Content de lai

Malawm Ni Hpe Lai U

 DAW 1

Yehowa Sakse Ni Gaw Kaning Re Masha Ni Ta?

Yehowa Sakse Ni Gaw Kaning Re Masha Ni Ta?

Denmark

Taiwan

Venezuela

India

Yehowa Sakse marai kade hpe nang chye a ta? Anhte kaw na nkau mi gaw, na a nta htingbu, bungli manang, jawng lung manang, shing nrai, nang hte Chyum Laika arau hti nga ai ni rai na re. Anhte gaw kadai ni rai ta? Anhte kamsham ai lam, kaga masha ni hpe hpa majaw tsun dan nga ai kun?

Anhte gaw yu maya masha ni re. Anhte gaw amyu baw sang hte htunghking amyu myu kaw na rai ga ai. Anhte kaw na nkau mi gaw, moi e kaga nawku htung kaw na re. Nkau gaw Karai n nga ai ngu kamsham wa ma ai. Raitim, anhte yawng gaw Yehowa Sakse nbyin shi yang, Chyum Laika hpe aten la nna atsawm sha hkaja ai. (Kasa 17:11) Chye na wa ai lam ni hpe hkap la nna, Yehowa hpe nawku na matu, tinang nan sharawng ai hte lata la ma ai.

Chyum Laika hkaja ai kaw na anhte akyu lu la ga ai. Anhte mung kaga masha ni zawn, manghkang ni, tinang a gawng kya lam ni hpe hparan ra ai. Raitim, Chyum Laika tara ni hpe, shani shagu shakut nna hkan sa ai shaloi, anhte a prat masa grau kaja wa ai. (Shakawn 128:1, 2) Dai majaw Chyum Laika kaw na hkaja la ai lam ni hpe, kaga masha ni hpe mung tsun dan ai re.

Karai Kasang masat da ai tara hte maren anhte asak hkrung ai. Chyum Laika hta lawm ai tara ni gaw, anhte ni hpe grau nna ngwi pyaw shangun ai. Kaga masha ni hpe hkungga na, myit dingman na hte, matsan dum chye na matu sharin ya ai. Hkam kaja lam nga na matu, masha ni hpe akyu jaw ai ni byin na matu hte, kun dinghku hta kahkyin gumdin ai lam nga na matu karum ya ai. Anhte yawng gaw, “Karai Kasang masha myi man n tau ai” hpe kamsham ai majaw, myu tsaw, mung tsaw myit madin ni hpe tawt lai nna, mungkan grup makam masham hpunau ni hku mu mada ai. Anhte gaw yu maya masha ni raitim, laklai ai masha amyu langai hku nna, hpawng de da ga ai.​—⁠Kasa 4:13; 10:34, 35.

  • Yehowa Sakse Ni hta kaga masha ni hte bung ai hpa lam ni nga a ta?

  • Yehowa Sakse Ni gara tara ni hpe Chyum Laika kaw na hkaja la ma a ta?