ahkyak htum daw hta lawm ai majaw anhte lung ga ai re. Zuphpawng hta Yehowa anhte hpe sharin ya ai majaw mung, anhte lung ai re. Gumrawng ai masha ni gaw hpa mung n sharin la ra ai ngu  myit la ma ai. (3Yh 9) Shanhte hte n bung ai sha anhte gaw, Yehowa hte shi akyu jashawn nga ai uhpung hku nna lam matsun ya nga ai hpe grai ra sharawng ga ai.​—⁠Esa 30:20; Yhn 6:45.

4 Anhte zuphpawng lung ai gaw, anhte hta shagrit shanem myit nga nna sharin hkam la na matu jin jin rai nga ai hpe madun nga ai. Yesu A Myit Dum Poi shana hta, anhte gaw dai ahkyak ai poi hpe lung ra ai lit nga ai majaw sha lung ai n re. “Ngai hpe adum nga na matu ndai galaw mu” ngu nna Yesu htet da ai ga hpe shagrit shanem let hkan sa mayu ai majaw mung lung ga ai re. (1 Korinhtu 11:23-26 hpe hti u.) Dai zuphpawng gaw, htawm hpang hte seng ai myit mada lam hpe ngang kang hkra galaw ya nna, Yehowa anhte hpe kade daram tsawra ai hpe mung bai myit dum shangun ai. Anhte gaw laning mi hta kalang sha n-ga, n-gun jaw lam hte shangang shakang ya ai lam ra ai hpe Yehowa chye ai. Dai majaw, shi gaw bat shagu zuphpawng ni hpe lajang ya nna, yawng hpe sa lung na matu mung n-gun jaw ai. Shagrit shanem ai myit gaw dai ga hpe hkan sa na matu anhte hpe shadut ya ai. Anhte gaw dai zuphpawng ni hpe hkyen lajang nna lung na matu aten law law jaw ga ai.

5. Yehowa a saw shaga ai lam hpe shagrit shanem ai masha ni gaw hpa majaw hkap la ai kun?

5 Shaning shagu, shagrit shanem ai masha ni gaw Yehowa sharin achyin ya na ngu ai saw shaga lam hpe hkap la ma ai. (Esa 50:4) Shanhte gaw Myit Dum Poi lung ai hpe ra sharawng nna, kaga zuphpawng ni hpe mung lung hpang wa ma ai. (Zeh 8:20-23) “[Anhte] hpe karum ai wa hte, mawai la ai wa” re ai Yehowa a sharin achyin ya ai lam hte lam matsun ya ai hpe anhte yawng ra sharawng ga ai. (Shk 40:17) Yehowa hte shi grai tsawra ai Kasha Yesu gaw anhte hpe sharin achyin ya na matu saw shaga nga ai. Dai hpe hkap la ai hta grau nna ahkyak ai, kabu gara shangun ai lam n nga sai.​—⁠Mat 17:5; 18:20; 28:20.

6. Shagrit shanem ai myit gaw Myit Dum Poi lung mayu wa hkra masha langai hpe gara hku karum ya ai kun?

6 Yesu a Myit Dum Poi hpe sa lung na matu, masha law law hpe dang lu ai daram, shaning shagu saw shaga ga ai. Shagrit shanem ai masha law law gaw, anhte a saw shaga ai hpe hkap la nna akyu lu la ma ai. Ga shadawn langai hpe yu yu ga. Lai wa sai shaning law law hta, masha langai gaw, Myit Dum Poi saw shaga laika lu la ai shaloi, hpunau wa hpe shi n lu sa ai lam tsun ai. Raitim, Myit Dum Poi shana hta dai wa gaw, Nawku Htingnu de sa wa ai hpe mu ai majaw, hpunau gaw grai mau mat ai. Hpunau nauna ni gaw, shi hpe alum ala hkap tau la ai hpe shi ra sharawng mat ai majaw, bat shagu zuphpawng ni hpe mung lung hpang wa ai. Laning mi ting hta zuphpawng masum hpe sha n lu lung ai. Zuphpawng yawng hpe lung mayu wa hkra shi hpe hpa gaw karum ya wa ai kun? Shi a myit masin galai shai na matu shagrit shanem myit gaw karum ya wa ai. Shi hpe saw shaga ai hpunau wa gaw shi a lam hpe ndai hku tsun ai: “Shi gaw grai shagrit shanem ai wa re.” Yehowa gaw shi hpe nawku wa hkra dai wa hpe lau la ai gaw teng sha re. Ya, shi gaw hkalup hkam ngut sai hpunau re.​—⁠2 Sa 22:28; Yhn 6:44.

