Content de lai

Malawm Ni Hpe Lai U

 Hkaja Na Sumhpa 16

Si Ai Hte Seng Ai Tengman Ai Lam Hpe Makawp Maga U

Si Ai Hte Seng Ai Tengman Ai Lam Hpe Makawp Maga U

“Teng man ai lam a wenyi hte, lam shadam ai wenyi hpe, anhte chye ginhka lu ga ai”​—⁠1 YH 4:6.

Mahkawn 73 Nden Marai Jaw Rit

Sumhpa Hta Lawm Ai Lam *

Karai Kasang n ra sharawng ai htung lailen ni hta n shang lawm ai sha, tsawra ai marai langai si mat ai majaw yawn hkyen nga ai jinghku ni hpe shalan shabran ya (Laika pang 1-2 hpe yu u) *

1-2. (a) Gara ladat ni hku nna masha ni hpe Satan hkalem nga ai kun? (b) Ndai sumhpa hta hpa lam ni hkaja mat na kun?

MASU magaw ai a kawa Satan gaw, Adam yan Ewa aten kaw nna masha ni hpe hkalem wa ai. (Yhn 8:44) Shi a masu ga nkau hta, si hkrung si htan hte seng ai lam, si mat ai hpang hpa byin ai lam hte seng nna shut ai hku sharin achyin ya ai lam ni lawm ai. Dai sharin achyin ya ai lam ni gaw, masha law law hkap la ai htung lailen hte shingra tara hta jan ai lam ni hta madung tawn ai. Dai majaw, anhte a hpunau nauna law law gaw, nta masha ni (sh) tinang a makau grup-yin kaw na marai langai ngai si ai shaloi, “makam masham a matu matut nna dakring dalang gasat gala makawp maga” ra nga ai.​—⁠Yud 3, JCLB.

2 Lama na, dai zawn masa hte nang hkrum yang, si mat ai masha hte seng nna Chyum Laika sharin ya ai hku matut hkan sa lu hkra, nang hpe hpa gaw karum ya lu ai kun? (Ehp 6:11) Karai Kasang n ra ai htung lailen ni hta shang lawm na matu shadut hkrum nga ai hpunau nauna langai hpe nang gara hku shalan shabran ya nna n-gun jaw lu na kun? Yehowa anhte hpe karum ya ai lam ndai sumhpa hta hkaja mat na re. Si hkrung si htan hte seng nna Chyum Laika hta gara hku tsun da ai hpe shawng hkaja yu ga.

Si Mat Ai Masha Ni A Masa Lam Hte Seng Ai Tengman Lam

3. Shawng nnan masu ai lam kaw nna hpa byin wa ai kun?

3 Karai Kasang gaw, shinggyim masha ni si na matu n yaw shada da ai. Adam yan Ewa gaw Yehowa tsun ai ndai ga hpe madat na nga yang si na n re: “Kaja ai hte n kaja ai hpe chye ginhka shangun ai hpun hta na chyawm gaw, nang n sha lu na ndai: kaning rai nme law, dai hpun hta na sha ai nhtoi hta, nang teng teng si lu na ndai.” (Nin 2:16, 17) Satan gaw manghkang ni hpe shabyin dat ai. Satan gaw lapu hku nna Ewa hpe ndai hku ga shaga ai: “Nan gaja wa n si na myit dai.” Yawn hpa gaw, Ewa dai masu ga hpe kam nna namsi hpe sha kau ai. Dai hpang, madu wa mung namsi hpe sha kau ai. (Nin 3:4, 6) Dai lam hku nna, shinggyim masha ni hta yubak hte si hkrung si htan shang wa ai.​—⁠Rom 5:12.

4-5. Satan gaw masha ni hpe gara hku matut nna hkalem nga ai kun?

 4 Karai Kasang tsun da ai hte maren Adam yan Ewa si mat ai. Raitim, Satan gaw si ai hte seng nna masu ai lam hpe n jahkring kau ai. Hpang e, kaga lam hku nna bai masu wa ai. Masu ai hku sharin achyin ya chye ai lam langai gaw, hkum hkrang si mat tim, masha hkum kaw na lama ma gaw, wenyi hku nna matut asak hkrung nga ai lam re. Dai zawn masu ai lam amyu myu hpe lang nna anhte a prat du hkra masha law law hpe hkalem nga ai.​—⁠1 Tm 4:1, 2

5 Masha law law hpa majaw hkalem hkrum nga ai kun? Si ai hte seng nna masha ni gara hku hkamsha ai hpe Satan chye ai majaw, dai hpe akyu jashawn nna masha ni hpe hkalem ai. Anhte gaw htani htana asak hkrung na matu hpan da hkrum ai majaw anhte n si mayu ga ai. (Hpj 3:11) Anhte a hpyen re ai si hkrung si htan hte seng nna hkaja yu ga.​—⁠1 Ko 15:26.

