Content de lai

Malawm Ni Hpe Lai U

 DAW 10

Dinghku Nawku Ngu Ai Gaw Hpa Rai Ta?

Dinghku Nawku Ngu Ai Gaw Hpa Rai Ta?

Dingda Korea

Brazil

Australia

Guinea

Moi aten kaw na, Yehowa gaw kun dinghku ni hpe shada da ga shaga na matu aten nga shangun mayu ai. Dai hku galaw ai gaw shanhte a wenyi lam grau ngang kang wa nna, nta masha shada da mung grau hku hkau ni htep wa na re. (Tara Jahprang 6:6, 7) Dai majaw Yehowa Sakse Ni gaw, bat mi hta aten langai mi hpe dinghku nawng, nawku na matu masat da ma ai. Dai aten hta, shanhte a matu ra ai Chyum Laika lam matsun ni hpe, a ngwi a pyaw hte hkaja ma ai. Nang langai hkrai nga ai rai yang pyi, dai zawn re aten hta, Chyum Laika lam langai ngai hpe hkaja nna, Karai Kasang hte grau ni htep hkra galaw mai ai.

Karai Kasang hte grau hku hkau ni htep lu na aten re. “Karai Kasang hpang de sit sa wa mu; shaloi shi nanhte hpang de sit wa na ra ai.” (Yaku 4:8) Chyum Laika hta lawm ai Yehowa a atsam ningja hte, shi galaw ai lam ni hpe atsawm hkaja ai shaloi, shi a lam grau chye wa na re. Dinghku nawku hpe galaw hpang na matu loi ai lam langai gaw, Chyum Laika arau hti ai re. Hkristan Prat Hte Magam Zuphpawng a matu, jaw da ai Chyum hti lamang hte maren mung hti mai ai. Nta masha ni hpe, shanhte hti ra na Chyum daw ni hpe garan da ya nna, hti mat ai Chyum daw kaw na sharin la lu ai lam hpe, arau bawngban mai ai.

Nta masha ni shada da grau hku hkau lu na aten re. Dinghku nawng, Chyum Laika arau hkaja ai shaloi, madu jan hte madu wa, kanu kawa hte kasha ni a lapran hta nga ai hku hkau lam grau ngang kang wa ai. Dai aten gaw ngwi pyaw ai, simsa ai, nta masha ni grai sharawng ai aten ladaw rai ra ai. Kanu Kawa ni hku nna, hkaja na lam hpe kasha ni a asak hta hkan nna, lata mai ai. Sin Langchyi hte Dum Hprang! shing nrai jw.org website hta lawm ai lam ni hpe mung hkaja mai ai. Jawng hta ma ni hkrum chye ai manghkang ni hpe, gara hku hparan mai na lam ni hpe mung bawngban mai ai. JW broadcasting (tv.jw.org) hpe yu nna arau bawngban ai lam galaw mai ai. Zuphpawng hta shakawn na mahkawn ni hpe shaman mai ai, nawku lamang ngut ai shaloi lama ma sha mai ai.

Yehowa hpe nawku ai ndai aten ladaw gaw, nta masha yawng hpe, Chyum Laika hkaja ai hta ngwi pyaw wa hkra karum ya ai. Na a shakut shaja ai hpe Karai Kasang shaman chyeju jaw na ra ai.​—⁠Shakawn 1:1-3.

  • Dinghku nawku galaw na matu anhte hpa majaw aten masat da a ta?

  • Nta masha shagu a matu ndai aten ladaw gaw, ngwi pyaw ai aten byin hkra kanu kawa ni hpa galaw mai a ta?