Content de lai

Malawm Ni Hpe Lai U

 Hkaja Na Sumhpa 1

‘Hkum Tsang Et, Ngai Na A Karai Kasang Rai Nga Ai’

‘Hkum Tsang Et, Ngai Na A Karai Kasang Rai Nga Ai’

“Hkum hkrit et, ngai nang hte rau rai nga nngai; hkum tsang et, ngai na a Karai Kasang rai nga nngai; ngai nang hpe n-gun shaja nna karum na de ai.”​—⁠ESA 41:10.

Mahkawn 7 Anhte A N-gun Atsam Yehowa

Sumhpa Hta Lawm Ai Lam *

1-2. (a) Esaia 41:10 hta lawm ai lam kaw nna nauna Yoshiko gara hku akyu lu wa ai kun? (b) Dai laika kaw nna kadai ni mung akyu lu la na kun?

SADI dung ai Hkristan nauna Yoshiko gaw, n kaja ai shiga na wa ai. Shata loi mi sha shi asak hkrung sana lam sarawun tsun ai. Shi gara hku bai htang ai kun? Shi grai ra sharawng ai Chyum daw re ai Esaia 41:10 (Hti u) hpe bai dum ai. Yehowa gaw shi a lata hpe magra da ai majaw, n hkrit ai lam sarawun hpe myit simsa let tsun dan lu wa ai. * Ndai Chyum daw hta mu lu ai shalan shabran lam gaw, Yehowa hpe tsep kawp kamhpa na matu nauna hpe karum ya wa ai. Chyam dinglik lam amyu myu hkrum ai shaloi, myit simsa lam lu na matu ndai Chyum daw gaw anhte hpe mung karum ya lu ai. Dai hku karum ya lu ai hpe chye na na matu, Esaia hpe ndai shiga hpa majaw jaw ai hpe shawng nnan hkaja yu ga.

2 Babelon de bawng masha hku nna woi mat wa hkrum ai Yuda masha ni hpe shalan shabran ya na matu, Esaia hpe Yehowa ka shangun ai re. Moi na Yuda masha ni sha n-ga, anhte ni mung akyu lu la na matu, Yehowa gaw Chyum Laika hta ka shalawm da ya ai. (Esa 40:8; Rom 15:4) Anhte gaw, “yak la ai aten” hta asak hkrung nga ai majaw, Esaia Laika kaw lawm ai n-gun lu shangun ai lam ni hpe grau nna ra nga ga ai.​—⁠ 2 Tm 3:1.

3. (a) 2019, shaning ginchyum Chyum daw a matu lata da ai Esaia 41:10 hta hpa ga sadi ni lawm ai kun? (b) Dai ga sadi ni hpe anhte hpa majaw ra sharawng ai kun?

3 Esaia 41:10 hta lawm ai anhte a makam masham hpe ngangkang hkra galaw ya lu ai lam masum hpe ndai sumhpa hta hkaja mat na re. Dai ni gaw, (1) Yehowa anhte hte arau rai nga na lam, (2) shi gaw anhte a Karai Kasang re ai lam, (3) shi anhte hpe karum ya na lam ni re. Yoshiko zawn anhte a aprat  hta, chyam dinglik ai lam ni hkrum nga ai majaw, dai ga sadi * ni ra ga ai. Ndai mungkan hta n kaja ai lam ni byin nga ai majaw, anhte mung yakhkak ai lam ni hkrum nga ai. Anhte kaw nna nkau mi gaw, n-gun atsam kaba ai asuya ni a zingri zingrat ai lam hkrum nga ma ai. Ndai ga sadi masum hpe langai hpra hkaja mat ga.

‘Ngai Nang Hte Rau Rai Nga Na’

4. (a) Anhte hkaja na shawng nnan na ga sadi gaw hpa rai kun? (Lawu matsing hpe yu u.) (b) Yehowa gaw anhte hte seng nna shi a hkamsha ai lam hpe gara hku madun dan ai kun? (c) Karai Kasang a ga ni kaw nna nang gara hku akyu lu la ai kun?