6-7. (a) Satan gaw si hkrung si htan hte seng ai tengman lam hpe makoi magap da lu ai kun? Sang lang dan u. (b) Si mat ai masha ni hpe n hkrit na matu Chyum Laika tengman lam gaw anhte hpe gara hku karum ya lu ai kun?

6 Satan gara hku mi shakut nga tim, si hkrung si htan hte seng ai tengman lam hpe makoi magap da lu na n re. Si mat ai ni a masa lam hte si mat ai ni a matu myit mada lam hte seng ai Chyum Laika tsun ai lam ni hpe masha law law gaw moi na hta grau chye wa nna, hkaw tsun nga ma ai. (Hpj 9:5, 10; Kas 24:15) Dai tengman ai lam ni gaw anhte hpe shalan shabran ya nna, masha ni si mat yang hpa byin ai hte seng nna ntsen ai myit ni, hkrit ai myit ni n nga hkra anhte hpe karum ya ai. Ga shadawn, anhte gaw, si mat ai ni hpe n hkrit ai sha n-ga, shanhte a matu mung myit n tsang ya ai. Shanhte gaw asak n hkrung sai rai nna, kadai hpe mung shoihpa n lu jaw ai hpe anhte chye ga ai. Shanhte a masa gaw grai yup pyaw nga ai hte bung ai. (Yhn 11:11-14) Si mat ai ni gaw aten kade daram lai mat ai hpe mung n chye ai lam anhte chye ga ai. Dai majaw, bai hkrung rawt wa ai shaloi, si mat ai masha gaw, si ai shaning tsa lam hku na tim, myi grip mi daram sha na ai ngu hkamsha na re.

7 Si mat ai masha ni a masa lam hte seng ai tengman ai lam gaw, dan leng ai, chye na loi ai, lachyum nga ai. Satan masu ai ga ni hte grai shai nga ai. Dai masu ga ni gaw, masha ni hpe shut ai hku hkalem ai sha n-ga, Hpan Madu hpe mung jahpoi asawng nga ai. Satan shabyin ai shoihpa ni hpe grau nna chye wa hkra karum ya lu ai ndai ga san ni hpe myit yu ga: Satan a masu ga ni gaw Yehowa hpe gara hku jahpoi asawng nga ai kun? Gara lam hku nna, Hkristu a gawng malai hkungga hpe kam sham n ra ai ngu shadu wa shangun ai kun? Masha ni a yawn hkyen ai lam hte yakhkak ai lam ni hpe gara hku nna grau jat shangun ai kun?

 Satan A Masu Ga Ni Gaw Shoihpa Byin Shangun

8. Yeremia 19:5 hta tsun da ai hte maren, si mat ai masha ni hte seng ai Satan a masu ga ni gaw Yehowa hpe gara hku sari jahpoi ya ai kun?

8 Si mat ai masha ni hte seng ai Satan a masu ga ni gaw Yehowa hpe sari jahpoi ya ai. Dai masu ga ni hta, si mat ai masha ni wan hta zingri hkrum ai ngu ai shut ai hku sharin achyin ai lam lawm ai. Dai zawn sharin achyin ai lam ni gaw Karai Kasang hpe sari jahpoi ai re. Gara hku nna kun? Dai zawn sharin achyin ya ai lam ni gaw, tsawra myit nga ai Karai Kasang mung Nat Satan a akyang lailen ni nga ai ngu nna masha ni hpe kam mat shangun ai. (1 Yh 4:8) Dai masu ga ni hte seng nna nang gara hku hkamsha ai kun? Grau nna gaw, Yehowa gara hku hkamsha ai kun? Yehowa gaw nhkru ai lam yawng hpe nju ndawng ai.​—⁠Yeremia 19:5 hpe hti u.

