Content de lai

Malawm Ni Hpe Lai U

Kamsham Ai​—⁠N-gun Jaw Ya Lu Ai Atsam Ningja

Kamsham Ai​—⁠N-gun Jaw Ya Lu Ai Atsam Ningja

KAMSHAM ai myit hta n-gun ja ai atsam nga ai. Ga shadawn, Satan gaw Yehowa hte anhte a hku hkau lam hten za hkra galaw mayu tim, kamsham ai myit gaw “n hkru n hkra ai wa a wan pala nlang hte hpe sat dang kau lu” hkra anhte hpe karum ya ai. (Ehp 6:16) Kamsham ai myit hte bum zawn kaba ai manghkang ni hpe tawt lai lu ai. Yesu gaw shi a sape ni hpe ndai hku tsun ai: “Kamsham ai myit chyinghkrang tum daram nanhte rawng nga myit yang gaw, ndai bum hpe, Wora de htawt sit mat u, ngu nna nanhte tsun mu yang, dai htawt sit mat na ra ai.” (Mat 17:20) Kamsham ai myit gaw anhte hpe wenyi lam ngang kang hkra galaw ya lu ai majaw, ndai ga san ni hpe atsawm sha myit yu ra ai: Kamsham ai myit ngu ai gaw hpa rai kun? Anhte a myit masin gaw anhte a kamsham ai myit hpe gara hku akyu shabyin lu ai kun? Anhte a kamsham ai myit hpe ngang kang hkra gara hku galaw lu na kun? Kadai hpe kamsham ging ai kun?​—⁠Rom 4:3.

Kamsham Ai Myit Ngu Ai Gaw Hpa Rai Kun?

Kamsham ai myit ngu ai gaw kam ai hta n-ga lawm ai ngu Chyum Laika hta tsun da ai. Nat ni pyi Karai Kasang nga ai hpe ‘kamsham nna hkrit gari nga ma ai.’ (Yak 2:19) Rai yang, kamsham ai myit ngu ai gaw hpa rai kun?

Shani hte shana ayan byin nga na hpe anhte kam ai zawn, Karai Mungga mung teng sha hpring tsup wa na hpe anhte kam ai

Kamsham ai myit hpe Chyum Laika hta lam lahkawng hte lachyum hpaw da ai. Langai, “makam masham ngu ai gaw, myit mada ai arai ni a lam myit mu myit hkut nga ai.” (Heb 11:1a) Nang hta kamsham ai myit nga yang, Yehowa tsun ai lam yawng mayawng hpring tsup wa na hpe teng sha kam na re. Ga shadawn, Yehowa gaw Israela ni hpe ndai hku tsun ai: “Shani hte shana aten ladaw seng ai, ngai tawn da ai ga shaka hpe, nanhte run kau lu nna, ang wa ai hte maren shani shana n galai hkra, galaw lu ai rai yang, nye a shangun ma Dawi . . . hte tawn da ai nye a ga shaka mung, . . . hten mat lu na ra ai.” (Yer 33:20, 21) Jan pru ai lam, lamu hte seng ai lam ni hkring mat nna, shani hte shana byin ai lam hkring mat na hpe nang hkrit ga ai kun? Mungkan gaw shi a hkyetding hta kawai taw nna, jan hpe mung kawan taw nga ai ngu ai hkrang jasat tara hpe nang kam yang, dai hkrang jasat tara a Hpan Madu gaw shi a ga ni hpe hpring tsup ya lu ai ngu ai hpe nang kam na re.​—⁠Esa 55:10, 11; Mat 5:18.

Lahkawng, makam masham ngu ai gaw “garai n mu yu ai arai ni a lam tau chye tawn lu ai hpe” ngu ai re. “Garai n mu yu ai arai ni” ngu ai gaw, myi hte n mu lu shi nna garai n byin wa shi ai lam ni hpe tsun ai re. (Heb 11:1b) Gara lam ni hku nna kun? Ma langai ndai hku ga san san ai ngu saga: ‘Nbung nga ai hpe nang gara hku chye ai kun?’ Nbung hpe nang n mu ga tim, nsa sa ai lam, nbung a majaw byin ai lam ni zawn re ai nbung nga ai hte seng ai madi madun lam, ma hpe sawn dinglik chye na matu, nang karum ya na re. Dai madi madun lam hpe ma kam ai majaw, shi a myi hte n mu lu ai lam ni nga ai hpe hkap la mat na re. Dai hte maren, kamsham ai lam mung tup hkrak re ai madi madun lam hta madung tawn ai.​—⁠Rom 1:20.

