Content de lai

Malawm Ni Hpe Lai U

 Daw 2

Myit Tsang Lam​—⁠“Lam Shagu Hta Tsin-Yam Tsindam Hkrum”

Myit Tsang Lam​—⁠“Lam Shagu Hta Tsin-Yam Tsindam Hkrum”

“Dinghku de nna 25 ning daram hta, nye madu wa hte hka mat ai. Nye a kasha ni mung teng man ai lam hta n nga sai. Hkamja lam mung grai sawng wa ai. Dai majaw ngai grai myit daw wa ai. Nye prat gaw hten mat sai. Myit mada lam mung n nga sai. Zuphpawng ni hpe mung n sa lung sai. Wenyi lam hta mung katsi mat wa ai.”​—⁠June.

Masha shagu hta myit tsang lam nga ai. Karai Kasang a masha ni hta mung nga ai. Shakawn kungdawn sara pyi “ngai myit ru myit tsang hkrum hkra nga ai” ngu ka wa ai. (Shakawn 94:​19, JCLB) Jahtum nhtoi hta “dinghta ga myit ru myit tsang” lam ni a majaw, Yehowa Karai Kasang hpe nawku daw jau na matu yak na ngu Yesu tsun da ai. (Luka 21:34) Nang hta ja gumhpraw, hkamja lam, ding­hku manghkang ni hte seng nna myit tsang lam ni nga ai kun? Dai ni hpe, nang hparan lu hkra Yehowa gara hku karum ya na kun?

“Chyahtum Chyalai Re Ai N-Gun Atsam”

Myit tsang lam ni hpe tinang hkrai n lu hparan ai. “Anhte lam shagu hta tsin-yam tsindam hkrum ga ai”, “myit ru myit tsang hkrum ga ai”, “gumpye kau ai hkrum ga ai” ngu kasa Pawlu tsun ai. Rai ti mung, “ginwan nlu ga ai nrai”, “myit htum ga ai nrai”, “daw hten ai hkrum ga ai nrai” ngu nna mung shi tsun wa ai. Rai yang, hkam jan lu hkra hpa gaw karum ya na kun? Hpung dagu kaba htum Yehowa Karai Kasang kaw na sa ai, “chyahtum chyalai re ai n-gun atsam” gaw karum ya na re.​—⁠2 Korinhtu 4:​7-9.

Moi shawng de “chyahtum chyalai re ai n-gun a­tsam” gara hku lu la wa ai hpe bai myit yu u. Yehowa a tsawra myit hpe, chyeju dum ai myit grau nna law jat wa hkra karum ya ai mungga langai hpe naw dum ai kun? Hparadisu myit mada lam kaga masha ni hpe tsun dan ai shaloi, Yehowa a ga sadi ni hpe nang grau nna kamsham wa ai n rai ni? Zuphpawng ni lung ai shaloi, shada da n-gun jaw hkat ai shaloi, myit tsang lam ni hpe hkam jan lu wa ai. Myit simsa lam mung lu nna, Yehowa hpe ngwi pyaw let nawku lu wa ai.

“Yehowa Mai Kaja Nga Ai Gaw Chyim Yu Nna Chye Mu”

Dip n-gun ni gaw, kalang ta shara shagu kaw na du wa ai ngu nang hkamsha ga na re. Ga shadawn, Yehowa gaw shi a Mungdan hpe shawng tam na matu, wenyi lam hta shamu shamawt nga na matu hpyi shawn da ai. (Mahte 6:33; Luka 13:24) Raitim, ninghkap ai lam ni, hkamja lam hte dinghku manghkang ni a majaw, nang galaw mayu ai daram n lu galaw ai zawn byin wa chye ai. Na a kanbau bungli a majaw hpung hte seng ai lam ni hta, aten hte n-gun atsam ni n lu jaw ai hku mung byin chye ai. Mayak mahkak gaw law nna hparan na matu aten hte n-gun atsam gaw n nga ai majaw myit daw wa chye ai. Dai shaloi, Yehowa hpyi shawn da ai lam ni, nau law ai ngu nna pyi myit wa chye ai.