9. Yawhan 3:16 hte 15:13 hta tsun da ai Hkristu a gawng malai hkungga hpe kam ai myit hte seng nna Satan a masu ga ni gaw gara hku hkra machyi shangun ai kun?

9 Si ai hte seng ai Satan a masu ga ni gaw Hkristu a gawng malai hkungga hpe akyu nau n nga ai ngu kamsham shangun ai. (Mat 20:28) Satan a kaga masu ga langai gaw shinggyim masha ni hta n chye si ai wenyi nga ai ngu ai lam re. Dai ga jaw ai nga yang, masha yawng gaw htani htana asak hkrung lu na re. Dai hku rai yang, htani htana asak lu na matu Hkristu gaw anhte a matu gawng malai hkungga hku nna shi a asak hpe jaw ra na n re. Hkristu a gawng malai hkungga gaw, shinggyim masha ni hpe Yehowa madun ai tsawra myit kaw nna grau htum ai lam re. (Yawhan 3:16; 15:13 hpe hti u.) Dai zawn grai manu dan ai kumhpa hpe akyu nau n nga ai ngu sharin ya ai lam hte seng nna Yehowa hte Yesu gara hku hkamsha na hpe shingran yu u. 

10. Si ai hte seng ai Satan a masu ga ni gaw masha ni a yawn hkyen ai lam hte yakhkak ai lam ni hpe gara hku grau nna jat shangun ai kun?

10 Satan a masu ga ni gaw yawn hkyen lam hte yakhkak lam ni hpe grau nna jat shangun ai. Sumsing lamu kaw lamu kasa byin shangun na matu, ma hpe Karai Kasang woi la kau ai nga nna ma si mat ai majaw yawn hkyen nga ai kanu kawa ni hpe sa tsun chye ma ai. Satan a dai masu ga gaw shanhte a hkra machyi lam hpe shayawm ya ai kun? Grau shalaw ya ai kun? Church sharin achyin ya ai hpe ninghkap ai ni hpe hpun shadaw hta wan nat ai hte hpawn, zingri zingrat ai lam gaw n shut ai ngu ai hpe makawp maga na matu, shut shai ai ngarai lam hpe sharin achyin ya ma ai. Zingri zingrat na matu san jep ai tara rung (Spanish Inquisition) hte seng ai laika buk langai hku nga yang, tara rung kaw na tara agyi nkau gaw, church a makam masham hpe n hkap la ai masha ni hpe wan nat ai. Wan nat hkrum ai shaloi, ngarai ngu ai gaw gara hku re ai hpe chye na mat nna si na mahka hta myit malai lu yang, si mat ai hpang ngarai de du na n re ngu dai tara agyi ni kam ma ai. Mungdan law law hta mung, si mat ai shanhte a jiwoi jiwa ni hpe hkungga na matu hte shanhte kaw na shaman chyeju lu na matu nawku ra ai ngu kamsham ma ai. Kaga ni gaw, si mat ai shanhte a jiwoi jiwa ni ari jaw na hpe koi lu na matu shanhte hpe myit shapyaw ya mayu ma ai. Yawn hpa gaw, Satan a masu ga ni hta madung da ai makam masham gaw, tengman ai shalan shabran lam n lu jaw ai. De a malai, myit tsang lam ni (sh) hkrit ai myit pyi byin shangun chye ai.

Chyum Laika Tengman Ai Lam Hpe Makawp Maga Lu Ai Lam

11. Chyum Laika hta n lawm ai lam ni hpe galaw na matu jinghku ni (sh) manang ni gaw myit madung hte gara hku shadut chye ai kun?

11 Si mat ai masha ni hte seng nna, Chyum Laika hte nhtan shai ai lam ni hta shang lawm na matu jinghku ni (sh) manang ni pyi myit madung hte shadut wa chye ai. Dai shaloi, Yehowa hte shi a Mungga hpe tsawra ai myit gaw, Yehowa a ga madat na matu karum ya na re. Dai lam ni hta n shang lawm yang, si mat ai wa hpe anhte n tsawra ai, n hkungga ai nga nna anhte hpe jahpoi asawng chye ai. Shing nrai, dai zawn n galaw ai majaw, si mat ai masha gaw anhte hpe shoihpa jaw chye ai nga nna pyi tsun ma ai. Tengman ai tara hpe anhte gara hku makawp maga lu na  kun? Lawu na Chyum Laika npawt tara ni hpe gara hku hkan sa lu na lam hkaja yu ga.

