Content de lai

Malawm Ni Hpe Lai U

 DAW 9

“Hpye Ai Amu Hpe Koi Gam Nga Mu”

“Hpye Ai Amu Hpe Koi Gam Nga Mu”

“Hpye ai amu, awu asin re ai amu, ngang kayut ai, n hkru n hkra re ai marin marit ai hte, gawngngu sumla nawku ai rai nga ai nammak lawhpa ngu ai, ga ningtsa na nanhte a daw shan ni hpe sat kau mu.”​—KOLOSE 3:5.

1, 2. Yehowa a masha ni hkra machyi na matu Balam gara hku galaw wa ai kun?

MASHA langai gaw nga myek na matu nta kaw na pru wa ai. Shi a myit hta nga amyu mi hpe dawn mayu ai. Dai majaw, nga shat hpe lata nna, noi dat ai. Dai hpang, nga myek shingna hpe hka de jahkrat dat ai. Kade n na yang, sumri kang wa nna nga myek shingna li wa ai majaw, dai hpe ntsa de shalun dat ai. Shi hkwi mayu ai nga ra ai nga shat hpe lang nna, lu hkwi dat ai majaw grai pyaw mat ai.

2 B.C. 1473 ning hta Balam ngu ai wa mung, mahkam hkam na matu myit wa ai. Shi hkam mayu ai gaw, Ga Sadi Tawn Da Ai Mungdan a ga jarit, Moba Pa Layang hta dap jung nga ai Karai Kasang a masha ni hpe re. Balam gaw tinang hkum tinang Yehowa a myihtoi nga nna tsun tim, gaja nga yang lawhpa ai wa re. Israela masha ni hpe matsa na matu shi hpe shap ai shaloi, hkap la ai. Raitim, Yehowa karum ya ai majaw Israela masha ni hpe shaman ai ga sha lu tsun ai. Dai majaw, ma-un kumhpa lu mayu ai Balam gaw Israela ni hpe mara kaba galaw hkra gunglau lu yang, Karai Kasang nan shanhte hpe ari jaw na nga nna myit wa ai. Dai lam awng dang na matu, grai tsawm nna hkalem chye ai Moba numsha ni hpe asung jashawn nna shi mahkam hkam wa ai.​—Bu Hkawm 22:1-7; 31:15, 16; Shingran 2:14.

3. Balam galaw ai lam kade daram awng dang wa ai kun?

3 Dai zawn galaw ai lam awng dang wa ai kun? Loi mi gaw awng dang wa ai. Mun lam hku law ai Israela la ni gaw, hkalem  hkrum nna “Moba num ni hte shut hpyit ai lam galaw ma ai.” Matsat shabat re ai ngang hte seng ai hpara Bala-Peora hte rau Moba hpara ni hpe pyi shanhte nawku wa ma ai. Dai majaw, Israela masha 24,000 gaw Ga Sadi Tawn Da Ai Mungdan a ga jarit hta si mat wa ra ai. Grai yawn hpa re.​—Bu Hkawm 25:1-9.

4. Mun lam hku law ai Israela ni hpa majaw hpye ai amu galaw ai mahkam hta hkrat sum mat ai kun?

4 Ndai zawn n kaja ai lam hpa majaw byin wa ai kun? Yehowa Karai Kasang hpe kau da nna n kaja ai myit masin nga wa ai majaw re. Gaja nga yang, Karai Kasang gaw shanhte hpe Egutu mung kaw nna hkye la ai, nam maling hta lusha jaw sha nna ga sadi tawn da ai mungdan de shim lum let du na matu lajang ya wa ai. (Hebre 3:12) Ndai lam hpe myit dum nna kasa Pawlu ndai hku ka ai: “Shanhte nkau mi hpye ai amu galaw nna, lani mi hta sha mun lahkawng e hkying masum rum mat ma ai zawn, anhte gaw hpye ai amu n galaw ga.” *​—1 Korinhtu 10:8.

5, 6. Moba Pa Layang hta Israela masha ni tara tawt lai wa ai labau lam gaw dai ni aten hta na anhte a matu hpa majaw ahkyak ai kun?

