Content de lai

Malawm Ni Hpe Lai U

 DAW 2

Kaja Ai Myit Nsam Hpe Gara Hku Makawp Maga Lu Na Kun?

Kaja Ai Myit Nsam Hpe Gara Hku Makawp Maga Lu Na Kun?

Myit nsam kaja rawng nga mu.​—1 PETRU 3:16.

1, 2. Marai langai nsin grai sin ai shaloi lam hkawm yang dat wan lawm na matu hpa majaw ahkyak ai kun? Dai hpe myit nsam hte gara hku shingdaw mai ai kun?

SHANA nsin grai sin ai shaloi, marai langai lam hkawm nga ai ngu myit yu ga. N galau na matu, shoihpa n nga na matu shi hta hpa baw ra na kun? Lam hpe atsawm mu lu na matu shi hta dat wan lawm ra ai.

2 Lama na, nang dat wan n lawm ai nga yang, lam hpe n mu lu ai majaw galau ai (sh) kaga shoihpa ni nga wa chye ai. Dat wan lawm wa yang lam hpe atsawm mu lu nna, nang mung shim lum na re. Dai dat wan hpe Yehowa anhte hpe jaw da ai myit nsam hte shingdaw mai ai. (Yaku 1:17) Myit nsam n nga yang anhte lam mat mat na. Dai myit nsam hpe jaw ai hku akyu jashawn na nga yang, anhte a prat hta teng man ai lam hpe tam mu nna, dai lam kaw nna lam dam mat na n re. Dai majaw, myit nsam ngu ai gaw hpa re ai hpe hkaja yu ga. (1) Myit nsam hpe gara hku shaman na, (2) masha ni a myit nsam hpe hpa majaw myit tau ya ra na hte (3) kaja ai myit nsam hpe makawp maga yang gara hku akyu lu na lam ni hpe hkaja mat na re.

MYIT NSAM NGU AI GAW HPA RAI A TA?

3. “Myit nsam” ngu ga gale da ai Greek ga si a lachyum gaw hpa rai kun? Dai gaw masha hta nga ai gara laklai ai atsam hpe tsun mayu ai kun?

3 Chyum Liaka hta “myit nsam” ngu ga gale da ai Greek ga a lachyum gaw, tinang hkum tinang chye ai myit hpe tsun mayu ai. Shinggyim masha ni hpe dusat ni hte n bung ai sha tinang  hkum tinang chye maram yu lu ai atsam Karai Kasang jaw da ai. Dai majaw, tinang hkum tinang bai maram yu nna, akyang lailen kaja n kaja chye ginhka lu ai. Myit nsam gaw, hkum kata kaw nna sakse hkam ai wa (sh) tara agyi hku nna anhte a galaw hkawm sa ai lam ni, myit jasat ni hte lata ai lam ni hpe maram yu lu ai. Dai myit nsam gaw kaja ai dawdan lam jahkrat lu na matu lam matsun ya lu nna, n kaja ai dawdan lam n jahkrat lu hkra sadi jaw lu ai. Dai myit gaw, jaw ai hku dawdan yang myit pyaw shangun nna, shut ai hku dawdan hkrup yang myit yawn shangun ai.

4, 5. (a) Adam yan Ewa hta myit nsam nga ai hpe gara hku chye lu ai kun? Karai Kasang a tara ni hpe shan n gawn n sawn galaw ai majaw hpa byin wa ai kun? (b) Hkristan prat n hpang shi ai aten hta sadi dung ai la ni a myit nsam bai htang ai lam ni hpe gara ga shadawn ni gaw madun dan ai kun?

4 Myit nsam gaw, Adam yan Ewa hta lawm chyalu re. Dai myit nga ai hpe shan yan madun wa ai. Shan mara galaw hkrup ai hpang hkrit kaya ma ai. Dai hpe yu yang, shanhte hta dai myit nsam nga ai hpe anhte chye lu ai. (Ningpawt 3:7, 8) Ndai masa hta shan a myit nsam gaw, shan hpe dingbai dingna jaw tim akyu n nga sai. Shan gaw Karai Kasang a tara hpe dingsang n gawn n sawn galaw ai re. Chye nga ninglen Karai Kasang hpe ninghkap ai wa byin hkra lata wa ai. Hkum tsup ai masha re ai majaw, shanhte gaw shanhte hpa galaw nga ai hpe atsawm chye ai. Dai majaw Karai Kasang hpang de bai n htang wa na matu n mai byin sai.

