Content de lai

Malawm Ni Hpe Lai U

 DAW 3

Karai Kasang Tsawra Ai Ni Hpe Tsawra Mu

Karai Kasang Tsawra Ai Ni Hpe Tsawra Mu

“Hpaji rawng ai ni hte kanawn ai wa hpaji rawng na ra ai.”​—GA SHAGAWP 13:20.

1-3. (a) Gara teng man ai tara hpe Chyum Laika hta tsun da ai kun? (b) Anhte a ntsa kaja ai shingkang ka-up na ni hpe gara hku lata nna kanawn na kun?

MASHA gaw pasi hte bung nna tinang a makau grupyin hta nga ai hpa hpe mung chyup la chye ai. Tinang hte grai hkau ai manang a myit jasat, akyang lailen ni hpe n myit mada ai sha, aloi sha hkan galaw chye ai.

2 Dai hpe Chyum Laika hta ndai hku tsun da ai: “Hpaji rawng ai ni hte kanawn ai wa hpaji rawng na ra ai; Angawk ai ni a manang ni chyawm gaw, hten byak hkrum na ra ai.” (Ga Shagawp 13:20) Anhte gaw anhte kanawn ai wa a akyang ni hpe kasi la chye ai hpe nang myit hkrum ai n re ni? Anhte gaw anhte kanawn ai wa hpe grai hkau ai majaw shanhte a kaja ai akyang raitim, n kaja ai akyang raitim anhte a ntsa shingkang ka-up chye ai.

3 Karai Kasang a n-gaw nwai ai tsawra myit hta agrin nga na matu anhte a ntsa kaja ai shingkang ka-up ya na ni hte kanawn na matu ahkyak ai. Gara hku lata nna kanawn na kun? Yehowa Karai Kasang tsawra ai ni hpe tsawra nna shi a jinghku ni hte jinghku hku mai ai. Yehowa tsawra ai wa gaw anhte a matu kaja htum manang re. Rai yang, Yehowa tsawra ai masha ni a lam hkaja yu ga. Yehowa a mu mada ai lam hpe myit hta bang da yang, anhte a ntsa kaja ai hku shingkang ka-up lu na ni hpe lata nna kanawn lu wa na re.

KARAI KASANG TSAWRA AI NI

4. Yehowa gaw jinghku hku ai hte seng nna hpa majaw lata na ahkang nga ai kun? Abraham hpe “nye a jinghku wa” nga nna hpa majaw Yehowa shaga wa ai kun?

4 Yehowa gaw jinghku ni hpe atsawm lata nna kanawn ai. Shi hta dai hku lata na ahkang nga ai. Shi gaw Ninggawn Tawa Uphkang Madu rai nna shi hte jinghku hku lu ai gaw ahkaw ahkang kaba langai re. Yehowa gaw kadai ni hpe shi a jinghku hku nna lata ai kun? Yehowa gaw shi hpe tsep kawp kamsham ai ni hpang sit sa ai. Ga shadawn hku nna, laklai ai makam masham nga ai ngu mying kaba ai Abraham a lam hpe hkaja yu ga. Kawa langai hku nna shi a kasha hpe hkungga nawng na matu, hpyi shawn hkrum ai hta grau kaba ai makam masham chyam dinglik hkrum ai lam n nga sai. * “Karai Kasang gaw si mat ai ni kaw na pyi bai sharawt ya lu ai” lam Abraham tsep kawp kamsham ai majaw shi kasha “Isak hpe hkungga” nawng na matu galaw ai. (Hebre 11:17-19) Abraham gaw dai zawn kamsham let madat mara ai lam madun ai majaw, Yehowa gaw shi hpe “nye a jinghku wa” nga nna tsawra myit hte shaga wa ai.​—Esaia 41:8; Yaku 2:21-23.

