Content de lai

Malawm Ni Hpe Lai U

 DAW 1

Anhte Chye Mayu Ai Makoi Magap Da Ai Lam

Anhte Chye Mayu Ai Makoi Magap Da Ai Lam

Ma ni e, marai langai ngai gaw kaga masha ni hpe ntsun dan ai lam langai ngai ma ni hpe tsun dan ga ai i?— * Dai hpe makoi magap da ai lam ngu tsun ai. Hpa majaw nga yang dai hpe kadai mung nchye ai majaw re. Chyum Laika hta, Karai Kasang kaw na sa ai, grai ahkyak ai “makoi magap da ai lam” hpe tsun da ai. Dai lam hpe lamu kasa ni pyi, chye mayu ai. Nang mung dai makoi magap da ai lam hpe chye mayu ai kun?—

Lamu kasa ni gara lam hpe chye mayu ma ai kun?

Moi shawng de, la sha hte num sha hpe Karai Kasang hpan da ai. La sha na mying gaw Adam, num sha na mying gaw Ewa re. Karai Kasang gaw, shan yan hpe grai tsawm ai Edin sun hta, nga shangun ai. Adam yan Ewa Karai Kasang a ga madat na nga yang, shan yan hte kashu kasha ni yawng, mungkan ting hpe dai sun zawn, grai tsawm ai hparadisu byin wa hkra galaw lu na re. Dai Hparadisu hta, shanhte yawng htani htana nga lu na re. Raitim, Adam yan Ewa hpa galaw wa ai hpe ma ni chye mayu ai i?—

Adam yan Ewa Karai Kasang a ga n madat ma ai. Dai majaw, ya anhte hparadisu hta n nga lu ai re. Raitim, Karai Kasang gaw mungkan ting hpe, grai tsawm hkra bai galaw ya na, nga nna ga sadi jaw da ai. Dai hta anhte yawng, grai pyaw let htani htana nga lu na. Shi dai hpe gara hku galaw ya na kun? Shaning law law dai hpe kadai mung nchye ma ai. Dai majaw makoi magap da ai lam ngu tsun ai.

Yesu mungkan ga ntsa hta nga ai shaloi, dai makoi magap da ai lam hpe masha ni hpe tsun dan ai. Dai gaw Karai a Mungdan lam re. Karai a Mungdan du wa na matu, akyu hpyi mu nga nna Yesu tsun ai. Dai mungdan gaw mungkan ga hpe, grai tsawm ai hparadisu byin hkra galaw ya na.

Ndai makoi magap da ai lam hpe ma ni chye lu ai majaw n pyaw ai i?— Yehowa a ga madat ai ni sha, Hparadisu hta nga lu na. Chyum Laika hta Yehowa a ga madat ai masha law law a lam tsun da ai. Shanhte a lam chye mayu ai i?— Shanhte gaw kadai ni kun? Shanhte hte bung hkra gara hku galaw ra na hpe hti yu ga.

Chyum Laika Hta Hti Yu U

  • Kolose 1:25

  • 1 Petru 1:12

  • Ningpawt Ninghpang 1:26-28; 2:8, 9; 3:6, 23

  • Mahte 6:9, 10

  • Shakawn Kungdawn 37:11, 29

^ စာပိုဒ်၊ 3 Gasan nkau mi hpang hta, ndai zawn mahkret (—) hpe mu yang, lachyum gaw chyahkring mi hkring nna, ma ni hpe mahtai jaw shangun na matu re.