5 Bu Hkawm Laika labau gaw grau htum ai ga sadi tawn da ai mungdan a chyinghka makau kaw du nga ai dai ni aten na Karai Kasang a masha ni hpe, ahkyak ai lam ni sharin ya ai. (1 Korinhtu 10:11) Ga shadawn, hpye ai amu galaw na matu grai ra  sharawng nga ai ya prat na masha ni gaw, Moba Masha Ni hta na pyi grau sawng nga ai. Dai hta n-ga, shaning shagu mun lam hku law ai Hkristan ni gaw, Israela masha ni zawn hpye ai amu galaw ai mahkam hta hkrat sum nga ai. (2 Korinhtu 2:10, 11) Zimri gaw Midian numsha langai hpe Israela dap hta nga ai shi a sum kata de shaga shang wa ai. Dai ni na aten hta mung Zimri zawn, Karai Kasang a masha ni hte kanawn nga ai masha nkau mi gaw, Hkristan Hpung hta n kaja ai shingkang ka-up taw nga ai.​—Bu Hkawm 25:6, 14; Yuda 4.

6 Nang gaw ga shadawn hku nna Moba Pa Layang hta du nga ai hpe chye ai kun? Kade n na yang lu la sana mungkan nnan shaman chyeju hpe mu ai kun? Rai yang, “hpye ai amu hpe koi gam nga mu” nga ai ga hpe madat u. Dai hku nna Karai Kasang a n-gaw nwai ai tsawra myit hta a nga nga na matu shakut u.​—1 Korinhtu 6:18, JCLB.

Moba Pa Layang

HPYE AI AMU NGU AI GAW HPA RAI KUN?

7, 8. “Hpye ai amu” ngu ai gaw hpa rai kun? Hpye ai amu galaw ai ni gaw gara lam hku nna gat hkai ai hte maren dan la ra ai kun?

7 Chyum Laika hta tsun da ai “hpye ai amu” (Greek ga hku, por·neiʹa) ngu ai ga si gaw, Chyum Laika tara hte maren n hkungran ai sha, tara n shang num la nga sha ai hpe tsun mayu ai re. Dai hta, numshaw lashaw ai, shawa num galaw ai, n-gup hte hpye ai amu galaw ai (oral sex), maidang hku hte hpye ai amu galaw ai (anal sex), tinang hte n hkungran da ai wa a gindai hpe jum ai lam ni lawm ai. Dai hta n-ga, dai zawn akyang ni hpe la shada, num shada raitim, dusat ni hte raitim galaw ai lam ni mung lawm ai. *

8 Hpye ai amu galaw ai ni gaw, Hkristan hpung hte matut nna kanawn mazum lu na n re ai sha n-ga, htani htana asak mung lu na n re nga nna Chyum Laika hta dan dan leng leng tsun da ai. (1 Korinhtu 6:9; Shingran 22:15) Ya aten hta pyi, shanhte gaw n kaja ai akyu ni hkamsha ra ai. Dai ni gaw, tinang hkum tinang  kam ai lam hte hkungga ai lam n nga ai, dinghku hta ngwi pyaw lam n nga ai, myit nsam n san seng ai, n ra ai sha ma hkum lu ai, ana zinli lu ai, asak sum ai baw pyi byin chye ai. (Galati 6:7, 8 hpe hti u.) Dai daram n kaja ai akyu ni hkrum na lam de hpa majaw sa na kun? Yawn hpa lam gaw, masha law law gaw shawng nnan lam shut ai aten hta, n kaja ai akyu ni byin wa na hpe n myit hkrup ma ai. Nse nsa sumla ni hpe yu ai, hti ai kaw nna shawng nnan lahkam htawt shut ai re.

