Content de lai

Malawm Ni Hpe Lai U

 Hkaja Na Sumhpa 8

Manawn Ai Myit Hpe Koi Nna Ngwi Pyaw Simsa Lam Tam U

Manawn Ai Myit Hpe Koi Nna Ngwi Pyaw Simsa Lam Tam U

“Ngwi pyaw simsa ai lam hte n-gun lu shangun ai lam ni hpe galaw na matu shakut shaja nga ga.”​—ROM 14:19, NW.

Mahkawn 113 Ngwi Pyaw Ai Lam Lu Da

Sumhpa Hta Lawm Ai Lam *

1. Manawn ai myit gaw Yosep a nta masha ni hpe gara hku hkra machyi shangun ai kun?

YAKU gaw kasha yawng hpe tsawra ai. Raitim, asak 17 ning re ai Yosep hpe grau tsawra ai. Yosep a kahpu ni gaw gara hku bai htang wa ai kun? Shanhte gaw shi hpe manawn ai majaw nju ndawng wa ai. Yosep gaw shi kahpu ni nju ndawng na zawn re ai lam hpa mung n galaw ai. Dai pyi, shanhte gaw Yosep hpe mayam hku dut sha kau nna, kawa hpe gaw shi tsawra ai kasha hpe matse ai dusat sha kau sai nga nna sa masu ai. Manawn ai myit gaw shanhte dinghku a simsa lam hpe jahten kau nna, kawa hpe mung grai nan yawn hkyen shangun ai.​—Nin 37:3, 4, 27-34.

2. Galati 5:19-21 hku nga yang manawn ai myit gaw hpa majaw grai shoihpa nga ai kun?

2 Chyum Laika hta tsun da ai si shangun chye ai “hkum shan a bungli” ngu ai hta, manawn ai myit * mung lawm ai. Dai myit gaw masha langai hpe Karai A Mungdan sali wunli n lu shangun ai. (Galati 5:19-21 hpe hti u.) Manawn ai myit anhte hta ru jung wa yang, ndawng n yawt ai, ga law ga la ai, pawt sindawng ai zawn re ai shoihpa nga ai asi ni si wa chye ai.

3. Ndai sumhpa hta hpa lam hkaja na kun?

3 Dinghku hta nga wa ai simsa lam hpe manawn ai myit gaw jahten sharun kau lu nna, hku hkau lam hpe mung hten za shangun ai lam hpe Yosep a kahpu ni a mabyin gaw madun dan ai. Yosep a kahpu ni galaw wa ai zawn, galoi mung galaw na gaw n raitim, anhte yawng gaw n hkum tsup nna, myit masin gaw magaw ai. (Yer 17:9) Dai majaw, kalang lang masha ni hpe manawn wa chye ai. Anhte a myit hta ru jung nga chye ai manawn ai myit  hpe hpa majaw baw kau ra ai lam hpe chye hkra, Chyum Laika hta lawm ai ga shadawn nkau mi hpe hkaja yu ga. Manawn ai myit hpe gasat lu nna, simsa lam hpe grau nga shangun ai tatut re ai lam nkau mi hpe mung hkaja lu na re.

Manawn Ai Myit Gaw Hpa Byin Chye Ai Kun?

4. Hpilisti masha ni gaw Isak hpe hpa majaw manawn ai kun?

4 Ja gumhpraw sut gan lusu ai shaloi. Isak gaw grai lusu ai majaw, Hpilisti masha ni gaw shi hpe manawn ai. (Nin 26:12-14) Dai majaw, shanhte gaw Isak a dusat ni hpe jaw lu ai hka htung hpe pat kau ya ai. (Nin 26:15, 16, 27) Hpilisti masha ni zawn, dai ni aten na masha nkau gaw, shanhte hta na ja gumhpraw grau lusu ai masha ni hpe manawn ai. Shanhte gaw kaga ni hta nga ai lama ma hpe lu mayu ai sha n-ga, kaga ni lu da ai lam ni hpe mung sum mat hkra galaw mayu ai.

