Content de lai

Malawm Ni Hpe Lai U

 DAW 4

Ahkang Aya Hpe Hpa Majaw Hkungga Ra Ai Kun?

Ahkang Aya Hpe Hpa Majaw Hkungga Ra Ai Kun?

“Nlang hte hpe hkungga lara di mu.” ​—1 PETRU 2:17.

1, 2. (a) Ahkang aya hpe hkungga na matu hpa majaw yak chye ai kun? (b) Gara ga san ni hpe anhte hkaja na kun?

KANU gaw gawk jasan jaseng galaw shangun ai hpe n kam galaw ai ma langai a lam myit yu ga. N kam galaw ai nsam shi a myi man hta madun nga ai. Kanu tsun nga ai hpe shi na ai. Kanu kawa ni a ahkang aya hpe hkungga ra ai lam shi chye da ai. Raitim, ndai lam hta kanu kawa a ga hpe shi n kam madat ai. Dai ma a mabyin gaw, anhte yawng hkrum ga ai ahkang aya hte seng ai lam hpe hkrang madun dan ai.

2 Ahkang aya hpe hkungga na matu lang shagu gaw loi na n re. Na ntsa ahkang aya nga ai ni hpe hkungga ai lam madun na matu kalang lang yak ga ai kun? Dai rai yang, dai hku byin ai gaw nang langai sha n re. Moi na hta grau nna ahkang aya hpe n hkungga ai prat hta anhte asak hkrung nga ai. Raitim, anhte a ntsa ahkang aya nga ai ni hpe hkungga ra na lam Chyum Laika hta tsun da ai. (Ga Shagawp 24:21) Anhte gaw Karai Kasang a n-gaw nwai ai tsawra myit hta nga mayu ai nga yang, hkungga ai lam gaw n nga n mai re. Dai majaw, ga san nkau mi pru wa ai. Ahkang aya nga ai ni hpe hkungga na matu hpa majaw grai yak ai kun? Dai hku galaw na matu Yehowa hpa majaw hpyi shawn ai kun? Dai hpe madat mara na matu hpa gaw karum ya na kun? Ahkang aya hpe hkungga ai lam gara hku madun mai na kun?

HPA MAJAW YAK AI LAM

3, 4. Yubak hte n hkum tsup ai lam gara hku byin hpang wa ai kun? Mara galaw mayu ai myit gaw ahkang aya hpe hkungga na matu hpa majaw yak shangun ai kun?

3 Ahkang aya nga ai ni hpe hkungga ai lam madun na matu yak chye ai lam lahkawng hpe kadun dawk hkaja yu ga. Langai,  anhte gaw n hkum tsup ai ni re. Lahkawng, anhte a ntsa ahkang aya nga ai ni mung n hkum tsup ai ni re. Yubak hte n hkum tsup ai lam gaw, Edin sun hta Karai Kasang a ahkang aya hpe Adam yan Ewa ninghkap ai shaloi byin wa ai re. Dai majaw ninghkap ai hte kalang ta yubak gaw shang nang wa ai. Dai aten kaw nna ninghkap mayu ai myit gaw shinggyim masha ni hta nga wa ai.​—Ningpawt 2:15-17; 3:1-7; Shakawn 51:5; Roma 5:12.

4 Mara galaw mayu ai myit a majaw anhte law malawng gaw gumrawng wa nna myit kaba wa ai lam nga na matu aloi sha byin wa ai. Myit shagrit shanem lam chyawm gaw nga na matu grai shakut ra ai. Karai Kasang hpe shaning law law sadi dung let nawku wa ai ni pyi gumrawng wa chye ai. Ga shadawn, yakhkak ai lam ni a lapran hta Yehowa a masha ni hte sadi dung let rau hkawm sa wa ai Kora a mabyin hpe yu yu ga. Shi gaw ahkang aya hpe ra marin wa nna, dai aten hta sumnung dik htum ai Mawshe hpe ninghkap wa ai. (Bu Hkawm 12:3; 16:1-3) Hkawhkam Uzia hpe mung myit yu u. Shi a gumrawng ai myit a majaw, Yehowa a nawku htingnu de shang nna hkinjawng ni sha galaw ging ai amu hpe galaw wa ai. (2 Hkawhkam Labau 26:16-21) Shanhte gaw ninghkap ai majaw, n kaja ai akyu law law hkamsha wa ai. Raitim, shanhte a n kaja ai kasi ni gaw anhte a matu akyu nga ai sadi jaw lam ni re. Gumrawng ai myit a majaw ahkang aya hpe hkungga na matu yak chye ai. Dai majaw dai hpe ninghkap ra ai.

