Content de lai

Malawm Ni Hpe Lai U

“Lam Shagu Hta Chyeju Dum Shakawn Kungdawn Nga Mu”

“Lam Shagu Hta Chyeju Dum Shakawn Kungdawn Nga Mu”

NA HKUM nang chyeju dum chye ai masha hku nna mu mada ai kun? Dai ga san gaw anhte langai hpra myit yu na matu re. Ya aten na masha law law gaw “chyeju n chye dum ai ni” rai na ngu Chyum Laika hta tau hkrau tsun da ai. (2 Tm 3:2) Tinang a matu galaw ya na hte tinang hpe jaw na matu sha myit ai ni hte nang hkrum chye ai. Shanhte hkam la ai lam a matu chyeju n dum ra ai ngu hkamsha ai rai na re. Dai zawn masha ni hte nga ra ai gaw myit n pyaw hpa re.

Dai hte n bung ai sha, Yehowa a mayam ni hpe “chyeju adum nga mu” ngu nna tsun da ai. Dai majaw, anhte gaw, “lam shagu hta chyeju dum shakawn kungdawn nga” ga ai. (Kol 3:15; 1 Ht 5:18, JCLB) Chyeju dum myit hpe shalat la ai gaw anhte a matu kaja ai. Hpa majaw kaja ai ngu ai hpe madun ai lam ni law law nga ai.

Chyeju Dum Chye Ai Gaw Anhte Hpe Ngwi Pyaw Lam Jaw

Lam langai hku nna, chyeju dum myit hpe shalat ai gaw anhte hkum anhte kaja ai ningmu nga na matu karum ya ai. Marai langai gaw chyeju dum ai ngu tsun ai shaloi, kaja ai lam ni hpe shi hkamsha lu ai majaw re. Chyeju dum ga hpe hkam la lu ai wa mung grau nna nga pyaw na re. Chyeju dum myit gaw lahkawng maga hpe hpa majaw akyu shabyin lu ai kun? Ga shadawn, marai langai gaw aten la nna sharawng awng let lama ma galaw ya ai nga yang, nang hpe dai hku galaw ya ging ai ngu shanhte hkamsha ai majaw re. Shanhte gaw nang hpe lanu lahku ai. Lanu lahku hkrum ai ngu nang hkamsha ai shaloi, nang hpe ngwi pyaw shangun na re. Dai hte seng nna Ruhta a mabyin hpe shingran yu mai ai. Bua gaw Ruhta hpe gam jaw gam ya ai lam madun wa ai. Marai langai ngai gaw shi hpe lanu lahku ai ngu chye ai shaloi, Ruhta grai kabu mat na re.​—Rut 2:10-13.

Laksan hku nna, Karai Kasang hpe chyeju dum ging ai. Shi gaw wenyi hte hkum hkrang a matu kumhpa ni madi shadaw ya nna, matut nna mung madi shadaw ya nga ai hpe kalang lang myit hkrup ai aten ni nga na re. (Trj 8:17, 18; Kas 14:17) Raitim, Karai Kasang jaw ai mai kaja ai lam ni hpe ntsa lam myit ai sha n-ga, nang hte nang tsawra ai masha ni hpe Karai Kasang jaw ai shaman chyeju law law hpe atsawm sumru na matu aten la u. Hpan Madu a gam jaw gam ya ai lam hpe myit sumru ai gaw, chyeju dum myit law htam wa shangun nna, nang hpe grai tsawra nna manu shadan ai hpe chye na matu shadut ya na re.​—1 Yh 4:9.

Anhte hpe Yehowa jaw da ai lam ni a matu myit sumru ging nna, shi a mai kaja ai lam ni a matu chyeju dum ging ai. (Shk 100:4, 5) “Chyeju dum ai lam madun ai gaw shinggyim masha ni hpe grau ngwi pyaw shangun ai” ngu tsun ma ai.

Chyeju Dum Myit Gaw Shada Da Hpe Grau Hku Hkau Shangun

Chyeju dum na matu kaja ai kaga lam langai gaw, hku hkau lam hpe ngang kang shangun ai re. Anhte yawng gaw chyeju dum ai lam hpe hkamsha ra ai. Tsawra myit hte galaw ya ai lam a matu, teng sha chyeju dum ai lam madun ai shaloi, langai hte langai grau magyep kap wa ai. (Rom 16:3, 4) Dai sha n-ga, chyeju dum chye ai wa gaw, kaga ni hpe mung grau nna karum ya chye ai. Shanhte hpe kaga ni tsawra myit madun ai shaloi, shanhte mung tsawra myit bai madun na matu shadut hkrum ai. Kaga ni hpe karum ya ai gaw ngwi pyaw lam lu shangun ai. “Hkam sha ai hta jaw ya ai mahtang grau a nga ai” ngu Yesu tsun wa ai.​—Kas 20:35.