5. Nawku htung ningbaw ni gaw Yesu hpe hpa majaw manawn ai kun?

5 Shagrau hkrum ai shaloi. Yesu gaw masha law law a shagrau hkrum wa ai majaw, Yuda nawku htung ningbaw ni gaw shi hpe manawn ai. (Mat 7:28, 29) Yesu gaw Karai Kasang a dat kasa rai nna, tengman ai lam hpe sharin ya ai. Dai pyi, Yuda htung ningbaw ni gaw Yesu a kaja ai amying hpe jahten na matu, sari jahpoi nna masu ga ni hpe shabra ai. (Mrk 15:10; Yhn 11:47, 48; 12:12, 13, 19) Ndai mabyin kaw nna hpa chye lu ai kun? Nawku hpung kaw nna hpunau nauna ni gaw kaja ai atsam ningja nga ai ni hpe tsawra ai shaloi, manawn ai myit n nga hkra ninghkap ra ai. De a malai, shanhte a tsawra chye ai atsam ningja ni hpe kasi la ging ai.​—1 Ko 11:1; 3 Yh 11.

6. Diotrehpi gaw manawn ai myit hpe gara hku madun wa ai kun?

6 Laksan magam lit ni lu la ai shaloi. Tsa ban langai hta, Diotrehpi gaw Hkristan nawku hpung kaw nna woi awn ai ni hpe manawn wa ai. Shi gaw nawku hpung kaw “grau tsaw” ai shara lu mayu ai majaw, kasa Yawhan hte kaga lit lu da ai hpunau ni hpe n kaja ai hku tsun nna sari jahpoi ai. (3 Yh 9, 10) Diotrehpi zawn anhte n galaw mayu ai. Raitim, anhte myit mada da ai lit langai hpe kaga hpunau langai lu mat ai shaloi, manawn wa chye ai. Laksan hku nna, dai lit hpe gun hpai na matu kaga ni hta na tinang grau atsam hpring ai ngu hkamsha ai shaloi hta re.

Anhte a myit masin gaw ga hte bung nna, kaja ai atsam ningja ni gaw tsawm ai nampan ni hte bung ai. Raitim, manawn ai myit gaw ntuk rawng ai tsing hte bung ai.Manawn ai myit gaw, tsawra myit, matsan dum myit hte myit tau ya chye ai zawn re ai kaja ai atsam ningja ni rawt jat na hpe pat shingdang (Laika pang 7 hpe yu u)

7. Manawn ai myit gaw anhte hpe hpa byin shangun chye ai kun?

7 Manawn ai myit gaw ntuk rawng ai tsing hte bung ai. Anhte a myit masin hta manawn ai nli tum gaw ru jung wa ai shaloi, dai hpe baw kau na matu yak chye ai. Gumrawng ai, tingkyeng myit jasat zawn re ai n kaja ai hkamsha lam ni gaw manawn ai myit byin shangun chye ai. Dai sha n-ga, tsawra myit, matsan dum myit hte myit tau ya chye ai atsam ningja ni rawt jat na matu, pat shingdang ya ai. Manawn ai myit nnan tu wa ai hpe sadi hkrup ai hte kalang ta, dai hpe myit masin kaw nna baw kau ra ai. Manawn ai myit hpe gara hku gasat lu na kun?

Shagrit Shanem Ai Lam Hte Myit Dik Lam Hpe Shalat La U

Tsing hte bung ai manawn ai myit hpe gara hku baw kau mai na kun? Karai a chyoi pra ai wenyi a karum shingtau lam hte manawn ai myit hpe baw kau lu nna, shagrit shanem ai myit hte myit dik lam hpe galai bang lu (Laika pang 8-9 hpe yu u)

8. Manawn ai myit hpe ninghkap na matu gara atsam ningja ni gaw karum ya lu ai kun?

8 Shagrit shanem ai lam hte myit dik lam hpe shalat la ai hku nna manawn ai myit hpe gasat lu ai. Anhte a myit masin hta dai zawn kaja ai atsam ningja ni hte jahpring da yang, manawn ai myit nga sana n re. Shagrit shanem ai myit gaw tinang hkum tinang arawng mala ai baw n byin na matu karum ya ai. Shagrit shanem ai wa gaw, kaga masha ni hta na tinang hpe grau ahkyak shatai ging ai ngu n myit ai. (Gal 6:3, 4) Myit dik lam nga ai wa gaw, tinang hta nga ai hte sha myit dik chye nna, kaga ni hte n shingdaw ai. (1 Tm 6:7, 8) Shagrit shanem nna myit dik lam nga ai wa gaw, marai langai ngai kaja ai lama ma lu la ai shaloi, shi hte arau kabu lawm ai.