5. N hkum tsup ai masha ni gaw ahkang aya hpe gara hku jailang wa ai kun?

5 Maga mi hta, ahkang aya nga ai n hkum tsup ai masha ni gaw, ahkang aya hpe masha ni n hkungga hkra galaw nga ai. Shanhte gaw grai n hkru ai, n tara ai, adip arip di ma ai. Ahkang aya hpe shut shai ai hku jailang wa ai labau ni law law nga ai. (Hpaji 8:9 hpe hti u.) Ga shadawn, Shawlu hpe hkawhkam hku nna Yehowa lata ai shaloi, shi gaw myit shagrit shanem ai masha kaja langai re. Raitim, shi gaw gumrawng wa nna manawn ai myit nga wa ai majaw sadi dung ai Dawi hpe zingri wa ai. (1 Samuela 9:20, 21; 10:20-22; 18:7-11) Hpang de Dawi gaw Israela mungdan a kaja htum hkawhkam langai byin wa ai. Raitim, shi gaw ahkang aya hpe shut ai hku jailang nna, Hiti masha Uria a madu jan hpe zing la kau ai. Mara n nga ai Uria hpe majan pa hta si na  matu, hpyen gasat laja grau ai shara de sa dat ai. (2 Samuela 11:1-17) Masha gaw n hkum tsup ai majaw, ahkang aya hpe jaw ai hku jailang na matu yak chye ai. Ahkang aya nga ai ni gaw Yehowa hpe n hkungga ai shaloi, grau sawng ai. British mung masa lam galaw ai wa gaw ndai hku tsun ai: “Kahtawlik Sarabyin nkau gaw shanhte a ahkang aya hpe jailang nna masha law law hpe zingri zingrat, adip arip galaw wa ai. Dai majaw ahkang aya gaw hten za shangun ai. Ahkang aya grau nga magang, grau hten za magang re.” Dai labau lam ni hpe myit dum let, ahkang aya hpe hpa majaw hkungga ra ai lam dinglik yu ga.

AHKANG AYA HPE HPA MAJAW HKUNGGA RA

6, 7. (a) Yehowa hpe tsawra ai tsawra myit gaw gara lam galaw na matu shadut ya ai kun? Hpa majaw kun? (b) Npu taw ai hta gara myit jasat lawm ai kun? Dai hpe gara hku madun mai ai kun?

6 Yehowa hpe tsawra ai, masha shada da tsawra ai, tinang hkum tinang tsawra ai tsawra myit a majaw, ahkang aya hpe hkungga ai re. Kaga lam ni hta na Yehowa hpe grau tsawra ai majaw shi a myit hpe anhte pyaw shangun mayu ai. (Ga Shagawp 27:11; Marku 12:29, 30 hpe hti u.) Yehowa a awmdawm ahkang aya gaw Edin sun hta mara tam hkrum wa ai. Masha law malawng mung Satan maga de lawm mat nna, Yehowa a uphkang ai lam hpe ningdang kau ai lam anhte chye wa sai. Anhte gaw kabu gara let Yehowa maga de tsap ga ai. Shingran 4:11 hta lawm ai ga ni hpe anhte hti ai shaloi, dai ga ni hpe grai ra sharawng ga ai. Yehowa gaw ninggawn tawa hpe uphkang ging ai Madu re ai lam dan dawng nga ai. Yehowa a awmdawm ahkang aya hpe anhte madi shadaw nna, shani shagu shi a uphkang ai lam hpe hkapla ga ai.

7 Ahkang aya hpe hkungga ai lam gaw, madat mara ai hta n-ga galaw ra ai hpe tsun mayu ai re. Yehowa hpe anhte tsawra ai majaw sharawng awng let madat mara ai. Raitim, madat mara na matu grai yak ai aten ni mung nga ai. Dai aten ni hta anhte gaw shawng nnan hta tsun wa ai ma zawn, npu taw na matu sharin la ra ai. Yesu gaw shi kawa myit ra ai lam galaw na matu grai yak ai aten hta pyi npu taw wa ai lam hpe dum u. “Ngai ra ai hku n rai, nang ra ai hku she rai u ga” nga nna shi a Kawa hpang akyu hpyi wa ai.​—Luka 22:42.