5. Yehowa gaw shi hpe sadi dung let madat mara ai ni hpe gara hku mu mada ai kun?

5 Yehowa gaw sadi dung let madat mara ai ni hpe grai manu shadan ai. Yawng mayawng hta na shi hpe sha sadi dung mayu ai ni hpe tsawra ai. Shi hpe tsawra nna madat mara ai ni hpe Yehowa grai ra sharawng ai lam ndai laika buk a Daw 1 hta anhte hkaja wa sai. “Teng man ai ni chyawm gaw shi hte jinghku hku lu na ma ra ai” nga nna Ga Shagawp 3:32 hta tsun da ai. Karai Kasang hpyi shawn ai hte maren sadi dung let hkan sa ai ni hpe, shi a “sum”  hta sa shanu na matu saw shaga da ai. Dai gaw shi hpe nawku daw jau na matu, akyu hpyi na matu saw shaga ai lam re.​—Shakawn 15:1-5.

6. Yesu hpe tsawra ai lam anhte gara hku madun mai ai kun? Yehowa gaw shi a Kasha hpe tsawra ai ni hpe gara hku mu mada ai kun?

6 Yehowa gaw shi a Kasha shingtai Yesu hpe tsawra ai ni hpe tsawra ai. Yesu gaw “ngai e tsawra ai wa rai yang gaw, nye ga matsun hkan shatup na ra ai: nye Wa mung dai wa hpe tsawra na wu ai rai nna, an lahkawng gaw dai wa kaw sa nna, shi hte rau hpawng de nga na ga ai” nga nna tsun wa ai. (Yawhan 14:23) Yesu hpe tsawra ai lam gara hku madun mai ai kun? Kabu gara shiga hkaw tsun ai, sape shatai ai lit ni hte nawng Yesu a tara ni hpe hkan sa ai hku nna madun mai ai. (Mahte 28:19, 20; Yawhan 14:15, 21) Anhte gaw n hkum tsup ai ni raitim, Yesu tsun wa ai lam ni hpe dang lu ai daram kasi la nna “shi a hkang hta hkan nang” ai hku nna shi hpe tsawra ai lam madun ma ai. (1 Petru 2:21) Yesu hpe tsawra ai myit a majaw Yesu a hpang hkan na matu shakut ai ni hpe Yehowa ra sharawng ai.

7. Yehowa a jinghku ni hte kanawn ai gaw hpa majaw hpaji rawng ai lam re ai kun?

7 Yehowa gaw shi a jinghku ni kaw nna myit mada ai atsam ningja ni gaw, makam masham, sadi dung ai lam, madat mara ai lam, Yesu hte shi galaw ai lam ni hpe tsawra ai lam ni re. ‘Dai zawn atsam ningja ni ngai hte kanawn ai ni hta nga ai kun? Yehowa a jinghku ni hte ngai kanawn ai kun?’ ngu ai ga san ni hpe tinang hkum tinang san ging ai. Dai zawn kaja ai akyang nga ai ni hte kanawn ai gaw hpaji rawng ai lam re. Karai Kasang ra sharawng ai atsam ningja ni hpe nga hkra galaw nna, mungdan kabu gara shiga hpe sharawng awng let hkaw tsun ai ni gaw anhte hpe akyu jaw lu ai. Karai Kasang myit ra ai hku galaw na ngu ai dawdan lam hte maren asak hkrung na matu anhte hpe karum ya lu ai.​—“ Jinghku Kaja Ngu Ai Gaw Hpa Rai Ta?” ngu ai lawk hpe yu u.

 CHYUM LAIKA KASI NINGLI NI KAW NNA SHARIN LA AI LAM

8. (a) Naomi hte Ruhta, (b) Hebre ramma masum, (c) Pawlu hte Timohti ni a lam hte seng nna hpa lam hpe nang ra sharawng ai kun?

8 Chyum Laika hta manang kaja lata ai majaw akyu hkamsha wa ai ni a kasi ningli law law lawm ai. Naomi hte shi a kanam Ruhta a lam, Babelon mung dan de du mat ai Hebre ramma masum a lam, Pawlu hte Timohti ni a lam ni hpe hti mai ai. (Ruhta 1:16; Daniela 3:17, 18; 1 Korinhtu 4:17; Hpilipi 2:20-22) Raitim, laklai ai kasi ningli langai re ai Dawi hte Yonahtan a hku hkau lam hpe myit maju jung ga.

9, 10. Dawi hte Yonahtan a hku hkau lam ngang grin ai gaw hpa majaw kun?