SHAWNG NNAN NA LAHKAM​—NSE NSA SUMLA

9. Nse nsa sumla gaw masha nkau mi tsun ai hku gaja wa shoihpa n nga ai kun? Sang lang dan u.

9 Mungdan law law hta laika buk seng, yu ngwi, TV hte law malawng hku nna internet hta nse nsa sumla ni chyam bra nga ai. * Dai gaw nkau mi tsun ai hku shoihpa n nga ai kun? N re. Nse nsa sumla yu ai ni gaw tinang hkrai ngang kayut shamai ai (masturbation) akyang nga ai masha byin wa nna, “kaya kahpa re ai ngang kayut ai” lam nga wa ai. * N kaja ai akyu hku nna ngang hpe ra marin ai, shingra tara hte n htan shai ai myit ni pru wa ai, dinghku n pyaw ai lam hte hka bra ai lam du hkra byin wa chye ai. (Roma 1:24-27; Ehpesu 4:19) Ngang kayut ai hpe ra marin ai myit gaw, mawng ana (cancer) hte bung ai nga nna hpaji du langai tsun ai. “Matut kaba wa nna chyam bra mat ai, ra marin ai lam mat mat na matu grai yak ai sha n-ga, tsi tsi na matu mung grai yak ai” nga nna shi tsun ai.

Masha ni mu lu ai shara hta internet lang ai gaw hpaji rawng

10. Yaku 1:14, 15 hta lawm ai npawt tara hpe gara lam hku akyu jashawn mai ai kun? (“ Akyang Lailen San Seng Na Matu N-gun Lu Ai Lam” ngu ai lawk hpe yu u.)

10 Yaku 1:14, 15 hta lawm ai ga ni hpe dinglik yu u: “Kadai rai ti mung, tinang a myit kayut ai hta, len nang ai hte agaw hkalem ai hkrum nga yang gaw, gunglau ai hkrum nga ai. Dai myit  kayut ai chyawm gaw na-um nasin rai wa jang, yubak hpe shangai dat wu ai; yubak mahtang gaw kunghpan wa jang, si ai hpe shaprat dat wu ai.” Dai majaw, n kaja ai lam ni myit hta shang wa yang kalang ta shaw kau u. Ga shadawn, ngang myit hpe sharawt ya ai sumla ni hpe n myit mada ai sha yu hkrup yang, kalang ta kaga de yu dat u. Shing nrai, computer hpe pat kau u (sh) TV line galai dat u. N kaja ai myit ni matut kaba wa nna, nang hpe shingkang ka-up kau ai du hkra, n byin na matu galaw ging ai lam shagu hpe galaw u.​—Mahte 5:29, 30 hpe hti u.

11. N kaja ai myit hpe ninghkap ai hta Yehowa hpe kamhpa ai lam gara hku madun mai na kun?

11 Anhte a lam hpe anhte hta grau chye ai Madu gaw anhte akyu lu na matu ndai hku tsun da ai: “Dai re ai majaw, hpye ai amu, awu asin re ai amu, ngang kayut ai, n hkru n hkra re ai  marin marit ai hte, gawngngu sumla nawku ai rai nga ai nammak lawhpa ngu ai, ga ningtsa na nanhte a daw shan ni hpe sat kau mu.” (Kolose 3:5) Dai hku galaw na matu yak la nga ai. Raitim, tsawra myit nga nna myit galu ai sumsing lamu na Wa hpang de karum hpyi mai ai lam hpe dum u. (Shakawn 68:19) Dai majaw n kaja ai myit ni nga wa yang, kalang ta akyu hpyi u. “Chyahtum chyalai re ai n-gun atsam” jaw na matu akyu hpyi u. Kaga lam ni hpe myit dat u.​—2 Korinhtu 4:7; 1 Korinhtu 9:27; Laika man 104 hta na “ N Kaja Ai Akyang Hpe Ngai Gara Hku Ninghkap Lu Na Kun?” ngu ai lawk hpe yu u.

12. Anhte a “myit masin” ngu ai gaw hpa rai kun? Hpa majaw makawp maga ra ai kun?

12 “Myit masin gaw asak a npawt nhpang rai nga ai majaw, Dai hpe tsam mari bau sin nga u” nga nna hpaji du Shawlumon ka da ai. (Ga Shagawp 4:23) Anhte a “myit masin” ngu ai gaw, Karai Kasang a man hta anhte gaw, kaning re ai masha re ai hpe madun ai anhte a myit hpe tsun mayu ai re. Htani htana asak lu ging ai, n lu ging ai ngu ai gaw anhte a “myit masin” hpe, Karai Kasang mu mada ai lam hta sha madung ai. Kaga masha ni a mu mada ai lam a ntsa madung ai n re. Dai gaw asak hte seng nga ai. Sadi dung ai Yoba gaw num langai hpe ra marin ai myit hte n yu na matu myi hte ga shaka tawn wa ai. (Yoba 31:1) Grai kaja ai kasi re. Shakawn kungdawn sara mung dai zawn myit jasat madun dan nna “kaman lila hpe n mu n ga, nye a myi kayin la ya e” nga nna akyu hpyi ai.​—Shakawn 119:37.