8. (a) Dai ni aten hta Yehowa a ahkang aya hpe npu taw ai lam hta gara lam lawm ai kun? Dai lam hte seng nna Yehowa gara hku hkamsha ai kun? (b) Hpaji jaw ga hpe madat mara nna sharin shaga ai lam hpe hkap la na matu gara lam gaw karum ya lu ai kun? ( “Hpaji Daw Ai Ga Madat La U, Sharin Shaga Ai Ga Hta La U” ngu ai lawk hpe yu u.)

 Ya aten hta, Yehowa gaw anhte langai hpra hte ading tawk ga shaga ai lam n galaw sai. Raitim, Chyum Laika hte mungkan ga hta nga ai shinggyim dat kasa ni hpe jailang nna tsun shaga ai. Dai majaw, anhte hpe woi awn na matu Yehowa lit ap da ai (sh) shi matut nna ahkang naw jaw da ai ahkang aya nga ai ni hpe anhte hkungga ga ai. Dai hku nna Yehowa a ahkang aya hpe npu taw ai lam madun ma ai. Ga shadawn, Chyum Laika hku nna shanhte hpaji jaw ai lam, sharin shaga ai lam hpe n hkap la nna shanhte hpe ninghkap na nga yang, Karai Kasang hpe ninghkap ai hte bung ai re. Israela masha ni aput angun di nna Mawshe hpe ninghkap ai shaloi, Yehowa gaw shi hpe ading tawk ninghkap ai re nga nna mu mada ai.​—Bu Hkawm 14:26, 27.

9. Hpunau nauna ni hpe tsawra ai tsawra myit gaw ahkang aya hpe hkungga na matu hpa majaw shadut ya ai kun? Ga shadawn tsun dan u.

9 Anhte gaw masha shada da hpe tsawra ai majaw mung, ahkang aya hpe hkungga ai re. Hpa majaw kun? Na hkum nang hpyen la langai hku nna shingran yu u. Hpyen dap a awng dang na lam gaw, hpyen la ni shada da jawm galaw ai lam hte woi awn ai hpe madat mara ai lam hta madung ai. Nang gaw ahkang aya hpe n madat na nga yang, na a hpyen la manang ni yawng a matu grai shoihpa nga ai. Shinggyim masha ni a hpyen dap ni gaw, dai ni aten hta mungkan hpe jahten nga ai. Raitim, Yehowa hta masha ni a matu kaja ai lam hpe sha galaw ya ai hpyen la ni nga ai. Chyum Laika hta Karai Kasang hpe “Zaw nawng zaw wa up ai Yehowa” nga nna law law lang tsun da ai. (1 Samuela 1:3) Shi gaw hpung shingkang kaba ai lamu kasa ni lawm ai dap kaba hpe uphkang ai Madu re. Kalang lang mungkan ga hta nga ai mayam ni hpe hpyen luksuk kaba hte Yehowa shingdaw da ai. (Ezekela 37:1-10, JCLB) Anhte hpe woi awn na matu Yehowa ahkang aya jaw da ai ni hpe ninghkap na nga yang, anhte a wenyi hpyen la ni re ai hpunau nauna ni hpe shoihpa nga shangun na re. Hkristan langai gaw aya tang da ai myitsu salang ni hpe ninghkap ai shaloi, hpung hta nga ai kaga ni mung hkra machyi  chye ai. (1 Korinhtu 12:14, 25, 26) Ma langai ga n madat ai shaloi, nta masha ni yawng hkra machyi chye ai. Dai majaw, ahkang aya lu ai ni hpe hkungga ai, arau jawm galaw ai gaw, hpunau nauna ni hpe tsawra ai lam madun ai hte bung ai.

10, 11. Akyu lu mayu ai myit jasat gaw ahkang aya hpe madat mara na matu gara hku shadut ya ai kun?

10 Dai sha n-ga, ahkang aya hpe hkungga ai gaw anhte hpe grai akyu jaw ai. Ahkang aya hpe hkungga na matu anhte hpe Yehowa hpyi shawn ai shaloi, dai zawn galaw ai majaw lu la na shaman chyeju ni hpe mung tsun dan ai. Ga shadawn, kashu kasha ni gaw kanu kawa hpe madat mara na nga yang, asak galu nna ngamu ngamai na nga nna tsun da ai. (Tara Jahprang 5:16; Ehpesu 6:2, 3) Hpung myitsu salang ni hpe hkungga na matu tsun da ai. N hkungga yang, Yehowa hte anhte a hku hkau lam hten za mat chye ai. (Hebre 13:7, 17) Dai sha n-ga, anhte makawp maga hkrum na matu ahkang aya nga ai asuya ni hpe madat mara na matu mung tsun da ai.​—Roma 13:4.

