Content de lai

Malawm Ni Hpe Lai U

 DAW 3

Yehowa Hpe Kam Sham Ai Rahab

Yehowa Hpe Kam Sham Ai Rahab

Yerihko ngu ai mare gaw Hkanan mung hta na mare kaba langai re. Dai hta nga ai masha ni gaw, Yehowa hpe nkam sham ma ai. Rahab ngu ai numsha mung, dai mare kaw nga ai. Dai mare hta anhte du nga ai ngu myit yu u.

Rahab gaw naw kaji ai aten kaw na, Mawshe Nawng Hkyeng Hka hpe, lahkawng brang ga hkra galaw ai lam, Israela masha ni hpe, Egutu mung kaw na woi awn sa wa ai lam hpe na ga ai. Shanhte a hpyen ni hpe awng dang na matu, Yehowa karum ya wa ai lam ni hpe mung na ga ai. Ya, Yerihko mare makau kaw Israela masha ni du nga ai hpe mung shi na ai.

Yehowa hpe Rahab kam sham ai majaw kin-yu ni hpe makoi ya

Lani mi hta, Israela masha marai lahkawng gaw, Yerihko masha ni nchye hkra Yerihko mare de lagu sa ma ai. Dai hku galaw ai ni hpe, kin-yu ngu shaga ma ai. Shan yan gaw Rahab nta de sa wa ai. Rahab gaw shan hpe nta kata de shaga la ai. Dai shana jang Yerihko mare na hkawhkam wa gaw, mare kata hta kin-yu ni du wa nna, Rahab nta de shang mat ai hpe chye mat ai. Dai majaw kin-yu ni hpe rim na matu, masha dat dat ai. Rahab gaw kin-yu ni hpe, shi nta numgaw ntsa hta makoi da nna, hkawhkam dat dat ai ni hpe: ‘kin-yu ni du wa ma ai, raitim bai pru mat wa sai. Ya jang hkan yang, naw dep na re’ ngu tsun dat ai. Rahab hpa majaw kin-yu ni hpe makoi da ya ai kun?— Yehowa hpe kam sham nna, Yehowa gaw Israela masha ni hpe Hkanan mung jaw na lam, shi chye da ai majaw re.

Kin-yu ni Rahab a nta kaw na npru shi yang, Yerihko mare jahten hkrum ai shaloi, shi hte nta masha ni hkye la hkrum na ngu ga sadi jaw da ai. Raitim Rahab hpa galaw ra na kun?— ‘Ndai sumri ahkyeng hpe hkuwawt hku hta gyit noi da u. Rai yang na nta kaw nga ai masha ni yawng, hkye la hkrum na re’ ngu kin-yu ni tsun ai. Shanhte tsun ai hte maren Rahab galaw ai. Hpa naw byin na hpe ma ni chye ai i?—

Rahab hte shi nta masha ni hpe Yehowa hkye la ai

Kade n na yang Israela masha ni, Yerihko mare hpe asim sha kawai ma ai. Lani mi hta kalang, kru ya tup dai mare hpe kawai ma ai. Sanit ya nhtoi hta gaw, sanit lang kawai ma ai. Dai hpang shanhte yawng nsen kaba hte marawn ma ai. Dai shaloi Yehowa gaw mare bunghku ni yawng, run hkrat mat hkra  galaw dat ai. Raitim, hkuwawt hku hta, sumri hkyeng gyit jahkrat da ai nta gaw, nrun mat ai. Ndai sumla hta mu ai i?— Rahab hte nta masha ni hkye la hkrum ai.

Rahab kaw na hpa sharin la mai ai rai?— Yehowa galaw ai mauhpa amu law law hpe Rahab na ga ai majaw, shi hpe kam sham ai. Anhte mung Yehowa galaw ai mauhpa amu ni hpe, sharin la ra ai. Ma ni mung Yehowa hpe Rahab zawn kam sham ai i?— E, dai hku kam ai gaw grai kaja ai.

Chyum Laika Hta Hti Yu U

  • Yawshu 2:1-24; 6:1-5, 14, 15, 20-25

  • Hebre 11:31