5 N hkum tsup ai masha law law gaw, Adam yan Ewa hte n bung ai sha shanhte a myit nsam a sadi jaw ai hpe madat ma ai. Ga shadawn, sadi dung ai Yoba gaw, “nye ding hpring ai hta ngai dakan nga nna, n yen nngai; Ngai hkrung nga dingsa nye myit ngai hpe mara shagun lu ai, n rai.” * (Yoba 27:6) Yoba gaw  myit nsam shadut ai hku dawdan nna hkan galaw wa ai. Dai majaw, shi a myit nsam gaw shi hpe mara n shagun ai, dingbai dingna n jaw ai nga nna apyaw sha lu tsun wa ai. Yoba hte Dawi a myit nsam bai htang ai lam n bung ai hpe yu yu ga. Yehowa namman chya da ai hkawhkam Shawlu hpe Dawi n gawn n sawn galaw hkrup ai. “Dai hpang Dawi a myit masin gaw shi hpe sharu hpang nga ai.” (1 Samuela 24:5, JCLB) Dai zawn, shi a myit nsam shi hpe sharu ai majaw Dawi akyu hkamsha wa ai. Dai zawn n gawn n sawn hpang de n galaw na matu shi hpe sharin ya wa ai.

6. Masha yawng hta myit nsam nga ai lam anhte gara hku chye lu ai kun?

6 Myit nsam gaw Yehowa a mayam ni hta sha nga ai kun? Pawlu ndai hku ka wa ai: “Jep ai tara hpe n lu ai maigan amyu ni, dai tara a daju hpe chye chyalu hte galaw nga ma ai shaloi e, jep ai tara n lu timung, tinang dai tinang a matu tara tai wa ma sa lu ai: shanhte a myit nsam dai tara a lam hpe sakse hkam ya nna, shanhte a myit mang ai hku shada da mara shagun ai hte mara raw hkat ma ai majaw, dai jep ai tara a ningli shanhte a kraw lawang hta ka da nga sai hpe, madun dan ma ai.” (Roma 2:14, 15) Yehowa a tara ni hpe tsep kawp n chye ai ni pyi kalang lang Karai Kasang a tara ni hte maren galaw hkawm sa na matu shanhte a myit nsam gaw shadut ya chye ai.

7. Kalang lang myit nsam gaw hpa majaw shut ai hku dawdan chye ai kun?

7 Raitim, kalang lang myit nsam gaw shut ai hku galaw chye ai. Hpa majaw kun? Dat wan a lam hpe bai myit yu ga. Battery n kaja yang, anhte a lam hpe n htoi ya lu ai. Dai zawn sha, Chyum Laika hpe anhte n hkaja yang, anhte a myit nsam mung jaw ai shut ai hpe n chye ginhka lu ai. Anhte ra marin ai lam hpe sha lai lai jan jan myit nga yang mung, anhte a myit nsam gaw shut ai hku dawdan chye ai. Chyum Laika lam matsun n lawm yang, ahkyak ai lam ni hta jaw ai, shut ai hpe anhte chye ginhka lu na n re. Anhte a myit nsam jaw ai hku galaw na matu, Yehowa a chyoi pra ai wenyi lam matsun ya na matu ra ai. Pawlu ndai hku ka wa ai: “Chyoi pra ai Wenyi hta e nye a  myit nsam gaw, ngai hte sakse hkam ya ai.” (Roma 9:2) Anhte a myit nsam hpe Yehowa a chyoi pra ai wenyi lam matsun ai hte maren byin hkra gara hku galaw ra na kun? Shaman shakyang ya ai hku nna re.

MYIT NSAM HPE SHAMAN SHAKYANG YA AI LAM

8. (a) Myit masin gaw myit nsam ntsa gara hku akyu shabyin lu ai kun? Hpa hpe shawng tawn nna dawdan ging ai kun? (b) Hkristan langai a matu san seng ai myit nsam nga ai hte sha hpa majaw n hkum tsup ai kun? (Lawu matsing hpe yu u.)