11 Madat mara lam madun na matu Yehowa hpa majaw ra sharawng ai hpe chye ai gaw, ahkang aya hpe hkungga na matu  karum ya ai. Prat hte seng ai madung lam masum hta, ahkang aya hpe hkungga ai lam gara hku madun mai na hpe hkaja yu ga.

DINGHKU HTA HKUNGGA AI LAM

12. Yehowa gaw dinghku hta madu wa hpe gara lit ap da ai kun? Shi gaw dai lit hpe gara hku gun hpai ra ai kun?

12 Yehowa gaw dinghku hpe nnan de ya ai madu re. Karai Kasang gaw dinghku hpe ngwi pyaw simsa na matu lajang da ya ai. (1 Korinhtu 14:33) Madu wa hpe dinghku a baw hku nna woi awn na matu ahkang aya jaw da ai. Madu wa gaw hpung a ntsa Yesu woi awn ai lam hpe kasi la ai. Dai lam hku nna shi a baw re ai Hkristu Yesu hpe hkungga ai lam madun ai. (Ehpesu 5:23) Madu wa gaw shi a lit hpe n hprai ai sha, atsawm gun hpai ra ai. Shi gaw dinghku hpe adip arip galaw ai hku, grai mazut ai hku woi awn na n re ai sha, tsawra myit hte rap rap ra ra woi awn na re. Tinang a ahkang aya gaw shadawn sharam sha nga ai. Yehowa a ahkang aya npu hta galoi mung shi nga ra ai hpe matsing da ai.

Hkristan kawa langai gaw Hkristu woi awn ai lam hpe kasi la

13. Madu jan gaw Yehowa ra sharawng ai lam hte maren dinghku hta tinang a lit hpe gara hku gun hpai lu na kun?

13 Madu jan gaw madu wa hpe ningrum ningtau hku nna madi shadaw ya na re. Chyum Laika hta “nnu a tara hpe mung, hkum gang kau et” ngu tsun da ai majaw, dinghku hta shi mung ahkang aya nga ai. (Ga Shagawp 1:8) Raitim, shi a ahkang aya gaw madu wa a ahkang aya npu hta re. Dinghku a lit hpe madu wa atsawm woi awn lu hkra madi shadaw ya ai hku nna, madu jan gaw madu wa a ahkang aya hpe hkungga ai  lam madun mai ai. Madu wa hpe yu kaji ai, shingdu kaw na hkang ai, madu wa a ahkang aya hpe n hkungga ai sha shi kam ai hku n galaw ai. Dai hku galaw na malai, shi hpe karum madi shadaw ya ai. Madu wa a dawdan ai lam ni gaw tinang ra sharawng ai lam hku n rai yang, tinang a mu mada ai lam hpe mung hkungga let tsun dan mai ai. Raitim, matut nna npu taw ra ai. Shi a madu wa gaw kamsham ai wa n rai yang loi yak na re. Raitim, shi a npu taw chye ai akyang a majaw madu wa hpe Yehowa hpang lau la lu na re.​—1 Petru 3:1, 2 hpe hti u.

14. Kashu kasha ni gaw kanu kawa hte Yehowa hpe gara hku ngwi pyaw shangun lu na kun?

14 Kanu kawa ni a ga hpe ma ni madat ai shaloi, Yehowa myit pyaw ai. Dai hta n-ga, kanu kawa ni mung shakawn shagrau hkrum nna kabu ma ai. (Ga Shagawp 10:1) Kanu kawa n hkum ai dinghku hta nga ai ma ni mung, madat mara ai hte seng ai dai npawt tara hpe hkan sa ma ai. Shanhte a kanu (sh) kawa gaw shanhte a karum shingtau ai lam hpe, grau nna ra kadawn nga ai lam chye ai majaw re. Dinghku masha yawng gaw, Karai Kasang  jaw da ai lit ni hpe gun hpai na nga yang, grai ngwi pyaw simsa ai dinghku byin wa na re. Dai hku galaw ai gaw, dinghku yawng a npawt nhpang re ai Yehowa Karai Kasang hpe shagrau ai re.​—Ehpesu 3:14, 15.

