Content de lai

Malawm Ni Hpe Lai U

 Hkaja Na Sumhpa 14

Karai A Magam Hpe Ngut Kre Hkra Galaw Nga Ai Kun?

Karai A Magam Hpe Ngut Kre Hkra Galaw Nga Ai Kun?

“Kabu gara shiga hpe matut nna hkaw tsun nga u. Karai jaw ai magam lit hpe ngut kre hkra galaw u.”​—⁠2 TM 4:5, NW.

Mahkawn 57 Masha Amyu Yawng Hpe Hkaw Tsun

Sumhpa Hta Lawm Ai Lam *

Yesu hkrung rawt ai hpang, shi a sape ni hte hkrum nna “pru sa nna,. . . sape shatai” na matu shanhte hpe matsun ya (Laika pang 1 hpe yu u)

1. Karai a mayam yawng gaw hpa galaw mayu ma ai kun? Hpa majaw kun? (Makawp sumla hpe yu u.)

YESU HKRISTU gaw, shi hpang hkan ai ni hpe “pru sa nna, masha amyu baw shagu hpe sape shatai” na matu matsun da ai. (Mat 28:19) Karai a sadi dung ai mayam yawng gaw, shanhte hpe jaw da ai magam lit hpe “ngut kre hkra” gara hku gun hpai lu na hpe chye mayu ma ai. (2 Tm 4:5, NW) Dai magam gaw, prat a kaga lam yawng hta na grau ahkyak ai, grau manu dan nna hkyak hkyak galaw ra nga ai. Raitim, ndai magam bungli hpe galaw mayu ai daram galaw lu na matu gaw yak chye ai.

2. Karai a magam lit hpe ngut kre hkra galaw nga ai laman gara mayak mahkak ni anhte hkrum chye ai kun?

2 Anhte a aten hte n-gun atsam hpe, akyu jashawn nna galaw ra ai kaga ahkyak ai lam ni nga ai. Tinang a matu hte dinghku hpe madi shadaw na matu, shani shagu aten law law jaw nna bungli galaw ra chye ai. Dinghku a lit ni, machyi makaw ai lam ni, myit daw myit hten ai lam ni (sh) asak kaba ai majaw hkrum chye ai manghkang ni anhte hta nga chye ai. Dai mayak mahkak ni hpe hparan ra nga tim Karai a magam lit hpe ngut kre hkra gara hku galaw mai na kun?

3. Mahte 13:23 hta mu lu ai Yesu a ga kaw nna hpa chye lu ai kun?

3 Yehowa a magam gun na matu, aten nau n lu jaw ai masa ni anhte hta nga yang, myit n daw ging ai. Masha yawng gaw, Mungdan asi hpe maren sha si lu na n re ai hpe Yesu chye ai. (Mahte 13:23 hpe hti u.) Yehowa a magam hta anhte galaw lu ai lam yawng hpe kaja htum galaw nga na nga yang, Yehowa grai manu shadan ai. (Heb 6:10-12) Masha nkau gaw, Karai a magam hpe grau nna galaw lu na masa nga ai ngu hkamsha ma ai. Ndai sumhpa hta, anhte a prat hta hkaw tsun magam hpe gara hku shawng tawn na, prat hpe gara hku asan sha tawn na, hkaw tsun magam hte sharin achyin ya ai atsam hpe  rawt jat hkra, gara hku galaw mai na lam ni hpe hkaja yu ga. Shawng nnan, hkaw tsun magam hpe ngut kre hkra galaw lu ai ngu ai lachyum gaw hpa rai kun? ngu ai hpe hkaja yu ga.

4. Hkaw tsun magam hpe ngut kre awng dang lu ai ngu ai gaw hpa lachyum rai kun?

4 Hkaw tsun magam hpe ngut kre lu na matu, anhte dang lu ai daram hkaw tsun nna sharin achyin ya ra ai. Dai hta, aten kade daram akyu jashawn ai hta n-ga lawm ai. Yehowa manu shadan ai gaw anhte a myit jasat hpe re. Yehowa hte htingbu ni hpe tsawra ai majaw, Hkristan magam * hpe myit masin mahkra hte anhte galaw ga ai. (Mrk 12:30, 31; Kol 3:23, 24) Myit masin mahkra hte Karai a magam gun ai ngu ai gaw, tinang a kaja htum n-gun atsam ni hpe akyu jashawn nna shi a magam gun hpai ai hpe tsun ai re. Hkaw tsun magam gun hpai lu ai laksan ahkaw ahkang hpe anhte manu shadan na nga yang, kabu gara shiga hpe dang lu ai daram masha law law hpe hkaw tsun na re.