8 Masha nkau mi gaw tinang a hkamsha lam hku hkan nna sha, dawdan lam jahkrat ma ai. Dai hpang, “nye a myit nsam hte nhtan shai ai n re” nga nna tsun ma ai. Tinang a ra marin ai myit grai sawng wa jang, myit nsam hpe shingkang ka-up chye ai. Dai majaw Chyum Laika ndai hku tsun ai: “Myit masin gaw, rai yawng mayawng hta magaw htum nna, grai n hkru nga ai: dai hpe kadai chye lu a ta?” (Yeremia 17:9) Dai majaw, anhte a ra marin ai myit hpe shawng n tawn ging ai. De a malai, Yehowa Karai Kasang ra sharawng ai hpe shawng myit ra ai. *

9. Karai Kasang hpe hkrit hkungga ai gaw hpa lachyum kun? Dai hku hkrit hkungga ai gaw anhte a myit nsam hpe hpa galaw na matu shadut ya ging ai kun?

9 Atsawm shaman da ai myit nsam hta madung tawn nna anhte dawdan na nga yang, anhte a dawdan lam hta anhte ra marin ai lam ni n re ai sha, Karai Kasang hpe hkrit hkungga ai lam ni dan dawng nga na re. Dai hpe madun ai mabyin langai hpe yu yu ga. Sadi dung ai mare up Nehemia gaw Yerusalem mare masha ni kaw nna, hkansi nkau mi hpe hta sha na  ahkang shi hta nga ai. Raitim, dai hku n galaw wa ai. Hpa majaw kun? Yehowa a masha ni hpe adip arip galaw yang, Yehowa myit n pyaw na hpe shi hkrit ai majaw re. Shi ndai hku tsun ai: “Ngai chyawm gaw Karai Kasang hpe hkrit kamyin ai majaw, dai zawn n galaw nngai.” (Nehemia 5:15) Karai Kasang hpe hkrit hkungga ai hta shi a myit hte n htuk na hpe tsang ai myit mung lawm ai. Dai hku hkrit hkungga ai myit gaw lama ma hpe dawdan ai shaloi, Chyum Laika lam matsun hpe tam na matu anhte hpe shadut ya ai.

10. Tsa chyaru lu ai hte seng nna gara Chyum Laika npawt tara ni nga ai kun?

10 Myit nsam hpe madung tawn nna dawdan ai ngu ai gaw gara hku kun? Ga shadawn, anhte ni gaw kanawn mazum poi sa ai ngu saga. Dai hta tsa chyaru mung daw ai. Dai shaloi lu na, n lu na hpe dawdan ra ai. Shawng nnan anhte tau hkrau myit da ra ai. Gara Chyum Laika matsun ni gaw ndai lam hte seng ai kun? Chyaru hpe ram daw lu ai hpe gaw Chyum Laika hta n pat shingdang da ai. Tsabyi jahku hpe kumhpa hku nna jaw da ai majaw Yehowa hpe shakawn da ai. (Shakawn 104:14, 15) Raitim, chyaru lu lai ai hte pyaw shalai ai poi galaw ai ni hpe gaw pat shingdang da ai. (Luka 21:34; Roma 13:13, NW) Dai hta n-ga, lu lai sha lai ai lam hpe hpye ai amu galaw ai zawn re ai mara kaba ni hte mara maren sha madun da ai.​—1 Korinhtu 6:9, 10.

11. Chyaru lu ai hte seng ai tara ni hpe hkan sa ai shaloi Karai Kasang a lam matsun lu na matu hpa galaw ra na kun?

11 Hkristan langai gaw shi a prat hta dai zawn tara ni hpe hkan sa ai hku nna myit nsam hpe shaman da ai. Dai majaw shut ai, jaw ai hpe chye ginhka lu na matu shi a myit nsam gaw sadi jaw nga ai. Kanawn mazum poi langai hta chyaru lu na, n lu na hpe daw dan ra ai aten hta tinang hkum tinang ndai zawn ga san ni san mai ai: Kaning re ai kanawn mazum poi kun? N hkang lu ai sha pyaw shalai ai poi zawn byin wa na kun? Lu ngut jang ngai hpa byin wa chye ai kun? Chyaru hpe ngai grai ra ai kun? Nye a manghkang ni hpe malap kau na matu (sh) koi yen na matu lu mayu ai kun? Kade daram sha lu na ngu ai  hpe ngai lu sharam ai kun? * Dai zawn ga san ni hte Chyum Laika tara ni hpe bai myit let Karai Kasang a chyoi pra ai wenyi anhte hpe lam matsun ya na matu akyu hpyi ra ai. (Shakawn 139:23, 24 hpe hti u.) Dai hku galaw yang, Yehowa karum ya ai hpe lu la nna, anhte a myit nsam hpe shi a tara ni hte htap htuk hkra shaman lu na re. Daw dan ai shaloi anhte myit yu ra ai lam langai naw nga ai.