Chyeju dum ai lam hte seng nna hkaja nga ai Kelihponiya Dakkasu kaw nna ningtau hpa-awn Rawbat Eman ndai hku tsun ai: “Chyeju dum chye na matu, shada da ra kadawn nga ai hpe anhte chye ra ai. Kalang lang gam jaw nna kalang lang  hkap la ra ai.” Matut asak hkrung na matu, ngwi pyaw na matu, anhte yawng gaw shada da shamyet shanat nga ga ai. Ga shadawn, malu masha a matu (sh) tsi tsi na matu kaga ni gaw anhte hpe karum ya nga ai. (1 Ko 12:21) Chyeju dum chye ai wa gaw, kaga ni shi hpe galaw ya ai lam a matu chyeju dum ai. Rai yang, nang hpe galaw ya ai lam ni a matu chyeju dum ai lam madun ai kun?

Chyeju Dum Chye Ai Wa Byin U

Chyeju dum myit gaw n kaja ai lam ni hpe myit maju jung na malai, kaja ai lam ni hpe myit maju jung na matu karum ya ai majaw mung dai hpe shalat la ging ai. Na a myit gaw, hka jen hte bung ai. Dai gaw na a makau grup-yin hta nga ai n kaja ai lam ni hpe jen kau nna, kaja ai lam ni hpe myit maju jung na matu karum ya ai. Nang gaw kaja ai ningmu hte sha yu na nga yang, manghkang ni hpe myit maju jung ai lam yawm mat na re. Grau chyeju dum chye magang, kaja ai ningmu grau nga magang re. Dai gaw nang hpe grau nna chyeju dum chye na matu karum ya ai. Prat hta chyeju dum chye ai ningmu nga yang, “dai Madu hta tut nawng e kabu gara nga mu” ngu nna kasa Pawlu n-gun jaw da ai lam hpe galaw lu na re.​—Hpl 4:4.

Chyeju dum myit gaw n kaja ai ningmu hku n myit na matu nang hpe karum ya ai. Manawn ai myit (sh) yawn hkyen nga ai, pawt sin dawng nga ai aten hta, chyeju dum na matu grai yak ai. Chyeju dum chye ai wa gaw arung arai ra marin ai myit mung yawm na re. Tinang hta nga ai lam ni a matu chyeju dum nna, grau lu la na matu mung myit maju n jung ai.​—Hpl 4:12.

Na A Shaman Chyeju Ni Hpe Hti Yu U

Ndai hpang jahtum nhtoi ni hta hkrum nga ai manghkang ni a majaw, Satan gaw nang hpe yawn hkyen nna, myit daw myit hten shangun mayu ai lam Hkristan langai hku nna nang chye na re. Nang hta n kaja ai myit jasat nga nna, lam yawng mayawng hpe aput angun tsun ai nga yang, Satan grai kabu ai. Dai zawn myit jasat nga yang, kabu gara shiga hkaw tsun ai shaloi, akyu nga na n re. Chyeju dum myit gaw Karai Kasang a chyoi pra ai wenyi a majaw byin wa ai atsam ningja ni hte matut mahkai nga ai. Ga shadawn, anhte hpe Karai Kasang jaw da ai kaja ai lam ni hpe anhte mu ai, htawm hpang hte seng ai ga sadi ni hpe anhte kam ai majaw kabu gara lu ai.​—Gal 5:22, 23.

Yehowa a masha langai hku nna nang gaw, ndai sumhpa hta tsun wa sai chyeju dum ai lam ni hpe myit hkrum na re. Chyeju dum chye nna, kaja ai ningmu nga na matu, ayan na gaw n loi ai hpe nang chye na re. Dai lam a majaw, asum hkum jaw. Nang rawt jat lu nna, chyeju dum chye ai wa byin lu ai. Gara hku nna kun? Na a prat hta, chyeju dum mai ai lam nkau hte seng nna, sumru na matu shani shagu aten la u. Dai hku galaw yang, chyeju dum na matu shi hkrai shi byin wa na re. Prat a mayak mahkak ni hpe sha myit maju jung ai ni hta grau nna, nang gaw ngwi pyaw lam hkamsha lu na re. Nang hpe ngwi pyaw shangun nna, n-gun lu shangun ai Karai Kasang hte kaga ni a kaja ai lam ni hpe myit yu u. Dai lam ni hpe ka matsing da mai ai. Shani shagu nang hpe chyeju dum ai lam byin shangun ai lam langai lahkawng hpe ka mai ai.

“Ayan na chyeju dum chye ai akyang nga yang, bawnu lasa bungli galaw ai lam galai shai wa nna kaja ai ningmu grau nga wa na re” nga nna dai lam hpe sawk sagawn ai masha nkau mi tsun ma ai. Chyeju dum chye ai wa gaw, ngwi pyaw ai masha re. Dai majaw, na a shaman chyeju ni hpe hti nna, na a prat hta kaja ai mahkrum madup ni hpe sumru nna, ayan chyeju dum u. Lu la da ai kaja ai lam ni a matu chyeju dum u. ‘Yehowa gaw mai kaja nga ai majaw, chyeju dum u.’ ‘Lam shagu hta chyeju dum shakawn kungdawn nga u.’​—1 Hl 16:34; 1 Ht 5:18, JCLB.