4 Yehowa gaw shawng nnan anhte hpe ndai ga hte shalan shabran ya ai: “Hkum hkrit et, ngai nang hte rau rai nga nngai.” * Yehowa gaw shi a tsawra myit hte aten shagu yu lanu lahku ai hku nna, anhte hte arau rai nga ai lam madun ai. Shi a tsawra myit hte hkamsha ai lam hpe gara hku madun dan ai hpe yu yu ga. “Nang gaw nye a matu hpu ging nga ndai; ngai nang hpe tsaw ra ai hte nang hpe shagrau sha-a nngai” nga nna Yehowa tsun ai. (Esa 43:4, JCLB) Shi hpe nawku dawjau ai masha ni hpe tsawra ai lam mat mat hkra Yehowa hpe kadai mung n lu galaw ai. Shi a ngang kang ai tsawra myit gaw galoi mung n galai shai ai. (Esa 54:10) Shi a tsawra myit hte shi hte hku hkau ai lam gaw anhte hpe n-gun jaw ai. Shi a jinghku Abraham hpe makawp maga ya wa ai zawn, dai ni anhte hpe mung makawp maga ya na re. “Abram e, hkum hkrit et; ngai gaw na a makawp ninggang rai nga nngai” nga nna Yehowa shi hpe tsun wa ai.​—⁠Nin 15:1.

Anhte a manghkang ni gaw hka panglai (sh) wan panglai zawn rai nga tim Yehowa a karum shingtau lam hte tawt lai lu na re (Laika pang 5-6 hpe yu u) *

5-6. (a) Anhte chyam dinglik ai lam ni hkrum ai shaloi Yehowa karum ya mayu ai hpe gara hku chye lu ai kun? (b) Yoshiko a kasi ningli kaw nna anhte hpa sharin la lu ai kun?

5 Anhte a manghkang ni hpe hparan ya na matu, Yehowa myit lawm nga ai lam anhte chye lu ai. Hpa majaw nga yang, shi a masha ni hpe ndai hku ga sadi jaw da ai: “Nang hka rap wa yang, ngai nang hte rau rai nga nngai; hka nu hka shi ni hpe rap wa yang, lim wa na n rai; wan hpe kabye yang, hkru na n rai, wan shinglet mung galip na n rai.” (Esa 43:2) Dai ga ni gaw hpa lachyum nga ai kun?

6 Chyam dinglik ai lam ni hpe tsep kawp yeng seng kau ya na nga nna Yehowa ga sadi n jaw ai. Raitim, “hka nu” zawn re ai manghkang ni hta lim mat na matu (sh) “wan shinglet” hte  bung ai yakhkak jamjau ai lam ni a majaw prat tup hten za mat na matu gaw, shi ahkang jaw na n re. Dai chyam dinglik hkrum ai lam ni hpe “rap wa yang” anhte hpe karum na, anhte hte arau rai nga na ngu shi ga sadi jaw da ai. Yehowa hpa galaw ya na kun? Shi gaw anhte a hkrit tsang ai myit hpe yawm mat hkra galaw ya na re ai majaw, si hkrung si htan hte hkrum wa yang pyi, anhte a ding hpring ai lam hpe matut nna hkang da lu ai. (Esa 41:13) Yoshiko gaw dai lam teng ai hpe tatut hkrum wa ai. Shi a kasha ndai hku tsun ai: “Anu a myit simsa ai lam hpe anhte grai ra sharawng wa ai. Yehowa gaw shi hpe myit simsa lam jaw wa ai hpe anhte teng sha mu lu ai. Shi si ai shani du hkra, Yehowa hte shi a ga sadi ni a lam hpe tsi sarama ni hte machyi ai masha ni hpe tsun dan wa ai.” Yoshiko a kasi ningli kaw nna anhte hpa sharin la lu ai kun? ‘Ngai nang hte rau rai nga na’ ngu ai Karai a ga sadi ni hpe anhte kamhpa ai shaloi, chyam dinglik ai lam ni hpe hkamjan lu nna nden marai rawng wa na re.

“Ngai Na A Karai Kasang Rai Nga Nngai”

7-8. (a) Anhte hkaja na lahkawng ngu na ga sadi gaw hpa rai kun? Dai gaw hpa lachyum rai kun? (b) “Hkum tsang et” nga nna Yuda bawng masha ni hpe Yehowa hpa majaw tsun wa ai kun? (c) Esaia 46:3, 4 hta mu lu ai gara ga si ni gaw Yehowa a masha ni n hkrit na matu karum ya ai kun?