NAWKU HPUNG HTA HKUNGGA AI LAM

15. (a) Yehowa a ahkang aya hpe hkungga ai lam hpung hta gara hku madun na kun? (b) Woi awn ai ni hpe madat mara na matu gara npawt tara ni gaw karum ya na kun? ( Woi Awn Ai Ni A Ga Madat Mara Nga Mu ngu ai lawk hpe yu u.)

15 Yehowa gaw shi a Kasha hpe Hkristan hpung a Uphkang Madu hku nna lit ap da ai. (Kolose 1:13) Mungkan ga ntsa nga ai Karai Kasang a masha ni hpe wenyi malu masha madi shadaw ya na matu, Yesu gaw ‘sadi dung ai hte myitsu ai mayam’ hpe lit ap da ai. (Mahte 24:45-47) Yehowa Sakse Ni a Uphkang Hpung gaw, ‘sadi dung ai hte myitsu ai mayam’ hku nna magam gun nga ai ni re. Tsa ban langai na Hkristan hpung zawn, ya aten na myitsu salang ni mung Uphkang Hpung kaw nna, lam matsun ni hpe ading tawk (sh) hpung kawan salang ni kaw nna lu la ma ai. Anhte langai hpra gaw Hkristan myitsu salang ni a ahkang aya hpe hkungga ai hku nna Yehowa hpe madat mara ga ai.​—1 Htesaloni 5:12; Hebre 13:17 hpe hti u.

16. Myitsu salang ni gaw gara lam hku nna chyoi pra ai wenyi hte aya tang hkrum ai kun?

16 Myitsu salang ni hte magam tau ni gaw n hkum tsup ma ai. Anhte zawn shanhte hta mung gawng kya ai lam ni nga ai. Raitim, hpung a wenyi lam ngang kang hkra karum ya na matu, myitsu salang ni hpe kumhpa hku nna Yehowa jaw da ai. Myitsu salang ni hpe chyoi pra ai wenyi hte aya tang da ai. (Kasa 20:28) Gara hku nna kun? Shanhte gaw, Karai Kasang a chyoi pra ai wenyi lam matsun hte ka da ai Chyum Laika kaw lawm ai atsam ningja ni hpe shawng nnan nga hkra galaw ra ai. (1 Timohti 3:1-7, 12; Titu 1:5-9) Dai sha n-ga, hpunau langai hpe myitsu salang aya tang na matu, shi a atsam ningja ni hpe myitsu salang ni dawdan ai shaloi, Yehowa a chyoi pra ai wenyi lam matsun ya na matu akyu hpyi ma ai.

17. Hpung a lit ni gun hpai ai shaloi, Hkristan nauna ni gaw kalang lang hpa majaw baw magap ra ai kun?

 17 Hpung hta, magam hkrumzup hpawng woi awn ya ai myitsu salang ni hte magam tau ni n nga ai aten ni mung nga chye ai. Dai shaloi, hkalup hkam ngut sai kaga hpunau ni gaw lit la mai ai. Shanhte mung n nga yang, machye machyang nga ai Hkristan nauna ni lit la mai ai. Raitim, hkalup hkam da ai hpunau langai gun hpai ai lit hpe nauna langai lit la ai shaloi, baw magap ra ai. * (1 Korinhtu 11:3-10) Dai zawn baw magap ai gaw, nauna ni hpe shagrit kau ai n re. De a malai, dinghku hte hpung hta Yehowa a woi awn ai lam hpe hkungga ai lam madun ai re.

AHKANG AYA LU AI ASUYA NI HPE HKUNGGA AI LAM

18, 19. (a) Roma 13:1-7 hta lawm ai npawt tara ni hpe gara hku sang lang dan na kun? (b) Asuya ahkang aya nga ai ni hpe hkungga ai lam gara hku madun na kun?