Yehowa gaw chyena ya ai. Anhte lu jaw ai hta grau nna galoi mung n hpyi ai. Anhte a hkum hkrang hte myit masin hta, hkamsha ai lam ni mat na matu, aten ra ai hpe shi chye ai.​—⁠Shakawn 103:​13, 14.

Ga shadawn, myihtoi Elia hpe Yehowa gara hku lanu lahku ya ai hpe myit yu u. Elia grai myit daw nna hkrit wa ai majaw, nam mali de hprawng mat ai. Dai shaloi Yehowa gaw daru sharin nna shi a lit hpe bai gun shangun ai kun? N re. Yehowa gaw Elia hpe jasu nna, shat jaw sha na matu lamu kasa hpe lahkawng lang dat dat ai. Raitim, nhtoi 40 ya du hkra Elia naw hkrit taw ai. Dai majaw shi hpe karum ya na matu, Yehowa hpa bai galaw wa ai kun? Langai, Yehowa gaw shi hpe makawp maga ya lu ai lam sakse madun wa ai. Lahkawng, “angwi sha nga ai nsen” hte shi hpe myit shalan ya ai. Masum, Karai Kasang hpe sadi dung ai masha hkying lam naw nga ai ngu tsun dan ai. Kade nna yang, Elia gaw myihtoi bungli hpe myit rawt let bai lu galaw wa ai. (1 Hkawhkam 19:​1-19) Ndai kaw na hpa sharin la lu a ta? Elia myit tsang lam hkrum nga ai shaloi, Yehowa gaw matsan dum ai hte myit galu ai lam madun wa ai. Yehowa gaw galoi mung n galai shai ai. Anhte hpe mung dai zawn sha lanu lahku ya ai.

Yehowa hpe sak jaw na ngu nang myit ai shaloi, tatut hkrak rai ra ai. Moi galaw wa ai hte, ya lu ga­law ai hpe hkum shadawn. Ga shadawn: Shata law law n shaman mat ai gat shing jawng masha la­ngai gaw, moi na zawn kalang ta bai lu kagat na n re. N-gun atsam bai nga wa hkra, bandung tawn nna angwi ngwi shaman la ra na re. Hkristan ni gaw gat shing jawng ai masha ni hte bung ai. Shanhte mung bandung jahkrat nna shaman ma ai. (1 Korinhtu 9:​24-27) Nang mung ya kaw nna, dang di lu ai bandung langai jahkrat nna shakut yu yang n kaja na kun? Ga shadawn, zuphpawng lung na matu bandung tawn mai ai. Dai hpe lu galaw hkra karum ya na matu Yehowa kaw akyu hpyi u. Wenyi n-gun atsam ni bai lu ai shaloi, “Yehowa mai kaja nga ai gaw, chyim yu nna chye” lu na re. (Shakawn 34:⁠8) Yehowa hpe nang tsawra ai lam madun ai gaw kaji kajaw sha raitim pyi, dai hpe shi manu shadan ai hpe dum u.​—⁠Luka 21:​1-4.

Yehowa gaw anhte lu jaw ai hta grau nna galoi mung n hpyi ai

“Ngai Ra Nga Ai N-gun Atsam”

Yehowa gaw June hpe shi hpang de bai wa na matu, gara hku n-gun atsam jaw ai kun? Shi ndai hku tsun ai: “Ngai hpe karum ya rit ngu Yehowa hpe galoi mung akyu hpyi ai. Anhte mare hta ninghtawn zuphpawng langai nga ai ngu, nye ka­nam tsun ai. Lani mi sha gaw naw sa lung na ngu dawdan kau ai. Yehowa a masha ni hte bai hkrum lu ai gaw grai pyaw hpa re. Ndai zuphpawng gaw ngai ra nga ai n-gun atsam hpe jaw ai. Ya gaw, Yehowa hpe ngwi pyaw let bai nawku nga sai. Nye a prat mung grau la­chyum nga wa ai. Hpunau nauna ni hte shanhte a karum shingtau lam galoi mung ra ai hpe ngai chye na wa sai. Yehowa hpang de aten dep bai wa lu ai majaw ngai grai chyeju dum ai.”