Content de lai

Malawm Ni Hpe Lai U

Uphkang Hpung Kaw Na Laika

Uphkang Hpung Kaw Na Laika

Yehowa Hpe Tsawra Ai Ni E:

“Teng man ai lam mung nanhte chye lu na ma rin dai rai nna, dai teng man ai gaw, nanhte hpe shalawt dat na ra ai” nga nna Yesu tsun ai. (Yawhan 8:32) Dai ga gaw grai n-gun lu hpa ga ni re. N teng n man ai ga ni chyam bra nga ai ndai “hpang jahtum na nhtoi” hta pyi, teng man ai mungga hpe chye lu ai. (2 Timohti 3:1) Chyum Laika a teng man ai lam hpe shawng nnan chye wa ai aten hpe nang dum ai kun? Dai aten hta nang grai pyaw na gaw teng sha re.

Teng man ai lam hpe tup hkrak chye da nna, masha ni hpe galoi mung tsun na matu ahkyak ai zawn, tinang mung dai hte maren hkan sa ra ai. Dai hku galaw lu na matu Karai Kasang a n-gaw nwai ai myit hta galoi mung nga ra ai. Karai Kasang a n-gaw nwai ai myit hkam la lu na matu hpa galaw ra na kun? Yesu n si shi ai shana hta tsun wa ai ga kaw nna chye lu ai. Shi a sadi dung ai kasa ni hpe ndai hku tsun ai: “Ngai gaw nye Wa a ga matsun hkan shatup nna, shi a tsaw ra ai hta maju jung nga nngai zawn, nanhte mung nye a ga matsun hkan shatup myit yang gaw, nye a tsaw ra ai hta maju jung na myit dai.”​—⁠Yawhan 15:10.

Yesu gaw shi Kawa a tara ni hpe hkan sa ai majaw, Karai Kasang a n-gaw nwai ai tsawra myit hpe galoi mung hkam la lu wa ai hpe dum u. Anhte mung dai hku galaw ra ai. Karai Kasang a n-gaw nwai ai myit hkam la lu na matu, teng man ai lam hpe shani shagu hkan sa ra ai. Dai shana maga hta sha, Yesu ndai hku tsun ai: “Ndai lam ni hpe nanhte chye nna, dai hpe hkan shatup myit yang gaw, nanhte a lu myit dai.”​—⁠Yawhan 13:17.

Prat hta teng man ai lam hpe matut hkan sa lu hkra, “n htum n wai asak lu la hkra, . . . Karai Kasang a n-gaw nwai ai myit” hta nga lu hkra, ndai laika buk gaw nang hpe karum ya na hpe anhte teng sha myit mada ga ai.​—⁠Yuda 21.

Yehowa Sakse Ni A Uphkang Hpung