KAGA MASHA NI A MYIT NSAM HPE HPA MAJAW MYIT TAU YA RA AI KUN?

Chyaru lu na nlu na dawdan ai shaloi Chyum Laika hte shaman da ai myit nsam gaw karum ya lu

12, 13. Hkristan ni a myit nsam n bung ai gaw hpa majaw kun? Dai zawn n bung ai masa ni hte hkrum wa yang hpa galaw ra na kun?

12 Hkristan Ni a lapran myit nsam nbung hkat ai hpe nang mu wa na re. Akyang lailen, htung langai hpe marai langai a matu ra na zawn raitim, kaga masha a matu gaw n ra ai sha n-ga, mara ngu nna pyi mu chye ai. Ga shadawn, kanawn mazum poi hta tsa chyaru lu ai lam re. Marai langai gaw shana maga hta manang ni hte rau hkring sa la let lu ai hpe ra ai. Kaga langai gaw dai hpe n ra ai ngu saga. Hpa majaw dai zawn shai hkat ai kun? Dai gaw anhte a dawdan lam ntsa gara hku akyu shabyin lu ai kun?

13 Masha ni gaw lam amyu myu a majaw n bung hkat ma ai. Asak hkrung nga kaba wa ai shingdu masa n bung ma ai. Ga shadawn, masha nkau mi gaw shanhte hta nga ai gawngkya lam langai hpe grai shakut shaja nna ninghkap wa ra ai. (1 Hkawhkam 8:38, 39) Dai majaw, chyaru hte seng nna shi a myit nsam gaw amyu mi byin nga ai ngu saga. Shi gaw nang hpang de sa chyai ai shaloi, nang jaw lu ai chyaru hpe n lu na matu shi a myit nsam gaw shadut ya na re. Nang shi hpe pawt na kun? Atik anang lu shangun na kun? Galaw na n re. Dai zawn n lu na matu hpa majaw dawdan ai hpe nang chye ai raitim, n chye ai raitim hpunau ni hpe tsawra ai myit gaw myit tau ya na matu nang hpe shadut ya na re.

14, 15. Tsaban langai hta nga ai Hkristan hpung masha ni gaw gara lam hta myit nsam n bung wa ai kun? Pawlu gara hku tsun wa ai kun?

 14 Tsaban langai na Hkristan ni lapran hta myit nsam grai shai ai hpe kasa Pawlu mu wa ai. Dai aten na Hkristan nkau mi gaw, gawngngu sumla ni hpe hkungga nawng da ai shahpa ni hte seng nna myit ung ang taw nga ma ai. (1 Korinhtu 10:25) Hkungga nawng ngut ai hpang, gat kaw sa dut ai shahpa hte seng nna Pawlu a myit nsam gaw hpa n byin ai. Hpa majaw nga yang, gawngngu sumla ni gaw shi a matu kaman lila sha re ai majaw re. Yehowa hpan da nna shi madu ai shahpa hpe gawngngu sumla ni galoi mung n madu lu ai. Raitim, dai lam hpe shi mu mada ai hku kaga masha ni n mu mada ai hpe shi chye ai. Nkau mi gaw Hkristan garai n byin shi ai aten hta sumla nawku ai lam hta grai myit lawm wa ai. Shanhte gaw sumla nawku ai hte matut manoi nga ai lam yawng hpe n ra ma ai. Dai lam hpe Pawlu gara hku hparan wa ai kun?

15 “Anhte n-gun ja ai ni gaw, tinang pyaw ai lam n hkan ai sha, n-gun kya ai ni a magrau n grang ai hpe hkam sharang na, sut nga ai. Shing rai Hkristu mung shi hkum dai n shapyaw la ai” nga nna Pawlu tsun wa ai. (Roma 15:1, 3) Hkristu zawn anhte mung tinang ra sharawng ai hpe shawng n tawn ai sha hpunau ni a myit nsam hpe tau chye ya ra ai ngu Pawlu tsun mayu ai re. Dai majaw, Pawlu gaw Hkristu asak jaw nna hkye la wa ai sagu langai mi hpe ahtu kataw shangun na malai, shi galoi mung ashan n sha sai ngu tsun wa ai.​—1 Korinhtu 8:13; 10:23, 24, 31-33 hpe hti u.