7. Zuphpawng hta sharin la lu ai lam hte Chyum Laika hti ai lam gaw shagrit shanem na matu gara hku karum ya ai kun?

7 Zuphpawng hta sharin la lu ai lam hte Chyum Laika hti ai kaw nna chye wa ai lam ni gaw, anhte hta shagrit shanem myit nga na matu karum ya ai. Myit Dum Poi ni wa ai aten hta Yesu a kasi ningli hte asak hpe gawng malai hkungga hku nna jaw wa ai shi a shagrit shanem ai myit hpe zuphpawng ni hta hkaja ai. Myit Dum Poi garai n du shi ai nhtoi ni hta, Yesu si ai hte hkrung rawt wa ai mabyin ni hte seng ai Chyum Laika labau ni hpe hti na matu anhte n-gun jaw hkrum ga ai. Dai laman, zuphpawng ni hta sharin la lu ai lam ni hte anhte hti ai Chyum Laika labau ni gaw, anhte a matu  Yesu sak jaw wa ai gawng malai hkungga hpe grau nna manu shadan hkra karum ya ai. Dai zawn manu shadan ai myit gaw, Yesu a shagrit shanem ai myit hpe kasi la na matu hte Yehowa a myit ra ai lam hpe galaw na matu yak tim pyi, hkan galaw na matu anhte hpe shadut ya ai.​—⁠Luk 22:41, 42.

Nden Marai Gaw Zuphpawng Lung Na Matu Karum Ya

8. Yesu gaw nden marai hpe gara hku madun wa ai kun?

8 Yesu madun wa ai nden marai hpe anhte shakut nna kasi la ga ai. Shi garai n si shi ai nhtoi ni hta, madun wa ai shi a nden marai hpe myit yu ga. Shi a hpyen ni gaw shi hpe kade n na yang, kaya jahkrum na, kayat na, sat na hpe shi chye ai. (Mat 20:17-19) Raitim, shi gaw si hkam na matu jin jin re. Aten du wa ai shaloi, Getsemane sun hta shi hte arau nga nga ai kasa ni hpe shi ndai hku tsun ai: “Rawt mu, anhte sa wa saga: yu mu, ngai hpe ap kau na wa gaw ni wa ra ai.” (Mat 26:36, 46) Laknak lang da ai masha hpawng gaw, shi hpe rim na matu sa wa ai shaloi, shi gaw shawng de sit sa nna shi kadai re ai hpe tsun dan ai. Dai hpang, shi a kasa ni hpe chyawm gaw n rim na matu hpyen la ni hpe tsun dat ai. (Yhn 18:3-8) Yesu madun wa ai nden marai gaw grai laklai ai. Dai ni, namman chya hkrum ai Hkristan ni hte sagu kaga ni gaw, Yesu madun wa ai nden marai hpe shakut nna kasi la nga ma ai. Gara hku nna kun?

Hkristan zuphpawng ni hpe nden marai rawng let lung ai gaw kaga ni hpe n-gun jaw lu (Laika pang 9 hpe yu u) *

9. (a) Zuphpawng ni hpe ayan lung na matu anhte hta hpa majaw nden marai ra ai kun? (b) Anhte a kasi ningli gaw makam masham a majaw htawng hkrat nga ai hpunau nauna ni hpe gara hku akyu shabyin ya lu ai kun?

9 Zuphpawng ni hpe ayan lung na matu, anhte hta yakhkak ai masa ni hkrum nga yang, nden marai madun ra na re. Anhte kaw na hpunau nauna nkau gaw, yawn hkyen ai, myit ru myit tsang ai, hkam n kaja ai zawn re ai yakhkak jamjau ai lam ni nga tim, zuphpawng ni hpe ayan lung nga ai. Nkau mi nga yang, nta masha ni (sh) ahkaw ahkang nga ai asuya ni a pat shingdang ai lam ni hkrum nga tim, nden marai rawng let zuphpawng ni hpe lung nga ma ai. Anhte a kasi ningli gaw, makam masham a majaw htawng hkrat nga ai hpunau nauna ni hpe gara hku akyu shabyin ya ai hpe myit yu ga. (Heb 13:3) Anhte mayak mahkak ni hkrum nga tim, Yehowa hpe matut nna nawku dawjau ai hpe shanhte na yang, shanhte mung makam masham ngang kang wa na re. Matut sadi dung lu nna nden marai mung grau nga wa na re. Kasa Pawlu mung dai zawn hkamsha wa ai. Roma hta bawng dung hkrum nga ai shaloi, hpunau nauna ni gaw Yehowa hpe sadi dung let matut nawku dawjau nga ai hpe na lu ai majaw, shi grai kabu ai. (Hpl 1:3-5, 12-14) Htawng kaw na pru na mahka (sh) pru ngut ai hte kalang ta, Hebre masha ni hpang shi laika ka wa ai. Dai laika hta, sadi dung ai Hkristan ni hpe “hpunau shada tsawra ai myit tutnawng” tsawra nna, arau zuphpawng ai hpe n koi yen na matu shi n-gun jaw da ai.​—⁠Heb 10:24, 25; 13:1.

