Content de lai

Malawm Ni Hpe Lai U

 DAW 11

Zuphpawng Kaba Ni Hpe Anhte Hpa Majaw Lung Ai Kun?

Zuphpawng Kaba Ni Hpe Anhte Hpa Majaw Lung Ai Kun?

Mexico

Germany

Botswana

Nicaragua

Italy

Ndai masha ni hpa na dai daram pyaw nga a ta? Anhte a zuphpawng kaba langai hta du taw ai majaw re. Moi prat na Karai Kasang a mayam ni hpe, laning mi hta masum lang hkrum zup na matu lam matsun da ai. Dai zawn sha anhte ni mung zuphpawng kaba ni hta arau hkrum zup na matu myit mada ai. (Tara Jahprang 16:16) Shaning shagu anhte hta zuphpawng kaba masum nga ai. Lani mi na ai Ninghtawn Zuphpawng lahkawng lang hte masum ya na ai Ginwang Zuphpawng ni re. Dai kaw na hpa akyu ni lu la na kun?

Hkristan hpunau ni a kahkyin gumdin lam hpe grau ngang kang shangun ai. Israela amyu ni gaw “shawa hpawng ni hta” Yehowa hpe shakawn lu ai majaw ngwi pyaw ma ai. Dai zawn anhte mung zuphpawng kaba ni hta, Yehowa hpe arau nawku lu ai majaw grai pyaw ai. (Shakawn 26:12; 111:1) Dai aten hta kaga buga, kaga mungdan ni hta na Yehowa Sakse Ni hte mung hkrum zup lu ai. Shani kaang hta lusha arau sha nna, shada da grau hku hkau wa hkra galaw mai ai. (Kasa 2:42) Dai hta mungkan grup “kahpu kanau ni” hpe kahkyin gumdin ya ai tsawra myit hpe nang hkam sha lu na.​—⁠1 Petru 2:17.

Wenyi lam hta grau galu kaba wa hkra karum ya ai. Israela amyu ni gaw Chyum Laika a lachyum sang lang dan ai hpe “chye na” wa ai majaw, akyu hkam sha lu ai. (Nehemia 8:8, 12) Anhte mung zuphpawng kaba ni hta, na la lu ai Chyum Laika lam matsun ni hpe manu shadan ai. Lamang yawng gaw madung Chyum daw kaw na sha lakap da ai. Anhte a prat hta Karai Kasang myit ra ai lam gara hku galaw na hpe, shawa mungga, daw matut mungga, bai hkrang shala dan ai lam ni hte sharin achyin ya ai. Ndai yakhkak ai aten hta, Chyum Laika tara ni hpe tatut jailang ai hta, awng dang ai ni a mahkrum madup ni kaw na mung, n-gun lu la ga ai. Ginwang zuphpawng ni hta, moi na hpun palawng ni bu hpun nna, hkrang shala ai kamung naura gaw, Chyum Laika na mabyin masa hpe shaleng dan nna, tatut hkan sa mai ai kasi ni hpe sharin ya ai. Tinang hkum hpe, Karai Kasang kaw ap nawng ai lam madun mayu ai ni a matu, zuphpawng kaba shagu hta hkalup hkam ai lamang mung nga ai.

  • Zuphpawng kaba aten hta hpa majaw ngwi pyaw ai kun?

  • Zuphpawng kaba ni lung ai kaw na nang hpa akyu ni lu la na kun?