Content de lai

Malawm Ni Hpe Lai U

 DAW 1

Karai Kasang Hpe Tsawra Ai Lam

Karai Kasang Hpe Tsawra Ai Lam

“Karai Kasang a hkang da ai ga ni hpe hkan galaw ai lam gaw shi hpe tsaw ra ai lam rai nga ai. Shi a hkang da ai ga chyawm gaw, anhte a matu yak la nga ai n rai.”​—1 YAWHAN 5:3, JCLB.

1, 2. Yehowa Karai Kasang hpe tsawra na matu nang hpe hpa gaw shadut ya ai kun?

KARAI KASANG hpe nang tsawra ai kun? Yehowa Karai Kasang hpang nang ap nawng da sai nga yang, tsawra ai ngu, nang hkrak tsun na re. Shi hpe anhte tsawra ai gaw byin ging ai lam sha re. Karai Kasang hpe anhte tsawra ai gaw shi a tsawra myit hpe bai htang ai she re. Chyum Laika hta ndai hku tsun da ai: “Shi [Yehowa] gaw shawng nnan e anhte hpe tsaw ra mi ai majaw, anhte mung, tsaw ra nga ga ai.”​—1 Yawhan 4:19.

2 Yehowa gaw anhte hpe tsawra ai lam shawng nnan madun wa ai. Anhte nga na matu ginding aga hpe jaw da ai. Anhte lu na, sha na, bu hpun na shi lajang ya ai. (Mahte 5:43-48) Dai ni hta grau ahkyak ai wenyi lam hpe mung madi shadaw ya ai. Chyum Laika hpe mung jaw da ai. Shi hpe akyu hpyi na matu saw shaga nna anhte a akyu hpyi ga ni hpe madat ya ai. Anhte hpe madi shadaw na matu chyoi pra ai wenyi jaw na ngu ga sadi jaw da ai. (Shakawn 65:2; Luka 11:13) Ahkyak htum ai lam gaw, yubak hte si hkrung si htan kaw nna anhte lawt lu hkra shi a kasha shingtai hpe gawng malai hkungga jaw na matu shangun dat ai. Dai hpe yu yang, Yehowa a tsawra myit gaw kade daram kaba ai hpe mu lu ai.​—Yawhan 3:16; Roma 5:8 hpe hti u.

3. (a) Karai Kasang a n-gaw nwai ai myit hta a nga nga na matu anhte maga hku nna hpa galaw ra ai kun? (b) Ahkyak ai gara ga san hpe anhte san ra ai kun? Mahtai hpe gara kaw mu lu ai kun?

 3 Yehowa gaw anhte hpe shi a tsawra myit htani htana hkamsha shangun mayu ai. Dai zawn hkamsha na matu gaw anhte hta sha madung ai. Chyum Laika hta ndai hku n-gun jaw da ai: “N htum n wai asak lu la hkra, . . . Karai Kasang a n-gaw nwai ai myit hta a nga nga mu.” (Yuda 21) “A nga nga mu” ngu ai ga si gaw anhte maga hku nna tatut shakut shaja let galaw ra ai lam nga ai hpe tsun ai re. Shi a tsawra myit hpe dan leng ai lam hku nna bai htang ra ai. Dai majaw, anhte hkum anhte san ra ai ga san langai gaw, “Karai Kasang hpe tsawra ai lam gara hku madun na kun?” Dai ga san a mahtai hpe kasa Yawhan ka  da ai kaw nna chye lu ai: “Karai Kasang a hkang da ai ga ni hpe hkan galaw ai lam gaw shi hpe tsaw ra ai lam rai nga ai. Shi a hkang da ai ga chyawm gaw, anhte a matu yak la nga ai n rai.” (1 Yawhan 5:3, JCLB) Karai Kasang hpe grai tsawra ai lam anhte madun mayu ai majaw, dai ga si ni a lachyum hpe atsawm sawk sagawn ra ai.

KARAI KASANG HPE TSAWRA AI LAM

4, 5. Yehowa hpe na a myit kraw lawang kaw nna gara hku tsawra wa ai kun?

4 “Shi [Karai Kasang] hpe tsaw ra ai lam” ngu kasa Yawhan ka ai shaloi hpa hpe tsun mayu ai kun? Karai Kasang ntsa tawn ai anhte a hkamsha lam hpe tsun mayu ai re. Na a myit masin hta Yehowa hpe shawng nnan tsawra wa ai aten hpe bai dum ai kun?