10-11. (a) Kadai ni hpe Myit Dum Poi saw shaga ging ai kun? (b) Ehpesu 1:7 hku nga yang hpa majaw dai hku galaw ging ai kun?

10 Anhte a jinghku ni, bungli manang ni hte htingbu ni hpe Myit Dum Poi sa lung na matu anhte saw shaga ai shaloi, nden marai hpe madun ga ai. Shanhte hpe anhte hpa majaw saw shaga ai kun? Yehowa hte Yesu anhte a matu  galaw ya wa ai lam ni hpe grai chyeju dum ai majaw anhte saw shaga ai re. Gawng malai hkungga a majaw lu la na Yehowa a “n taw n tsang ai chyeju” hpe shanhte mung akyu hkam la lu hkra sa madat na matu anhte saw shaga ai re.​—⁠Ephesu 1:7 hpe hti u; Shr 22:17.

11 Zuphpawng lung ai hku nna anhte nden marai madun yang, manu dan ai kaga atsam ningja langai hpe mung madun ai re. Dai atsam ningja hpe Yehowa hte shi a Kasha gaw laklai ai hku madun wa ai.

Tsawra Myit Gaw Zuphpawng Lung Na Matu Shadut Ya

12. (a) Yehowa hte Yesu hpe grau tsawra wa hkra zuphpawng ni gaw gara hku karum ya ai kun? (b) Yesu hpe kasi la na matu 2 Korinhtu 5:14, 15 gaw anhte hpe gara hku n-gun jaw ai kun?

12 Yehowa hte Yesu hpe tsawra ai myit gaw zuphpawng lung na matu anhte hpe shadut ya ai. Zuphpawng ni kaw nna anhte chye lu ai lam ni gaw, Yehowa hte Yesu hpe grau nna tsawra hkra karum ya ai. Anhte a matu shan yan galaw ya wa ai lam ni hpe, bai dum na matu mung ayan na karum ya ai. (Rom 5:8) Laksan hku nna Myit Dum Poi gaw, gawng malai hkungga a manu dan ai lam hpe n chye na shi ai ni hte hpawn, anhte yawng hpe shan kade daram tsawra ai hpe bai dum shangun ai. Anhte a shani shagu asak hkrung hkawm sa lam hta Yesu hpe shakut shaja let kasi la ai hku nna Chyeju dum ai lam madun ga ai. (2 Korinhtu 5:14, 15 hpe hti u.) Dai hta n-ga, gawng malai hkungga hpe lajang ya ai Yehowa hpe shakawn na matu, anhte a myit masin gaw shadut ya ai. Shakawn lu ai lam langai gaw, zuphpawng ni hta myit masin mahkra hte mahtai jaw ai hku nna re.

13. Yehowa hte Yesu hpe grai tsawra ai lam anhte gara hku madun lu ai kun? Sang lang dan u. 

13 Yehowa hte Yesu a matu sharawng awng let sak jaw ai hku nna shan hpe grai tsawra ai lam anhte madun mai ai. Zuphpawng ni lung na matu, kalang lang anhte hta sak jaw ra ai lam amyu myu nga ai. Zuphpawng langai hpe anhte law malawng bungli galaw nna grai ba nga ai shana maga aten hta galaw ma ai. Zuphpawng langai hpe gaw, kaga ni hkring sa ai aten re ai kru ya (sh) laban ya hta galaw ai. Anhte grai ba let zuphpawng lung ai hpe Yehowa sadi hkrup ai kun? Sadi hkrup ai. Dai sha n-ga, Yehowa hpe anhte tsawra nna, zuphpawng sa na matu shakut shaja ai lam yawng hpe shi grai manu shadan ai.​—⁠Mrk 12:41-44.