9 Goliat hpe Dawi sat ngut ai hpang, “Yonahtan a myit gaw Dawi a myit hte makyit mat lu ai rai nna, Yonahtan gaw Dawi hpe shi hkum hte maren tsaw ra wu ai” nga nna Chyum Laika hta tsun da ai. (1 Samuela 18:1) Dai majaw, asak grai shai hkat ai raitim, ngang kang ai hku hkau lam nga wa nna majan pa hta Yonahtan si ai aten du hkra grin wa ai. * (2 Samuela 1:26) Shan lahkawng a hku hkau lam ngang grin ai gaw hpa majaw kun?

10 Karai Kasang hpe tsawra nna shi hpe matut nna sadi dung mayu ai myit a majaw, Dawi hte Yonahtan a hku hkau lam ngang grin wa ai. Shan lahkawng yan Karai Kasang myit ra ai hte maren byin mayu ai myit jasat a majaw hku hkau wa ai re. Langai hte langai grau tsawra wa hkra karum ya ai atsam ningja ni hpe madun wa ai. Yehowa a amying hpe marai rawng let makawp maga wa ai dai ramma a atsam marai hte myit rawt ai lam hpe Yonahtan myit hta ra sharawng wa na gaw teng sha re. Yehowa a lamang ni hpe sadi dung let madi shadaw nna, tinang a akyu hta na Dawi a akyu hpe shawng tawn wa ai Yonahtan hpe Dawi hkungga wa na gaw teng sha re. Ga shadawn,  Dawi a prat masa n kaja wa ai shaloi na mabyin langai hpe myit yu ga. Dawi gaw Yonahtan a kawa n hkru ai hkawhkam Shawlu a pawt sindawng ai kaw nna lawt na matu, nam maling hta hprawng hkawm ra taw ai. Yonahtan gaw “Dawi nga ai maling de sa wa nhtawm, Karai Kasang hta shamyet shanat ngang na lam, shadaw shalan” ya ai hku nna sadi dung ai lam madun wa ai. (1 Samuela 23:16) Tsawra ai manang sa wa nna  n-gun jaw ai shaloi, Dawi gara hku hkamsha na hpe shingran yu u. *

11. Dawi hte Yonahtan a kasi ningli kaw nna jinghku hku ai hte seng ai gara lam hpe sharin la mai ai kun?

11 Yonahtan hte Dawi a kasi ningli kaw nna hpa lam sharin la lu ai kun? Tinang a manang ni hta Karai Kasang hte hku hkau ai lam nga na gaw ahkyak htum re ai hpe sharin la lu ai. Anhte gaw anhte hte makam masham bung ai, akyang lailen  hte seng ai tsang madang bung ai, Karai Kasang hpe sadi dung mayu ai myit mung bung ai ni hte hku hkau wa ai shaloi, sumru ai lam, hkamsha lam hte mahkrum madup ni hpe shada da tsun hkat let n-gun jaw lu na re. (Roma 1:11, 12 hpe hti u.) Dai zawn wenyi lam shawng tawn ai manang ni hpe hpunau nauna ni a lapran hta mu lu ai. Rai yang, nawku htingnu hta zuphpawng sa lung ai ni yawng gaw kaja ai manang ni re ai ngu tsun mayu ai kun? N re.

HKU HKAU AI MANANG NI HPE LATA AI LAM

12, 13. (a) Hkristan shada hta pyi hpa majaw lata nna kanawn ra ai kun? (b) Tsa ban langai na nawku hpung ni gaw gara lam ni hte hkrum wa ai kun? Dai majaw gara sadi jaw ga ni hpe Pawlu tsun wa ai kun?

12 Hpung kata hta pyi, wenyi lam hpe shawng tawn ai manang ni hpe lata nna kanawn ra ai. Dai majaw nang mau mat ai kun? Mauhpa n re. Hpun langai hta nga ai namsi nkau mi gaw, myin na matu aten loi na chye ai zawn, hpung hta nga ai nkau mi mung wenyi lam hta kunghpan na matu aten na chye ai. Dai majaw, hpung shagu hta wenyi lam hta kunghpan ai madang n bung ai Hkristan ni hpe anhte mu lu ai. (Hebre 5:12–6:3) Raitim, masha nnan ni (sh) gawng kya ai ni hpe wenyi lam hta kunghpan shangun mayu ai majaw, anhte ni gaw myit galu ai lam hte tsawra myit madun ma ai.​—Roma 14:1; 15:1.