Ap nawng ai hte hkalup hkam ai gaw Yehowa hpe tsawra nna madat mara ai prat hkrun lam hpang wa ai hpe madun

5 Yehowa hte shi a yaw shada lam hte seng ai teng man ai tara hpe nang chye wa nna, kamsham wa ai aten hpe chyahkring mi myit yu u. Nang gaw yubak kap ai masha hku nna shangai wa tim, Adam sum mat ai hkum tsup ai prat hte htani htana asak hpe lu na matu, Hkristu kaw nna Yehowa lam hpaw ya ai hpe chye na wa ai. (Mahte 20:28; Roma 5:12, 18) Yehowa gaw shi grai tsawra ai kasha hpe na a matu si hkam shangun ai hpe yu nna shi kade daram asum hkam wa ai hpe nang chye na wa ai. Dai majaw, dai daram kaba la ai tsawra myit madun wa ai Karai Kasang hpe nang tsawra wa ai.​—1 Yawhan 4:9, 10 hpe hti u. 

6. (a) Teng man ai tsawra myit hpe gara hku madun na kun? (b) Karai Kasang hpe tsawra ai myit gaw nang hpe hpa galaw shangun ai kun?

6 Dai hku hkamsha ai gaw Yehowa hpe tsawra ai a npawt sha re. Tsawra myit ngu tsun ai hta ga hte sha, hkamsha lam hpe sha tsun mayu ai n re. Tsun mayu ai gaw, Karai Kasang hpe teng sha tsawra ai hta, “tsawra ai” ngu ga hte tsun ai hta n-ga lawm ai. Makam masham zawn, teng man ai tsawra myit mung tatut galaw ra ai lam lawm ai. (Yaku 2:26) Tinang tsawra ai marai langai ngai a ra sharawng ai lam ni hpe galaw ai gaw shi hpe  tsawra ai lam madun dan ai re. Dai zawn sha, na a myit masin hta Yehowa hpe tsawra ai myit ru jung wa jang, shi ra sharawng ai lam hku nna asak hkrung mayu wa ai. Nang gaw hkalup hkam ngut sai Sakse hkam langai kun? Hkam ngut sai rai yang, Karai Kasang hpe tsawra nna sadi dung ai majaw, grai ahkyak ai dai dawdan lam hpe nang dawdan wa ai re. Yehowa myit ra ai hku galaw na matu, tinang hkum tinang ap nawng nna dai ap nawng ai lam hpe hkalup hkam ai hku nna nang madun wa ai. (Roma 14:7, 8 hpe hti u.) Yehowa hpe jaw ai ndai ga sadi hpe grin na matu kasa Yawhan tsun wa ai hpe matut nna hkaja yu ga.

“HKANG DA AI GA NI HPE HKAN GALAW AI LAM”

7. Karai Kasang hkang da ai tara nkau mi gaw hpa ni kun? Dai ni hpe hkan sa ai hta hpa ni lawm ai kun?

7 Karai Kasang hpe tsawra ai lam gaw, “hkang da ai ga ni hpe hkan galaw ai lam” rai nga ai ngu Yawhan ka wa ai. Karai Kasang a hkang da ai ga ni gaw hpa ni rai a ta? Yehowa gaw Chyum Laika hku nna tara ni hpe jaw da ai. Ga shadawn, chyaru lu lai ai, hpye ai amu galaw ai, gawngngu sumla nawku ai, lagu ai hte masu ai zawn re ai akyang ni hpe n galaw na matu tsun da ai. (1 Korinhtu 5:11; 6:18; 10:14; Ehpesu 4:28; Kolose 3:9) Karai Kasang a hkang da ai ga ni hpe hkan sa ai hta, Chyum Laika kaw lawm ai akyang lailen hte seng ai tara ni hte maren, asak hkrung ai mung lawm ai.

8, 9. Chyum Laika hta tup hkrak matsun da ai tara n nga ai masa hta hpa hpe Yehowa ra sharawng ai lam anhte gara hku chye lu ai kun? Ga shadawn tsun dan u. 