5-6. Aten loi mi sha jaw lu tim hkaw tsun magam hpe shawng tawn lu ai lam ga shadawn tsun dan u.

5 Tingse dum ai hpe grai sharawng ai ramma langai hpe myit yu ga. Gara aten hta raitim, tingse dum lu yang shi grai pyaw ai. Shi gaw, kru ya hte laban hta kohpi seng kaw tingse dum ai bungli lu wa ai. Raitim, shang gumhpraw n law ai majaw, kaga 5 ya hta gat seng kaw bungli sa galaw ai. Shi a aten law malawng hpe gat seng kaw sha akyu jashawn ra mat tim, tingse dum na matu gaw grai sharawng nga ai. Shi a atsam rawt jat na matu hte madum sumpyi ninghkrin langai hku nna aten hpring galaw lu na matu grai sharawng nga ai. Tingse dum na matu aten loi sha lu tim, dai aten hpe akyu jashawn ai.

6 Dai hte maren, hkaw tsun magam hta shang lawm na matu, nang aten nau n lu jaw nga na re. Raitim, dai magam hpe gaw nang sharawng nga na re. Masha ni a salum de kabu gara shiga du hkra hkaw tsun chye na matu, na a atsam ningja rawt jat hkra galaw nga na re. Nang hta galaw ra na lam ni law ai majaw, hkaw tsun magam hpe prat hta gara hku shawng tawn mai na kun? ngu nna myit nga na re.

 Hkaw Tsun Magam Hpe Shawng Tawn Mai Na Lam

7-8. Hkaw tsun magam hte seng ai Yesu a myit jasat hpe gara hku kasi la mai na kun?

7 Hkaw tsun magam hte seng nna laklai ai kasi ningli hpe Yesu madun wa ai. Shi a prat ting, Karai a Mungdan hte seng ai lam hpe tsun ai hta myit maju jung wa ai. (Yhn 4:34, 35) Masha law law hpe hkaw tsun lu na matu, deng tsa lam hku lam hkawm sa ai. Nta hta (sh) gara shara kaw raitim mu ai masha ni hpe hkaw tsun lu hkra, ahkaw ahkang tam ai. Yesu a prat hta galaw wa ai lam yawng gaw, hkaw tsun magam hpe sha madi shadaw wa ai.

8 Anhte mung, gara shara, gara aten hta raitim, dang lu ai daram kabu gara shiga hpe tsun dan na matu ahkaw ahkang tam ai hku nna, Hkristu hpe kasi la mai ai. Hkaw tsun bungli hta shang lawm lu na matu, tinang a ngamu ngamai ai prat hpe sharawng awng let sak jaw ai. (Mrk 6:31-34; 1 Pe 2:21) Nawku hpung kaw na nkau gaw, laksan, aten galu (sh) aten kadun ningshawng hku nna magam gun lu ma ai. Nkau gaw, kaga amyu ga ni hpe sharin la ai (sh) hkaw tsun masha grau ra ai shara ni de htawt nga ma ai. Hkaw tsun masha law law gaw, shanhte zawn n lu galaw tim, kaja htum sak jaw nga ai majaw, magam bungli ngut kre nga ai re. Gara hku mi raitim, Yehowa gaw anhte galaw lu ai hta jan nna galaw na matu n hpyi shawn ai. “A rawng ai Karai Kasang a hpung shingkang madun ai kabu gara shiga” hpe hkaw tsun ai hku nna shi a magam hta, anhte yawng kabu gara nga na matu shi ra sharawng ai.​—⁠1 Tm 1:11; Trj 30:11.

9. (a) Pawlu gaw kan bau bungli galaw ra tim hkaw tsun magam hpe gara hku nna ahkyak shatai galaw wa ai kun? (b) Kasa 28:16, 30, 31 hta hkaw tsun magam hte seng nna Pawlu a gara myit jasat hpe mu lu ai kun?