DINA A HPAJI N RAWNG AI HKU LATA AI LAM

13. Dina gaw kadai rai kun? Shi manaw manang lata ai lam gaw hpa majaw hpaji n rawng ai kun?

13 Daw 3 hta anhte mu lu ai hte maren, manaw manang ni gaw anhte a ntsa kaja ai akyu (sh) n kaja ai akyu shabyin lu ai. (Ga Shagawp 13:20; 1 Korinhtu 15:33 hpe hti u.) Yaku a kasha Dina a mabyin hpe myit yu u. Shi gaw sharin achyin lam atsawm lu wa tim, hpaji n rawng let Hkanan numsha ni hte manang galaw wa ai. Moba masha ni zawn Hkanan amyu masha ni mung, hpye ai amu galaw ai lam hta mying kaba ai. (Jaw Jau 18:6-25) “Shi kawa a amyu mahkra hta arawng grau  nna lu” ai Shehkem hte Hkanan lasha ni gaw, Hkanan numsha ni zawn, Dina mung hpye ai amu galaw na matu, hkap la na zawn shadu ma ai.​—Ningpawt 34:18, 19.

14. Dina a n kaja ai manaw manang lata ai majaw hpa byin wa ai kun?

14 Dina gaw Shehkem hpe mu ai shaloi shi hte hpye ai amu galaw na nga nna myit da na n re. Raitim, Shehkem gaw ngang kayut ai myit nga wa ai shaloi, Hkanan masha ni yu maya ngu hkam la da ai amu hpe galaw wa ai. Dina hpe “mu nna woi wa nhtawm, . . . woi yup” kau ai. Dina maga hku nna hpang jahtum aten du hkra ningdang tim majoi sha rai mat sai. Dai hpang, Shehkem gaw, Dina hpe “tsawra” mat tim, Dina a ntsa shi tawt lai wa ai lam hpe gaw n galai shai lu ai. (Ningpawt 34:1-4 hpe hti u.) Dina langai sha n kaja ai akyu hkamsha ra ai n re. Shi a n kaja ai manaw manang lata ai lam a majaw, nta masha yawng sari jahpoi hkrum wa ai.​—Ningpawt 34:7, 25-31; Galati 6:7, 8.

15, 16. Teng man ai nyan hpaji hpe gara hku lu mai ai kun? (“ Sumru Ra Na Chyum Daw Ni” ngu ai lawk hpe yu u.)

 15 Dina gaw n kaja ai akyu ni hkamsha ngut yang she, ahkyak ai lam sharin la lu ai. Yehowa hpe tsawra nna madat mara ai ni gaw, n kaja ai akyu ni hkamsha ngut yang she sharin la ai baw n byin ai. Karai Kasang a ga madat ai majaw, “hpaji rawng ai ni hte kanawn” na matu lata ma ai. (Ga Shagawp 13:20a) Shanhte gaw, “mai kaja ai lam shagu” hpe chye na da ai majaw, manghkang  ni hte myit machyi hpa lam ni hpe koi lu ai.​—Ga Shagawp 2:6-9; Shakawn 1:1-3.

16 Karai Kasang kaw nna nyan hpaji lu mayu ai myit hte nsim nsa akyu hpyi na, Chyum Laika hte sadi dung ai mayam kaw nna hkyen lajang ya ai laika ni hpe ayan hkaja na nga yang, nyan hpaji hpe lu wa na re. (Mahte 24:45; Yaku 1:5) Shagrit shanem ai myit nga na matu mung ahkyak ai. Rai yang she, Chyum Laika hpaji ga hpe sharawng awng ai hte madat lu na re. (2 Hkawhkam 22:18, 19) Ga shadawn, myit masin gaw magaw nna kam ai hku galaw chye ai lam Hkristan langai hkap la na re. (Yeremia 17:9) Raitim, ra ang ai majaw tsawra myit hte sharin shaga hkrum wa ai shaloi, shi shagrit shanem let madat mara ai kun?