8 Karai Kasang ra sharawng na matu, shi a hkang da ai tara ni hpe hkan sa ai hta n-ga lawm ai. Yehowa gaw anhte a prat hkrun lam shagu hta shi a tara ni hte n hkang da ai. Dai majaw, shani shagu hkawm sa ai lam hta Chyum Laika kaw tup hkrak n tsun da ai masa ni hte hkrum chye ai. Dai shaloi, Yehowa ra sharawng ai lam hpe gara hku chye lu na kun? Chyum Laika hta Karai Kasang a myit mang ai lam hpe mu lu ai. Chyum Laika hpe anhte hkaja ai shaloi, Yehowa ra sharawng ai lam ni hte  n dawng n yawt ai lam ni hpe anhte chye wa ai. (Shakawn 97:10 hpe hti u; Ga Shagawp 6:16-19) Karai Kasang manu shadan ai myit jasat hte akyang lailen ni hpe anhte chye wa ai. Yehowa a atsam ningja ni hte shi galaw ai lam ni hpe hkaja magang, anhte galaw hkawm sa ai lam ni hta shi ra sharawng ai hku galaw lu magang re. Dai hku galaw yang, Chyum Laika hta tup hkrak n tsun da ai masa ni hte hkrum wa yang pyi, Yehowa “myit ra ai lam” hpe anhte chye lu na re.​—Ehpesu 5:17.

9 Ga shadawn, grai n hkru ai (sh) nse nsa re ai lam ni hpe madun ai sumla hkrung ni hpe n yu na matu, ading tawk tsun da ai tara Chyum Laika hta n lawm ai. Dai ni hpe n yu na matu tsun da ai tara n nga tim, n mai yu ai hpe anhte chye ging ai. Ndai lam hte seng nna Yehowa a myit jasat hpe anhte chye ai. Chyum Laika hta ndai hku dan dan leng leng tsun da ai: “Kashun kashe tsaw ai wa hpe, Shi [Yehowa] a myit masin n dawng nga mu ai.” (Shakawn 11:5) “Hpye ai amu galaw ai ni . . . hpe, Karai Kasang tara dara na” nga nna mung tsun da ai. (Hebre 13:4) Karai Kasang a lam matsun hte ka da ai dai ga ni hpe yu nna shi gara hpe ra sharawng ai lam anhte asan sha chye lu ai. Dai majaw, anhte gaw TV, sumla hkrung ni, internet ni hta lawm ai Yehowa n ra ai akyang ni hpe dan dan leng leng madun da ai ni hpe yu nna ban sa ai baw n galaw ga ai. Dai zawn n kaja ai lam ni hpe koi gam na nga yang, Yehowa ra sharawng na hpe mung anhte chye ai. *

10, 11. Yehowa hpe madat mara na matu anhte hpa majaw lata ai kun? Gara hku madat mara ai kun?

10 Karai Kasang a tara ni hpe anhte hpa majaw hkan sa ra ai kun? Shani shagu hkawm sa lam hta Karai Kasang myit mang ai hte maren hpa majaw asak hkrung mayu ai kun? Ari jaw n hkrum mayu ai majaw (sh) Karai Kasang ra sharawng ai hpe n galaw yang, n kaja ai akyu ni byin wa na hpe tsang ai majaw sha, tara ni hpe hkan sa ai n re. (Galati 6:7) De a malai, Yehowa a ga madat ai gaw shi hpe tsawra ai lam madun dan lu ai laksan  ahkaw ahkang hku nna hkam la ga ai. Ma langai gaw shi kawa a ra sharawng ai hpe lu mayu ai zawn, anhte mung Yehowa a man hta myi man lu mayu ga ai. (Shakawn 5:12) Shi gaw anhte a kawa rai nna, shi hpe anhte tsawra ai. Tinang gaw Yehowa “ra sharawng” ai lam hku asak hkrung nga ai ngu myit hta chye da ai gaw, anhte a prat hpe ngwi pyaw shangun ai.​—Ga Shagawp 12:2, JCLB.

11 Anhte a madat mara ai lam gaw myit n lawm nna, masa hku hkan nna madat ai baw n re ai. * Tinang ra ai hpe lata nna madat ai, kaja ai aten, mayak mahkak n hkrum ai aten hta sha madat ai baw n re. De a malai, anhte gaw “sharawng ai myit hte madat mara” ga ai. (Roma 6:17) “Ngai tsaw ra ai, na a jep ai tara hta, Ngai ngwi pyaw nga na nngai” nga nna tsun ai shakawn kungdawn sara zawn anhte mung hkamsha ga ai. (Shakawn 119:47) Yehowa a ga madat na matu anhte ra sharawng ga ai. Anhte a myit masin mahkra hte madat mara ai lam hpe Yehowa lu ging ai. Dai majaw madat mara na matu shi hpyi shawn ai hpe anhte hkap la ga ai. (Tara Jahprang 13:1) Shaning law law Yehowa hpe madat mara let, tsawra ai lam madun wa ai sadi dung ai Noa hte seng nna, Chyum Laika hta ndai hku tsun da ai: “Noa gaw . . . Karai Kasang shi hpe hkang da wu ai hte maren, lam shagu shi galaw wu ai.” (Ningpawt 6:22) Chyum Laika hta Noa hte seng nna Yehowa dai hku tsun wa ai zawn, anhte hte seng nna mung dai hku tsun shangun mayu ai.