9. Galati 5:16 hte Hpilipi 2:3, 4 hku nga yang chyoi pra ai wenyi gaw hpa galaw na matu karum ya lu ai kun?

 9 N kaja ai akyang lailen re ai manawn ai myit hpe ninghkap nna, shagrit shanem ai lam hte, myit dik lam nga hkra shalat la lu na matu, Karai a chyoi pra ai wenyi gaw anhte hpe karum ya na re. (Galati 5:16; Hpilipi 2:3, 4 hpe hti u.) Anhte a myit kraw lawang na hkamsha lam hte myit mang ai lam hpe san jep na matu Yehowa a chyoi pra ai wenyi gaw karum ya lu ai. Karai a karum shingtau lam hte, shoihpa nga ai hkamsha lam hte myit mang ai lam ni a shara hta, shadaw shalan ya lu ai lam ni hpe galai bang lu na re. (Shk 26:2; 51:10) Manawn ai myit n nga wa ai Mawshe hte Pawlu a kasi ningli hpe myit yu ga.

Israela la kasha langai gaw Mawshe hte Yawshu hpang de sa nna, dap dabang kaw nna la lahkawng gaw myihtoi htoi nga ai ngu shiga sa tsun ai. Dai la ni hpe hkum pat na matu Mawshe hpe Yawshu tsun ai. Raitim, Mawshe n hkap la ai. Yehowa gaw Shi a wenyi hpe dai la lahkawng kaw bang ya ai majaw, shi kabu ai lam Yawshu hpe tsun ai (Laika pang 10 hpe yu u)

10. Mawshe hpe gara masa ni gaw chyam dinglik lam byin shangun ai kun? (Makawp sumla hpe yu u.)

10 Mawshe gaw Karai a masha ni a ntsa ahkang aya ram ram nga ai. Raitim, dai ahkang aya hpe masha ni lu la ai shaloi manawn ai myit n nga ai. Ga shadawn, mabyin langai hta, Yehowa gaw Mawshe kaw nna chyoi pra ai wenyi nkau hpe la nna, shawa sum makau hta tsap nga ai Israela salang hpung hpe jaw ya ai. Shanhte zuphpawng ai shara kaw n nga ai salang lahkawng mung chyoi pra ai wenyi lu la nna, myihtoi ni zawn galaw hpang wa ai hpe Mawshe na ai. Yawshu gaw dai salang lahkawng hpe hkum pat na matu shi hpe tsun ai shaloi gara hku bai htang wa ai kun? Mawshe gaw Yehowa kaw nna chyoi pra ai wenyi lu la ai dai marai lahkawng hpe manawn ai myit n nga wa ai. Shi gaw shanhte lu la ai ahkaw ahkang hpe shagrit shanem let kabu lawm wa ai. (Bhk 11:24-29) Mawshe kaw nna hpa sharin la lu ai kun?

Mawshe zawn shagrit shanem lam nga na matu Hkristan myitsu salang ni gara hku galaw mai na kun? (Laika pang 11-12 hpe yu u) *

11. Mawshe hpe myitsu salang ni gara hku kasi la mai na kun?

11 Lama na, nang gaw myitsu salang rai yang, nang grai ra sharawng ai nawku hpung kaw na lit langai hpe kaga marai langai hpe shaman shakyang ya na matu tsun hkrum ga ai kun? Ga shadawn, nang gaw bat shagu Sin Langchyi Hkaja ai lamang hpe woi awn ai lit hpe ra sharawng na re. Raitim, nang gaw Mawshe zawn shagrit shanem yang, kaga hpunau langai hpe shaman ya na matu tsun hkrum ai shaloi, ahkaw ahkang yawm mat ai ngu hkamsha na n re. Dai hpunau mung dai lit hpe gun hpai lu ai atsam hpring wa na re. Hpunau hpe karum ya lu ai majaw nang mung kabu na re.

12. Hkristan law law gaw shagrit shanem ai myit hte myit dik lam gara hku madun wa ai kun?

12 Asak kaba ai hpunau law law hkrum nga ai kaga masa hpe myit yu ga. Lai wa sai shaning law law hta, shanhte gaw myitsu salang hpung a hpa-awn ni hku nna magam gun wa ai. Raitim, asak 80 du wa ai shaloi, shanhte a lit hpe sharawng awng let lahpa galai ya mayu ai. Hpung kawan ni gaw asak 70 du yang, shanhte a lit hpe shagrit shanem let jahkring kau nna, kaga lit gun hpai na matu hkap la ma ai. Kade n na shi ai shaning ni hta, mungkan ting na Behtela nta masha law law gaw, hkaw tsun lawk hta magam gun na matu lit nnan ni lu la ma ai. Dai sadi dung ai hpunau nauna ni gaw moi shanhte lu wa ai lit hpe ya kaga ni bai gunhpai nga ai majaw masin n pawt ai.