16. Shada da myit nsam n bung ai shaloi, kaga ni hpe hpa majaw tara n jeyang ging ai kun?

16 Lam langai ngai hta tinang a myit nsam gaw galaw na matu ahkang n jaw ai. Dai shaloi, kaga ni hpe mung tinang hku sha mu mada na matu atik anang n galaw ging ai. (Roma 14:10 hpe hti u.) Teng sha nga yang myit nsam gaw, masha ni hpe tara jeyang na matu n re ai sha tinang hkum tinang jeyang na matu re. “Nanhte jeyang ai n hkrum myit ga, hkum jeyang myit” nga nna Yesu tsun ai ga hpe dum ra ai. (Mahte 7:1) Anhte yawng gaw tinang hte sha (sh) kaga ni hte sha seng ai lam ni hta, myit  nsam hku dawdan ra wa ai shaloi, shada da dangrang hkat ai hpe koi yen ra ai. De a malai, tsawra myit hte kahkyin gumdin nga na matu, langai hte langai karum hkat ma ai.​—Roma 14:19.

KAJA AI MYIT NSAM AKYU JAW AI LAM

Kaja ai myit nsam gaw anhte a prat hkrun lam hpe lam matsun ya lu nna ngwi pyaw simsa ai lam hpe lu shangun

17. Ya aten na masha law law a myit nsam gaw hpa byin taw nga ai kun?

17 “Myit nsam kaja rawng” na matu shakut ra ai nga nna kasa Petru ka da ai. (1 Petru 3:16) Yehowa Karai Kasang a man hta san seng ai myit nsam nga ai gaw shaman chyeju langai re. Raitim, ya aten na masha law law a myit nsam gaw dai zawn n re ai. “Myit nsam hpri kahtet hte zawn gaba” hkrum nga ai masha ni a lam Pawlu tsun wa ai. (1 Timohti 4:2) Hpri kahtet hte hkra da ai shara gaw nma hkang ngam taw nna, ja taw ai majaw hkra yang pyi hpa n chye sai. Masha law law a myit nsam gaw dai zawn byin nga ai. Shanhte a myit nsam hta nma hkang nga  taw ai majaw sadi jaw ai, ninghkap ai ni n chye galaw sai. Mara galaw timung kaya ai, mara nga ai ngu hkam sha lam mung n nga sai. Ya aten na masha law law gaw, mara nga ai ngu ai myit hpe aloi sha kau da ma ai.

18, 19. (a) Mara nga ai ngu hkamsha ai myit gaw gara hku akyu jaw ai kun? (b) Lai wa sai aten na mara a majaw, myit malai lu ngut tim anhte naw myit n pyaw ai nga yang gara hku galaw na kun?

18 Mara nga ai ngu hkamsha ai gaw, anhte galaw ai lam shut ai hpe anhte a myit nsam madun nga ai re. Dai zawn hkamsha nna myit malai lu ai nga yang, grai sawng ai mara raitim mara raw hkrum na re. Ga shadawn, hkawhkam Dawi gaw mara kaba galaw hkrup tim, teng sha myit malai lu ai majaw mara raw hkrum wa ai. Shi galaw shut ai lam hpe n ju n dawng nna, Yehowa a tara ni hpe madat mara na matu dawdan ai majaw, Yehowa gaw shi a ntsa “mai kaja nga nna, mara raw kau ya”  ai hpe shi nan hkamsha wa ai. (Shakawn 51:1-19; 86:5) Raitim, anhte myit malai lu nna mara raw hkrum ai hpang pyi mara nga ai ngu naw hkamsha nga yang gara hku galaw na kun?

19 Mara galaw hkrup ai wa gaw mara nga ai ngu hkamsha ai myit n nga ging ai aten du yang pyi, shi a myit nsam gaw mara naw nga ai ngu hkam la nga ai baw byin chye ai. Dai hku tinang hkum tinang mara nga ai ngu hkamsha ai shaloi, Yehowa gaw anhte a myit masin hte hkamsha lam ni yawng hta na grau kaba ai hpe kam ra ai. Karai Kasang a tsawra myit hte mara raw ya ai lam masha ni hpe anhte n-gun jaw ai hte maren, anhte nan mung hkap la ra ai. (1 Yawhan 3:19, 20 hpe hti u.) San seng ai myit nsam gaw, ndai mungkan hta mu na matu yak la ai ngwi pyaw simsa lam hpe hkamsha shangun ai. Lai wa sai aten hta grai kaba ai mara ni galaw lai wa ai masha law law gaw, myit simsa let ya aten hta kaja ai myit nsam hte Yehowa Karai Kasang hpe nawku daw jau nga ma ai.​—1 Korinhtu 6:11.