7 Esaia hpe ka shangun ai lahkawng ngu na ga sadi gaw ndai re: “Hkum tsang et, ngai na a Karai Kasang rai nga nngai.” Tsang ai ngu tsun da ai lachyum gaw hpa rai na kun? Ndai Chyum daw hta lawm ai ‘tsang ai’ ngu ai a madung lachyum gaw, marai langai ngai (sh) lama ma gaw nang hpe shoihpa jaw na tsang ai majaw, hpang de chyahkring hkring kayin yu ai hpe tsun mayu ai re. Shing nrai, shoihpa hte hkrum nga ai marai langai ngai a hkrit tsang nga ai myit hpe mung tsun mayu ai re.

8 Babelon hta bawng masha hku nna rim hkrum mat ai Yuda masha ni hpe hkum tsang nga myit ngu nna Yehowa hpa majaw tsun wa ai kun? Dai mung hta nga ai masha ni hkrit tsang myit nga wa na hpe shi chye ai majaw re. Hpa majaw hkrit tsang myit nga wa na kun? Yuda masha ni bawng dung hkrum ai 70 ning hpring na mahka hta, grai n-gun ja ai Medi-Persi hpyen dap gaw Babelon hpe gasat na hkyen nga ai. Babelon hta, bawng dung hkrum nga ai shi a amyu masha ni lawt lu na matu, dai hpyen dap hpe shi jailang wa ai. (Esa 41:2-4) Babelon masha ni hte dai hta nga ai kaga amyu masha ni gaw, shanhte a hpyen ni sa gasat sana lam chye ai majaw, shanhte gaw langai hte langai “dating u” ngu nna n-gun jaw hkat nga ma ai. Shanhte gaw hpara sumla ni hpe grau galaw wa ai. Dai sumla ni gaw shanhte hpe makawp maga ya na ngu myit mada ai majaw re. (Esa 41:5-7) Dai laman hta, Yehowa gaw Yuda bawng masha ni hpe myit simsa lam jaw wa nna, shanhte hpe ndai hku tsun wa ai: “Nye a mayam Israela e, . . . hkum tsang et, ngai na a Karai Kasang rai nga nngai.” (Esa 41:8-10) “Ngai na a Karai Kasang rai nga nngai” ngu nna Yehowa tsun wa ai hpe sadi yu u. Yehowa gaw shi a sadi dung ai mayam ni hpe galoi mung n malap ai lam, shanhte a Karai Kasang naw rai nga ai lam, shanhte mung shi a amyu masha ni naw rai nga ai lam hpe, dai ga tsun ai hku nna Yehowa ga sadi jaw wa ai. Shanhte hpe shi ndai hku tsun ai: “Ngai gun hpai nngai; . . . ngai mawai la na nngai.” Dai n-gun jaw ga ni hte shalan shabran ya ai ga ni gaw, bawng dung hkrum ai Yuda masha ni hpe n-gun lu shangun na gaw teng sha re.​—⁠Esaia 46:3, 4 hpe hti u.

9-10. Anhte hpa majaw myit n tsang ra ai kun? Ga shadawn tsun dan rit.

9 Mungkan a masa ni grau sawng wa ai majaw, anhte a makau grup-yin hta nga ai ni gaw grau nna myit tsang wa ma ai. Shanhte hkrum ai manghkang ni hpe, anhte mung hkrum nga ai. Raitim, anhte myit n tsang ra ai. Yehowa anhte hpe ndai hku tsun ai: “Ngai na a Karai Kasang rai nga nngai.” Matut nna myit simsa na matu dai ga gaw hpa majaw n-gun lu shangun ai kun?

