Content de lai

Malawm Ni Hpe Lai U

 BUNGJAT

Garan Nga Ai Lam, Hka Ai Lam Hte Seng Ai Chyum Laika Ningmu

Garan Nga Ai Lam, Hka Ai Lam Hte Seng Ai Chyum Laika Ningmu

Yehowa gaw, dinghku de ai ni hpe hkungran ga sadi grin shangun mayu ai. Shawng nnan na, num hte la hpe hkungran ya ai aten hta “lasha gaw . . . shi a madu jan hte manoi nga na rai nna, shan lahkawng gaw hkum shan langai sha tai lu na ma ra ai” nga nna Yehowa tsun ai. Yesu mung, dai ga hpe tsun ngut ai hpang, kahtap nna “Karai Kasang matut da nu ai hpe, masha gaw n jahka kau u ga” nga nna tsun wa ai. (Ningpawt 2:24; Mahte 19:3-6) Hkungran ai lam hpe prat ting a makyit sumri hku nna, Yehowa hte Yesu mu mada ai. Ningrum ningtau si mat yang she dai sumri di mat ai. (1 Korinhtu 7:39) Yehowa gaw, hkungran ai hpe grai manu shadan ai majaw, jahka ai lam hpe ahpa atang n sawn la ging ai. Chyum  Laika tara hta madung n tawn ai sha, jahka ai lam hpe Yehowa n ra sharawng ai.​—⁠Malahki 2:15, 16.

Hka na matu, Chyum Laika a madung lam gaw hpa rai kun? Numshaw lashaw ai hte hpye ai amu hpe Yehowa n ju n dawng ai. (Ningpawt 39:9; 2 Samuela 11:26, 27; Shakawn 51:4) Hpye ai amu hpe grai matsat ai majaw, jahka na matu ahkaw ahkang jaw da ai. (Hpye ai amu hta hpa ni lawm ai hpe sang lang da ai Daw 9, laika pang 7 hpe yu u.) Dai majaw, jahka kau na (sh) matut nna rau nga na lam ni hpe, mara n nga ai ningrum ningtau wa dawdan lu ai ahkang Yehowa jaw da ai. (Mahte 19:9) Hka na matu shi dawdan yang, Yehowa gaw dai hpe mara ngu mu na n re. Raitim, Hkristan nawku hpung gaw, hka na matu n-gun jaw ai lam ni galaw na n re. Mara n nga ai ningrum ningtau gaw, mara galaw ai wa hte matut nga ra na masa ni nga chye ai. Mara galaw ai wa teng man ai myit malai lu ai shaloi re. Gara hku raitim, Chyum Laika tara ni hte maren hka ai hpe tinang nan dawdan ra nna, byin wa na akyu yawng hpe mung hkap la ra na re.​—⁠Galati 6:5.

Ningrum ningtau gaw hpye ai amu n galaw tim, grai sawng ai masa ni hta garan nga na matu (sh) jahka na matu, Hkristan nkau mi dawdan wa ma ai. Dai zawn masa ni hta, garan nga ai wa gaw “num bai n wa u ga, shing n rai, myi na la wa hte bai hkau chyap u ga” ngu, Chyum Laika hta tsun da ai. (1 Korinhtu 7:11) Dai zawn garan nga ai Hkristan langai gaw, dinghku bai de na ahkang n nga ai. (Mahte 5:32) Garan nga ra ai ngu, masha nkau mi mu mada ai masa ni hpe yu yu ga.

Ding sang n madi shadaw ai. Madu wa gaw, dinghku hpe madi shadaw ya lu tim, ra rawng ai ni hpe n madi shadaw ya ai majaw, grai jamjau nga na re. Chyum Laika hta “marai langai ngai tinang hte seng ai . . . nta na ni hpe n bau ai wa gaw, dai makam masham hpe nyet kau nna, n kam n sham ga ai wa hta grau nna n hkru nga ai” ngu tsun da ai. (1 Timohti 5:8) Madu wa matut nna n bau ai nga yang, madu jan gaw tinang hte kasha ni a akyu hpe myit nna, tara shang garan nga ging n nga ging dawdan ra ai. Hkristan  langai dinghku hpe n bau ai ngu shiga na yang, myitsu salang ni atsawm maram yu ra ai. Tinang a dinghku hpe n bau ai wa gaw, hpung kaw nna pyi shapraw hkrum chye ai.

Ladu lai kayat zingri ai. Ladu lai kayat zingri hkrum ai ningrum ningtau gaw, hkamja lam hkra machyi ai hta n-ga, asak shoihpa pyi nga chye ai. Kayat zingri ai wa gaw Hkristan langai rai yang, hpung myitsu salang ni gaw, teng n teng atsawm sawk sagawn ging ai. Ladu lai masin pawt nna, lata du chye ai akyang nga ai wa hpe, hpung hta na shapraw kau mai ai.​—⁠Galati 5:19-21.

Nawku daw jau lam hta n shang lawm lu hkra pat shingdang ai. Ningrum ningtau wa gaw, teng man ai nawku daw jau lam hta n shang lawm lu hkra, ayan pat shingdang ai (sh) Karai a tara hpe tawt lai hkra, atik anang galaw yang galaw na re. Dai zawn masa ni hkrum wa yang, “masha ga madat na hta, Karai Kasang a ga mahtang grau madat” lu hkra, tara shang garan nga ra na kun, ngu ai hpe dawdan ra ai.​—⁠Kasa 5:29.

Lahta kaw bawngban wa sai hte maren, grai sawng ai masa ni hta garan nga na (sh) matut rau nga na matu, mara n nga ai ningrum ningtau hpe dip n-gun n jaw ging ai. Kung hpan ai Hkristan ni hte myitsu salang ni gaw, karum madi shadaw ai hte Chyum Laika lam matsun ni jaw mai ai. Raitim, madu jan hte madu wa a lapran hta nga ai, masa yawng hpe shanhte chye na n re. Yehowa sha chye ai. Hkristan madu jan (sh) madu wa gaw, garan nga mayu ai majaw, masa ni hpe grai shapau nna tsun ai gaw, Karai Kasang hte dinghku lamang hpe n shagrau ai hte bung ai. Garan nga mayu ai lam yawng hpe Yehowa chye ai majaw masu lu na n re. “Yawng mayawng gaw shi myi a man e dan leng nga ai hte asan brang lang rai nga ai rai nna, anhte shi a man e jahpan dan lu na ga ai.” (Hebre 4:13) Grai sawng ai masa matut nna hkrum nga ai majaw, garan nga na matu dawdan ai Hkristan langai hpe mara n shagun ging ai. Lani mi hta “anhte yawng mayawng hte gaw, Karai Kasang a tara tingnyang a man e du tsap na ra ga ai.”​—⁠Roma 14:10-12.