14. Yesu gaw tingkyeng akyu n tam ai tsawra myit madun ai hku nna anhte a matu gara hku kasi ningli jahkrat wa ai kun?

14 Yesu gaw tingkyeng akyu n tam ai tsawra myit madun ai hku nna anhte a matu kasi ningli  jahkrat wa ai. Sape ni a matu sharawng awng let shi si hkam wa ai. Dai sha n-ga, shani shagu asak hkrung ai lam hta mung sape ni a myit ra ai lam hpe shawng tawn wa ai. Ga shadawn, myit masin, hkum hkrang grai pu ba nga tim, shi hpang hkan ai ni hte aten jaw nna hkrum zup wa ai. (Luk 22:39-46) Shi gaw, shanhte kaw nna lu la na hpe n myit ai sha, shi mahtang jaw na matu she myit maju jung wa ai. (Mat 20:28) Yehowa hte hpunau nauna ni hpe anhte tsawra yang, Madu A Shana Shat Sha Poi hpe anhte lung ai zawn, kaga zuphpawng ni hpe mung shakut nna lung na re.

15. Kadai ni hpe laksan hku nna karum ya mayu ai kun?

15 Jet ai Hkristan uhpung hta anhte nga nga nna, anhte hte arau masha nnan ni shang lawm wa na matu dang lu ai daram aten jaw nna saw shaga nga ai. Grau nna gaw, “makam masham a dinghku na ni” raitim, wenyi lam hta katsi mat ai ni hpe karum na matu myit maju jung ga ai. (Gal 6:10) Zuphpawng ni hpe lung na matu shanhte hpe n-gun jaw ai hku nna anhte a tsawra myit hpe madun ga ai. Laksan hku nna Myit Dum Poi hpe lung na matu re. Shanhte gaw, Sagu Rem hte Kawa re ai Yehowa hpang de bai wa ai shaloi, Yehowa hte Yesu zawn, anhte mung grai kabu ga ai.​—⁠Mat 18:14.

16. (a) Anhte shada da gara hku n-gun jaw lu ai kun? Zuphpawng ni gaw anhte hpe hpa galaw ya na kun? (b) Yawhan 3:16 hta mu lu ai Yesu a ga ni hpe myit dum na matu hpa majaw ndai aten gaw htap htuk ai kun?

16 2019, April 19, bat manga ya shani hta ang ai Myit Dum Poi hpe lung na matu, garai n du shi ai bat ni hta, dang lu ai daram masha law law hpe saw shaga ga. (“ Shanhte Hpe Saw Shaga Na Kun?” ngu ai lawk hpe yu u.) Du wa na aten ni hta, Yehowa anhte hpe lajang ya ai zuphpawng ni hpe ayan lung ai hku nna anhte shada da n-gun jaw mai ai. Mungkan a jahtum ni wa sai hte maren, anhte hta shagrit shanem ai myit, nden marai hte tsawra myit matut nga na matu karum ya lu ai zuphpawng ni anhte ra ga ai. (1Ht 5:8-11) Yehowa hte shi a Kasha hpe myit masin mahkra hte anhte grai tsawra ai lam matut nna madun mat ga.​—⁠Yawhan 3:16 hpe hti u.

Mahkawn 126 Myit Maja, Kam Sham, Myit Rawt Jat

^ စာပိုဒ်၊ 5 Hkristu a Myit Dum Poi gaw, 2019, April 19, bat manga ya shana hta ang ai. Dai zuphpawng gaw laning mi laman hta galaw ai ahkyak htum zuphpawng re. Dai zuphpawng hpe lung na matu, anhte hpe hpa gaw shadut ya ai kun? Yehowa hpe myit pyaw hkra galaw ya mayu ai myit gaw shadut ya ai. Ndai sumhpa hta, Myit Dum Poi hte bat shagu zuphpawng lung mayu hkra karum ya lu ai atsam ningja ni hpe hkaja mat na re.

^ စာပိုဒ်၊ 52 SUMLA HPE HTAI DAN AI LAM NI: Makam masham a majaw htawng hkrat nga ai hpunau gaw, nta kaw na laika lu la ai majaw grai n-gun lu wa ai. Shi a dinghku gaw shi hpe n malap nna, shanhte nga ai shara hta, mung masa lam n kaja tim Yehowa hpe matut sadi dung nga ai hpe na ai majaw shi grai kabu nga ai.