9 Kasa Pawlu gaw, hkaw tsun bungli hpe prat hta ahkyak htum galaw ai hku nna kasi kaja madun wa ai. Lahkawng ngu na sasana hkrun lam hta Korinhtu mare kaw du ai shaloi, jai na gumhpraw n law mat ai majaw, janghpang chywi ai aten ni mung nga wa ai. Raitim, janghpang chywi ai hpe madung bungli hku nna n galaw wa ai. Hkaw tsun magam hpe madi shadaw lu hkra sha galaw wa ai. Dai majaw, Korinhtu masha ni hpe “jahpu n hpyi ai sha” hkaw tsun wa ai. (2 Ko 11:7) Pawlu gaw, kan bau bungli nkau galaw ra tim, hkaw tsun magam hpe shawng tawn nna Laban Nhtoi shagu hta hkaw tsun wa ai. Shi a masa grau kaja wa ai shaloi, Mungga hkaw tsun ai amu hpe grau nna myit maju jung galaw lu wa ai. “Yesu gaw Meshia nan rai nga ai lam Yuda masha ni hpe sakse hkam” wa ai. (Kas 18:3-5, JCLB; 2 Ko 11:9) Roma kaw, nta hta 2 ning sharen da hkrum ai shaloi mung, sa chyai ai ni hpe sakse hkam nna laika ni mung ka wa ai. (Kasa 28:16, 30, 31 hpe hti u.) Pawlu gaw, hkaw tsun magam hpe hpa lam a majaw mung dingbai dingna n byin na matu dawdan da ai. Shi ndai hku ka wa ai: “Anhte hpe ndai magam gun hpai na matu ap da ai majaw . . . asum n jaw ga ai.” (2 Ko 4:1, NW) Pawlu zawn sha, anhte mung kan bau bungli a matu aten jaw ra tim, Mungdan magam bungli hpe gaw prat hta ahkyak htum hku nna galaw nga ga ai.

Hkaw tsun magam ngut kre hkra galaw lu na lam amyu myu nga (Laika pang 10-11 hpe yu u)

10-11. Hkam n kaja tim hkaw tsun magam hpe ngut kre hkra gara hku galaw mai na kun?

10 Anhte gaw, asak kaba wa ai (sh) hkam n kaja ai majaw, nta langai hpang langai hkaw tsun sa na matu n mai byin yang, kaga lam hku nna hkaw tsun lu ai. Tsa ban langai na Hkristan ni gaw, masha ni nga ai shara shagu hta hkaw tsun wa ai. Shanhte gaw, gara aten, gara shara kaw mi raitim, nta langai hpang langai (sh) shawa masha nga ai shara ni hta hkaw tsun wa ai. (Kas 17:17; 20:20, 21) Anhte gaw lam nau n lu hkawm ai nga yang, lai wa  lai sa masha ni law ai shara hta dung nna hkaw tsun lu ai. Laika ka nna, phone (sh) masat kaman sakse hkam ai hku nna hkaw tsun mai ai. Hkaw tsun masha law law gaw, mayak mahkak amyu myu a majaw nta langai hpang langai n lu sa tim, lahta na lam ni hku hkaw tsun lu ai majaw myit dik lam hte ngwi pyaw lam lu la ma ai.

11 Hkam n kaja tim, hkaw tsun magam hpe ngut kre hkra nang galaw lu ai. Kasa Pawlu a kasi ningli hpe bai myit yu ga. Shi ndai hku tsun ai: “Ngai hpe n-gun lagaw shaja ya ai wa a majaw lam shagu hpe ngai hkam lu nngai.” (Hpl 4:13) Kalang mi na sasana hkrun lam hta, shi machyi mat ai majaw dai n-gun atsam hpe ra wa ai. Galati nawku hpung hpe shi ndai hku tsun wa ai: “Shawng nnan e dai kabu gara shi ga nanhte hpe hkaw dan ma de yang, ngai hkum hkrang machyi makaw hkrum ai majaw hkring nna hkaw dan ma de ai.” (Gal 4:13) Dai hte maren, nang hkam n kaja tim, sarawun ni, tsi sara ni hte hkamja lam lanu lahku ya ai ni hpe kabu gara shiga hkaw tsun mai ai. Shanhte gaw bungli galaw nga ai majaw, hkaw tsun masha ni hkaw tsun sa ai shaloi, nta kaw n nga ai ni re.