10 Ndai ga shadawn hpe myit yu u: Jim hte  Ben gaw, nbungli hte bu hkawm nga ai shaloi, nbung laru a majaw nbungli gara wa ai. Dai hpang, nem dat tsaw dat byin wa ai shaloi, “dunghkum shingkyit hpe ngang ngang kyit da u. Ndai hku sha aten loi mi naw jawn ra na re” ngu nna nbungli gau ai wa shana ya ai. Jim gaw grai hkrit nga ai. Raitim, nbungli gau ai wa ndai hku bai shana ya ai: “Ngai nanhte a nbungli gau ai wa re, hkum tsang mu.” Dai shaloi, Jim gaw, baw ga-nga let “shi a ga hpe mai kam na kun?” ngu nna tsun ai. Ben hpe yu yang gaw, hkrit ai myit loi mi pyi n nga ai hpe shi sadi hkrup ai. “Nang hpa majaw dai daram myit zim nga ai kun?” ngu nna Jim san ai. Ben gaw mani sumsai hte ndai hku bai tsun ai: “Nbungli gau ai wa hpe ngai atsawm chye ai. Shi gaw nye wa re. Nye wa na lam hpe tsun dan na. Shi nbungli atsawm gau chye ai hpe nang kam yang, nang mung myit simsa lu na re.”

11. Bu hkawm ai masha lahkawng a ga shadawn kaw nna anhte hpa sharin la lu ai kun?

11 Ndai ga shadawn kaw nna anhte hpa sharin la lu ai kun? Ben zawn, anhte mung sumsing Kawa Yehowa a lam hpe atsawm chye da ai majaw, myit simsa lu ai. Ndai hpang jahtum nhtoi a yak la ai aten hta, mayak mahkak ni hkrum tim, hkamjan lu hkra shi karum ya na hpe anhte chye ai. (Esa 35:4) Mungkan hta nga ai masha ni hkrit tsang nga ai shaloi, anhte gaw Yehowa hpe kamhpa nga ai majaw myit simsa lam lu mai ai. (Esa 30:15) Anhte ni mung Ben zawn, Karai Kasang hpe kamhpa mai ai lam htingbu ni hpe tsun dan ga ai. Rai yang she, shanhte hta hpa mayak mahkak mi hkrum tim, Yehowa shanhte hpe madi shadaw ya na hpe kam wa na re.

“Ngai Nang Hpe N-Gun Shaja Nna Karum Na”

12. (a) Anhte hkaja na masum ngu na ga sadi gaw hpa rai kun? (b) Yehowa a “lahpum” gaw gara lam hpe shadum ya ai kun?

12 Esaia ka wa ai masum ngu na ndai ga sadi hpe myit yu ga: “Ngai nang hpe n-gun shaja nna karum na de ai.” Yehowa gara hku n-gun shaja ya na hpe Esaia tsun wa ai. Shi a masha ni hpe ndai hku tsun ai: “Yehowa gaw hpung dagu hte du nna, shi a lahpum up nga na  ra ai.” (Esa 40:10) Chyum Laika hta “lahpum” ngu nna chyahkring hkring lang da ai ga gaw, n-gun atsam ngu ai hpe tsun mayu ai re. Yehowa a “lahpum up nga na” ngu nna tsun da ai lam gaw, Yehowa gaw n-gun atsam rawng ai Hkawhkam re ai lam anhte hpe shadum ya ai. Lai wa sai aten na shi a mayam ni hpe, chyahtum chyalai n-gun atsam hte madi shadaw ya nna makawp maga ya wa ai. Dai ni aten hta mung, shi hpe kamhpa ai ni hpe matut n-gun jaw nna makawp maga ya na re.​—⁠Trj 1:31, 32; Esa 43:10.

Yehowa a n-gun atsam nga ai lata hte makawp maga da ai majaw anhte hpe gasat ai gara laknak mung awng dang na n re (Laika pang 12-16 hpe yu u) *

13. (a) Anhte hpe n-gun shaja ya na ngu ai ga sadi hpe laksan hku nna Yehowa gaw galoi aten hta grin hkra galaw ya ai kun? (b) N-gun atsam hte kamhpa myit jahpring ya na ngu ai ga sadi gaw hpa rai kun?