13. Kasa 12 hpe manawn ai myit byin wa chye ai gara masa ni Pawlu hta nga ai kun?

13 Shagrit shanem lam hte myit dik lam nga ai hta kasi kaja madun wa ai kaga marai langai gaw kasa Pawlu re. Shi gaw manawn ai myit nga na matu ahkang n jaw ai. Hkaw tsun bungli hpe shakut shaja galaw ai. Raitim, shagrit shanem let shi ndai hku tsun ai: “Kasa ni hta kaji htum ai wa ngai rai nga nngai; . . . kasa ngu na pyi ngai n ging n dan nngai.” (1 Ko 15:9, 10) Kasa 12 gaw Yesu mungkan ga hta hkaw tsun magam gun ai shaloi, Yesu hpang hkan nang ma ai. Raitim, Pawlu gaw Yesu si hkam nna bai hkrung rawt wa ai du hkra Hkristan garai n byin shi ai. Hpang e, “maigan amyu ni a kasa” hku nna aya tang hkrum tim, laksan ahkaw ahkang re ai kasa 12 kaw nna, kasa langai byin na matu gaw ahkaw  ahkang n lu wa ai. (Rom 11:13; Kas 1:21-26) Yesu hte grai pyaw let hku hkau wa ai kasa 12 hpe n manawn ai sha, Pawlu gaw shi lu da ai magam lit hta sha myit dik nga ai.

14. Anhte hta myit dik lam hte shagrit shanem ai myit nga yang hpa galaw na kun?

14 Anhte hta myit dik lam hte shagrit shanem ai myit nga yang, Pawlu zawn sha, Yehowa jaw da ai ahkang aya lu ai ni hpe hkungga ai lam madun na re. (Kas 21:20-26) Yehowa gaw Hkristan nawku hpung hpe woi awn na matu, myitsu salang ni hpe lajang da ya ai. Shanhte gaw n hkum tsup ai ni raitim, Yehowa gaw shanhte hpe shinggyim masha ni a matu jaw ai “kumhpa” hku nna mu mada ai. (Ehp 4:8, 12) Anhte gaw aya tang hkrum ai ni hpe hkungga nna shanhte a lam matsun hpe shagrit shanem let hkan sa na nga yang, Yehowa hte grau hku hkau wa nna, hpunau nauna ni hte mung simsa nga na re.

Ngwi Pyaw Simsa Lam Nga Hkra Shakut Shaja U

15. Anhte hpa galaw ra ai kun?

15 Manawn ai myit nga yang, simsa lam nga na n re. Anhte a myit hta nga ai manawn ai tsing hpe baw kau ra ai. Kaga ni tinang hpe manawn ai myit byin shangun chye ai lam ni hpe mung koi ra ai. Dai ahkyak ai lam ni hpe galaw yang, “ngwi pyaw simsa ai lam hte n-gun lu shangun ai lam ni hpe galaw na matu shakut shaja” u ngu tsun da ai Yehowa a hkang da ai ga hpe hkan sa lu na re. (Rom 14:19, NW) Manawn ai myit hpe ninghkap lu hkra kaga ni hpe karum ya na matu, laksan hku nna hpa galaw lu na kun? Simsa lam rawt jat hkra gara hku galaw lu na kun?