18 Jet ai Hkristan ni gaw Roma 13:1-7 (Hti u.) hta lawm ai npawt tara ni hpe sharawng awng let hkan sa ma ai. Dai Chyum daw kaw lawm ai, “daru magam ahkang aya lu ai ni” gaw mungdan asuya ni hpe tsun ai re. Yehowa ahkang jaw da ai aten laman, shinggyim asuya ni gaw shim lum ai lam ramdaw nga na matu hte, mung masha ni a akyu galaw ya na matu shakut nga ma ai. Anhte gaw upadi hpe madat mara ai hku nna asuya ni hpe hkungga ai lam madun ga ai. Anhte jaw ra ai hkansi ni hpe jaw ga ai. Asuya hpyi shawn ai laika ni hpe tang shawn ra ai shaloi, tup hkrak jaw hkra ka ya ai. Dai sha n-ga, anhte hkum nan, anhte a dinghku, anhte madu ai arung arai, anhte a hpaga bungli ni hte seng ai asuya upadi ni hpe mung hkan sa ga ai. Raitim, Karai Kasang a ga hpe n madat na matu asuya ni hpyi shawn wa yang hkan sa na n re. Dai hku galaw na malai, moi prat na kasa ni zawn “Masha ga madat na hta, Karai Kasang a ga mahtang grau madat na ga ai” nga nna tsun ma ai.​—Kasa 5:28, 29; “ Kade A Ahkang Aya Hpe Ngai Madat Ra Na Kun?” ngu ai lawk hpe yu u.

 19 Anhte a tsun shaga ai lam hku nna mung, asuya ni hpe hkungga ai lam madun ga ai. Kalang lang, asuya ni hte ading tawk matut mahkai ra ai aten ni mung nga ai. Kasa Pawlu gaw Herod Agripa Hkawhkam, Hpestu Hkawhkam zawn re ai ahkang aya nga ai ni hte tsun shaga wa ai. Shanhte gaw mara kaba galaw ai ni raitim, Pawlu gaw shanhte hpe hkungga let tsun shaga wa ai. (Kasa 26:2, 25) Anhte tsun shaga ra ai masha gaw, ahkang aya kaba ai gumsan magam raitim, ahkang aya nau n nga ai balik raitim Pawlu a kasi hpe anhte kasi la ai. Jawng hta Hkristan ramma ni gaw sara, sara ma ni hte kaga amu gun ai ni yawng hpe hkungga ai lam madun na matu shakut ma ai. Anhte a makam masham hpe ra sharawng ai ni hpe sha n-ga, anhte hpe ninghkap ai ni hte tsun shaga ra ai shaloi mung hkungga ai lam madun ga ai. Anhte gaw hkungga chye ai ni re ai hpe Yehowa Sakse n re ai ni chye wa hkra shakut ra ai.​—Roma 12:17, 18 hpe hti u; 1 Petru 3:15.

20, 21. Ahkang aya hpe hkungga ai kaw nna lu la ai shaman chyeju nkau mi gaw hpa ni rai kun?

20 Kasa Petru gaw “Nlang hte hpe hkungga lara di mu” nga nna ka wa ai. (1 Petru 2:17) Dai majaw, hkungga ai lam hpe galoi raitim madun ga. Masha ni gaw shanhte hpe anhte hkungga ai lam chye wa ai shaloi myit hta matsing mat ai. Raitim, hkungga lara ai lam hpe ya aten hta n mu lu ai daram re. Dai majaw, hkungga ai lam madun ai gaw Yesu a ndai matsun hpe hkan sa ai hte bung ai: “Masha ni gaw nanhte a kaja ai bungli mu lu nna, sumsing lamu e nga ai nanhte a Kawa hpe shagrau sha-a lu mu ga, shanhte a man e nanhte a nhtoi hpe htoi tu shangun da mu law.”​—Mahte 5:16.

21 Ndai mungkan hta myit masin kaja ai ni gaw wenyi nhtoi hpe mu lu nna lau la hkrum ma ai. Dai majaw, dinghku hta, hpung hta, masa amyu myu hta hkungga ai lam madun ai gaw, anhte hte arau Karai Kasang hpe nawku na matu masha ni hpe lau la lu na re. Dai gaw grai kaja ai lam n re i? Dai zawn n byin wa yang pyi, teng sha byin na lam langai nga ai. Masha ni hpe hkungga ai lam gaw, Yehowa Karai Kasang ra sharawng ai lam rai nna, shi a n-gaw nwai ai tsawra myit hta a nga nga na matu karum ya ai. Dai hta grau ai shaman chyeju nga sana n re.

^ စာပိုဒ်၊ 17 Laika man 209-212 hta na Bungjat Daw hta ndai npawt tara hpe tatut hkan sa mai ai lam nkau mi madun da ai.