13 Kalang lang, hpung kata hta sadi nna kanawn ra ai masa ni pru wa chye ai. Nkau mi gaw myit n ding man ai mai byin ai. Nkau mi hta gaw, myit machyi chye ai, aput angun tsun chye ai myit jasat ni nga wa chye ai. A.D. tsa ban langai, nawku hpung ni hta dai zawn masa ni nga wa ai. Nawku hpung masha law malawng gaw sadi dung ai ni raitim, nkau mi a akyang lailen gaw n kaja ai. Korinhtu hpung masha nkau mi gaw, Hkristan sharin achyin ai lam nkau hpe n hkap la ai majaw kasa Pawlu gaw, “nanhte lam hkum dam myit; N kaja ai kanawn manang ni, mai kaja ai arawn alai hpe jahten ma ai” nga nna nawku hpung hpe sadi jaw wa ai. (1 Korinhtu 15:12, 33)  Hkristan ni a lapran hta n kaja ai akyang nga ai ni nga na ngu Timohti hpe Pawlu sadi jaw wa ai. Dai ni hte hku hku hkau hkau n kanawn ai sha koi na matu Timohti hpe htet da ai.​—2 Timohti 2:20-22 hpe hti u.

14. Kanawn manang hte seng nna Pawlu jaw ai sadi jaw ga a npawt tara hpe gara hku tatut hkan sa mai na kun?

14 Pawlu jaw ai sadi jaw ga a npawt tara ni hpe anhte gara hku tatut hkan sa lu na kun? Nawku hpung kata kaw na raitim, shinggan kaw na raitim anhte a ntsa n kaja ai shingkang ka-up ai kadai hte mung hku hku hkau hkau n kanawn ai hku nna re. (2 Htesaloni 3:6, 7, 14) Anhte a wenyi lam hpe makawp maga ra ai. Anhte ni gaw pasi hte bung ai hpe dum u. Manang ni galaw ai hku anhte hkan galaw chye ai. Pasi hpe tsabyi ntsin hta tsing yang tsabyi ntsin hpe sha chyup la na re ai zawn, n kaja ai ni hte anhte kanawn yang n kaja ai akyang ni sha anhte hta nga wa na.​—1 Korinhtu 5:6.

Hpunau nauna ni a lapran hta kaja ai manaw manang ni mu lu

15. Nawku hpung kata hta wenyi lam kaja ai manang ni hpe gara hku mu lu na kun?

15 Hpunau nauna lapran hta manang kaja ni hpe mu lu ai lam gaw grai chyeju dum hpa re. (Shakawn 133:1) Nawku hpung kata hta wenyi lam kaja ai manang ni hpe gara hku tam mu na kun? Karai Kasang ra sharawng ai atsam ningja ni nga hkra nang shaman ai nga yang, nang hte myit jasat bung ai ni nang hpe hku hkau mayu wa na re. Manang nnan tam na matu, tatut re ai lam nkau hpe tinang maga hku nna, nnan hpang galaw ra ai. (“ Manang Kaja Tam Mai Ai Lam” ngu ai lawk hpe yu u.) Nang kasi la mayu ai atsam ningja nga ai ni hpe tam yu u. Amyu, mung masha, htung hking hpe n lata ai sha hpunau nauna ni hte kanawn ai hku nna “nanhte a kraw lawang mung maden dat mu” ngu ai Chyum Laika lam matsun hpe hkan sa u. (2 Korinhtu 6:13; 1 Petru 2:17 hpe hti u.) Asak bung ai shada da sha hkum kanawn. Yonahtan gaw Dawi hta asak grai kaba ai lam hpe dum u. Asak kaba ai ni a mahkrum madup hte nyan hpaji gaw hku hkau ai lam hpe grau kaja shangun ai.

 MAYAK MAHKAK NI HKRUM WA AI SHALOI

16, 17. Hpunau nauna langai ngai gaw anhte hpe hkra machyi hkra galaw ai shaloi, nawku hpung hte tsan tsan nga mat ai baw hpa majaw n galaw ging ai kun?