12. Gara hku madat mara ai gaw Yehowa hpe myit pyaw shangun ai kun?

12 Anhte myit masin mahkra hte madat mara ai majaw Yehowa gara hku hkamsha ai kun? Anhte dai hku galaw yang, shi myit pyaw ai ngu Chyum Laika hta tsun da ai. (Ga Shagawp 27:11) Anhte a madat mara ai lam gaw, Ninggawn Tawa Up Hkang Madu a myit hpe teng sha pyaw shangun ai kun? Pyaw  shangun ai. Hpa majaw nga yang, Yehowa gaw anhte hpe tinang myit ra ai hku lata na ahkang nga ai ni hku nna hpan da ai. Dai gaw anhte hpe wanglu wanglang lata na ahkang jaw da ai hpe tsun mayu ai re. Karai Kasang hpe madat na matu lata mai ai zawn n madat na matu mung lata mai ai. (Tara Jahprang 30:15, 16, 19, 20) Yehowa hpe tsawra ai myit a majaw shi hpe madat mara na matu sharawng awng ai myit hte lata yang, shi hpe grai myit pyaw shangun ai. (Ga Shagawp 11:20) Dai hta n-ga, kaja htum prat hkrun lam hpe lata nga ai mung re ai.

“SHI A HKANG DA AI GA CHYAWM GAW, ANHTE A MATU YAK LA NGA AI N RAI”

13, 14. Karai Kasang a “hkang da ai ga chyawm gaw, anhte a matu yak la nga ai n rai” nga nna hpa majaw lu tsun ai kun? Dai hpe gara hku ga shadawn mai na kun?

13 Kasa Yawhan gaw Yehowa hpyi shawn ai ni hte seng nna “shi a hkang da ai ga chyawm gaw, anhte a matu yak la nga ai n rai” nga nna tsun wa ai. 1 Yawhan 5:3 hta “yak la nga ai” nga nna ga gale da ai ga si gaw, Greek ga hta “li ai” ngu lachyum nga ai. * Yehowa hpyi shawn da ai tara ni gaw rap ra ai, li ai n re. Shi a hkang da ai tara ni gaw n hkum tsup ai shinggyim masha ni n lu hkan sa ai baw ni n re.

14 Ndai ga shadawn hpe myit yu ga. Nang hte grai hkau ai manang gaw shi nta htawt na matu nang hpe karum hpyi ai. Hpai ra na sutdek ni grai law ai. Nkau mi gaw tsang nna marai langai sha lu hpai tim, nkau mi gaw grai li ai majaw marai lahkawng she mai ai. Na a manang gaw shi hpai shangun mayu ai sutdek ni hpe lata ya ai. Na matu grai li ai sutdek hpe shi hpai shangun na kun? N re. Dai hpe nang hkrai hpai nna hkra machyi mat na hpe shi byin shangun mayu na n re. Dai zawn sha, tsawra myit rawng ai Karai Kasang mung, li la ai lit ni hpe anhte hpai na matu galoi mung hpyi shawn na n re. Tsun mayu ai gaw, anhte n hkan sa lu ai yak la ai tara ni hpe hpyi shawn  na n re. (Tara Jahprang 30:11-14) Yehowa gaw “anhte a hkum tsawp hpe shi chye ya nga ai, Anhte ga nhpu rai nga ga ai hpe, shi dum nga ai” majaw anhte n lu galaw ai ni nga ai hpe shi chye na ya ai.​—Shakawn 103:14.