12. Si mat ai masha hte seng ai gara htung lai ni gaw Chyum Laika hta n lawm ai lam chye lu ai kun?

12 Chyum Laika hta n lawm ai makam masham hte htung lailen ni kaw na “kaga lak lak rai nga mu.” (2 Ko 6:17) Masha si ai hpang shi a “minla” gaw, makau grup-yin kaw matut nga nga nna, shi ntsa n kaja wa ai ni hpe ari jaw ai ngu Karibiyan masha law law kam ma ai. “Minla” gaw, makau grup-yin na masha ni hpe shoihpa jaw ai nga nna pyi laika buk langai hta tsun da ai. Ahprika kaw na htung langai gaw, masha langai si ai shaloi, dai nta na pat ni hpe magap dat ai, sumla ni hpe mung shakum maga de kayin dat ai. Hpa majaw kun? Si mat ai masha gaw shanhte hkum shanhte n mu ging ai ngu masha nkau tsun ma ai. Yehowa a mayam ni gaw, Satan a masu ga ni hpe n-gun jaw ai maumwi mausa ni hpe n kam ga ai, htung lailen ni hta mung n shang lawm ga ai.​—⁠1 Ko 10:21, 22.

Chyum Laika hpe madung tawn ai laili laika ni hpe atsawm sawk sagawn nna Yehowa Sakse n re ai jinghku ni hte atsawm tsun shaga ai gaw manghkang ni hpe koi yen lu hkra karum ya (Laika pang 13-14 hpe yu u) *

13. Htung lailen langai hte seng nna hkrak n chye ai nga yang, Yaku 1:5 hta tsun da ai hte maren nang hpa galaw ging ai kun?

13 Htung lailen langai hte seng nna hkrak n chye ai nga yang, Yehowa hpe akyu hpyi nna hpaji hpyi u. (Yaku 1:5 hpe hti u.) Dai hpang, anhte a laili laika ni kaw nna tam sawk sagawn u. Ra ang yang, na a nawku hpung kaw na myitsu salang ni hpe karum hpyi u. Shanhte gaw nang hpe hpa galaw u ngu nna tsun na gaw n re. Raitim, shanhte gaw ya ndai kaw tsun nga ai zawn re ai Chyum Laika npawt tara ni hpe nang tam mu hkra karum ya na re. Ndai lam ni hpe nang galaw ngut yang, nang gaw na a “sawn maram chye ai atsam” hpe shaman ai rai nna, dai atsam gaw “kaja ai hte n kaja ai hpe chye ginhka lu hkra” nang hpe karum ya na re.​—⁠ Heb 5:14, NW.

14. Masha ni hpe ahtu kataw ai baw n byin hkra gara lam ni hku nna anhte koi yen mai ai kun?

14 “Karai Kasang a hpung shingkang tam let, galaw nga mu . . . ahtu kataw shara hkum tai nga myit” (1 Ko 10:31, 33) Htung lailen (sh) htung hking langai hta anhte shang lawm na kun? N shang lawm na kun? nga nna dawdan ai shaloi, masha ni a myit nsam hpe gara hku hkra machyi na kun? nga nna myit yu ging ai. Laksan hku nna hpunau nauna ni a myit nsam hpe tau chye ra ai. Marai langai ngai hpe galoi mung ahtu kataw n byin shangun mayu ai. (Mrk 9:42) Yehowa Sakse n re ai ni hpe masin pawt hkra anhte n galaw mayu ga ai. Tsawra ai myit gaw kaga ni hpe hkungga ai hku tsun na matu shadut ya ai. Dai gaw Yehowa hpe mung shagrau nga ai re. Anhte gaw masha ni hte ga law hkat nna shanhte a htung lailen hpe jahpoi asawng ai baw n galaw mayu ga ai. Tsawra myit gaw grai atsam kaba ai. Anhte gaw tsawra myit hte masha ni hpe myit tau ya nna, hkungga ai lam madun yang, ninghkap ai ni a masin salum pyi kya wa chye ai.

15-16. (a) Na a makam masham hpe kaga ni chye hkra tsun dan da ai gaw hpa majaw hpaji rawng ai kun? Ga shadawn tsun dan u. (b) Roma 1:16 hta mu lu ai Pawlu a ga hpe anhte gara hku hkan sa lu ai kun?