16 Nawku hpung kata hta akyang amyu myu, shingdu masa amyu myu nga ai majaw manghkang ni kalang lang byin wa chye ai. Hpunau nauna langai ngai gaw anhte hpe hkra machyi hkra tsun ai (sh) galaw ai baw byin chye ai. (Ga Shagawp 12:18) Kalang lang, akyang n bung ai lam, chye na shut ai lam, myit jasat shai hkat ai lam a majaw manghkang byin chye ai. Dai manghkang ni a majaw, ahtu kataw nna nawku hpung hte tsan tsan nga mat na kun? Yehowa hte shi tsawra ai ni hpe, jet ai tsawra myit hte anhte tsawra na nga yang dai zawn galaw na n re.

17 Anhte a Hpan Madu hte Asak Madu re ai Yehowa gaw anhte a tsawra ai lam hte nawku daw jau ai lam hpe lu ging ai. (Shingran 4:11) Karai Kasang akyu jashawn ai nawku hpung gaw anhte a sadi dung ai lam hte madi shadaw ai lam hpe lu  ging ai. (Hebre 13:17) Dai majaw, hpunau nauna langai ngai gaw anhte hpe myit machyi hkra galaw ai shaloi, kade daram myit machyi ai hpe madun ai hku nna nawku hpung hte tsan mat hkra nga na kun? Dai hku galaw na n re. Hpa majaw nga yang, anhte hpe myit machyi hkra galaw ai gaw Yehowa n re ai. Yehowa hpe tsawra ai myit gaw, shi hte shi a masha ni hpe galoi mung n kau da na matu karum ya ai.​—Shakawn 119:165 hpe hti u.

18. (a) Nawku hpung kata simsa lam grau nga wa hkra anhte hpa galaw lu ai kun? (b)  Anhte hpe myit machyi hkra galaw ai ni hpe mara raw ya yang, gara shaman chyeju ni hkamsha lu na kun?

18 Hpunau nauna ni hpe tsawra ai myit gaw nawku hpung hta simsa ai lam jat wa hkra shadut ya ai. Yehowa gaw shi tsawra ai ni hpe hkum tsup na matu n myit mada ai zawn, anhte mung hpunau nauna ni hpe n myit mada ging ai. Tsawra myit gaw anhte yawng n hkum tsup ai rai nna shut chye ai hpe myit dum na matu karum ya lu ai. Kaji kajaw shut ai lam hpe ahkyak n la na matu mung karum ya ai. (Ga Shagawp 17:9; 1 Petru 4:8) Tsawra myit gaw “shada da mara raw dat hkat” na matu madi shadaw ya ai. (Kolose 3:13, JCLB) Dai hpaji jaw ga hpe hkan sa na matu lang shagu gaw n loi ai. Hkra machyi ai lam hpe sha myit taw nga yang, matut nna myit machyi let anhte a ntsa shut hpyit ai wa hpe masin pawt ging ai ngu sawn la chye ai. Gaja nga yang, myit n dik nna myit hta hkamsha nga ai gaw anhte a matu n kaja ai. Anhte hpe myit machyi hkra galaw ai ni hpe mara raw ya yang, shaman chyeju law law lu na re. (Luka 17:3, 4) Dai hku galaw ai nga yang, myit simsa lam lu na. Nawku hpung kata hta mung simsa lam matut nga na. Ahkyak htum gaw Yehowa hte anhte a hku hkau lam hpe makawp maga ya na re.​—Mahte 6:14, 15; Roma 14:19.

N KANAWN RA NA ATEN

19. Marai langai hte n mai kanawn ai gara mabyin masa ni pru wa chye ai kun?

19 Kalang lang, hpung masha langai ngai hpe n mai kanawn sai lam shana ai aten ni nga ai. Myit malai n lu nna Karai Kasang a tara ni hpe tawt lai ai majaw shapraw hkrum ai shaloi,  shut shai ai tara ni hpe sharin achyin ai (sh) nawku hpung hte n kanawn ai hku nna tinang a makam masham hpe nyet kau ai ni nga wa ai shaloi re. Chyum Laika hta dai zawn masha ni hpe “n kanawn” na matu asan sha tsun da ai. * (1 Korinhtu 5:11-13 hpe hti u; 2 Yawhan 9-11) Kanawn n mai sai wa gaw tinang hte grai hkau ai manang (sh) jinghku rai yang, shanhte hpe koi na matu yak chye ai. Yawng mayawng hta, Yehowa hte shi a dinghpring ai tara ni hpe sadi dung ai lam madun na kun? Yehowa gaw sadi dung ai hte madat mara ai hpe grai manu shadan ai lam dum u.