17. Nta masha ni hta byin wa chye ai masa langai hpe tsun dan u. Kawa gaw kasha hte rau sawn dinglik mai ai lam ni hpe tsun dan u.

17 Ndai mabyin hpe myit yu u. Kawa langai gaw shi a kasha numsha hpe Hkristan lasha langai hte marai lahkawng sha, wam hkawm na ahkang n jaw ai. Kasha gaw “Awa, ngai hpe n kam ai i? Anhte n kaja ai hpa mung n galaw ai” ngu bai tsun ai. Kasha re ai wa gaw, Yehowa hpe tsawra nna myit ding man ai. Raitim, shi gaw “hpaji lam hkan” nga ai kun? “Hpye ai amu hpe koi gam” nga ai kun? Shing nrai hpaji n rawng ai sha “tinang myit hpe machyu” nga ai kun? (Ga Shagawp 28:26) Ndai lam hpe myit yu ai shaloi, kawa hte kasha a matu madi shadaw ya ai kaga npawt tara ni hpe nang myit yu mai ai.​—Ga Shagawp 22:3; Mahte 6:13; 26:41 ni hpe yu u.

HPYE AI AMU HPE YOSEP KOI GAM WA

18, 19. Gara agung alau hpe Yosep hkrum wa ai kun? Shi gara hku ninghkap wa ai kun?

18 Karai Kasang hpe tsawra ai majaw, hpye ai amu hpe koi gam wa ai ramma langai gaw Dina a kayung Yosep re. (Ningpawt 30:20-24) Kana re ai wa hpaji n rawng ai hku galaw wa ai majaw, n kaja ai akyu ni hkamsha wa ai hpe Yosep kaji ai aten hta mu ai. Dai mabyin hpe shi galoi mung n malap ai. Karai Kasang a n-gaw nwai ai tsawra myit hta nga mayu ai Yosep a myit gaw, htawm hpang hta shi hpe makawp maga ya wa ai. Egutu mung hta, shi  a madu na madu jan gaw, “shani shagu” shi hpe gunglau wa ai shaloi re. Yosep gaw mayam langai rai nga ai majaw, bungli kaw na pru mai na n re. Mabyin masa hpe hpaji rawng ai hku, marai rawng ai hku hparan ra na re. Hputihpa a madu jan hpe lang shagu ningdang kau nna, hpang jahtum hta gaw shi hprawng pru wa ai.​—Ningpawt 39:7-12 hpe hti u.

19 Myit yu u. Yosep gaw dai num a lam myit taw na (sh) hpye ai amu galaw na matu sha myit taw na nga yang, shi a ding hpring ai lam hpe hkang lu na kun? Hkang lu na n re. N kaja ai hpe sumru na malai, Yehowa hte hku hkau lam hpe Yosep manu shadan ai lam, Hputihpa a madu jan hpe tsun ai ga hta mu lu ai. “Nye a madu gaw . . . nang hta kaga hpa mung ngai hpe hkum ai n rai; nang gaw shi a madu jan she rai ndai: dai rai nna dai n hkru ai amu kaba hte Karai Kasang a man e ngai kaning rai shut hpyit lu na rai ta?” nga nna shi tsun ai.​—Ningpawt 39:8, 9.

20. Yosep hte seng nna Yehowa gara hku lajang ya wa ai kun?

20 Ramma Yosep gaw, nta masha ni hte tsan nga ai raitim, ding hpring ai lam hta shani shagu hkawm sa nga ai hpe Yehowa mu ai shaloi, kade daram kabu na hpe myit yu u. (Ga Shagawp 27:11) Htawm hpang hta, Yehowa lajang ya wa ai majaw, Yosep gaw htawng kaw nna lawt wa ai sha n-ga, Egutu mung a hkringmang daju hte lusha garan kachyan ya ai hpaawn hku nna lit ap hkrum wa ai. (Ningpawt 41:39-49) “Yehowa hpe tsaw ra ai ni e, n hkru ai hpe n dawng kau mu; Shi hpe kam sham ai ni a myit masin hpe shi sin nga ai: Tara n lang ai ni a lata  na, shi shanhte hpe mawai la mu ai” nga ai Shakawn Kungdawn 97:10 hta lawm ai ga ni gaw gaja wa teng nga ai.