 15 Na a makau grup-yin hta nang gaw Yehowa Sakse langai re ai lam madun u. (Esa 43:10) Nang gaw na a makam masham hte seng nna htingbu ni, jinghku ni hpe tau hkrau nna tsun da yang, nang n lawm ging ai masa lam ni hte hkrum wa ai shaloi, aloi sha hparan lu na re. Mozambik kaw nga ai Hpransisako ndai hku tsun ai: “Nye a madu jan Kerolina hte ngai tengman ai tara hpe chye wa ai shaloi, si mat ai masha ni hpe an n nawku sai lam an a nta masha ni hpe tsun dan ai. Kerolina a kana si mat ai shaloi, an a makam masham chyam dinglik hkrum wa ai. Moi mang hpe buga htung lailen hte maren hka shin ya ra ai. Dai hpang, ni dik htum jinghku majing gaw, hka shin ya ai hka hpe ru kau ai shara hta, masum ya yup ra ai htung nga ai. Dai htung gaw, si mat ai masha a minla hpe shapyaw ya na matu galaw ya ma ai re. Kerolina a nta masha ni gaw shi mung hka sa ru kau ai shara hta yup na ngu shadu ma ai.”

16 Hpransisako hte shi madu jan gara hku galaw wa ai kun? Hpransisako ndai hku tsun ai: “An Yehowa hpe tsawra nna shi hpe myit shapyaw ya mayu ai. Dai majaw, dai htung lailen ni hta n shang lawm ai lam tsun dan ai. Kerolina a nta masha ni gaw grai pawt wa ai. Shanhte gaw si mat ai masha hpe an n hkungga ai ngu mara shagun nna, an kaw mung n sa chyai sai, karum mung n karum ya sai ngu nna tsun ma ai. An a makam masham hpe tau hkrau nna tsun dan ngut chyalu re ai majaw, shanhte pawt nga ai shaloi, shanhte hte dai lam n tsun sai. An a masa hte seng nna tau hkrau tsun dan da chyalu re ai hpe jinghku nkau mi gaw bai tsun dan ya ai hku nna an a maga tsap ya ma ai. Dai hpang Kerolina a jinghku ni gaw, myit zim mat nna, an hte bai matut mahkai wa ai. Nkau mi nga yang, Chyum Laika hte seng ai laili laika ni hpe nta kaw sa hpyi ma ai.” Si hkrung si htan hte seng ai tengman ai lam hpe anhte makawp maga na matu, galoi mung n kaya ga ai.​—⁠Roma 1:16 hpe hti u.

Yawn Hkyen Nga Ai Ni Hpe Shalan Shabran Nna Madi Shadaw Ya U

Tsawra ai marai langai si mat ai majaw yawn hkyen nga ai wa hpe manang ajet ni gaw sa shalan shabran ya nna madi shadaw ya (Laika pang 17-19 hpe yu u) *

17. Yawn hkyen hkrum nga ai hpunau nauna langai a matu jinghku byin lu hkra hpa gaw anhte hpe karum ya na kun?

17 Tsawra ai marai langai si mat ai majaw yawn hkyen nga ai hpunau nauna ni a matu anhte gaw, ‘ru yak hkrum ai nhtoi hta kahpu kanau tai’ ya ai jinghku byin hkra anhte shakut ra ai. (Gsh 17:17) Chyum Laika hta n lawm ai lam ni galaw na matu shadut hkrum nga ai, yawn hkyen nga ai  hpunau nauna ni a matu anhte gaw gara hku nna “jinghku” byin lu na kun? Yawn hkyen hkrum nga ai ni hpe shalan shabran ya na matu anhte hpe karum ya ai Chyum Laika npawt tara lahkawng hpe hkaja yu ga.