13 Laksan hku nna hpyen ni anhte hpe zingri ai shaloi, ‘ngai nang hpe n-gun shaja na’ ngu ai ga sadi hpe Yehowa matut nna sadi dung na re. Dai ni mungkan a shara nkau mi hta, anhte a hkaw tsun bungli hpe hkring mat hkra (sh) uhpung galaw ai lam ni pat mat hkra anhte a hpyen ni grai shakut nga ai. Dai hku byin nga tim, dai zawn gasat ai lam ni hpe ladu lai n tsang nga ai. Yehowa gaw, anhte hpe n-gun atsam hte kamhpa myit jahpring ya na ngu nna ga sadi jaw ai. Shi ndai hku mung tsun ai: “Nang hpe hpyen na matu galaw ai ri nhtu, langai mi tai na n rai.” (Esa 54:17) Dai ga sadi gaw, grai ahkyak ai lam masum hpe shadum ya nga ai.

14. Karai Kasang a hpyen ni anhte hpe gasat ai hpe hpa majaw n mau ga ai kun?

14 Langai, tsa ban langai na Hkristu a sape ni zawn, anhte mung n ju n dawng hkrum na hpe myit mada da ga ai. (Mat 10:22) Hpang jahtum na nhtoi ni hta, shi hpang hkan ai ni zingri zingrat hkrum na ngu nna Yesu tau hkrau tsun da ai. (Mat 24:9; Yhn 15:20) Lahkawng, anhte a hpyen ni gaw anhte hpe grau n ju n dawng wa na ngu nna, Esaia tau hkrau sadi jaw da ai. Shanhte gaw, anhte hpe gasat na matu laknak amyu myu lang na re. Dai laknak ni hta, si mani ai hku hkalem ai, dan dan leng leng masu tsun ai, laja lana zingri zingrat ai lam ni lawm ai. (Mat 5:11) Anhte hpe gasat na matu hpyen ni lang nga ai dai laknak ni hpe Yehowa gaw jahkring kau ya na n re. (Ehp 6:12; Shr 12:17) Raitim, anhte n hkrit ra ai. Hpa majaw kun?

15-16. (a) Anhte dum nga ra na masum ngu na lam gaw hpa rai kun? Esaia 25:4, 5 gaw ndai hpe gara hku madi shadaw ya ai kun? (b) Anhte a hpyen ni hte seng nna Esaia 41:11, 12 hta gara hku tsun da ai kun?

 15 Anhte dum ra ai masum ngu na lam hpe myit yu ga. Anhte hpe gasat na “ri nhtu, langai mi tai na n rai” ngu nna Yehowa tsun ai. Hten za shangun ai nbung laru a shoihpa kaw nna bunghku gaw anhte hpe makawp maga ya ai zawn, “pawt kahtet” nga ai hpyen ni a gasat ai kaw nna mung, Yehowa makawp maga ya na re. (Esaia 25:4, 5 hpe hti u.) Anhte a hpyen ni a awng dang ai lam gaw galoi mung grin nga na n re.​—⁠Esa 65:17.

16 Anhte hpe “pawt sin dawng ai ni” hpa byin mat na hte seng nna Yehowa asan sha tsun dan ai. Dai hku nna anhte a makam masham grau nna ngang kang wa hkra Yehowa karum ya ai. (Esaia 41:11, 12 hpe hti u.) Anhte hpe gasat na matu hpyen ni kade mi shakut tim, gasat gala ai lam kade daram sawng wa tim, byin wa na lam langai sha nga ai. Karai a amyu masha ni a hpyen ni yawng gaw hten za mat na re.

Yehowa Hpe Grau Kamhpa Hkra Galaw Lu Ai Lam

Chyum Laika hta lawm ai Yehowa a lam ni hpe ayan hti ai nga yang shi hpe kamhpa ai myit grau ngang kang wa na re (Laika pang 17-18 hpe yu u) *

17-18. (a) Karai Kasang hpe kamhpa ai lam grau ngang kang wa hkra Chyum Laika hpe gara hku hti na kun? Ga shadawn langai jaw rit. (b) 2019 a shaning ginchyum Chyum daw hpe myit sawn sumru ai gaw anhte hpe gara hku karum ya na kun?

17 Yehowa a lam grau chye hkra galaw ai nga yang, shi hpe grau nna kamhpa wa na re. Chyum Laika hpe atsawm hti nna, hti ai lam ni hpe myit sawn sumru ai lam hku nna sha, Karai Kasang hpe atsawm chye lu ai. Lai wa sai aten na shi a masha ni hpe, Yehowa makawp maga ya wa ai kamhpa mai ai labau ni Chyum Laika hta lawm ai. Ya aten hta mung, anhte hpe shi lanu lahku ya na ngu ai hpe dai labau gaw kam shangun ai.