Prat Hpe Asan Sha Tawn Mai Ai Lam

12. Myi hpe asan sha tawn ai ngu ai gaw hpa lachyum rai kun?

12 Yesu ndai hku tsun ai: “Dai myi gaw, hkum a pyengdin rai nga lu ai; na a myi asan sha rai nga yang gaw, na a hkum ting a htoi nga ai.” (Mat 6:22) Shi hpa hpe tsun mayu ai kun? Anhte a prat hpe asan sha tawn ra ai lam (sh) bandung langai, yaw shada lam langai hpe myit n bra ai sha myit maju jung ra ai hpe tsun mayu ai re. Yesu shi nan mung, hkaw tsun magam hta myit maju jung nna kasi madun wa ai. Yehowa a magam hte Karai Mungdan  hpe myit maju jung na matu mung, sape ni hpe sharin ya wa ai. Anhte mung, Hkristan magam hpe myit maju jung let, ‘mungdan hte Karai a ding hpring ai lam hpe shawng tam’ ai hku nna Yesu hpe kasi la ga ai.​—⁠Mat 6:33.

13. Hkristan magam bungli hta myit maju jung lu hkra hpa gaw anhte hpe karum ya na kun?

13 Hkaw tsun magam hpe myit maju jung lu ai lam langai gaw, prat hpe asan sha tawn ai hku nna re. Dai hku nna, kaga ni Yehowa hpe chye wa hkra karum ya na matu aten grau nna jaw lu na re. * Ga shadawn, bat lapran nhtoi ni hta grau nna magam gun lu na matu, kan bau bungli galaw ai aten hpe loi shayawm kau lu na kun? Aten grai law hkra jaw ra ai ban sa lam ni hpe shayawm kau lu na kun?

14. Hkaw tsun magam hta aten grau jaw nna myit maju jung lu na matu yan la langai hpa galaw wa ai kun?

14 Myitsu salang Ilaiya hte shi a madu jan gaw dai lam hpe galaw wa ai. Hpunau ndai hku tsun ai: “Ningshawng magam hpe kalang ta gaw n lu galaw wa ai. Raitim, hkaw tsun magam hta aten grau jaw lu na masa nga ai. Dai majaw, grau nna hkaw tsun lu na matu kaji kajaw lam ni kaw na hpang wa ai. Ga shadawn, jai gumhpraw hpe shayawm kau ai. Aten grai law hkra jaw ra ai ban sa lam hpe mung shayawm kau ai. Bungli madu hpe bungli aten loi shayawm ya na matu tsun ai. Dai majaw, shana maga hkaw tsun magam hta shang lawm lu wa ai. Chyum ga sharin ni grau galaw lu wa ai. Shata mi hta 2 lang, bat lapran laman hkaw tsun magam hta shang lawm lu wa ai. An grai kabu ga ai!”

Hkaw Tsun Ai Hte Sharin Achyin Ai Hta Rawt Jat Lu Na Lam

Bat lapran zuphpawng hta sharin la lu ai lam ni gaw hkaw tsun magam hta rawt jat hkra karum ya (Laika pang 15-16 hpe yu u) *

15-16. 1 Timohti 4:13, 15 hta tsun da ai hte maren hkaw tsun masha langai gaw atsam rawt jat hkra gara hku galaw lu na kun? (“ Karai Magam Hpe Ngut Kre Hkra Karum Ya Lu Na Bandung Ni” ngu ai lawk hpe yu u.)

15 Hkaw tsun magam hpe ngut kre lu na kaga  lam langai gaw, hkaw tsun magam hta atsam rawt jat hkra galaw ai hku nna re. Kan bau bungli nkau hta, machye machyang hte atsam ningja ni rawt jat na matu, ayan na shaman shakyang lam ra ai. Mungdan shiga hkaw tsun ai lam hta mung dai hte maren re. Hkaw tsun magam hta grau nna atsam rawt jat na matu matut nna shaman shakyang ra ai.​—⁠Gsh 1:4, 5; 1 Timohti 4:13, 15 hpe hti u.