20, 21. (a) Shapraw ai lam gaw hpa majaw tsawra myit lawm ai lam re ai kun? (b) Manang ni hpe hpaji rawng let lata na matu hpa majaw ahkyak ai kun?

20 Shapraw ai lamang gaw Yehowa a tsawra myit lawm ai hkyen lajang ai lam re. Gara hku nna kun? Myit malai n lu nna mara galaw ai wa hpe shapraw ai gaw, chyoi pra ai Yehowa a amying hte shi a tara ni hpe tsawra ai lam madun ai. (1 Petru 1:15, 16) Shapraw ai lam gaw nawku hpung hpe shim lum shangun ai. Sadi dung ai hpung masha ni gaw, dingsang mara galaw ai ni a n kaja ai shingkang ka-up ai lam kaw nna lawt lu ai. Nawku hpung gaw ndai n hkru ai mungkan hta, shim lum ai shara re ai lam chye let matut nawku daw jau mai ai. (1 Korinhtu 5:7; Hebre 12:15, 16) Laja lana sharin shaga ya ai gaw mara galaw ai wa hpe tsawra ai lam madun ai re. Shi gaw galai shai ra na hpe chye wa nna, Yehowa hpang bai kayin wa na matu shakut na re.​—Hebre 12:11.

21 Grai hkau ai manang ni gaw anhte a ntsa shingkang ka-up lu ai atsam nga ai gaw teng sha re. Dai majaw, manang ni hpe hpaji rawng let lata na matu ahkyak ai. Yehowa a jinghku ni hpe kanawn nna, shi tsawra ai ni hpe tsawra ai nga yang anhte hta kaja htum manang ni nga wa na re. Shanhte kaw nna anhte kasi la lu ai lam ni gaw, Yehowa ra sharawng ai lam hte maren asak hkrung na matu karum ya na re.

^ စာပိုဒ်၊ 4 Abraham hpe dai hku hpyi shawn ai hku nna, Yehowa shi nan mung shi a kasha shingtai hpe shagu hkungga hku nna, jaw na lam madun dan wa ai. (Yawhan 3:16) Abraham a mabyin hta Yehowa gaw Isak a malai sagu la langai hpe hkungga jaw shangun wa ai.​—Ningpawt 22:1, 2, 9-13.

^ စာပိုဒ်၊ 9 Dawi gaw Goliat hpe sat wa ai aten hta “ma sha naw rai nga” nna shi a asak 30 daram hta Yonahtan si mat ai. (1 Samuela 17:33; 31:2; 2 Samuela 5:4) Yonahtan si ai shaloi asak 60 daram re ai majaw Dawi hta na asak 30 daram kaba ai hpe chye lu ai.

^ စာပိုဒ်၊ 10 1 Samuela 23:17 hta tsun da ai hte maren Yonahtan gaw Dawi hpe lam manga tsun nna n-gun jaw wa ai. (1) Hkum hkrit nga nna Dawi hpe n-gun jaw wa ai. (2) Shawlu a shakut ai lam awng dang na n re ai lam Dawi hpe kam shangun wa ai. (3) Karai Kasang ga sadi jaw da ai hte maren, Dawi gaw hkawhkam aya hpe lu la na lam myit dum shangun ai. (4) Dawi a ntsa sadi dung na nga nna ga sadi jaw wa ai. (5) Dawi a ntsa shi a sadi dung ai lam hpe Shawlu pyi chye da ai lam Dawi hpe tsun dan wa ai.

^ စာပိုဒ်၊ 19 Shapraw hkrum ai wa (sh) kanawn mazum jahkring hkrum ai wa hpe gara hku tsun shaga ging ai lam grau nna chye mayu yang, laika man 207-209 kaw na Bungjat Daw hpe yu u.