20, 21. (a) Ndai laika buk gaw nang hpe gara hku karum ya ai kun? (b) Hkristan ni hku nna gara ahkang hpe lu da ai kun? Dai hpe gara hku akyu jashawn ging ai kun?

20 Satan mungkan a jahtum nhtoi hta asak hkrung nga ai anhte ni gaw, ngwi pyaw lam hte kaja ai myit nsam matut nga na matu ndai laika buk gaw karum ya na re. Ndai laika buk gaw shani shagu hkrum chye ai masa ni hta, nang tatut hkan sa ra ai Chyum Laika tara ni yawng hpe gaw n madun da ai. Myit nsam hte seng nna gara hpe galaw ra ai, n galaw ra ai ngu ai tup hkrak re ai tara ni hpe mung n ka da ai. Ndai laika buk a yaw shada lam gaw shani shagu asak hkrung lam hta Chyum Laika lam matsun hpe tatut gara hku hkan sa ra ai lam hpe hkaja nna, na a myit nsam hpe shaman na matu re. “Hkristu a tara” gaw jep ai tara zawn n re. Tup hkrak ka da ai tara ni hta n-ga, npawt tara ni hpe myit yu let tinang a myit nsam hku hkan sa ra na re. (Galati 6:2) Yehowa gaw Hkristan ni hpe wanglu wanglang galaw na matu laklai ai ahkang jaw da ai. Raitim, wanglu wanglang galaw na ahkang  hpe “n kaja ai amu hpe shinggang kau” ai hku n galaw na matu Chyum Laika hta sadi jaw da ai. (1 Petru 2:16) De a malai, dai ahkaw ahkang hpe Yehowa hpe tsawra na matu madun mai ai.

21 Chyum Laika npawt tara hte maren gara hku asak hkrung mai ai lam akyu hpyi nna dawdan ra ai. Dai hku dawdan ai hte maren hkan sa na nga yang, Yehowa hpe shawng nnan chye wa ai shaloi, galaw hpang wa ai lam hpe matut galaw lu na re. Dai gaw sawn maram ginhka chye ai atsam re ai “kaja ai hte n kaja ai hpe chye ginhka lu” ai atsam hpe shaman ai re. (Hebre 5:14) Chyum Laika hte shaman da ai na a myit nsam gaw shani shagu asak hkrung lam hta akyu jaw na re. Dat wan kaw na nhtoi gaw, na a lam hpe htoi ya ai zawn, na a myit nsam mung Karai Kasang myit ra ai hku dawdan chye hkra nang hpe madun ya na re. Dai gaw nang hpe Karai Kasang a n-gaw nwai ai myit hta a nga nga na matu karum ya lu ai.

^ စာပိုဒ်၊ 5 Hebre Chyum (Ga Shaka Dingsa) hta “myit nsam” ngu ai ga si hpe n mu lu ai. Raitim, ndai ga shadawn hta myit nsam hpe tsun mayu ai lam dan dawng nga ai. Yoba tsun ai hta myit nsam ngu n ka da tim, shi a myit nsam bai htang ai lam hpe tsun mayu ai re. Hkristan Greek Chyum (Ga Shaka Ningnan) hta myit nsam ngu ga gale da ai Greek ga si 30 lang daram lawm ai.

^ စာပိုဒ်၊ 8 San seng ai myit nsam nga ai hte sha n hkum tsup ai hpe Chyum Laika hta madun da ai. Ga shadawn, Pawlu gaw “ngai hkum dai mara n lu dum nngai: rai ti mung, dai gaw nye a dinghpring ai lam n rai nga ai: ngai hpe jeyang ai wa gaw, dai Madu rai nga ai” nga nna tsun wa ai. (1 Korinhtu 4:4) Shawng de Pawlu galaw wa ai zawn Hkristan ni hpe adip arip galaw ai ni pyi, tinang galaw ai hpe Karai Kasang ra ai ngu shadu ai majaw san seng ai myit nsam nga ma ai. Dai majaw, anhte a myit nsam gaw tinang a man hta san seng ai sha n-ga, Karai Kasang a man hta mung san seng na matu ahkyak ai.​—Kasa 23:1; 2 Timohti 1:3.

^ စာပိုဒ်၊ 11 Chyaru ya ni a matu ram daw lu ai gaw n mai byin ai ngu Sarawun ni tsun ai gaw matsing hpa re. Shanhte a matu “ram daw” ngu ai gaw tsep kawp n lu ai hpe tsun ai re.