18. Yesu hpa majaw hkrap ai kun? Shi a kasi ningli kaw na anhte hpa sharin la lu ai kun?

18 “Hkrapngu hkrapngoi re ai ni hte rau hkrapngu hkrapngoi nga mu.” (Rom 12:15) Grai yawn hkyen nga ai marai langai ngai hpe anhte tsun na ga tam n mu ai baw byin chye ai. Kalang lang anhte a myi prwi gaw anhte tsun ai ga hta grau nna lu tsun ai. Yesu a manang Lazaru si ai shaloi, Mari, Marhta hte kaga ni gaw hkrap nga ma ai. Mali ya na ai hpang, Yesu du ai shaloi, Lazaru hpe shi bai jahkrung ya lu ai hpe chye tim, shi mung “myi prwi” pru wa ai. (Yhn 11:17, 33-35) Yesu a myi prwi gaw shi kawa a hkamsha lam hpe chye shangun ai. Yesu gaw shanhte a dinghku hpe teng sha tsawra ai hpe shanhte chye lu nna, Mari yan Marhta mung shalan shabran lam teng sha lu wa na re. Dai zawn sha, anhte a hpunau nauna ni mung, anhte a tsawra myit hte myit tsang ya ai hpe chye yang, shanhte langai sha hkamsha nga ai n re. Makau hta manaw manang ni gaw madi shadaw ya nga ai, yu lanu lahku ya nga ai ngu hkamsha na re.

19. Yawn hkyen hkrum ai hpunau nauna ni hpe shalan shabran ya ai shaloi Hpaji Ningli 3:7 hpe gara hku hkan sa mai na kun?

19 “Atsin sha nga ai aten hte, ga tsun na aten mung rai nga ai.” (Hpj 3:7) Yawn hkyen nga ai hpunau nauna ni hpe shalan shabran ya lu ai lam langai gaw atsawm madat ya ai hku nna re. Hpunau nauna ni gaw shanhte a hkamsha lam hpe tsun dan ai shaloi, “ga tsun lai” yang pyi myit hkum daw. (Yob 6:2, 3) Shi gaw Yehowa Sakse n re ai jinghku ni a shadut hkrum ai majaw grau yawn ai mung rai na re. Dai majaw shi hte rau akyu hpyi u. Shi atsawm sha chye myit na matu, n-gun jaw na matu “akyu hpyi ai ga madat mara ai wa” kaw akyu pyi ya u. (Shk 65:2) Lama na, byin mai na nga yang, Chyum Laika arau hti u. Shing nrai, anhte a laili laika ni kaw na n-gun jaw ya lu ai prat labau zawn re ai sumhpa hpe hti dan u. 

20. Hpang na sumhpa hta hpa lam ni hkaja mat na kun?

20 Si mat ai masha ni hte seng ai tengman lam hte lup ni hta nga ai ni a matu kaja ai htawm hpang gaw ala nga ai hpe chye lu ai gaw ahkaw ahkang kaba re. (Yhn 5:28, 29) Dai majaw, tsun shaga, galaw hkawm sa ai lam hku nna, Chyum Laika tengman lam hpe matut makawp maga nna, ahkaw ahkang lu shagu, kaga ni hpe htawn tsun mat wa ga. Tengman ai tara hpe masha ni n chye hkra Satan galaw nga ai kaga lam langai gaw nat hpaji re ai lam hpang na sumhpa hta hkaja lu na re. Satan a mahkam ni re ai htung lailen ni hte shangwi shapyaw lam ni hpe hpa majaw koi yen ra ai lam hpe mung hkaja mat na re.

Mahkawn 24 Yehowa A Bum De Sa Wa Marit

^ စာပိုဒ်၊ 5 Satan hte nat ni gaw, si mat ai masha ni a masa lam hte seng ai masu ga tsun nna masha ni hpe hkalem nga ai. Dai masu ga ni a majaw Chyum Laika hta n lawm ai htung lailen ni nga wa ai. Dai zawn htung lailen ni hta shang lawm na matu nang hpe shadut tim, Yehowa hpe matut sadi dung lu ai lam ndai sumhpa gaw nang hpe karum ya na re.

^ စာပိုဒ်၊ 55 SUMLA HPE HTAI DAN AI LAM NI: Tsawra ai marai langai si mat ai majaw yawn hkyen nga ai jinghku langai hpe, Yehowa Sakse ni sa shalan shabran ya nga.

^ စာပိုဒ်၊ 57 SUMLA HPE HTAI DAN AI LAM NI: Makoi mayang htung ni hte seng nna sawk sagawn ngut ai hpang, Sakse Hkam langai gaw jinghku ni hpe shi a makam masham hpe sang lang dan nga.

^ စာပိုဒ်၊ 59 SUMLA HPE HTAI DAN AI LAM NI: Tsawra ai marai langai si mat ai hpunau hpe myitsu salang ni gaw n-gun jaw nna shalan shabran ya nga.