21. African mungdan langai kaw na hpunau gaw ding man ai lam gara hku madun wa ai kun?

21 Dai ni na aten hta mung, Karai Kasang a mayam ni gaw “n kaja ai hpe n dawng nna, kaja ai hpe tsaw ra” ai lam madun nga ai. (Amo 5:15) African mungdan kaw na hpunau hpe numsha langai gaw, san poi htai ai aten hta shi hpe jawng laika karum ya yang, rau yup shangun na ngu tsun wa ai. “Ngai kalang ta nyet kau ai. Ngai ding hpring ai lam hkang lu ai majaw, aja, gumhpraw hta grau manu dan ai sari hte tinang hkum tinang hkungga ai lam matut lu la ai” ngu shi tsun ai. Mara galaw yang, chyahkring mi pyaw lu tim, de a majaw manghkang kaba byin wa chye ai. (Hebre 11:25) Yehowa a ga madat ai majaw, lu la na htani htana ngwi pyaw lam hte shingdaw dat yang dai gaw hpa n rai mat sai.​—Ga Shagawp 10:22.

KARAI KASANG KAW NA KARUM YA AI LAM HKAP LA U

22, 23. (a) Hkristan langai mara kaba galaw hkrup yang, myit mada lam n nga sai nga nna hpa majaw n lu tsun ai kun? (b) Mara galaw ai wa gaw hpa karum shingtau lam lu mai ai kun?

22 Anhte yawng n hkum tsup ai majaw hkum shan ra marin ai myit hpe asum n jaw na matu, jaw ai hpe galaw na matu shakut shaja let ninghkap ra ai. (Roma 7:21-25) Dai hpe Yehowa chye da ai. Anhte “ga nhpu rai nga ga ai hpe, shi dum nga ai.” (Shakawn 103:14) Raitim, Hkristan langai gaw mara kaba galaw hkrup chye ai. Dai shaloi, shi myit mada lam n nga sai kun? N re. Mara galaw ai wa gaw Hkawhkam Dawi zawn, n kaja ai akyu ni hpe dan la ra ai. Raitim, myit malai lu nna yubak mara hpe “shapraw dan” ai ni hpe Karai Kasang “mara raw kau ya” na matu jin jin rai nga ai.​—Shakawn 86:5; Yaku 5:16; Ga Shagawp 28:13 hpe hti u.

23 Dai hta n-ga, Karai Kasang gaw Hkristan hpung hta atsam nga nna karum na matu jin jin rai nga ai kunghpan ai sagu rem ni hpe “kumhpa” hku nna jaw da ai. (Ehpesu 4:8, 11; Yaku 5:14, 15) Shanhte a bandung gaw, mara galaw ai wa hpe Karai  Kasang hte hku hkau wa hkra, “nyan lu la” nna, mara n kahtap galaw hkra, karum ya na matu re.​—Ga Shagawp 15:32.

“HPAJI LU AI WA”

24, 25. (a) Ga Shagawp 7:6-23 hta lawm ai ramma gaw “nyan n rawng ai” lam gara hku madun wa ai kun? (b) Anhte gara lam hku nna “hpaji lu ai wa” byin mai ai kun?

