Content de lai

Malawm Ni Hpe Lai U

 Ga San 7

Hpye Ai Amu Galaw Na Matu Shadut Hkrum Yang Hpa Galaw Na Kun?

Hpye Ai Amu Galaw Na Matu Shadut Hkrum Yang Hpa Galaw Na Kun?

HPA MAJAW AHKYAK

Hpye ai amu galaw ai hte seng nna na a dawdan lam gaw na a shawng lam hpe akyu shabyin lu ai zawn hkra machyi shangun ai.

NANG NGA YANG HPA GALAW NA?

Ndai mabyin hpe shingran yu u: Heather hte Mike sumtsaw byin ai shata lahkawng sha naw rai shi ai. Raitim, Mike a lam yawng chye da ai ngu Heather hkamsha ai. Langai hte langai shada da laika ni sa ai, phone grai na hkra shaga ai. Tsun n ma hkra ga shaga ma ai. Raitim, ya Mike gaw ga shaga ai hte sha myit n dik sai.

Lai wa sai shata lahkawng laman hta lata jum ai, manam ai daram sha naw rai shi ai. Heather gaw dai hta na n kam lai sai. Mike hpe mung asum n hkam mayu ai. Mike daram ngai hpe lanu lahku ai masha n nga ai. ‘Bai nna Mike hte ngai gaw sumtsaw ni re le’ ngu myit taw nga ai.

Nang gaw sumtsaw tawn lu ai asak rai nna Heather zawn masa hte hkrum yang hpa galaw na kun?

BAI MYIT YU U

Num hte la arau yup lu ai gaw hkungran da ai ni hpe sha Karai Kasang jaw da ai kumhpa re. N hkungran shi yang dai hku arau nga na nga yang, Karai jaw kumhpa hpe n gawn n sawn di ai re. Kumhpa lu da ai palawng tsawm tsawm hpe nhpu katsut ai tsupni zawn galaw kau ai hte bung

Nang gaw shingra tara hte nhtan shai nna utsa zawn pyen na matu hpun ntsa de lung nna gumhtawn dat ai nga yang, nang sha jamjau hkrum na re. Dai zawn sha, akyang lailen hte seng ai “hpye ai amu hpe koi” u ngu ai tara hpe n hkan sa yang jamjau hkrum na re.​—⁠1 Htesaloni 4:⁠3.

Ndai tara hpe n hkan sa yang hpa akyu ni hkamsha ra na kun? “Hpye ai amu galaw ai wa mahtang gaw, shi a hkum hkrang hpe nan shut hpyit da wu ai” ngu Chyum Laika hta tsun da ai. (1 Korinhtu 6:18) Dai gara hku byin mai na kun?

 N hkungran shi yang rau nga ai ramma ni hta law malawng gaw lawu hta madun da ai n kaja ai akyu langai ngai hkamsha ai ngu nna sawk sagawn ai lam ni gaw madun dan ai.

  • MYIT RU AI LAM. Ramma law malawng gaw n hkungran shi yang rau nga ngut ai hpang myit malai lu ai ngu tsun ma ai.

  • N TSEN AI LAM. Sumtsaw hte rau nga ngut ai hpang ‘shi kaga kadai hte mung ndai hku byin wa ai kun’ ngu nna n tsen ai myit ni shang wa ai.

  • MYIT HTUM AI LAM. Gaja nga yang, numsha ni gaw ti­nang a ntsa ahkaw ahkang la mayu ai ni hpe n re ai sha makawp maga ya ai ni hpe sha ra sharawng ai. Lasha ni chyawm gaw ahkaw ahkang loi loi jaw chye ai numsha ni hpe n ra mat ai.

  • Madung lam: N hkungran shi yang rau nga ai gaw, manu dan ai lama ma hpe kaga masha ni hpe jaw dat ai re majaw tinang hkum tinang manu n dan hkra galaw dat ai re. (Roma 1:24) Na a hkum hkrang gaw grai manu dan ai majaw loi loi hte hkum jaw kau u. 

“Hpye ai amu hpe koi” nna nang gaw akyang lailen kaja ai wa re ai lam madun u. (1 Htesaloni 4:⁠3) Nang dinghku de ai shaloi na a ningrum ningtau hte rau dinghku shaman chyeju hpe hkamsha lu na re. N hkungran shi yang rau nga hkrup ai majaw byin wa ai myit ru myit tsang lam, myit malai lu ai lam, myit n shim ai lam ni hkamsha ra na n re.​—⁠Ga Shagawp 7:​22, 23; 1 Korinhtu 7:⁠3.

 NANG GARA HKU SHADU AI KUN?

  • Jet ai tsaw myit hte tsawra ai wa gaw na a myit masin, hkum hkrang hpe hkra machyi hkra galaw na kun?

  • Nang hpe manu shadan ai wa gaw Karai Kasang hte na a hku hkau lam hpe htenza hkra galaw na kun?​—⁠Hebre 13:⁠4.