Jaw Ai Myit Jasat Nga Ra Ai

Kamsham ai lam gaw madi madun lam hta madung tawn ai majaw, kamsham ai myit nga na matu marai langai gaw shawng nnan “teng man ai lam a chye chyang ai” lam ra ai. (1 Tm 2:4) Raitim, dai daram hte n hkum tsup shi ai. Kasa Pawlu ndai hku ka ai: “Myit masin hte kamsham” ra ai. (Rom 10:10) Marai langai gaw tengman ai lam hpe kamsham ai sha n-ga, dai hpe mung manu shadan ra ai. Kamsham ai lam gaw shi hpe shadut ya ai shaloi, tengman ai lam hte maren shi asak hkrung na re. (Yak 2:20) Marai langai  gaw tengman ai lam hpe chyeju n dum ai nga yang, shi a kamsham ai lam hpe galai shai na matu nyet kau na (sh) shi lata ai lam hte maren galaw na re ai majaw, madi madun lam ni hpe mung shi nyet kau na re. (2 Pe 3:3, 4; Yud 18) Chyum Laika prat hta mung, mauhpa lam ni hpe mu ai masha yawng gaw kamsham ai myit rawt jat wa ai n re. (Bhk 14:11; Yhn 12:37, 40) Karai a chyoi pra ai wenyi gaw tengman ai lam hpe gaja wa tsawra ai ni hpe sha, kamsham ai myit shalaw ya ai.​—⁠Gal 5:22; 2 Ht 2:10, 12.

Dawi A Kamsham Ai Myit Rawt Jat Wa Ai Lam

Ngang kang ai makam masham nga ai ni hta Hkawhkam Dawi mung lawm ai. (Heb 11:32, 33) Dawi zawn makam masham hpe shi a nta masha yawng hta mu lu ai n re. Ga shadawn, mabyin langai hta Dawi a kahpu ba Eliaba gaw Goliat mara tam wa ai shaloi hta, Dawi hpe daru sharin ai hpe yu yang shi hta makam masham n nga ai hpe madun ai. (1 Sa 17:26-28) Kadai mung makam masham lawm nna n shangai wa ai. Kanu kawa ni kaw nna mung sali wunli hku nna lu la ai lam n re. Dawi a kamsham ai myit gaw, Karai Kasang hte shi a hku hkau ai lam a majaw, lu la wa ai re.

Shakawn Kungdawn 27 hta, dai zawn ngang kang ai makam masham gara hku lu la wa ai hte seng nna Dawi tsun da ai. (Kaji 1) Dawi gaw lai wa sai aten na shi a mahkrum madup ni hte shi a hpyen ni hpe Yehowa gara hku galaw wa ai hte seng nna, myit sawn sumru wa ai. (Kaji 2, 3) Nawku dawjau ai lam hte seng ai Yehowa a lamang ni hpe teng sha chyeju dum wa ai. (Kaji 4, NW) Dawi gaw nawku sum hta kamsham ai ni hte arau Karai Kasang hpe nawku wa ai. (Kaji 6) Yehowa hpe myit rawt let akyu hpyi ai. (Kaji 7, 8) Karai a lam matsun hpe Dawi ra sharawng ai. (Kaji 11) Ndai atsam ningja gaw, Dawi a matu grai ahkyak ai lam ndai ga san hta mu lu ai: “Kamsham ai myit n nga yang, ngai gara de du nga na kun?”​—⁠Kaji 13, NW.

Kamsham Ai Myit Ngang Kang Lu Ai Lam

Shakawn Kungdawn 27 hta mu lu ai myit jasat hte lailen ni hpe kasi la na nga yang, Dawi zawn kamsham ai myit nga wa na re. Kamsham ai lam gaw tengman ai machye machyang hta madung tawn ai. Dai majaw, Chyum Laika hte Chyum Laika hpe madung tawn ai laili laika ni hpe grau hkaja magang, Karai a chyoi pra ai wenyi asi re ai kamsham ai myit grau nga wa na re. (Shk 1:2, 3) Hkaja ai shaloi aten la nna myit sawn sumru u. Dai hku sumru ai nga yang, Yehowa hpe chyeju dum ai myit grau rawt jat wa na re. Yehowa hpe grau chyeju dum magang, nawku zuphpawng ni hta shi hpe nawku ai hku nna, kaga ni hpe na a myit mada lam tsun dan ai hku nna, kamsham ai myit grau madun mayu wa na re. (Heb 10:23-25) Anhte “asum n jaw ai sha, akyu hpyi” ai nga yang, anhte hta kamsham ai myit nga ai hpe madun ai re. (Luk 18:1-8, NW) Dai majaw, Yehowa kaw “n sim n sa akyu hpyi” nna, “shi gaw nanhte hpe lanu lahku” ya na lam kam u. (1 Ht 5:17; 1 Pe 5:7, JCLB) Kamsham ai lam gaw tatut galaw na matu shadut ya nna, anhte a galaw ai lam ni mung, makam masham ngang kang hkra galaw ya lu ai.​—⁠Yak 2:22.