15. Yehowa a tara ni gaw anhte hpe akyu jaw ai ngu hpa majaw kam mai ai kun?

15 Yehowa a tara ni gaw n yak ai sha n-ga anhte hpe akyu pyi jaw ai. (Esaia 48:17 hpe hti u.) Dai majaw, moi na Israela ni hpe Mawshe ndai hku tsun ai: “dai ni rai nga ai hte maren anhte a asak hpe bau ya nga na matu, anhte a tut nawng na ngamai nhpang tai lu hkra, anhte a Karai Kasang Yehowa hpe hkrit hkungga nga mu ga nga, Yehowa gaw ndai matsun maroi ga nlang anhte hpe tawn da ya ai.” (Tara Jahprang 6:24) Yehowa gaw anhte hpe htani htana akyu lu shangun mayu ai majaw, tara ni hpe jaw da ai lam anhte kam mai ai. Dai hta grau kaja ai lam n nga sai. Yehowa a hpaji byeng-ya gaw shadawn n lu ai. (Roma 11:33) Dai majaw anhte a matu gara gaw kaja htum re ai hpe shi chye ai. Yehowa gaw tsawra myit a madung mung rai nga ai. (1 Yawhan 4:8) Shi tsun shaga ai lam hte galaw ai lam shagu gaw tsawra myit hta madung nga ai. Shi a mayam ni a matu hkang da ai tara ni mahkra hta tsawra myit lawm ai.

16. N hkru ai mungkan a shingkang ka-up ai hte n hkum tsup ai a akyang ni nga tim, madat mara ai lam hpa majaw madun lu ai kun?

16 Karai Kasang a ga madat na matu loi ai ngu tsun mayu ai gaw n re. Anhte gaw “n hkru ai wa” a npu hta nga nga ai mungkan a shingkang ka-up ai hpe ninghkap nga ra ai. (1 Yawhan 5:19) Karai Kasang a tara ni hpe tawt lai mayu ai n hkum tsup ai myit hpe mung ninghkap nga ra ai. (Roma 7:21-25) Raitim, Karai Kasang hpe tsawra ai myit a majaw anhte ni awng dang lu ai. Yehowa gaw, shi hpe madat mara nna tsawra ai lam madun mayu ai ni hpe shaman chyeju jaw ai. Shi a ga madat mara ai ni hpe chyoi pra ai wenyi jaw ai. (Kasa 5:32) Chyoi pra ai wenyi gaw madat mara ai lam madun lu na matu atsam ningja ni nga wa hkra karum ya ai.​—Galati 5:22, 23.

17, 18. (a) Ndai laika buk hta gara lam hkaja na kun? Dai lam hpe hkaja ai shaloi gara lam ni hpe matsing da ra na kun? (b) Hpang na daw hta gara lam hkaja na kun?

 17 Ndai laika buk hta Yehowa a npawt tara ni, akyang lailen hte seng ai tara ni, shi ra sharawng ai lam ni law law hpe hkaja lu na re. Dai ni hpe hkaja ai laman, ahkyak ai lam nkau mi hpe matsing da ra ai. Yehowa gaw shi a tara ni hpe atik anang hkan shangun mayu ai n re ai sha, anhte sharawng awng let madat mara ai hpe sha ra ai lam matsing da ga. Ya aten hta shaman chyeju lu la nna, htawm hpang hta mung htani htana asak lu shangun mayu ai majaw sha, Yehowa hpyi shawn ai hpe mung matsing da ga. Myit kraw lawang mahkra hte madat mara ai gaw, Yehowa hpe grai tsawra ai lam madun lu ai ahkaw ahkang langai re ai hpe mung hkaja na re.

18 Jaw ai hte shut ai hpe chye ginhka lu na matu Yehowa gaw “myit nsam” hpe kumhpa hku nna anhte hpe jaw da ai. Raitim, anhte a myit nsam gaw anhte hpe jaw ai hku lam matsun lu na matu shaman da ra ai. Dai lam hpe hpang na daw hta hkaja yu ga.

^ စာပိုဒ်၊ 11 N hkru ai nat ni pyi madat mara ma ai. Raitim myit lawm nna madat mara ai gaw n re. Nat shung ai masha ni kaw nna pru mat na matu nat ni hpe Yesu tsun ai shaloi, shanhte myit n lawm tim Yesu a ga hpe madat wa ai.​—Marku 1:27; 5:7-13.

^ စာပိုဒ်၊ 13 Dai Greek ga si hpe sha, Mahte 23:4 hta “li la ai lit” ngu ga gale da ai. Laika ka ai sara ni hte Hparishe ni gaw, masha ni hpe lit li na matu mara da ai tara ni, masha htung lailen ni hpe tsun mayu ai re.