24 Chyum Laika hta “nyan n rawng ai” wa hte “nyan lu” ai wa a lam tsun da ai. (Ga Shagawp 7:7) “Nyan n rawng ai” wa gaw kunghpan ai lam n nga ai, Karai Kasang a amu hta mahkrum madup n nga ai majaw atsawm dawdan lu ai atsam, sawn maram lu ai atsam nga na n re. Ga Shagawp 7:6-23 hta tsun da ai ramma zawn, shi gaw mara kaba hpe aloi sha galaw hkrup chye ai. Raitim, “hpaji lu la ai wa” gaw akyu hpyi nna, Chyum Laika hpe shani shagu hkaja ai hku nna, tinang a myit masin hpe atsawm san jep ai. Shi gaw n hkum tsup tim, shi a sumru ai lam, ra sharawng ai lam, hkamsha ai lam hte bandung ni hpe Karai Kasang myit ra ai hku byin na matu dang lu ai daram shakut ai. Shi gaw, “tinang myit masin hpe tsaw ra” ai majaw, “mai kaja ai” hpe hkam la lu na re.​—Ga Shagawp 19:8.

25 Tinang hkum tinang ndai hku san u: ‘Karai Kasang a tsang madang ni gaw teng man ai hpe ngai tsep kawp kam ai kun? Dai ni hpe hkan sa yang gaja wa ngwi pyaw lam lu na hpe ngai kam ai kun?’ (Shakawn 19:7-10; Esaia 48:17, 18) Dai ni hpe ntsen ai myit loi mi nga taw ai nga yang pyi, hparan na matu shakut u. Karai Kasang a tara ni hpe ahpa atang sawn la ai majaw, byin wa ai n kaja ai akyu ni hpe myit sumru yu u. Teng man ai lam hte maren asak hkrung nna, mai kaja ai lam, ding hpring ai lam, chyoi pra ai lam, tsawra myit nga ai lam ni hte na a myit masin hpe jahpring da u. Dai lam hku nna ‘Yehowa mai kaja nga ai hpe, chyim yu nna chye’ na matu shakut u. (Shakawn 34:8; Hpilipi 4:8, 9) Dai rai yang, Karai Kasang hte shi tsawra ai lam hpe grau tsawra wa nna, shi n ju n dawng ai lam hpe grau n ju n dawng wa na re. Yosep gaw atsam kaba ai masha langai n re. Raitim, “hpye ai amu hpe koi gam” lu wa ai. Hpa majaw nga yang, shi a prat hkrun lam hta Yehowa sharin ya ai lam hpe hkam la wa nna, Yehowa myit ra ai hku galaw mayu ai majaw re. Nang mung dai hte maren rai u ga.​—Esaia 64:8.

26. Hpang na daw hta gara ahkyak ai lam hpe hkaja lu na kun?

 26 Anhte a Hpan Madu gaw shinggyim maka hkrang hpe myit kahpra shangun ai ginsup hpa zawn n re ai sha, mayat maya na matu, dinghku hta dinghku num, la shada da grau hku hkau wa na matu, yaw shada nna hpan da ya ai re. (Ga Shagawp 5:18) Hpang na daw lahkawng hta dinghku hte seng ai Karai Kasang a mu mada ai lam hpe hkaja lu na re.

^ စာပိုဒ်၊ 4 Bu Hkawm Laika hta madun da ai hti hkum hta, tara agyi ni sat kau ai “du nlang” 1,000 hte Yehowa nan sat kau ai masha ni lawm na nga nna sawn la lu ai.​—Bu Hkawm 25:4, 5.

^ စာပိုဒ်၊ 7 N san seng ai hte man jahtat ninghkap ai akyang a lachyum hpe Yehowa Sakse Ni dip shapraw da ai 2006, July 15, Sin Langchyi (w-BU) kaw lawm ai “Laika Hti Ai Ni Hpang De Na Ga San” ngu ai hpe yu u.

^ စာပိုဒ်၊ 9 “Nse nsa sumla” ngu ai gaw ngang kayut ai myit hpe sharawt ya ai sumla, laika, nsen hpe tsun mayu ai. Ngang myit hpe sharawt ya ai hku byin hkra kayat da ai sumla hte nawng, marai lahkawng (sh) lahkawng hta n-ga grai matsat na zawn rai hkra hpye ai amu galaw nga ai sumla ni lawm ai.

^ စာပိုဒ်၊ 9 Tinang hkrai ngang kayut shamai ai lam hpe “Tinang Hkrai Ngang Kayut Shamai Ai Hpe Ning Hkap Lu”ngu ai Bungjat Daw hta sang lang da ai.