Yesu Hpe Kamsham Ai Lam

Yesu garai n si shi ai shana maga hta, shi a sape ni hpe ndai hku tsun wa ai: “Karai Kasang hpe kam mu, ngai hpe mung kam mi.” (Yhn 14:1) Dai majaw,  Yehowa hpe sha n-ga, Yesu hpe mung kamsham ra ai. Yesu hpe kamsham ai lam gara hku madun na kun? Lam 3 hpe hkaja yu ga.

Yesu hpe kamsham ai ngu ai gaw hpa lachyum rai kun?

Langai, gawng malai hkungga hpe Karai Kasang jaw ai kumhpa hku nna nang mu mada u. Kasa Pawlu ndai hku tsun ai: “Nye a matu mara shi hkum dai shi ap kau ai Karai Kasang a Kasha a makam masham hta sha ngai hkrung nga nngai.” (Gal 2:20) Yesu hpe kam yang, gawng malai hkungga gaw, na a matu re ai hpe kam wa na re. Dai hta, anhte a yubak mara ni hpe raw ya lu ai lam, htani htana asak myit mada lam jaw ai madung lam, na a matu Karai Kasang a tsawra myit hpe teng sha kam ai lam ni lawm ai. (Rom 8:32, 38, 39; Ehp 1:7) Nang teng sha kam yang, na hkum nang n kaja ai, mara nga ai ngu nna n hkamsha hkra gawng malai hkungga gaw karum ya na re.​—⁠2 Ht 2:16, 17.

Lahkawng, Yesu a gawng malai hkungga hpe madung tawn nna, Yehowa kaw akyu hpyi nna sit shang u. Gawng malai hkungga a majaw, “nden ja ai myit hte Karai Kasang a chyeju tingnyang man de sit shang wa ga. Shing rai yang anhte gaw matsan dum ai lam hkam la lu na hte, ra kadawn ai aten hta nan anhte hpe karum ai chyeju lu la” na matu, Yehowa kaw anhte akyu hpyi mai ai. (Heb 4:15, 16, JCLB; 10:19-22) Chyam dinglik hkrum ai shaloi mara n galaw hkrup hkra akyu hpyi ai gaw karum ya lu ai.​—⁠Luk 22:40.

Masum, Yesu a ga madat u. Kasa Yawhan ndai hku ka da ai: “Kasha wa hpe kam sham ai wa gaw, htani htana asak lu la wu ai: Kasha wa a ga hpe n madat ai wa chyawm gaw, asak hkrung lam mu na wu ai n rai: Karai Kasang a sindawng kahtet ai gaw, dai wa a ntsa e a nga nga ai.” (Yhn 3:36) Kamsham ai myit gaw ga n madat ai lam hte shai ai hpe Yawhan tsun wa ai. Dai majaw, Yesu a ga madat ai gaw shi hpe kamsham ai re. Yesu sharin ya ai lam hte lam matsun yawng re ai “Hkristu a tara” hpe hkan sa ai hku nna, Yesu a ga madat mai ai. (Gal 6:2) “Sadi ai hte myitsu ai mayam” hku nna Yesu jaw ai lam matsun ni hpe hkan sa ai hku nna mung, shi a ga madat mara mai ai. (Mat 24:45) Yesu hpe madat mara yang, nbung laru zawn re ai tsin-yam tsindam ni hpe hkam jan lu na re.​—⁠Luk 6:47, 48.

Chyoi Pra Ai Makam Masham Lam Hta Shangang Shakang Nga Mu

Kalang mi hta, masha langai gaw Yesu hpe ndai hku tsun ai: “Ngai kam sham nga nngai, rai ti mung nye a kam sham myit n law li ai, grau nna law wa na matu ngai hpe karum matsan dum la rit law!” (Mrk 9:24, JCLB) Shi hta kamsham ai myit loi mi nga tim, dai masha gaw kamsham ai myit naw ra ai hpe shagrit shanem let hkap la wa ai. Ndai masha zawn, anhte yawng hta mung makam masham grau ra ai masa ni nga chye ai. Anhte yawng gaw kamsham ai myit law htam wa na matu ya aten hta galaw lu ai. Anhte mu lu ai hte maren, Karai A Mungga hkaja nna, myit sawn sumru ai shaloi, anhte a makam masham ngang kang wa nna Yehowa hpe grau chyeju dum wa ai. Anhte a hpunau nauna ni hte arau Yehowa hpe nawku ai, kaga ni hpe anhte a myit mada lam tsun dan ai, shakut shaja let akyu hpyi ai shaloi, anhte a makam masham grau ngang kang wa ai. Dai sha n-ga, makam masham ngang kang wa yang, yawng mayawng hta grau htum ai kumhpa hpe anhte lu la na re. Karai A Mungga gaw anhte hpe ndai hku n-gun jaw ai: “Tsaw ra ai ni e, . . . nanhte a chyoi pra ai makam masham lam hta, tinang dai shangang shakang nga mu: . . . Karai Kasang a n-gaw nwai ai myit hta a nga nga mu.”​—⁠Yud 20, 21.