18 Yehowa gaw anhte hpe gara hku makawp maga ya na ngu ai lam hpe, grai kaja ai ga shadawn langai hte Esaia tsun dan wa ai. Esaia gaw Yehowa hpe sagu rem ai wa hte shingdaw da nna, Karai a mayam ni hpe gaw sagu ni hte shingdaw da ai. Yehowa hte seng nna Esaia ndai hku tsun ai: “Shi gaw sagu kasha ni hpe shinggyin la nna dai ni hpe shi a lata lahpum hta pawn da na ra ai.” (Esa 40:11, JCLB) Yehowa a n-gun atsam nga ai lata lahpum hte pawn da ai shaloi, makawp maga hkrum nna, myit simsa ai ngu hkamsha na re. Anhte manghkang ni hkrum nga tim, matut nna myit simsa lam lu hkra karum ya na matu, “hkum tsang et, ngai na a Karai Kasang rai nga nngai” ngu ai Esaia 41:10 hpe 2019 na shaning ginchyum Chyum daw hku nna sadi dung ai hte myitsu ai mayam gaw lata dat ai. Dai ga sadi ni hpe atsawm myit sawn sumru u. Htawm hpang hta hkrum wa na manghkang ni hpe tawt lai lu na matu, dai ga sadi gaw nang hpe n-gun jaw na re.

Mahkawn 38 Shi Nang Hpe N-gun Shaja Ya Na

^ စာပိုဒ်၊ 5 Anhte a prat hta (sh) ndai mungkan hta n kaja ai lam ni byin nga tim, anhte simsa lam lu mai ai lam masum hpe 2019 a matu lata da ai shaning ginchyum Chyum daw gaw, chye shangun ai. Yehowa hpe grau nna kamhpa wa na matu hte anhte a myit tsang ai lam ni yawm mat na matu, karum ya lu ai lam ni hpe ndai sumhpa hta hkaja mat na re. Shaning ginchyum Chyum daw hpe atsawm myit sawn sumru u. Matsing hkra galaw da u. Rai yang, htawm hpang hta manghkang ni hkrum wa ai shaloi, anhte hpe n-gun lu shangun na re.

^ စာပိုဒ်၊ 1 2016, July Sin Langchyi (BU) laika man 18 hpe yu u.

^ စာပိုဒ်၊ 3 Ga Si A Lachyum: Yehowa a ga sadi ngu ai gaw teng sha byin wa na lam hpe madun dan ai teng man ai lam re. Anhte a prat hta byin wa na manghkang ni hte seng nna, myit tsang ai hpe yawm mat hkra galaw ya lu ai Yehowa a ga sadi ni re.

^ စာပိုဒ်၊ 4 Esaia 41:10, 13, hte 14 hta, “hkum hkrit” ngu ai ga si hpe masum lang madun da ai. Dai Chyum daw ni hta sha “ngai” (Yehowa hpe tsun) ngu ai ga si hpe chyahkring hkring lang da ai. “Ngai” ngu ai ga si hpe chyahkring hkring lang na matu, Esaia hpe Yehowa hpa majaw shadut ya wa ai kun? Yehowa hpe kamhpa ai myit sha, anhte a myit tsang ai lam hpe hkring kau ya lu ai lam, dan dawng shangun mayu ai majaw re.

^ စာပိုဒ်၊ 52 SUMLA HPE HTAI DAN AI LAM NI: Nta masha ni gaw bungli hta, hkamja lam hta, hkaw tsun bungli hte jawng hta chyam dinglik ai lam ni hkrum nga ai.

^ စာပိုဒ်၊ 54 SUMLA HPE HTAI DAN AI LAM NI: Nta hta zuphpawng galaw nga ai shaloi, pyada ni gaw a kajawng sha shang wa ai. Raitim, hpunau, nauna ni gaw kajawng kaja n byin ma ai.

^ စာပိုဒ်၊ 56 SUMLA HPE HTAI DAN AI LAM NI: Dinghku nawku ayan na galaw ai gaw, hkamjan lu na matu anhte hpe n-gun jaw ai.