16 Rai yang, hkaw tsun magam hta gara hku rawt jat lu na kun? Prat Hte Magam Zuphpawng kaw nna bat shagu lu la nga ai lam matsun ni hpe, htep lahti hkan sa ai hku nna re. Dai zuphpawng gaw, hkaw tsun magam hta anhte a atsam ni rawt jat wa na matu, tatut re ai shaman shakyang lam ni jaw nga ai. Ga shadawn, jawng ma lit ang ai ni hpe tingnyang up gaw hpaji jaw ga ni tsun ai. Dai kaw nna anhte rawt jat ra na lam ni hpe chye lu ai. Lu la ai hpaji jaw ga hpe, kabu gara shiga bai hkaw tsun ai shaloi tatut hkan sa mai ai. Hkaw tsun magam hpaawn hpe shi hte arau hkaw tsun sa na matu (sh) mahkrum madup nga ai hkaw tsun masha, ningshawng, hpung kawan hpunau hte arau sa lu na matu karum hpyi mai ai. Sharin Achyin Hkingrai Ni hta lawm ai hkingrai langai hpra hpe grau akyu jashawn chye wa yang, hkaw tsun magam hte sharin achyin ya ai lam hta grau pyaw wa na re.

17. Hkaw tsun magam hpe ngut kre hkra galaw na nga yang gara akyu ni lu la na kun?

17 Yehowa gaw, shi a “shingdep shingtau” hku nna galaw na matu anhte hpe ahkaw ahkang jaw nna shagrau da ai. (1 Ko 3:9) “Grau ahkyak ai lam” hpe chye nna hkaw tsun magam hta myit maju jung na nga yang, “Yehowa hpe kabu gara ai hte daw jau” lu na re. (Hpl 1:10, NW; Shk 100:2) Karai a magam gun ni hku nna, shi a magam hpe ngut kre hkra gun hpai lu na matu, gara mayak mahkak (sh) gara chyam dinglik lam ni hkrum nga tim, ra nga ai atsam hpe Yehowa jaw na re. (2 Ko 4:1, 7; 6:4, 10) Na a masa lam gaw gara hku mi rai nga tim, hkaw tsun magam hta loi mi sha raitim, grai law hkra raitim, myit masin mahkra hte shang lawm na nga yang, “kabu gara lu na re.” (Gal 6:4, NW) Hkaw tsun magam hpe ngut kre hkra nang galaw na nga yang, Yehowa hte hpunau nauna ni hpe tsawra ai lam madun nga ai re. “Shing rai galaw n yang gaw, na a hkum hpe mung, nang hpe madat mara ai ni hpe mung, nang hkye hkrang la lu na ra ai.”​—⁠1 Tm 4:16.

Mahkawn 58 Ngwi Pyaw Lam Ra Sharawng Ai Ni Hpe Tam Ga

^ စာပိုဒ်၊ 5 Mungdan kabu gara shiga hkaw tsun na matu hte sape shatai na matu anhte hpe lit jaw da ai. Anhte hta manghkang ni nga tim, Karai a magam hpe gara hku ngut kre hkra galaw lu na lam ndai sumhpa hta hkaja mat na re. Grau kaja ai hkaw tsun masha gara hku byin lu na hte hkaw tsun ai shaloi grau nna ngwi pyaw hkra gara hku galaw lu na lam hpe mung hkaja mat na re.

^ စာပိုဒ်၊ 4 Ga Si A Lachyum: Hkristan magam hta, hkaw tsun ai hte sharin achyin ai lam, Karai a magam a matu akyu jashawn ai Htingnu ni hpe gawgap nna gram lajang ai lam hte hkye mawai bungli ni lawm ai.​—⁠2 Ko 5:18, 19; 8:4.

^ စာပိုဒ်၊ 13 2016, July Sin Langchyi (BU) laika man 10 a “Prat Hpe Asan Sha Tawn Lu Na Lam” ngu ai lawk hta lawm ai lam 7 hpe yu u.

^ စာပိုဒ်၊ 62 SUMLA HPE HTAI DAN AI LAM NI: Nauna langai gaw, bat lapran zuphpawng lamang hta bai kawan ai jawng ma lit hpe galaw nga. Dai hpang, tingnyang up gaw hpaji jaw ga tsun ai shaloi, Sharin Achyin laika buk hta ka matsing nga. Kru ya laban hkaw tsun magam hta, zuphpawng kaw nna sharin la lu ai lam hpe tatut akyu jashawn nga.