16. Manawn ai myit hpe ninghkap lu hkra kaga ni hpe gara hku karum ya lu na kun?

16 Anhte a myit jasat hte galaw ai lam ni gaw, kaga ni hpe grai nan shingkang ka-up lu ai.  Mungkan gaw tinang hta nga ai arung arai ni hpe “shakawng dan” shangun mayu ai. (1 Yh 2:16, NW) Raitim, dai myit jasat gaw manawn ai myit grau nga wa shangun ai. Anhte gaw tinang hta nga ai arung arai ni hte mari na matu myit da ai lam ni hpe chyahkring hkring tsun yang, kaga ni manawn wa chye ai. Nawku hpung hta lu da ai magam lit hpe shagrit shanem let n gunhpai ai nga yang, kaga ni manawn wa chye ai. Anhte lu da ai lit ni hpe sha myit maju jung ai nga yang, manawn ai myit grau kaba wa hkra anhte namhpun bang ya ai hte bung ai. De a malai, anhte gaw kaga ni hpe myit lawm ai lam madun nna, shanhte galaw ai kaja ai lam ni hpe myit maju jung yang, myit dik lam nga hkra karum ya nga ai rai nna, nawku hpung mung kahkyin gumdin simsa nga na re.

17. Yosep a kahpu ni gaw hpa hpe lu galaw wa ai kun? Hpa majaw kun?

17 Manawn ai myit hpe gasat ai majan hta anhte awng dang lu ai. Yosep a kahpu ni a lam hpe bai myit yu ga. Yosep hpe n tara ai hku kanawn mazum nna, shaning grai na mat ai hpang, Egutu mung hta shanhte gaw shi hte bai hkrum ai. Yosep gaw shi kadai re ai hpe garai n tsun shi yang, shanhte galai shai sai kun? ngu ai hpe chyam yu ai. Shi gaw, lusha poi lajang nna, kaji htum kanau Ben-yamin hpe kaga ni hta lusha grau bang ya ai. (Nin 43:33, 34) Ben-yamin hpe kahpu ni manawn ai myit n nga ai. Shanhte gaw kanau hte kawa Yaku hpe grai myit tsang ai lam madun ai. (Nin 44:30-34) Hpa majaw nga yang, Yosep a kahpu ni gaw manawn ai myit n nga mat nna, dinghku hta simsa lam lu hkra shakut ai majaw re. (Nin 45:4, 15) Dai hte maren, anhte mung manawn ai myit hpe baw kau yang, anhte a dinghku hte nawku hpung hpe matut simsa hkra karum ya lu na re.

18. Yaku 3:17, 18 hku nga yang simsa ai shara byin hkra shakut yang hpa byin wa na kun?

18 Manawn ai myit hpe ninghkap nna, simsa lam nga hkra Yehowa gaw anhte hpe shakut shangun mayu ai. Dai lam lahkawng hpe anhte galaw ra ai. Anhte hta manawn ai myit nga chye ai lam hpe ndai sumhpa hta hkaja wa sai. (Yak 4:5) Manawn ai myit grau nga shangun ai mungkan hta anhte asak hkrung nga ai. Anhte gaw shagrit shanem lam, myit dik lam hte chyeju dum chye ai myit hpe shalat la na nga yang, manawn ai myit nga sana n re. Dinghpring ai asi grau si shapraw lu ai simsa ai shara byin hkra anhte galaw lu na re.​—Yaku 3:17, 18 hpe hti u.

Mahkawn 130 Mara Raw Ya Nga Ga

^ စာပိုဒ်၊ 5 Yehowa a uhpung gaw ngwi pyaw simsa ai. Raitim, anhte hta manawn ai myit nga wa yang, dai simsa lam hpe jahten kau hkrup chye ai. Ndai sumhpa hta, manawn ai myit byin shangun chye ai lam ni hpe hkaja lu na re. Ndai zawn shoihpa nga ai myit jasat hpe gara hku ninghkap nna, simsa lam grau nga hkra gara hku galaw lu na lam hpe mung hkaja lu na re.

^ စာပိုဒ်၊ 2 Ga Si A Lachyum: Chyum Laika hta tsun da ai hte maren, manawn ai myit gaw kaga ni hta nga ai lama ma hpe lu mayu ai sha n-ga, kaga ni lu da ai lam ni hpe mung sum mat hkra galaw mayu ai.

^ စာပိုဒ်၊ 61 SUMLA HPE HTAI DAN AI LAM: Myitsu salang hpung a zuphpawng hta, Sin Langchyi Hkaja ai lamang woi awn ai asak kaba sai hpunau hpe, dai lit hpe asak kaji ai myitsu salang hpe shaman ya na matu tsun ai. Dai lit hpe shi grai ra sharawng tim, shi gaw asak kaji ai hpunau hpe tatut re ai hpaji jaw ga ni hte myit madung hte shakawn ya ai hku nna, myitsu salang ni a dawdan lam hpe myit masin mahkra hte madi shadaw wa ai.